2 Kɔlɛŋte 7 - Eka Eswhī

¹ Mepɔŋ mesoó pá, Ndém a le laʼnē á lelāʼ ŋghʉ̄ menu muɔ mɛ́t ntsem á mbū pímpɛ. Púp, ḿpɛ méŋwɛ̄t e esōk epe ntsem á mbe nnɛ̄t pímpɛ, mbɔɔ á ntē pímpɛ, ŋ́kāk ete á legɔ̄ té alɔ́ʼ, ńnɔŋ njúʼu nchu Ndém.

Ŋgɔŋ e é ega mbɔ̄ŋɔ á Pɔ́ɔl

² Pɛ eghʉ̄, pek ewɛ̄ á ajʉʼ á ntē pɛ. Pek kɛ te fā anu á mbū ŋiŋ ɛ́. Pek te ghʉ̄, ŋiŋ á fhó ánɛ mɛnzhɛ Ndém ntúɔ́. Pek te pɔ̄p á ŋiŋ, ŋ́kú ajūɔ zí í.

³ Meŋ te ndʉ́ɛ́ páʼa, ńdɔkɔ nthúɔ amɔ̄ʼ alɔ́ʼ ánɛ pɛ ɛ́. Meŋ ndē ndáʼ eshúŋ á wɛ́, anu zɛ́ á ntē pek tɛ ŋgɔ́ yīi, pek zi nnɔ̄ŋ ŋkwhʉ́ kwhʉʉ́, kɛ á lenāŋ á ŋgɔŋ lɛ́, pek ekɔ̄ɔŋ á wɛ́ kɔŋ.

⁴ Meŋ á si mbúu ntémɛ nzem za ŋgyáa mé pɛ, ńnɔŋ ŋkáka tɛʼ melaʼ mɛ́, ntē gá é nɔŋ mbúu eswítɛ tɛʼ. Ntē gá é si mbúu ŋkáka tɛ nzíʼɛ ndhʉ, tɛ mbɔɔ páʼ pek ke nɔ̄ŋ njʉ́ɔ á ntií ntiī ŋgʉɔ̄ʼ.

⁵ Á lɛ, pek le gʉ̄ɔ tɛ ŋkó á tésɔŋ Maseduan páʼā, ḿbú te wɛ̄ njhʉ̄ á lelɔk nzwītɛ ɛ́, ŋgʉɔ̄ʼ é pú eshʉ̄ʼ á mbū pek á ŋkɔʼɔ́ ŋkɔʼɔ́. Epuɔ é nɔŋ ndʉɔ́ʼɔ á wék, ntē wék é nɔŋ te ŋímnɛ nnáŋa á.

⁶ Táʼ, Ndém, páʼ a switeé ntē epuɔ pīi, anu á tsya á wɔ́p lā, a le gē eswíte ntē wék, ŋ́ghʉ̄, Tíit á shʉʼ tɛ ŋkó ega.

⁷ Yí á leshʉʼ ndaʼ, mé lɛ te swíte ntē wék ɛ́, ntē wék é le zéŋ ŋ́ge eswíte, á gɔ́ páʼ, a á shúŋ á wék páʼ, pɛ le swité eyí ntē épúp. A le shúŋ á wék páʼ, pɛ é si mbúu ntsáa á lezēŋ njʉ́ɔ á gá épúp. Éshúŋ á wék páʼ pɛ é si mmēkɛ ánɛ anu zá épúp, mbɔɔ páʼ pɛ é si ŋkhʉ́nɛ á lelhʉ athū zá épúp. Meŋ júʼ épúp, ḿbú nzéŋ ntswīʼne ŋ́kák tɛʼ.

⁸ A zi ŋgɔ́ éyi, azi amɔ̄ʼ akɛtte zīi meŋ nde tí á mbū pɛ, á le ghʉ̄ʉ̄, pɛ mēek, mbɔ ntē gá é té si ŋŋāka á gá melaʼ épúp ɔ́. Meŋ nde jʉ́ɔ́ páʼ akɛtte mɛ́t, á ghʉ, pɛ náʼ mmēk ánɛ méŋ afʉʼ, ńjʉ́ɔ épúp, ntē gá é ŋak á gá.

⁹ Meŋ ké ŋgɔ́ tsetsɔŋɔ, ńnɔŋ ŋgáŋtɛ, á ké te páʼ meŋ nde ghʉ̄ʉ̄, pɛ mēek ɛ́. Á gɔ́ áa melaʼ páʼ, lemek mɛ́t, á le ghʉ̄ʉ̄, pɛ egɔ nnɛ̄t zɛ, ŋ́gwáʼ atswhī tepɔŋ zɛ́. Pɛ le ge emek páʼā, á gɔ́ áa páʼ Ndém a á kɔŋ épúp. Ńdɔkɔ ŋ́gɛ, á mbū pek, mbɔ pek lɛ te fā amɔ̄ʼ anu á mbū pɛ ɛ́.

