2 Kɔlɛŋte 2 - Eka Eswhī

¹ A gɔ́ mé meŋ, mbɔ meŋ nde néŋ á ntē meŋ á légɛ, meŋ gɔ le pīŋ nzem á alāʼ pɛ, ńzéŋ ŋghʉ̄, ntē wɛ́ é záŋ á.

² Meŋ ŋgwiʼe ŋghʉ̄, ntē wɛ́ é záŋ, mbɔ awɔ́ a gɔ epiŋ ŋghʉ̄, ntē gá é gáŋte ē? Ŋiŋ yīi meŋ á ghʉ, ntē yí é záŋ, a gɔ egaá ŋghʉ̄, ntē gá é gáŋte ē?

³ Ajū mīi á le ghʉ̄ʉ̄, meŋ tí akɛtte, á lɛ: meŋ nde nɔ̄ŋ te ŋkɔ̄ŋɔ á gá á lege eshʉʼe, ntē gá é nɔŋ nzáŋa melaʼ epuɔ pīi, pɔ́ mbɔ́ŋte á leghʉ, meŋ gáŋte ɛ́. Meŋ á si ncuŋtɛ nzhɛ́ɛ á légɛ, á mbū pɛ, ntē gá é nɔŋ ŋgáŋtɛ páʼā, pɛ metsem é gɔ́ azɛ́ á ntē lekāk.

⁴ Meŋ ke gē etí akɛtte mɛ́t, ntē gá é nɔŋ nzáŋa tɛʼ. Mbe za é nɔŋ ntsyɛ̄ttɛ, meŋ nɔ̄ɔŋ ndāa tɛ ntshi nnēk é túɔ́. Á ke te gɔ́ épúp, meŋ ndɔ̄kɔ efāʼa á légɛ, ntē wɛ́ e ezáŋ á. Meŋ ndɔ̄kɔ efāʼa ŋghʉ̄ áa lɛ, pɛ ezhɛ́ á légɛ, meŋ ŋgwɛɛ̄ á mía mía ŋkɔŋne ánɛ pɛ.

Pɔ́ɔl a á ega ndēknɛ á mbū ŋiŋ yīi, a á fa

⁵ Meŋ á kwaŋ ŋ́gɛ, mmɔʼ ŋiŋ a le ghʉ̄ʉ̄, ntē epuɔ é záŋ. Ŋgaŋ a lɛ te ghʉ̄ ntē gá ndaʼ mé záŋ á, a le ghʉ̄ ntē wɛ́ metsem é záŋ, meŋ te néŋɛ ŋgokó ó.

⁶ Epuɔ te nzá á nnɔ pɛ, é lɛ te véŋ anu zīi, ŋiŋ wuɔ mɛ́t a á ghʉ ɛ́, ńcɔ́k á yí, á kuʼ épúp.

⁷ Melaʼ épúp tɛ́ á tsetsɔŋɔ, pɛ epɔ́ŋte á lelekne mefa mɛ́t á mbū yí, éswíte ntē yí, ḿbɔ́k ntē yí á lezāŋ tɛ nzíʼ ndhʉ.

⁸ É zeéŋ ŋgɔ́ melaʼ épúp tɛ́, meŋ á si ntsáa ŋ́gɛ, pɛ etswī á ŋiŋ wuɔ mɛ́t á légɛ, pɛ zɛɛ́t ŋkɔŋ á yí kɔŋ.

⁹ Meŋ nde ge etí azi amɔ̄ʼ akɛtte, ńdɔkɔ nzwíʼɛ á wɛ́, ŋ́gɔ̄ á njʉ́ɔ kɛ pɛ zɛɛ́t ŋkúʼtɛ menu ntsem mīi, meŋ nde shúŋ á wɛ́ lɛ́ɛ.

