2 Kɔlɛŋte 5 - Eka Eswhī

¹ Ḿpɛ é si nzhɛ́ɛ á légɛ, ntap zīi ḿpɛ naáŋ éwú, á esī atsetsáʼ ega, meŋ ndɔkɔ ndʉ́ɛ́ mbe nnɛ̄t zímpɛ, e táka, mbɔ Ndém a a shʉʼ eyá ezi ndɛʼɛ, á athʉ́ lephū, e egɔ́ ezi, ŋiŋnɔŋ mé ka lɔ̄k mbū mí ŋghʉ̄ ɛ́. Ejʉɔ ntap mɛ́t, e te ndáʼa ntáka á.

² Ḿpɛ é tsetsɔŋɔ ndāa, ńnɔŋ nchʉ́ɛ nnɛ̄t esʉ́ɛ́ ŋ́gɛ, Ndém a eyá á yímpɛ mbe nnɛ̄t eswhī, á athʉ́ lephū.

³ Eziɛ́ mbe nnɛ̄t e nɔŋ ŋkáptɛ á yímpɛ, ḿpɛ é le gɔ́ á mvhɔ Ndém, ŋ́gɔ́ atseŋ te nzhó ɔ́.

⁴ Á anuúnē, ḿpɛ pīi ḿpɛ é naŋteé á ntē mentap muɔ á esī atsetsáʼ ega, menu é si eswɛ́tɛ á yímpɛ, ḿpɛ nɔ̄ɔŋ ntswīɛ̄. Táʼ, á ké te ndɔ̄kɔ ŋ́gɛ, ḿpɛ é si ŋkɔ̄ŋɔ á lefhō á ntē mentap mɛ́t ntúɔ́. Ḿpɛ é si ŋkɔ̄ŋɔ áa lekō á ntē mentap ndɛʼɛ, tɛ́ ajū mīi á naáŋ á lemiʼɛ, a kápte á azi á gɔ ekwhʉ́.

⁵ Ndém mé le kɔ̄ŋ ŋ́gɛ, yí e láʼ eghʉ épúp á mbū pímpɛ, yí mé neéŋ Azwakne zí á ntē pímpɛ, ńdɔkɔ ntswī á légɛ, ŋkwa ecū mīi, a le laʼnē á leyā mé pímpɛ, a a láʼ eyá.

⁶ Púp, ḿpɛ é efʉʼ metsem, ńnɔŋ mbúu ŋkāka ete, ŋ́ké nnɔŋ nzhɛ́ɛ á légɛ, ḿpɛ náŋa nnáŋa áa me mbe nnɛ̄t jʉɔ, mbɔ ḿpɛ e náŋa egáne gané, égɔ́ á ŋgia sisia á lekō á lezēŋ Atsyapuɔ.

⁷ Ńdɔkɔ ndʉ́ɛ́ ŋ́gɛ, ḿpɛ te lɔ̄k ajū mīi, ḿpɛ é si njʉ́ɔɔ mé menēk tɛ́ nnáŋ á, ḿpɛ lɔɔ̄k áa lefɛ̄ nnɛ̄t ŋgyá mé Ndém, tɛ́ nnáŋ.

⁸ Á épúp, ḿpɛ é si mbúu ŋkāka ete, ńnɔŋ njʉ́ɔ ŋ́gɛ, á mbɔŋ á lefhō ánɛ mbe nnɛ̄t jʉɔ ntó, ŋ́gʉɔ nnáŋ á lezēŋ Atsyapuɔ.

⁹ Ḿpɛ é si ŋké ntsáa áa leghʉ ajū mīi, a pɔŋ á yí, tɛ a láʼa ŋgɔ́ éyi, ḿpɛ e fhó ánɛ mbe jʉɔ etó, kɛ ḿpɛ ezɛ́t enáŋ éwú lɛ́,

¹⁰ melaʼ mīi, ḿpɛ metsem, e láʼ etshí á mvhɔ Klísto, a ezáʼ ntsaŋ zímpɛ. Éfhó ánɛ mefaʼ mīi, awíɛ awíɛ a le zɛ́t á esī atsetsáʼ ega, ŋ́ghʉ̄ɛ, kɛ emi mbɔŋ lɛ̄ɛ, kɛ emi tepɔŋ lɛ̄ɛ, ńzápa azí anu á alá apū yí.

Klísto mé nziŋ‑ekém á tsetsɛlɛ epuɔ menɔŋ pɔ́ a Ndém

¹¹ Pek é si nzhɛ́ɛ anu zīi, lewuʼte Atsyapuɔ, á páʼā ndɔkɔ ndʉ́ɛ́, ńnɔŋ efāʼa á leghʉ, tɛ epuɔ menɔŋ é véŋ azɔ́p. Ndém a zhɛɛ́ á wék tɛ ntsékne. Meŋ á kwaŋ ŋ́gɛ, pɛ méŋwɛ̄t é zhɛɛ́ á gá azá tɛ ntsékne, á ntē pɛ.

