2 Kɔlɛŋte 1 - Eka Eswhī

Atsaʼte

¹ Meŋ Pɔ́ɔl nziŋ‑ntō Yɛɛ́so Klísto, páʼ Ndém a le kɔ̄ŋ épúp mé tíi akɛtte jʉɔ páʼa. Pek méŋ mɔ́ yímpɛ Timotɛ mé tíi, ŋ́gyáa á mbū alúŋ epuɔ Ndém, á tésɔŋ Kɔlɛŋte, mbɔɔ á mbū epuɔ Ndém ntsem pīi, pɔ́ puú ŋgɔ́ á ntē apak alāʼ zīi, mɛ́ tɔ́ŋɔ lɛ Akayi.

² Ŋ́gɛ Mɔʼɔ́ yímpɛ Ndém pɔ́ Atsyapuɔ Yɛɛ́so Klísto, e elɛ ŋghʉ̄ anu mbɔŋ té ndhʉ ánɛ pɛ, ŋ́ghʉ̄ pɛ enáŋ mé apwɛne.

Pɔ́ɔl a á ega eshúŋɔ ŋgʉɔ̄ʼ zīi, a le jʉ́ɔ̄, Ndém á ké ntswíte

³ Awuʼte a egɔ́ á mbū Ndém, á Mɔʼɔ́ Atsyapuɔ yímpɛ Yɛɛ́so Klísto. Á Mɔʼɔ́ yīi, atsāmezeŋɛ ntsem á fhoó á mbū yí. Á Ndém yīi, a zhɛɛ́ á leswīte ntē ŋiŋ ntsem.

⁴ A switeé ntē yímpɛ, éfʉʼ metsem yīi, ḿpɛ é ntē ŋgʉɔ̄ʼ. Ńdɔkɔ efāʼa ŋ́gɛ, ḿpɛ efhó ánɛ páʼ, a á swíte ntē yímpɛ lā, ŋ́kūʼ á leswīte ntē epuɔ metsem pīi, pɔ́ é azɔ́p á ntē ŋgʉɔ̄ʼ.

⁵ Ḿpɛ é si njʉ́ɔ ŋgʉɔ̄ʼ efʉʼ metsem, ńdeŋ ndeŋ páʼ Klísto a le jʉ́ɔ azí épúp. Ndeŋ ndeŋ épúp, Ndém a á si nzápa ánɛ Klísto, ḿbúu eswítɛ ntē yímpɛ efʉʼ metsem.

⁶ Pek é si njʉ́ɔ ŋgʉɔ̄ʼ páʼā, á gɔ́ áa lelɔk ŋghʉ̄, Ndém á swíte ntē wɛ́, ŋ́ghʉ̄ pɛ etswɛ́t. Ndém a á si eswíte ntē wék páʼā, ńdɔkɔ efāʼa ŋ́gɛ, pek eswíte ntē wɛ́ azɛ́, tɛ́ pɛ elɔk ŋkūʼ á wɛ́ á lekwɛ̄t ntē, ánɛ ŋgʉɔ̄ʼ zīi pɛ jʉ́ɔɔ, ńdeŋ ndeŋ páʼ, pek méŋwɛ̄t é si njʉ́ɔ azék épúp.

⁷ Ajū mīi pek é si ntsáa, ńnɔŋ nzhɛ́ɛ á légɛ, á épúp á mbū pɛ, á si ŋgɔ́ á légɛ, pɛ etswiʼne efɛ́ nnɛ̄t ŋgyá á mbū Yɛɛ́so. Pek é si nzhɛ́ɛ á légɛ, ḿpɛ é si njʉ́ɔ á taʼ ŋgʉɔ̄ʼ, ńnɔŋ nzhɛ́ɛ á légɛ, Ndém a á si eswítɛ ntē wɛ́, páʼ a á si eswítɛ ewék.

