2 Kɔlɛŋte 10 - Eka Eswhī

Pɔ́ɔl a á ega eshúŋɔ á légɛ, yí é nziŋ‑ntō Yɛɛ́so

¹ Meŋ Pɔ́ɔl méŋwɛ̄t, á gá yīi emɔ̄ʼ epuɔ é si ndʉ́ɛ́ ŋ́gɛ, meŋ shʉʉ̄ʼ tɛ ŋkó á tsetsɛlɛ pɛ, ḿbwɛ́ne, ḿbiŋ efhó á tsetsɛlɛ pɛ ŋgʉ̄ɔ, ńcʉ́ʼɛ eshúŋnɛ á mbū pɛ, áa ncɔk cɔké, meŋ á si ndɔ̄kɔ apwɛne mbɔɔ apɔŋɔ́ ntē zīi, Yɛɛ́so a le wɛ̄ɛ, ḿmāʼa ŋghi á mbū pɛ.

² Éswíŋtɛ á wɛ́ ŋ́gɛ, ndɛ́ʼ pɛ eghʉ̄ʉ, meŋ eshʉ̄ʉʼ tɛ ŋkó á tsetsɛlɛ pɛ, ńdɔ̄k ncɔ̄k, éshúŋne á mbū pɛ, páʼ meŋ á si esáŋa á lelɔk ncɔ̄k, éshúŋne té pɔ́k á mbū epuɔ pīi, pɔ́ é si ŋkwāŋa ŋ́gɛ, meŋ á si ŋgē eghʉɛ menu, mbe nnɛ̄t za mé tshónɛ á gá.

³ Á anuúnē, pek é si ŋgɔ́ epuɔ menɔŋ. Táʼ, ŋ́ké nnɔ̄ŋ te ndʉɔ́ʼɔ ncu páʼ, epuɔ ŋgɔŋ puɔ é lʉɔ́ʼɔ épúp ɔ́.

⁴ Tsitsi ncu yīi pek lɔkɔ ndʉɔ́ʼɔ, a te fhɔ́ɔ á mbū ŋiŋnɔŋ ɔ́, á fhɔ́ɔ áa mbū Ndém. Mete é gɔ́ éwú á lelɔk mbík megaŋ mbo Ndém. Pek tsɛɛ́t nchu epuɔ pīi, pɔ́ é si eshúŋɔ epoó‑enu.

⁵ Ḿbík ajūɔ tsem zīi, á lɔkɔ á leŋia, ńtɛ́nnɛ á lezhɛ̄ á Ndém. Ŋ́ghʉ̄, epuɔ é wáʼ mekwaŋte mīi, é ntē pɔ́p, ńjúʼ á mbū Klísto.

⁶ Pɛ metsem e láʼ egɔ́ tɛ enɔŋ epúu ejúʼu nchu Ndém, njhʉ̄ e lɔkɔ ŋkūʼu, á wék á letswā ŋgʉɔ athʉ́ lepé, ánɛ epuɔ pīi, pɔ́ é si ntʉ̄ɛ̄ athū á mbū Ndém.

⁷ Pɛ ejʉ́ɔ ajūɔ tsem páʼ á épúp ndeŋ ndeŋ. Ŋiŋ a nɔŋɔ ncūŋtɛ nzhɛ́ɛ á ntē yí légɛ, yí é ŋiŋ Klísto, á pú ncūŋte nzhɛ́ á taʼ legʉɔ á légɛ, páʼ a á ŋiŋ Klísto lā, pek zeéŋ ŋgɔ́ azék epuɔ Klísto.

⁸ Atsyapuɔ a le yá mete á mbū pek, á lelɔk ŋghʉ̄, pɛ etswhí ánɛ lefɛ̄ nnɛ̄t. É lɛ te á lelɔk mbík á wɛ́ ɛ́. A zi mbú ŋgɔ́ éyi, meŋ nde lɔ̄k mete mɛ́t, ŋ́kāʼte tɛ ntɔ́k ndhʉ, mbɔ esē é té si ŋkúu á gá melaʼ épúp ɔ́.

⁹ Meŋ te si efāʼa á gá á lelɔk mekɛtte mīi, meŋ tíi á mbū pɛ, éfāŋne á wɛ́ ɛ́.

