2 Kɔlɛŋte 3 - Eka Eswhī

Megaŋ afaʼ á ntē eka eswhī

¹ Pɛ é páʼa ndɔkɔ ndʉ́ɛ́ ŋ́gɛ, pek méŋwɛ̄t é si efāʼa á lezēŋ eshúŋ á légɛ pek é kwaʼ meziŋ‑ntō lɛ́? Á té si nzɛ́ttɛ ŋ́gɛ, pek eláʼ ndɔ̄k akɛtte tɛ́ ntswī á wɛ́ pá emɔ̄ʼ epuɔ, á légɛ, pek é si ŋgɔ́ á kwaʼ meziŋ‑ntō ɔ́. Pek te si nzɛ́ttɛ ŋ́gɛ, pɛ etí akɛtte ŋgyá mé pek, ńdɔk eshúŋ emɔ̄ʼ epuɔ á légɛ, pek é si ŋgɔ́ meziŋ‑ntō ɔ́.

² Pɛ mé si ŋgɔ́ azék akɛtte. Klísto mé tí akɛtte mɛ́t á ntē pek, tɛ ŋgɔ́ yīi, awíɛ awíɛ a gɔ ejʉ́ɔ, ńtɔ́ŋ.

³ Á kwaʼ anuúnē, pɛ é si ŋgɔ́ akɛtte, Klísto mé tí ntsékne ŋ́gɛ, pek elɔ̄k afaʼ zék eshúŋ á wɛ́. A lɛ te lɔ̄k nzɔ̄ŋ tɛ́ tí aziɛ́ akɛtte mɛ́t ɛ́, a le lɔ̄k áa Azwakne Ndém páʼ á naáŋ ntē, tɛ́ ntí. A te tí ánɛ metaáflɛ tɔ́ ɔ́, a le tí áa ánɛ atá ntē zɛ́.

⁴ Pek lʉ́ɛ́ épúp melaʼ mīi, Klísto a le ghʉ̄ pek cuŋte nzhɛ́ á légɛ, Ndém mé le tó á wék.

⁵ Pek lɛ te lɔ̄k mete mék méŋwɛ̄t, tɛ́ ŋkūʼ á leghʉ mefaʼ mɛ́t, tɛ ŋgɔ́ yīi pek gɔ epú ŋŋáʼne ɛ́. Ndém mé si ŋgyáa á wék mete á lelɔk ŋkūʼ á leghʉ ajūɔ tsem.

⁶ Yí mé le ghʉ̄ʉ̄, pek kūuʼ á legɔ̄ megaŋ afaʼ á ntē eka eswhī. Eka eswhī mɛ́t é té si ŋgɔ́ lepé, tɛ mɛ́ tí tií í, é fhɔ́ɔ áa mbū Azwakne Ndém. Lepé tsīi mɛ́ le tíī, é ghʉʉ̄, ŋiŋ á pí pií. Azwakne Ndém á piŋ ŋghʉ̄, mɛ́ gɔ́ éwú.

⁷ Mɛ́ le gē etí mbé ánɛ metaáflɛ tɔ́, shʉ́shɔ́k Ndém á nɔŋ ŋŋwāŋnɛ, eshhʉ̄ Mɔɔ́sɛ é nɔŋ ŋŋwāŋnɛ tɛ ŋgɔ́ yīi, epuɔ Islaɛl é le gɔ le kūʼ á lecʉte á yí í. Shʉ́shɔ́k mɛ́t á le lɛ ŋwaŋne áa ánɛ méŋ atsém njhʉ̄ lɛ. Páʼ mɛ́ le gē etí mbé mīi, é ghʉʉ̄ mɛ́ pí pií, shʉ́shɔ́k Ndém á ŋwaŋne épúp lā,

⁸ afaʼ Azwakne Ndém á ghʉʉ̄, shʉ́shɔ́k Ndém á ŋwaŋne ntɔ́k épúp.

