2 Kɔlɛŋte 6 - Eka Eswhī

¹ Páʼ pek a Ndém mé si mbútɛ ŋghʉɛ afaʼ lā, pek é si swíŋtɛ á wɛ́ ŋ́gɛ, ndɛ́ʼ pɛ elɔ̄ɔk apɔŋɔ́ ntē te ndhʉ zīi, Ndém a le néŋ á ntē pɛ, ŋ́ghʉ̄ mega.

² Ndém yí méŋwɛ̄t a leé á ntē aŋwaʼne yí ŋ́gɛ: «Afʉʼ á le náŋ tɛ ŋkūʼ, ázi meŋ gɔ á ŋghʉɛ́ anu mbɔŋ ánɛ wu, meŋ ejúʼ aswiŋte jú. Afʉʼ á le náŋ tɛ ŋkūʼ, ázi meŋ gɔ eghʉ o etswɛ́t, meŋ shʉ̄ʉʼ ntswíte á wú. » Pek ké nzhɛ́ á légɛ, afʉʼ zīi Ndém a gɔ á ŋghʉɛ́ anu mbɔŋ ánɛ pɛ, a ajʉɔ páʼa. Tsetsɔŋɔ á si ŋgɔ́ afʉʼ zīi Ndém a gɔ eghʉ, pɛ etswɛ́t.

³ Pek te si ŋkɔ̄ŋɔ á leghʉ tsɔ azō, tɛ ŋgɔ́ yīi, á gɔ etshóne á ŋiŋ, ńnéŋ á ntē mefa á, ńdɔkɔ efāʼa ŋ́gɛ, ndɛ́ʼ ŋiŋ, á jʉ́ɔ ajū mīi, a gɔ elɔ̄ɔk nthú alɔ́ʼ, ánɛ afaʼ zék.

⁴ A cʉ́ʼɛ épúp, mbɔ pek méŋwɛ̄t é si ntswīi á légɛ, pek é si ŋgɔ́ megaŋ afaʼ Ndém, ánɛ ajūɔ tsem zīi, pek ghʉɛ. Ńdɔ̄k á wék á lekak ete, á afʉʼ zīi, pek é ntē ŋgʉɔ̄ʼ, á afʉʼ zīi, mɛ́ é si ndʉɔ́ʼɔ á wék, mbɔɔ afʉʼ zīi, pek é ntē atapne, tɛ́ ntswī.

⁵ Ńdɔ̄k á wék á lekak ete, á afʉʼ zīi, mɛ́ é si ntswáa á wék, á afʉʼ zīi, pek é ŋgyā atʉɛ́, mbɔɔ afʉʼ zīi, mɛ́ swite alāʼ ŋ́gɛ, a elʉɔ́ʼ á wék, tɛ́ ntswī. Ńdɔ̄k á wék á lekak ete, á afʉʼ zīi, pek é si ŋkáa, á afʉʼ zīi, pek te wɛ̄ njhʉ̄ á lelɔk ndí í, mbɔɔ á afʉʼ zīi, pek te wɛ̄ njhʉ̄ á lelɔk mpfɛ́t azō ɔ, tɛ́ ntswī.

⁶ Ńdɔ̄k á wék á lelʉɔ̄ʼte ajū mīi, á gɔ etsēŋte á wék, ńdɔ̄k á lezhɛ̄ azō, ńdɔ̄k á lekwɛ̄t ntē, ńdɔ̄k ntē mbɔŋ, tɛ́ ntswī. Ńdɔ̄k á Azwakne Ndém páʼ á ntē pek lā, ńdɔk á wék á lekɔŋ epuɔ té sɛt nzem, tɛ́ ntswī.

⁷ Ńdɔ̄k anu zīi, pek shúŋɔ á gɔ́ anuúnē, ńdɔ̄k mete Ndém, tɛ́ ntswī. Ńdɔ̄k ewek tsitsi ncu, á lelɔk nták, mbɔɔ á lelɔk ndhʉ̄ athū zék ánɛ mɛnzhɛ ndeŋ ndeŋ, tɛ́ ntswī.

⁸ Ńtswī á légɛ pek é megaŋ afaʼ Ndém, á afʉʼ zīi mɛ́ é si ŋghʉ̄ɛ mekuʼ mék, mbɔɔ ánɛ afʉʼ zīi mɛ́ é si ŋgwáka á wék. Ńtswī épúp, á afʉʼ zīi mɛ́ zɔtɛ á wék, mbɔɔ ánɛ afʉʼ zīi, mɛ́ é si ŋgūʼtɛ á wék. Ńtswī épúp mbɔɔ ánɛ afʉʼ zīi, mɛ́ é si ndɔ̄kɔ á wék ntɔ́ŋɔ wɔ táŋ‑mela, pek ké nnɔ̄ŋ eshúŋɔ áa anuúnē.

