2 Kɔlɛŋte 12 - Eka Eswhī

Menda jʉɔ́ ecū mīi Ndém a le ŋaʼá menēk Pɔ́ɔl, á jʉ́ɔ

¹ Á mbɔŋ ŋ́gɛ, meŋ eŋīa lɛ́? Meŋ ghʉɛ épúp, mbɔ á gɔ le tswíte ánɛ amɔ̄ʼ azō ɔ́. Tsetseŋɔ, meŋ ŋké ŋgɔ á eshúŋ pɛ menjʉɔ te lí, pɔ́ emɔ̄ʼ menu mīi, Atsyapuɔ a le ŋaʼá menēk má, meŋ njʉ́ɔ.

² Meŋ á si nzhɛ́ɛ emɔ̄ʼ ŋiŋ Klísto yīi a á éwú, mbɔ á ayáʼa ŋguʼ ntsɔp lekua mé legēm, páʼ Ndém a le lɔ̄k á yí ŋgʉ̄ɔ tɛ ŋkó á ajʉʼ zīi, yí méŋwɛ̄t Ndém a naáŋ éwú. Kɛ ŋgaŋ a lɛ péʼe, ńdíi athū lɛ́, mbɔ meŋ ka zhɛ́ ɛ́. Kɛ a le lɔ̄k á kwaʼ mbe nnɛ̄t zi lɛ́, mbɔ meŋ ka zhɛ́ ɛ́. Ndém méŋwɛ̄t mé si nzhɛ́ɛ.

³ Meŋ á si ŋké nzhɛ́ɛ á légɛ, á épúp. Kɛ ŋgaŋ a lɛɛ́ ndíi athū lɛ́, kɛ a le lɔ̄k á kwaʼ mbe nnɛ̄t zi lɛ́ɛ, mbɔ meŋ ka zhɛ́ ɛ́. Ndém méŋwɛ̄t mé si nzhɛ́ɛ.

⁴ Á épúp, Ndém a le lɔ̄k á ŋiŋ wuɔ mɛ́t, ŋ́kɔ́ʼ tɛ ŋkó á ajʉʼ zīi, yí méŋwɛ̄t Ndém a naáŋ éwú. A le lɔ̄k á yí ŋkɔ́ʼ épúp, á júʼ menu mīi, mɛ́ gɔ le zhɛ́ páʼ mɛ́ gɔ eshúŋ épúp ɔ́. Ŋiŋnɔŋ á zi te pɔŋté á le zi eshúŋ ɔ́.

⁵ Meŋ gɔ elɔ̄ɔk á ŋiŋ mɛ́t, ŋ́ŋīa. Ŋ́ké ŋgɔ́ mé meŋ, mbɔ meŋ gɔ elɔ̄ɔk áa ecū mīi é tswii á légɛ, meŋ soʼneé nnɛ̄t za, tɛ́ ŋŋīa.

⁶ Meŋ á nzi ŋgwíʼe nnɔ̄ŋ ŋkɔ̄ŋɔ á gá á leŋia, mbɔ meŋ te ndɔ̄kɔ ŋgɔ́ɔ apia á, mbɔ meŋ ndɔkɔ eshúŋɔ áa anuúnē. Táʼ, meŋ ké ka kɔ̄ŋ á gá á leŋia á, melaʼ mīi, meŋ te si ŋkɔ̄ŋɔ ŋ́gɛ, epuɔ ewɛ̄ á akwaŋte ndɛʼɛ, tɛ a etɔ́k ajū mīi, pɔ́ é si njʉ́ɔ á gá á leghʉ, ká ázi pɔ́ é si njúʼu á gá á leshūŋ ɔ́.

⁷ Páʼ menu mīi Atsyapuɔ a le ghʉ̄ meŋ jʉ́ɔ, é lɛ mɛgém anu lā, a lɛ te kɔ̄ŋ ŋ́gɛ meŋ ndɔk ŋŋīa á. Melaʼ épúp tɛ́, a le véŋ ŋ́gɛ, ŋgʉɔ̄ʼ e eshʉ̄ʼ ánɛ meŋ, páʼ nzɔ̄ŋ e epwɔ́ʼɔ ánɛ ŋiŋ, ŋ́gyáa á yí ŋgʉɔ̄ʼ épúp, ŋ́gɔ́ á cɔʼ Sɛ́ta yīi, a a náŋ ezapa á gá efʉʼ metsem, ḿbɔ́k á gá á leŋia.

⁸ Meŋ ndé eswíŋte á Ndém ŋgʉɔ ntɛ́t, ŋ́gɛ a lɛ efók ŋgʉɔ̄ʼ mɛ́t ánɛ meŋ.