¹⁰ Meŋ ndʉ́ɛ́ páʼā melaʼ mīi, mɛ́ é si ndʉ́ɛ́ ŋ́gɛ, meŋ á si ndɔ̄kɔ áa ncɔ̄k tɛ́ eshúŋnɛ á mbū pɛ té pɔ́k, á ntē mekɛtte. Ḿbiŋ eshʉ̄ʼ tɛ ŋkó á tsetsɛlɛ pɛ, ńcʉ́ʼ á aŋwɛɛ́‑ŋiŋ, ashuŋne zá á pú te zɛ́t azō ɔ́.

¹¹ Ŋiŋ yīi a á si ndʉ́ɛ́ páʼa mɛ́t, a ecuŋte nzhɛ́ á mbɔŋɔ́ á légɛ, ajū mīi pek é lʉ́ɛ́ á ntē akɛtte, áfʉʼ zīi pek te tsetsɛlɛ pɛ ɛ́, pek e láʼ eshʉʼ tɛ ekó á tsetsɛlɛ pɛ, pɛ efhó ánɛ atswhī zék, ńjʉ́ɔ á légɛ, á ndeŋ ndeŋ épúp.

¹² Pek te ŋkwāŋtɛ á wék á letshī á ajʉʼ epuɔ pīi, pɔ́ méŋwɛ̄t é tswii ajū mīi, pɔ́ aziɛ́ ɛ́, ńnɔŋ te efāʼa á lepɛ̄ efʉʼ ánɛ pɔ́p ɔ́. Athū epuɔ mɛ́t á té tshí. Pɔ́ zhɛɛ́ á légɛ, mɛ́ gɔ epɛ́ efʉʼ áa ánɛ pɔ́p, ńzhɛ́ á légɛ, mɛ́ fhoó ánɛ pɔ́p, tɛ́ nzhɛ́ ajū mīi, ŋiŋ a á aziɛ́.

¹³ Ŋ́ké ŋgɔ́ mé pek, mbɔ pek lɔɔ̄k áa afaʼ zīi, Ndém a le tsekné á mbū pek, tɛ́ ŋkāʼte, é ké le zíʼ ndhʉ ɛ́. Pek pɛɛ́ efʉʼ áa ánɛ ndhʉ ŋkāʼ afaʼ yīi, Ndém a le tsekné á mbū pek, páʼ a le ghʉ̄ʉ̄, pek egʉɔ tɛ ŋkó mbɔɔ á alāʼ pɛ.

¹⁴ Pek le wíʼe, pek te shʉ̄ʼ tɛ ŋkó á alāʼ pɛ ɛ́, mbɔ pek é tsetsɔŋɔ eshʉ̄ʼɛ páʼa, ńdɔkɔ nzíʼɛ ndhʉ ŋkāʼ afaʼ wék. Pek le gɔ á kwaʼ megaŋ mvhɔ, á lelɔk ŋke mbɔŋ Klísto, éshʉ̄ʼ á alāʼ pɛ.

¹⁵ Pek te si ŋkāʼtɛ tɛ nzíʼɛ ndhʉ, tɛ á gɔ́ páʼ pek é si ndɔ̄kɔ mefaʼ emɔ̄ʼ epuɔ, ŋ́ŋīa á. A cʉ́ʼɛ épúp, mbɔ pek é si ntsáa, ńnɔŋ nzhɛ́ɛ á légɛ, pɛ etswiʼne efɛ́ nnɛ̄t eyá á mbū Ndém. Púp, afaʼ zék á tsetsɛlɛ pɛ, á etswiʼne ŋgʉ̄ɔ mé mvhɔ, ŋ́ké le zíʼ ndhʉ yīi, Ndém a le kīa ā.

¹⁶ Ŋ́gʉ̄ɔ mé mvhɔ épúp, pek egʉ̄ɔ emɔ̄ʼ mejʉʼ ndɛʼɛ, ńtswī ŋke mbɔŋ éwú. Ŋ́ké le lɔ̄k mefaʼ mīi, emɔ̄ʼ epuɔ é le ghʉ̄ á ŋkāʼ afaʼ pɔ́p, ŋ́kāʼtɛ ɛ́.

¹⁷ Ŋiŋ a nɔŋ mpfēŋɛ á kíkhí yi, á fhó áa ánɛ ajū mīi, Atsyapuɔ a le ghʉ̄ʉ̄, tɛ́ mpfēŋ.

¹⁸ Ŋiŋ yí méŋwɛ̄t é tswiī ajū mīi, yí é aziɛ́ páʼā, Atsyapuɔ a te á yí véŋ. A veéŋ áa ŋiŋ yīi, yí Atsyapuɔ mé tswiī ajū mīi, ŋgaŋ a á aziɛ́.