⁸ Epɔ̄ memía, pek é si ŋkɔ̄ŋɔ ŋ́gɛ, pɛ ezhɛ́ ntií ŋgʉɔ̄ʼ zīi, pek le jʉ́ɔ̄, á apak ŋgɔŋ Azíi. Ŋgʉɔ̄ʼ mɛ́t, e le zɛ̄t á wék tɛ ntɔ́k ndhʉ, tɛ pek te zɛ́t ŋkūʼ ɔ́. Ŋ́gɔ́ gɔ́ɔ, tɛ pek te zhɛ́ á légɛ, pek gɔ ezéŋ nnáŋ á ŋgɔŋ ɔ́.

⁹ Ńcʉ́ʼɛ njʉ́ɔ á gɔ́ áa páʼ, mɛ́ é ndáʼ nzápa á légɛ, pek gɔ á ŋkwhʉ́tɛ lā. Á lɛ épúp páʼā, ńdɔkɔ nzíʼnɛ á wék á legɔ̄ le sáŋ ánɛ mete mék méŋwɛ̄t ɛ́, ńcʉ́ʼɛ esáŋa áa ánɛ Ndém páʼ, a ghʉʉ̄, mɛ́ zím ánɛ lewhʉ̄.

¹⁰ Yí mé le kú á wék á mbū ejʉɔ ntií lewhʉ̄ mɛ́t, ézéŋɛ enáŋa ekúu á wék épúp. Pek kʉʉ̄ŋ mbú ḿmāʼ ŋgua zek ŋgyá á mbū yí. A a náŋa ezéŋɛ ekúu á wék á mbū lewhʉ̄.

¹¹ Pɛ azɛ́, e elɔ̄k á leswīŋte Ndém ánɛ athū zék, ńnéŋ azɛ́ apū éwú. Púp, Ndém a ejúʼ aswiŋte zīi, epuɔ tɛ nzáne é ghʉ, ḿbwɛ̄t á mbū pek. Epuɔ tɛ nzáne e epiŋ esyákne á yí, ánɛ azék athū.

Pɔ́ɔl a á tsɔ́ʼte á leziŋ yīi, a á nnɔŋ ŋgʉ̄ɔ mé éwú

¹² Ajū mīi ḿpek lɔkɔ ŋkāʼtɛ, á si ŋgɔ́ páʼ akwaŋte zék á té si ŋŋāka á wék ɛ́. Pek lɔɔ̄k á ndeŋ ndeŋ pɔ́ anuúnē zīi, á fhɔ́ɔ á mbū Ndém, tɛ́ nnáŋ á ŋgɔŋ ega. Ńtswhi ŋgwɛ̄ á ndeŋ ndeŋ pɔ́ anuúnē mɛ́t, ánɛ pɛ. Ŋ́gē ewɛ épúp, á té fhɔ́ɔ ánɛ azhɛ̄‑anu ŋiŋnɔŋ ɔ́, á fhɔ́ɔ áa ánɛ apɔŋɔ́ ntē te ndhʉ zīi, Ndém a wɛɛ̄ ánɛ pek.

¹³ Pek ka tí amɔ̄ʼ azō ŋgyá á mbū pɛ, té gɔ́ áa azi pɛ é si ntɔ́ŋɔ njúʼu ú. Meŋ á ké ŋkwāŋ ŋ́gɛ, pɛ é si nchʉ́ɛ nnɛ̄t njúʼu ajū mīi, pek tíi.

¹⁴ Azi pɛ kɛ te júʼ tɛ ntsékne ɛ́, a ajʉɔ páʼa: a láʼ aleʼé zīi, Atsyapuɔ yímpɛ Yɛɛ́so, a piŋɛ nzem, pek elɔ̄k á wɛ́ ŋkāʼte, pɛ elɔ̄k á wék ŋkāʼte.

¹⁵ Meŋ nde nɔ̄ŋ ncuŋtɛ nzhɛ́ɛ épúp, akwaŋte mɛ́t á tshóne á gá, meