2 Kɔlɛŋte 4 - Eka Eswhī

Ŋiŋ a nɔɔ̄ŋ ŋghʉɛ afaʼ Klísto páʼā, pɔ́ yí mé gɔ́ nnɔ

¹ Púp, páʼ Ndém a le lɔ̄k atsāmezeŋɛ zí, ńtsékne ajʉɔ afaʼ á mbū pek lā, pek te pɔŋté á lezāŋte nnɛ̄t ɛ́.

² Pek le pú ndʉ̄ʼ ajūɔ tsem zīi, mɛ́ kɔ́ŋne kɔŋné tɛ́ ŋghʉ̄, ńdʉ̄ʼ ajūɔ tsem zīi, á gɔ enéŋ esē á athū pek. Pek te si mbɔ̄ptɛ epuɔ ɔ́. Pek te si ŋkúmnɛ anu zīi, ashuŋne Ndém á si ndʉ́ɛ́. A cʉ́ʼɛ épúp, mbɔ pek é si ŋghʉ̄ɛ mɛ́ zhɛ́ɛ anuúnē ndeŋ ndeŋ, ńdɔkɔ efāʼa á leghʉ, epuɔ menɔŋ metsem, é zhɛ́ á légɛ, pek é si ŋgɔ́ epuɔ ndeŋ ndeŋ, á mvhɔ Ndém.

³ A piŋɛ ŋgɔ́ éyi, ŋke mbɔŋ yīi pek tswii, é té si ŋgyáa á lejūʼ ú, mbɔ epuɔ menɔŋ pīi, pɔ́ é ánɛ mɛnzhɛ lepī mé té njúʼ ú.

⁴ Pɔ́ té mvéŋɛ ŋke mɛ́t ɛ́ melaʼ mīi, Sɛ́ta ndém ŋgɔŋ wuɔ, a lē ŋkápte leghi tsɔ́p, ḿbɔ́k ŋkaʼ yīi é fhɔ́ɔ ánɛ ŋke mbɔŋ, á lekɛʼɛ á wɔ́p. Ŋke mbɔŋ é si mbiŋɛ ntswīi páʼ, shʉ́shɔ́k Klísto a á épúp. Mɛ́ jʉɔ́ á Klísto, ńzhɛ́ á légɛ mɛ́ é jʉ́ɔ á Ndém.

⁵ Pek é si ŋgē etswii ŋke mbɔŋ á mbū pɛ páʼā, pek te efāʼa áa leshūŋ á wɛ́ epuɔ pīi, pek é epiɛ́ ɛ́, pek é si ŋghʉ̄ɛ áa lɛ, pɛ ezhɛ́ á légɛ, Yɛɛ́so Klísto a á si ŋgɔ́ á Atsyapuɔ. Ŋ́gɔ́ mé pek, mbɔ pek é si ndʉ́ɛ́ ŋ́gɛ, pek é megaŋ afaʼ pɛ́, melaʼ Yɛɛ́so.

⁶ Púp melaʼ mīi, Ndém yīi a le lé ŋ́gɛ: «Á pɔŋ ŋ́gɛ ŋkaʼ e ekɛ̄ʼɛ ánɛ nzém», yí méŋwɛ̄t mé le zéŋ ŋghʉ̄, ŋkaʼ yí é kɛʼɛ á ntē pek. Ńdɔkɔ efāʼa ŋ́gɛ, pek ezhɛ́ á légɛ, ŋkaʼ mɛ́t é si ŋgɔ́ á shʉ́shɔ́k yi, ńnɔŋ ŋwāŋnɛ ánɛ eshhʉ̄ Yɛɛ́so Klísto.

⁷ Pek é si ŋgɔ́ ajūɔ ndʉne lʉné, páʼ meŋgwʉ́ŋ lā, táʼ, Ndém a le ké ŋghʉ̄, ŋkaʼ yí mɛ́t é kɛʼɛ á ntē pek, á lɔkɔ ntswīi á légɛ, mete te ndhʉ á lelɔk ŋghʉ̄ afaʼ zí, é fhɔ́ɔ á mbū yí, é té efhɔ́ɔ á mbū pek ɛ́.

⁸ Pek é si njʉ́ɔ á ntií ntiī ŋgʉɔ̄ʼ, táʼ, ŋgʉɔ̄ʼ mɛ́t é ké nnɔ̄ŋ te swɛ́tɛ á wék ɛ́. Ńnɔŋ ntāpnɛ, ŋ́ké te páŋne mbū nnáŋ á esī í.