¹⁰ Pɛ leknɛ mefa ŋiŋ, meŋ ndēkne azá á mbū ŋgaŋ. Meŋ ndeknɛ mefa ŋiŋ, páʼ meŋ á ghʉ épúp la, mbɔ meŋ ndeknɛ melaʼ mɛ́, ńtshí á mvhɔ Klísto tɛ́ ndēknɛ.

¹¹ Ŋ́ghʉ̄ɛ épúp páʼa, ŋ́gɛ ndɛ́ʼ Sɛ́ta á pɔpte á yímpɛ. Ḿpɛ te si mbūŋnɛ ajū mīi, a á nzem pímpɛ efāʼa á.

Pɔ́ɔl a á kó á tésɔŋ Tloas, mbe zi é nɔŋ ntsyɛ̄ttɛ

¹² Meŋ nde gʉ̄ɔ á tésɔŋ Tloas, á ntswiī ŋke mbɔŋ Klísto, ŋ́kó éwú, Atsyapuɔ á ghʉ, mmɔʼ mbɔŋ mɛnzhɛ á tsɔ́ʼɔ á mbū meŋ, á lelɔk ŋghʉ̄ á afaʼ mɛ́t.

¹³ Táʼ, mbe nnɛ̄t za é ké nnɔ̄ŋ ntsyɛ̄tte tsyɛtte, melaʼ mīi, meŋ nde kó éwú, meŋ te jʉ́ɔ á méŋ mɔ́ yímpɛ Tíit ɛ́. Púp, ńdɛ ndāʼne epuɔ tésɔŋ mɛ́t, ŋgʉ̄ɔ mé apak ŋgɔŋ Maseduan, á efaāʼ yí.

Yɛɛ́so Klísto mé ghʉ̄ʉ, ḿpɛ gɔ́ wɔ asaʼa‑ndʉɔ́ʼ

¹⁴ Awuʼte a eké ŋgɔ́ á mbū Ndém. A á efʉʼ metsem, ŋ́ghʉ̄ pek gɔ́ á nnɔ wɔ asaʼa‑ndʉɔ́ʼ, Klísto á tshí mvhɔ. A zapaá ánɛ pek, ŋ́ghʉ̄ mɛ́ zhɛ́ á Klísto ejʉʼ tsem, páʼ azík alamńda á jhʉ́ɛ ejʉʼ tsem lā.

¹⁵ Á épúp, pek é si ŋgɔ́ páʼ azík zīi, á pɔɔ̄ŋ á Ndém lā, melaʼ mīi, pek é si ŋghʉ̄ɛ, mɛ́ zhɛ́ɛ á Klísto. Ŋ́ghʉ̄ɛ, epuɔ pīi Ndém a le tshí á wɔ́p ánɛ mɛnzhɛ letswɛ̄t, mbɔɔ epuɔ pīi, pɔ́ é ánɛ mɛnzhɛ lepī, é zhɛ́ɛ á yí.

¹⁶ Pek é mbū epuɔ pīi, é ánɛ mɛnzhɛ lepī, ŋ́gɔ́ páʼ azík zīi, á gɔ ezwhí á ŋiŋ lā. Ŋ́gɔ́ á mbū epuɔ pīi, é ánɛ mɛnzhɛ letswɛ̄t, ŋ́gɔ́ páʼ azík mbɔŋ lā. Pɔ́ kuʼteé ashuŋne zék, éfú eta á lezēŋ Ndém. Awɔ́ a gɔ epīiŋ ŋghʉ̄ ajʉɔ afaʼ mɛ́t é?

¹⁷ Pek te si ŋgɔ́ páʼ emɔ̄ʼ epuɔ pīi, pɔ́ lɔkɔ ashuŋne Ndém ntáŋa esaá á. Pek é si ŋgē eshúŋɔ anu Ndém, ńdɛ̄tne ánɛ Klísto, ńdɔ̄kɔ anuúnē tɛ́ eshúŋɔ, Ndém mé túɔ́ á wék, pek a pɔ́p mé gɔ́ nnɔ.