¹⁰ Ŋiŋ a gē emeke, á gɔ́ páʼ Ndém mé kɔŋ páʼā, a te ndɔ̄kɔ efāʼa ŋ́gɛ, ntē ŋgaŋ, e eŋāk á yí í, ńdɔkɔ efāʼa ŋghʉ̄ áa lɛ, lemek mɛ́t a eghʉ̄, ŋgaŋ a egɔ̄ nnɛ̄t zi, ŋ́gwáʼ atswhī tepɔŋ zí, a eláʼ ŋghʉ̄, a etswɛ́t. Ŋiŋ a piŋɛ mmēk ánɛ ntií zīi, epuɔ ŋgɔŋ puɔ é lɔkɔ mmēkɛ, mbɔɔ ŋgaŋ a lē ŋkwhʉ́ ndáʼne á ndo ŋgia.

¹¹ Pɛ eké mbīŋ njʉ́ɔ ajū mīi, lege meke, mbɔ Ndém mé kɔŋ, á ke ghʉ̄ ánɛ pɛ: á ke ghʉ̄ʉ̄, pɛ te zéŋ eféŋ alɔ́ʼ ŋiŋ ɛ́. Ŋ́ghʉ̄, pɛ egákne mvéŋ mefa mɛ́. Ŋ́ghʉ̄, esē é kú á wɛ́ ánɛ menu mīi, pɛ ke fʉʼtēē. Ŋ́ghʉ̄, pɛ ecɔʼ apiŋ ŋghʉʉ́‑menu mɛ́. Ŋ́ghʉ̄, pɛ etsá á lezēŋ njʉ́ɔ á gá. Ŋ́ghʉ̄, pɛ ekhʉ́ne á leghʉ afaʼ Ndém. Ŋ́ghʉ̄, pɛ ekɔ̄ɔŋ á letswā ŋiŋ ŋgʉɔ athʉ́ lepé. Pɛ ke tswī ánɛ meshhʉ̄ metsem á légɛ, pɛ lɛ á ntē anu mɛ́t páʼā, ŋ́gɔ́ áa ndendem.

¹² Meŋ ndɛɛ́ te ntíi akɛtte páʼā, melaʼ ŋiŋ yīi, a le fā ā, meŋ te ntií melaʼ ŋiŋ yīi, mɛ́ le fā á mbū yí í. Meŋ ndɛɛ́ ntíi, ńdɔ̄kɔ efāʼa áa letswi á wɛ́ ndeŋ ndeŋ, á mvhɔ Ndém á légɛ, pɛ kɔɔ̄ŋ á wék mé taʼ ntē.

¹³ Á si ŋgɔ́ ajū mīi, á le ghʉ̄ʉ̄, ntē wék é swíte. Ntē wék é lɛ te swíte ndaʼ á, é le zéŋ mbúu ŋgáŋte páʼ, pek le jʉ́ɔ̄, Tíit á nɔŋ ŋkáka melaʼ mīi, pɛ metsem é le pú eswíte ntē yí.

¹⁴ Meŋ nde lɔ̄k á wɛ́ ŋkāʼte á mvhɔ yí, pɛ ké te ghʉ̄, esē é kú á gá á. Páʼ pek kɛ efʉʼ metsem, éshúŋ á wɛ́ áa anuúnē lā, ajū mīi pek ke lɔ̄k ndɔk á wɛ́ ŋkāʼte á mvhɔ Tíit, á ke zéŋ ntó áa anuúnē.

¹⁵ A á si ŋkímtɛ páʼ pɛ metsem, é kuʼteé menu mīi a ke shúŋ á wɛ́, mbɔɔ páʼ pɛ le gē ekókne á yí, ńnɔŋ ncɔ̄ʼɔ, ńnɔŋ mvɛ̄tɛ lɛ lák lak lak. Ŋ́kímte épúp, ŋkɔŋne zīi a wɛɛ̄ ánɛ pɛ, é nɔŋ ntswīʼnɛ efáŋ faáŋ.

¹⁶ Meŋ á si mbúu ŋkáka melaʼ mīi, meŋ á zhɛ́ á légɛ, meŋ gɔ esáŋ ánɛ pɛ, ánɛ ajūɔ tsem.