2 Kɔlɛŋte 11 - Eka Eswhī

Afaʼ Pɔ́ɔl á té páʼ azi wɔ táŋ‑mela ŋ́gɛ, pɔ́ é meziŋ‑ntō ɔ́

¹ Tsetsɔŋɔ, meŋ gɔ enáʼ eshúŋne á mbū pɛ, páʼ meŋ á apia lā, pɛ elɛ mvéŋ épúp. Tsɔ́ʼɔtsɔ̄ʼ, pɛ evéŋ épúp.

² Meŋ kɔɔ̄ŋ á wɛ́, tɛ meŋ te véŋ ŋ́gɛ, ŋiŋ a shʉʼ nnéŋ á atāk á nnɔ pɛ ɛ́. Ezíɛ ntií ŋkɔŋne mɛ́t, e fhoó á mbū Ndém. Meŋ nde cuŋtē á légɛ, pɛ a taʼ ŋiŋ wɔ́mɔʼɔ́ páʼa, e eshʉʼ ndá ŋgyā, ŋgaŋ á gɔ́ á Klísto. Meŋ á si ŋké ntsáa ŋ́gɛ, pɛ egɔ́ té alɔ́ʼ, púp, meŋ eshʉʼ ŋgē etswi á wɛ́ á mbū yí, mbɔ pɛ la emɔ̄ʼ ŋiŋ ndɛʼɛ zhɛ́ ɛ́, páʼ mɛ́ gē etswi á mɔ́ ŋgɔ á mbū ndō yi, á gɔ́ épúp.

³ Meŋ á si mbiŋɛ mbɔ́kɔ ŋ́gɛ, ndɛ́ʼ ŋiŋ á kʉlɛ leghi tsɛ́, pɛ fhó ánɛ mbɔŋ mɛnzhɛ Klísto ntó, ńdeŋ ndeŋ páʼ Éva a le cʉ́ʼ, nnū é pɔpte á yí, á fa nzhɛ.

⁴ Meŋ ndʉ́ɛ́ páʼa, melaʼ mīi awɔ́ ŋiŋ lɛ́, a lɛɛ̄ eshʉʼ á mbū pɛ, éshúŋ á wɛ́ menu ndɛʼɛ ánɛ Yɛɛ́so, é gɔ́ te emi, pek le shúŋ á wɛ́ ɛ́, pɛ véŋ veéŋ. Ńnɔŋ ŋgyáa á wɛ́ azwakne ndɛʼɛ, á gɔ́ te Azwakne Ndém ɛ́. Ńnɔŋ ntswīi mmɔ̄ʼ ŋke á mbū pɛ, é té gɔ́ ŋke mbɔŋ yīi, pek le tswī á mbū pɛ ɛ́, pɛ véŋ veéŋ.

⁵ Pɛ kwaāŋ ŋ́gɛ, epuɔ puɔ mɛ́t é memía meziŋ‑ntō, táʼ, meŋ ké nzhɛ́ á ntē meŋ á légɛ, pɔ́ té gá tsya.

⁶ A gɔ́ mmɔʼ, mbɔ meŋ te zhɛ́ á gá á leshūŋne páʼ pɔ́p ɔ́. Táʼ, ŋ́ké nnɔŋ nzhɛ́ɛ ajū mīi, meŋ shúŋɔ. Pek le lɔ̄k meshhʉ̄ metsem, ńtswī á wɛ́ efʉʼ metsem á légɛ, pek é si ŋgē eshúŋnɛ, ŋ́gwɛ̄ ŋgwɛ́t.

⁷ Meŋ nde tswī ŋke mbɔŋ Ndém á mbū pɛ ndémndēm, meŋ méŋwɛ̄t é sóʼne nnɛ̄t za mé esī, ńdɔk ŋkɔ́ʼne á wɛ́. Meŋ nde ghʉ̄ épúp páʼā, ńdɔkɔ efāa lɛ́?

⁸ Meŋ ndɛ á alāʼ pɛ, emɔ̄ʼ melúŋ epuɔ Yɛɛ́so mé nɔŋ ŋgyáa azō á mbū meŋ. Meŋ nde pāk alák ánɛ pɔ́p, ńdɔk ŋghʉ̄ afaʼ á mbū pɛ.

⁹ Á lɛ afʉʼ zīi meŋ ndɛ á alāʼ pɛ, azō á nɔŋ ŋkíŋɛ á mbū meŋ, meŋ te ŋiŋ lɔ́. Epɔ̄ memía é le fhó á apak alāʼ Maseduan, tɛ́ eshʉʼ ŋgyá ajū mīi á si ŋkíŋɛ, ńdɔk ntswíte á gá. Meŋ ndɛ te kɔ̄ŋ á gá á legɔ̄ apiʼ á mbū pɛ, ánɛ amɔ̄ʼ azō ɔ́, épīŋ le láʼ aleʼé ŋgɔ́ ɔ́.