⁹ Tɛ́ á tsɔ́ʼ mé meŋ ŋ́gɛ: «Apɔŋɔ́ ntē te ndhʉ zīi, meŋ ŋgwɛɛ̄ ánɛ wu, á kuūʼ á mbū wú á lelɔk mbīʼ ŋgʉɔ̄ʼ mɛ́t, melaʼ mīi meŋ ntswiteé á ŋiŋ yīi, a á si mbwɛ́tɛ páʼā, tɛ á zhɛ́ mete má á mbɔŋɔ́. » Púp, meŋ gɔ elɔ̄ɔk áa ecū mīi, é tswii á légɛ, meŋ soʼneé nnɛ̄t za, tɛ́ ŋŋīa, a egɔ́ épúp, tɛ́ mete Klísto e egɔ́ ánɛ meŋ.

¹⁰ Melaʼ épúp tɛ́, meŋ nɔɔ̄ŋ mbwɛ́tɛ lɛ akɔ̄ lɛ́, mɛ́ nɔŋ nzɔ̄tɛ á gá lɛ akɔ̄ lɛ́, Eziɛ́ ntií ŋgʉɔ̄ʼ é nɔ̄ŋ eshʉ̄ʼɛ ánɛ meŋ lɛ́, mɛ́ nɔŋ ndʉɔ́ʼɔ á gá lɛ akɔ̄ lɛ́, meŋ gɔ́ á ntē eziɛ́ ntií atapne melaʼ anu Klísto lɛ́, ntē gá é nɔŋ ké ŋgáŋte gaŋté, melaʼ mīi meŋ nɔɔ̄ŋ mbwɛ́tɛ páʼā, tɛ́ mete Ndém é ghʉ, meŋ ekāak ete.

Pɔ́ɔl a le lɔ̄k á ndeŋ ndeŋ, tɛ́ ŋghʉ̄ afaʼ á Kɔlɛŋte

¹¹ A awuɔ yīi, meŋ á shúŋne páʼ apia lā, mbɔ pɛ mé ké ntshóne á gá. Pɛ mé ké gɔ́, pɛ eshúŋ á ŋiŋ yīi, meŋ á ewiɛ́. Azi ŋgɔ́ éyi á mbū pɛ, meŋ te azō ɔ́, mbɔ meŋ ké nzhɛ́ á ntē meŋ á légɛ, epuɔ pīi pɛ tɔ́ŋɔ á wɔ́p lɛ memía meziŋ‑ntō, é té á gá tsya.

¹² Meŋ ndɛ á tsetsɛlɛ pɛ, ŋ́ghʉ̄ menu mīi é tswii á légɛ, meŋ á si ŋgɔ́ á nziŋ‑ntō. Á gɔ́ á lekwɛ̄t ntē ánɛ menu ntsem, ŋ́gɔ́ á leghʉ nda jʉɔ́ menu, ŋ́gɔ́ á leghʉ meŋkʉʼne menu, ŋ́gɔ́ á leghʉ menu mīi, é tswii mete Ndém.

¹³ Amɔ̄ʼ anu mbɔŋ zīi, meŋ nde ghʉ̄ ánɛ melúŋ epuɔ Yɛɛ́so, té ghʉ ánɛ pɛ azɛ́, á té éwú ú. Ńdaʼ ŋ́gɛ, á gɔ́ mé meŋ, mbɔ meŋ ndɛ te apiʼ á mbū pɛ ɛ́. Pɛ elɛ ndēkne ŋgyá á mbū meŋ, melaʼ épúp lɔ.

¹⁴ Awuɔ yīi meŋ á ndáʼ mbɛ́tte nnɛ̄t, ŋ́gɔ̄ eshʉʼ á alāʼ pɛ, ánɛ páte métɛ́t legʉɔ lāa. Éshʉʼ épúp, ézéŋ le gɔ́ apiʼ á mbū pɛ ɛ́, melaʼ mīi meŋ te si efāʼa etsō tsɛ́ ɛ́, meŋ á si efāʼa áa á wɛ́ méŋwɛ̄t. Á lɔk ŋgɔ́ páʼ, ewɔŋkhʉ̄ mé té pɔŋté á lefēŋ azō á mbū memɔʼɔ́ pɔ́p ɔ́. Memɔʼɔ́ mé pɔŋteé á lefēŋ azō á mbū ewɔŋkhʉ̄ pɔ́p.