⁹ Ndém a le gē eyá lepé á mbū epuɔ menɔŋ, shʉ́shɔ́k yi á nɔŋ ŋwāŋnɛ, lepé mɛ́t mé shʉʼ ŋghʉ̄, á tswá epuɔ menɔŋ. A gɔ le néŋ té ghʉ, shʉ́shɔ́k yi á tswhi ŋwāŋne á mbū epuɔ pīi, é si ŋghʉ̄ɛ afaʼ, ńdɔkɔ ntshónɛ epuɔ, á legɔ̄ ndeŋ ndeŋ á mvhɔ yí í.

¹⁰ Mɛ́ gɔ elé ŋ́gɛ, ntií zīi shʉ́shɔ́k Ndém á si ndɔkɔ ntswhīɛ ŋwāŋnɛ tsetsɔŋɔ épúp, e é si ndɔkɔ mbíktɛ á shʉ́shɔ́k yīi, a le zī ŋwaŋne efʉʼ mvhɔ.

¹¹ Páʼ shʉ́shɔ́k a le sóʼo ánɛ ajū mīi, á gɔ le náŋ lā, tɛ ŋgʉɔ shɔ́ʼɔ́ ánɛ ajū mīi, a náŋ enáŋa á lemiʼɛ ɛ̄?

¹² Pek é si eshúŋɔ menu mɛ́t esia sia, melaʼ mīi, pek é si ncuŋtɛ nzhɛ́ɛ á légɛ, é kwaʼ anuúnē.

¹³ Pek te si ŋghʉ̄ɛ páʼ Mɔɔ́sɛ, páʼ a le lɔ̄k azō nzhó ŋkápte eshhʉ̄ yí, ńdɔkɔ te ŋkɔ̄ŋɔ ŋ́gɛ, epuɔ Islaɛl e ejʉ́ɔ páʼ shʉ́shɔ́k Ndém a á mi á eshhʉ̄ yí í.

¹⁴ Mɔɔ́sɛ a le ghʉ̄ épúp, táʼ, leghi tsɔ́p é ké ntsɛ́te tsɛ́te. Tɛ ntshí ayáʼa, mɛ́ nɔɔ̄ŋ ntɔ́ŋɔ meŋwaʼne á ntē nzwiŋ eka, leghi tsɔ́p é zɛ́t tsɛ́te tsɛ́te. Azō nzhó á gɔ́ nzɛ́t ŋkáptɛ leghi tsɔ́p kápte. Lefɛ̄ nnɛ̄t ŋgyá mé Klísto mé ghʉʉ̄, leghi ŋiŋ é tsɔ́ʼɔ.

¹⁵ Á épúp, tɛ ntshí ayáʼa, pɔ́ nɔɔ̄ŋ ntɔ́ŋɔ meŋwaʼne Mɔɔ́sɛ, azō á kʉŋɛ leghi tsɔ́p, páʼ mɛ́ é lɔk azō nzhó ŋkápte lā.

¹⁶ Ŋiŋ a gɔ te gɔ̄ nnɛ̄t zi, esɛ̄t nnɛ̄t á mbū Atsyapuɔ ɔ́, mbɔ ajūɔ nzhó zīi, á ŋkʉŋɛ leghi tsí, á gɔ le ŋáʼa.

¹⁷ Atsyapuɔ a á si ŋgɔ́ Azwakne. Ajʉʼ zīi Azwakne Atsyapuɔ á piīŋ ŋgɔ́ éwú, epuɔ menɔŋ é ajʉʼ mɛ́t, ńnáŋ á ŋga athū pɔ́p.

¹⁸ Ajūɔ nzhó á gɛ te nzɛ́t ŋkʉ̄ŋɛ eshhʉ̄ ŋiŋ á nnɔ pímpɛ ɛ́. Shʉ́shɔ́k Atsyapuɔ a gɛ ncʉ́ʼɛ nzápa ánɛ pímpɛ, tɛ́ ŋwāŋnɛ. Ḿpɛ lē esɛnne, ncʉ́ʼɛ ŋgɔ́ɔ áa páʼ Atsyapuɔ lā, ŋ́gwɛ̄ á shʉ́shɔ́k yīi, a á eséŋɛ́ lɛ́, ńtswiʼne efáŋ fáaŋ. Á páʼa, ŋ́gɔ́ afaʼ zīi Atsyapuɔ, páʼ a á si ŋgɔ́ Azwakne lā, a ghʉʉ̄ ánɛ pímpɛ.