¹⁰ Meŋ á lɔk anuúnē Klísto, páʼ a á ntē meŋ, ńdé ŋ́gɛ: meŋ gɔ le gʉ̄ɔ tɛ ŋkó á apak alāʼ Akayi, ŋiŋ á tɔʼ á gá á lelɔk ewuɔ legɔ̄ mɛ́t ŋkāʼte ɛ́.

¹¹ Pɛ é kwaŋ ŋ́gɛ, meŋ ndʉ́ɛ́ páʼa melaʼ akɔ̄? Melaʼ mīi meŋ te á wɛ́ kɔŋ lɛ́? Ŋgáŋ, Ndém a á si nzhɛ́ɛ á légɛ, meŋ kɔɔ̄ŋ á wɛ́.

¹² Atswhī jʉɔ mɛ́t zīi, meŋ á tsetsɔŋɔ ŋgwɛ̄, meŋ a shʉʼ ezéŋ etswiʼne ewɛ épúp, élɔk egʉɔ mé mvhɔ. Élɔk le yá eshhʉ̄ á lekaʼte á mbū epuɔ pīi, pɔ́ é si ŋŋīa, á legɔ̄ yīi, pek a pɔ́p é si ŋghʉ̄ɛ á taʼ afaʼ á.

¹³ Epiɛ́ epuɔ mɛ́t, é si ŋgɔ́ wɔ táŋ‑mela ŋ́gɛ, pɔ́ é meziŋ‑ntō Yɛɛ́so. Pɔ́ é si ŋghʉ̄ɛ afaʼ, ńdɔkɔ mbɔ̄pɔ epuɔ ŋ́gɛ, mɛ́ ejʉ́ɔ á wɔ́p páʼ meziŋ‑ntō Klísto lā.

¹⁴ Ajū mīi pɔ́ ghʉɛ, á gɔ́ le á ŋiŋ kʉ̄ʼne, melaʼ mīi Sɛ́ta a gɛ nzéŋɛ mbɔ̄pɔ epuɔ ŋ́gɛ, yí é si ŋgɔ́ á cɔʼ Ndém yīi, a ŋwaŋnēe.

¹⁵ Á pú te á nte azō á mbū epuɔ puɔ mɛ́t, á lepɔp epuɔ ŋ́gɛ, pɔ́ é megaŋ afaʼ kwaʼ Ndém ɛ́. Pɔ́ e ké eláʼ ewɛ ntsɔʼɔ́‑afaʼ wɔ́p, e egɔ́ ndeŋ ndeŋ páʼ mefaʼ mɔ́p.

Ŋgʉɔ̄ʼ zīi Pɔ́ɔl nziŋ‑ntō Yɛɛ́so a le jʉ́ɔ̄

¹⁶ Meŋ ezéŋ ncūŋte éshúŋ á wɛ́ ŋ́gɛ, ndɛ́ʼ ŋiŋ á kwaŋ ŋ́gɛ, meŋ á si ŋgɔ́ a apia. Ŋ́gɔ́ te épúp ɔ́, pɛ evéŋ ŋ́gɛ, meŋ á apia, tɛ́ meŋ ndɔ̄ɔk ŋkūʼ á gá azá á lenāʼ ŋŋīa.

¹⁷ Ékē egē eŋia, ézhɛ́ ajū mīi meŋ ndɔkɔ ŋŋīa. Anu zīi meŋ gɔ á eshúŋ elɔk eŋia, á té fhɔ́ɔ á mbū Atsyapuɔ ɔ́. Meŋ gɔ á eshúŋnɛ páʼ agaáʼ‑apia lā.

¹⁸ Páʼ epuɔ tɛ nzáne é si ndɔ̄kɔ menu ŋgɔŋ muɔ tɛ́ ŋŋīa lā, meŋ a zéŋ eŋia azá.

¹⁹ Pɛ kwaāŋ ŋ́gɛ athū zɛ́ á éwú, ŋ́ké mbiŋ ŋ́gɔ́ si mvéŋɛ á letswīʼte epia.

²⁰ Epuɔ é nɔɔ̄ŋ ndɔkɔ á wɛ́ ŋghʉ̄ɛ meŋkwa mɔ́p, ńnɔŋ njʉ̄ʉ etsō tsɛ́, ńnɔŋ mbɔ̄pɔ á wɛ́ ŋkúu etsō tsɛ́, ńnɔŋ ncʉ̄ʉ á wɛ́ ŋgwáka á wɛ́, ńnɔŋ ŋŋɔ́ʼɔ á wɛ́, pɛ evéŋ veéŋ.

²¹ Esē é si ŋkúu á gá á lelē ŋ́gɛ, pek lɛ te ghʉ̄ azék páʼ pɔ́p ɔ́. Tsetsɔŋɔ, meŋ gɔ á eshúŋnɛ páʼ apia lā, meŋ gɔ ezéŋ elɔk ajū mīi, epuɔ menɔŋ é lɔkɔ ŋŋīa, éŋia azá.