⁹ Epuɔ é si ndʉɔ́ʼ á wék, Ndém á ké nnɔ̄ŋ ŋkáptɛ á wék. Ŋ́gɔ́ amɔ̄ʼ afʉʼ, ńtém ŋkaʼte wék á esī, pek ke te kwhʉ́te.

¹⁰ Mɛ́ é ŋkwa efʉʼ, éfāʼ á lezwhī á wék páʼ mɛ́ le zwhí á Yɛɛ́so épúp, pek ké mbīŋ ŋgɔ́ nte páʼa, tɛ́ epuɔ menɔŋ e ezápa ánɛ pek, ńjʉ́ɔ á légɛ, Yɛɛ́so a á nte.

¹¹ Pek é ndo esī atsetsáʼ ega, ŋ́gɔ́ efʉʼ metsem, ńzápne áa nchu lewhʉ̄ melaʼ Yɛɛ́so. Pek ké ŋgɔ́ nte páʼā, tɛ́ epuɔ menɔŋ é ezápa ánɛ pek, nzhɛ́ á légɛ, Yɛɛ́so a á nte, tɛ́ á piŋ ŋgɔ́ yīi, pek e fú eláʼ ekwhʉ́ kwhʉ́.

¹² Pek é efʉʼ metsem, nzápne áa nchu lewhʉ̄, ńdɔkɔ ntswīi ŋke mbɔŋ. Ewiɛ́ mé si ŋghʉ̄ɛ, pɛ gɔ́ɔ éwú.

¹³ Aŋwaʼne Ndém á leé ŋ́gɛ: «Meŋ ndē efɛ́ nnɛ̄t za ŋgyá á mbū Ndém, melaʼ épúp tɛ́, meŋ shúŋɔ anu zí. » Pek azék, é le fɛ́ nnɛ̄t ŋgyá á mbū Ndém ánɛ ejʉɔ ntií mɛ́t, melaʼ épúp tɛ́, pek shúŋɔ anu zí.

¹⁴ Pek é si ncuŋtɛ nzhɛ́ɛ á mbɔŋɔ́ á légɛ, Ndém, páʼ a le ghʉ̄ʉ̄, Atsyapuɔ Yɛɛ́so á zím ánɛ lewhʉ̄ lā, a a láʼ ezéŋ eghʉ, pek azék, e ezím ánɛ lewhʉ̄, pek a Yɛɛ́so e egɔ́ nnɔ. Éghʉ, pek egɔ́ á lezēŋ yí, pɛ ezéŋ ŋgɔ́ azɛ́ éwú.

¹⁵ Mefaʼ mɛ́t ntsem mīi pek ghʉɛ, mbɔɔ ŋgʉɔ̄ʼ zīi pek jʉ́ɔ, é páʼa, ŋ́gɔ́ áa melaʼ mɛ́, pek elɔ̄kɔ efāʼa ŋ́gɛ, Ndém a ewɛ̄ atsāmezeŋɛ té ndhʉ, ánɛ epuɔ tɛ nzáne. Púp, epuɔ tɛ nzáne, e esyákne á Ndém, ŋ́gūʼte á yí.

Lefɛ̄ nnɛ̄t ŋgyá á mbū Yɛɛ́so, ńdɔk nnáŋ

¹⁶ Melaʼ épúp tɛ́, pek é efʉʼ metsem, ŋ́kāk ete. Azi ŋgɔ́ éyi, mbe nnɛ̄t jʉɔ e é si ncútɛ, éláʼ ekwhʉ́, mbɔ pek ké ŋgɔ́ á ntē pek, ńzhɛ́ á légɛ, pek te e fú ekwhʉ́ ɛ́. Ndém a á eleʼé tsem, ŋ́gyá á wék mete, á lelɔk ŋkúʼte épúp.

¹⁷ Ŋgʉɔ̄ʼ zīi pek é tsetsɔŋɔ njʉ́ɔ, e puú te kūʼ azō, ánɛ mía mía tee nzwiŋ shʉ́shɔ́k te mi yīi, ŋgʉɔ̄ʼ jʉɔ mɛ́t, e cuŋtɛ á mbū pek ɛ́.

¹⁸ Pek te tshí ntē wék ánɛ ajū mīi, mɛ́ é si ndɔ̄kɔ menēk njʉ́ɔ ɔ́, pek tshií ntē wék áa ánɛ ajū mīi, mɛ́ té lɔ̄k menēk njʉ́ɔ ɔ́. Ajū mīi, mɛ́ lɔɔ̄k menēk njʉ́ɔ á gɔ emīi, azi mɛ́ té lɔ̄k menēk njʉ́ɔ ɔ́, á náŋ á lemiʼɛ.