¹⁵ Ŋ́gɔ́ mé meŋ, mbɔ meŋ zi mbú ntsēŋte ajū mīi, meŋ ŋgwɛɛ̄ melaʼ mɛ́, ḿbú ŋgyá athū nnɛ̄t zá melaʼ mɛ́, mbɔ amɔ̄ʼ azō á gɔ le á gá pék. Á si ŋgɔ́ páʼ ŋkɔŋne zīi, meŋ ŋgwɛɛ̄ á mbū pɛ, e é tswiʼne ŋgʉ̄ɔ mé mvhɔ, ŋkɔŋne zīi pɛ wɛɛ̄ ánɛ meŋ, é piŋ nnɔ̄ŋ ntswɛ́ttɛ lā.

¹⁶ Pɛ evéŋ azɛ́ á légɛ, meŋ kɛ te apiʼ á mbū pɛ ɛ́. Táʼ, emɔ̄ʼ epuɔ é tsetsɛlɛ pɛ ndʉ́ɛ́ ŋ́gɛ: «Pɔ́ɔl a kɛ á ŋghi, á ke pɔptē á wék, ŋ́kú etsō tsék. »

¹⁷ Pɛ ejʉ́ɔ á awɔ́ ŋiŋ lɛ́ yīi, pɛ é kɔŋ, á nnɔ epuɔ pīi, meŋ nde tó á wɔ́p á mbū pɛ, meŋ nde zapá á nzem emɔ̄ʼ, ŋ́gɔ́ apiʼ á mbū pɛ kɛ?

¹⁸ Meŋ nde swiŋté á Tíit, ńtó á yí ŋ́gɛ, a eshʉ̄ʼ á alāʼ pɛ, pɔ́ méŋ mɔ́ yīi, pɛ é si nzhɛ́ɛ á yí lā. Tíit a le pɔ́p á wɛ́, ńtswí etsō tsɛ́ kɛ? Pɛ lɛ te jʉ́ɔ, pek yí é wɛ áa taʼ akwaŋtɛ lɛ́? Pɛ lɛ te jʉ́ɔ, pek yí, é nɔŋ nzīŋɛ áa ánɛ taʼ mɛnzhɛ lɛ̄?

¹⁹ Tɛ efhó tɛ afʉʼ, pɛ nɔ̄ɔŋ ŋkwāŋa ŋ́gɛ, pek é si ndhʉ̄ɛ athū zék á mvhɔ pɛ lɛ́? Ŋgáŋ, pek zapaá ánɛ Klísto, ńtshí á mvhɔ Ndém tɛ́ eshúŋnɛ. Ŋ́ghʉ̄ɛ épúp me epɔ̄ memía, ńdɔkɔ efāʼa á légɛ, pɛ efɛ́ nnɛ̄t ŋgyá á mbū Ndém, ńdɔk ŋgʉ̄ɔ mé mvhɔ.

²⁰ Meŋ á si mbɔ́kɔ á gá á lekō á alāʼ pɛ, meŋ ńde jʉ́ɔ pɛ wɛ̄ɛ atswhī zīi, meŋ á si ŋkɔ̄ŋɔ ŋ́gɛ, pɛ ewɛ̄ ɛ́. Púp, pɛ azɛ́, pɛ é le jʉ́ɔ meŋ gɔ́ páʼ, pɛ é si ŋkɔ̄ŋɔ ŋ́gɛ, meŋ egɔ́ épúp ɔ́. Meŋ á si mbɔ́kɔ á gá á legē eshʉʼe, ńjʉ́ɔ membo é gɔ́ á tsetsɛlɛ pɛ, pɛ nɔ̄ɔŋ ŋgwīɛ̄ á sɛ́h ntē á nnɔ pɛ, ńnɔŋ nzáŋa á lɔ́ŋ, ńnɔŋ nnɛ́ttɛ, ńnɔŋ ntáŋa mela, ńnɔŋ esɛ́ʼɛ epuɔ, ńnɔŋ nzɔ̄ɔ epuɔ, ńnɔŋ ntáktɛ ejʉʼ.

²¹ Meŋ á si mbɔ́kɔ á gá á leshʉʼ tɛ ŋkó á alāʼ pɛ, Ndém ga, á maʼ esē á athū meŋ á mvhɔ pɛ, ŋ́ghʉ̄ meŋ ndāa, melaʼ epuɔ tɛ nzáne pīi, pɔ́ zɛɛ́t ntswiʼnɛ efāa páʼ, pɔ́ lɛɛ́ ŋghʉɛ épúp. Épuɔ pīi pɔ́ la gɔ̄ nnɛ̄t zɔp, ŋ́gwáʼ atswhī tepɔŋ zɔ́p, ésōk epe ánɛ pɔ́p, éfhó ánɛ mɛnzhɛ tepɔŋ ntó, éfhó ánɛ agā ntó ɔ́.