¹² Pek te si efāʼa á wék á lezēŋ eshúŋ á wɛ́ á légɛ pek é kwaʼ meziŋ‑ntō ɔ́. Pek é si efāʼa á leghʉ, tɛ pɛ lɔ̄ɔk á wék ŋkāʼte, tɛ́ ndɔk ŋkūʼ á wɛ́ á lewɛ anu zīi, pɛ gɔ epwɛ̄ɛt á mbū epuɔ pīi, pɔ́ é si ndɔ̄kɔ páʼ, pɔ́ é épúp ŋkāʼtɛ, pɔ́ té ndɔ̄kɔ páʼ, ntē wɔ́p é épúp ɔ́.

¹³ A gɔ́ éyi pek é metsetseŋ, mbɔ é gɔ́ áa melaʼ Ndém. Ḿbiŋ ŋgɔ́ éyi athū zék á éwú, mbɔ pek lɔkɔ efāʼa áa letswīte á wɛ́.

¹⁴ Ŋkɔŋ te ndhʉ zīi, Klísto a wɛɛ̄ ánɛ pek, mé tshoneé á wék á leghʉ ajūɔ tsem, melaʼ mīi pek é si ncuŋtɛ nzhɛ́ɛ á légɛ, yí ndaʼ mé le kwhʉ́ á athū epuɔ metsem. Epuɔ metsem é tsia épúp, ŋ́kwhʉ́ ánɛ mefa mɔ́p.

¹⁵ A le kwhʉ́ ánɛ athū epuɔ metsem páʼā, ńdɔkɔ ŋ́gɛ, ndɛ́ʼ wɔ náŋ á ndo esī atsetsáʼ, é zéŋ ŋghʉ̄ páʼ pɔ́ kɔŋ. Ŋ́gɛ pɔ́ ecʉ́ʼɛ nzīŋɛ áa ánɛ lekɔŋ ŋiŋ yīi, a le kwhʉ́ á athū pɔ́p, Ndém á ké ŋghʉ̄ á zím ánɛ lewhʉ̄.

¹⁶ Melaʼ épúp tɛ́, tɛ efhó épúp, pek gɛ te nzɛ́t ndɔ̄kɔ ntií zīi, epuɔ menɔŋ é lɔkɔ ncʉ̄ʉ epuɔ, tɛ́ njʉ́ɔ epuɔ menɔŋ ɔ́. Pek lɛ amɔ̄ʼ afʉʼ, ńdɔ̄kɔ áa ntií zīi, epuɔ menɔŋ é lɔkɔ njʉ́ɔ á ŋiŋ, tɛ́ njʉ́ɔ á Klísto. Á piīŋ ŋgɔ́ tsetsɔŋɔ, pek te zɛ́t njʉ́ɔ á yí ánɛ ntií mɛ́t ɛ́.

¹⁷ Ŋiŋ a lɛtneē ánɛ Klísto páʼā, ńcʉ́ʼ á ŋiŋ eswhī, mbɔ nzwiŋ atswhī ŋgaŋ, a á mi. Á cʉ́ʼɛ ŋgwɛ̄ áa atswhī eswhī.

¹⁸ Ndém mé le pú ŋghʉ épúp, á yí yīi, a le zapá ánɛ Klísto, ŋ́ghʉ̄ ḿpɛ a pɔ́p é zéŋ ncʉ́ʼ á taʼ nchu, á tsékne afaʼ á leghʉ pɔ́ a epuɔ menɔŋ é cʉ́ʼ á taʼ nchu, á mbū pek.

¹⁹ Yí méŋwɛ̄t a le zapá ánɛ Klísto, ŋ́ghʉ̄, pɔ́ a epuɔ menɔŋ é cʉ́ʼ á taʼ nchu páʼā, a te zéŋ mefa mɔ́p esáŋ á. Ńtsékne ashuŋne á lelɔk ŋghʉ̄, pɔ́ á epuɔ menɔŋ é cʉ́ʼ á taʼ nchu, á mbū pek.

²⁰ Pek é páʼā ndɔk ŋgɔ́ wɔ mɛmekém Klísto, púp, Ndém méŋwɛ̄t mé nɔŋ nzápa ánɛ pek, ńtɔ́ŋɔ á wɛ́. Pek é swíŋte á wɛ́ ánɛ lezēŋ Klísto, pɛ elɛ ncʉ́ʼ, pɛ a Ndém e ecʉ́ʼ á taʼ nchu.

²¹ Klísto a lɛ á te fa, Ndém á piŋ ŋgyá apiʼ mefa mímpɛ á mbū yí, ńdɔkɔ ŋ́gɛ ḿpɛ elɔ̄k páʼ, ḿpɛ lɛtneē ánɛ Klísto, ńcʉ́ʼ epuɔ ndeŋ ndeŋ á mvhɔ Ndém.