²² Pɔ́ é si ŋgɔ́ epuɔ Eble, meŋ gɔ́ azá ewiɛ́. Ŋ́gɔ́ á ntē eka epuɔ Islaɛl, meŋ gɔ́ azá éwú. Ŋ́gɔ́ ndhu Ablaham, meŋ gɔ́ azá eziɛ́.

²³ Ŋ́gɔ́ megaŋ afaʼ Klísto, meŋ a shúŋne páʼ apia lā, meŋ gɔ́ azá ewiɛ́ tɛ ntɔ́k á wɔ́p. Meŋ nde ghʉ̄ afaʼ ntɔ́k á wɔ́p. Ŋgɔ́ me lekō á atʉɛ́, mbɔ meŋ ndé kó ntɔ́k á wɔ́p. Mɛ́ lé pú ntswá á gá, ńtɔ́k á wɔ́p. Meŋ ndé zápne á nchu lewhʉ̄, ánɛ meŋgʉɔ tɛ nzáne.

²⁴ Á gɔ́ ŋgʉɔ ntáa, páʼ epuɔ Yúda é le tshí á taʼ legʉɔ, ńtswá á gá ntɛ̄ ntsɔp levuʼɔ́ megēm ntɛ́t.

²⁵ Á gɔ́ ŋgʉɔ ntɛ́t, páʼ epuɔ Lóma é le lɔ̄k ntɛ̄ ntswá á gá. Mɛ́ lɛ amɔ̄ʼ aleʼé, ńdɔ̄k metɔ́ ndʉɔ́ʼ á gá, ŋ́gɔ̄ á nzwhíɛ. Á gɔ́ ŋgʉɔ ntɛ́t páʼ á le cʉ́ʼ á méŋ agáʼ, mɛtúa ntshi a a lɔ̄k á gá ŋgʉ̄ɔ á ntshi. Meŋ ndé zók á taʼ aleʼé, ŋ́kó ndáʼ, á atseŋ ntshi.

²⁶ Meŋ ndé ziŋ tɛʼ, ŋ́kó á nziŋɛ́, ntshi é nek á gá, metsɔ́ŋ é nek á gá, epuɔ alāʼ pék é nek á gá, epuɔ pīi é té epuɔ alāʼ pek ɛ́, é nek á gá. Meŋ ndé zápne á nchu lewhʉ̄, á ntē metésɔŋ, ńzápne á nchu lewhʉ̄ á késáatswɛt, ńzápne á nchu lewhʉ̄ á ndo mía ntshi, ńzápne á nchu lewhʉ̄ melaʼ wɔ táŋ‑mela ŋ́gɛ, pɔ́ é epuɔ Yɛɛ́so.

²⁷ Meŋ ndé kɔ́ŋ aziʼne ánɛ mefaʼ. Ŋ́gɔ́ amɔ̄ʼ afʉʼ, ndáʼ té lí. Nzi é záŋ á gá, agāk zá á shhʉ́. Ŋ́gɔ́ amɔ̄ʼ afʉʼ, ḿbúŋ ajū mīi meŋ gɔ epfɛ́t. Efwɔ̄k é kú á gá, meŋ te wɛ̄ nzhó zīi, meŋ gɔ emāaʼ á.

²⁸ Meŋ ndé jʉ́ɔ ŋgʉɔ̄ʼ tɛ záne, meŋ ké ka kím ntsem ɛ́. Ajū mīi á ntē meŋ eleʼé metsem, á si ŋgɔ́ á gá á lefhʉte ánɛ melúŋ epuɔ Yɛɛ́so ntsem.

²⁹ Ŋiŋ a nɔɔ̄ŋ ŋkáa ánɛ mɛnzhɛ Ndém páʼā, á záŋ á gá páʼ meŋ méŋwɛ̄t mé káa lā. Ŋiŋ a whʉʉ̄ ánɛ mefa, á pú nzáŋ á gá tɛʼ.

³⁰ Azi ŋgɔ́ éyi meŋ a ŋia, mbɔ meŋ a lɔk ecū mīi, é tswii á légɛ meŋ soʼneé nnɛ̄t za ŋgyá á esī, tɛ́ eŋia.

³¹ Ndém, á Mɔʼɔ́ Atsyapuɔ yímpɛ Yɛɛ́so, a á si nzhɛ́ɛ á légɛ, meŋ te ntáŋa mela á. Awuʼte a egɔ́ á mbū yí á lemiʼɛ.

³² Meŋ nde gʉ̄ɔ tɛ́ ŋkó á tésɔŋ Damas, ŋwɛ́t alāʼ yīi, Aletas, efɔ tésɔŋ mɛ́t, á le zapáā, á tswi mɛ́ tshíte á menchu tésɔŋ, mbípɛ á gá, ŋ́gɔ̄ á ŋgɔɔ̄ meŋ.

³³ Tɛ́ mɛ́ néŋ á gá á ntē túŋ akelaʼ, ńtɔ́kne ánɛ atɔ̄k akɛ tésɔŋ, ésóʼne á gá á mbe akɛ, ńtshí á nzem mmɔʼ, meŋ vūʼu á yí.