⁹ Ńtswī épúp afʉʼ zīi, mɛ́ é si ŋghʉ̄ɛ páʼ, mɛ́ té si nzhɛ́ɛ á wék ɛ́ lā, ŋ́ké nnɔŋ nzhɛ́ɛ á wék zhɛ́. Ńtswī épúp ánɛ afʉʼ zīi, mɛ́ é si ndɔ̄kɔ á wék ntɔ́ŋɔ apfhō azō, káʼā pek ké ŋgɔ́ epuɔ mete. Ńtswī épúp ánɛ afʉʼ zīi, mɛ́ é si ndɔ̄kɔ ŋgʉɔ̄ʼ, ŋ́gɔ̄ʼɔ á wék, pek ké te ŋkwhʉ́tɛ ɛ́.

¹⁰ Mɛ́ kwaāŋ ŋ́gɛ, pek é si mmēkɛ azō, káʼā, pek é piŋ ŋgɔ́ áa ánɛ lekāk efʉʼ metsem. Mɛ́ kwaāŋ ŋ́gɛ, pek é wɔ te kuʼ ánɛ azō, káʼā, pek ké mbīŋ nnɔŋ ŋghʉ̄ɛ, epuɔ tɛ nzáne, é wiɛ lewūʼ. Mɛ́ kwaāŋ ŋ́gɛ, pek te azō wɛ, káʼā, pek pīiŋ ŋgwɛ̄ etsō tsem.

¹¹ Pɛ epuɔ Kɔlɛŋte, mépɔŋ mesoó pék, pek ke pú ntsɔ́ʼ ntē wék ntshí, éshúŋne á mbū pɛ esia esia.

¹² Pek kɛ te néŋ té kɔŋ á wɛ́ ɛ́, pɛ mé kɛ te véŋ á letsɔ̄ʼ ntē wɛ́ ntshí á mbū pek ɛ́.

¹³ Meŋ shúŋnɛ á mbū pɛ, páʼ meŋ shúŋnɛ á mbū ewɔŋkhʉ̄ pá lā. Pɛ etsɔ́ʼ apiŋ ŋkɔŋne zék, ḿbú ntsɔ́ʼ ntē wɛ́ ntshí á mbū pek.

Ndɛ́ʼ epuɔ Yɛɛ́so é fʉʼne wɔ te véŋ‑Ndém

¹⁴ Ndɛ́ʼ pɛ a wɔ te véŋ‑Ndém é kwɛ́t nnɔ. Ajū mīi á ndeŋ ndeŋ pɔ́ azi alɔ́ʼ á éwú, á gɔ eghʉ̄ʉ páʼ lā, ŋ́gɔ́ nnɔ ɔ́? Ŋkaʼ pɔ́ nzém é gɔ eghʉ̄ʉ páʼ lā, ŋ́kwɛ́t nnɔ ɔ́?

¹⁵ Klísto pɔ́ Beliaa é gɔ eghʉ̄ʉ páʼ lā, ńjúʼne é? Ŋiŋ Yɛɛ́so pɔ́ te véŋ‑Yɛɛ́so é gɔ́ eghʉ̄ʉ páʼ lā, ŋ́gɔ́ á taʼ nchu ū?

¹⁶ Ŋgyā Ndém pɔ́ mesī é te azō wɛ. Ḿpɛ mé si ŋgɔ́ ŋgyā Ndém yīi, a naáŋ ntē lā, yí méŋwɛ̄t á le lé ŋ́gɛ: «Meŋ a shʉʼ enáŋ á tsetsɛlɛ pɔ́p, pek a pɔ́p e egɔ́ nnɔ. Meŋ egɔ́ á Ndém wɔp, pɔ́ egɔ́ epuɔ alāʼ pá. »

¹⁷ Melaʼ épúp tɛ́, Atsyapuɔ a le zéŋ ndé ŋ́gɛ: «Pɛ efhó á tsetsɛlɛ wɔ te véŋ‑Ndém ntó, ndɛ́ʼ pɛ a pɔ́p é zéŋ ŋgɔ́ nnɔ. Ndɛ́ʼ pɛ epfēeŋ ajū mīi, epe é éwú, meŋ mbiŋ ŋkókne á wɛ́. »

¹⁸ Atsyapuɔ ŋgaŋ mete ntsem, a le zéŋ ndé ŋ́gɛ: «Meŋ a shʉʼ egɔ́ á mbū pɛ, égɔ́ á Mɔʼɔ́ wɛ, pɛ egɔ́ á mbū meŋ, ŋ́gɔ́ ewɔŋkhʉ̄ pá epi mbaŋa, mbɔɔ epi wɔnzwí. »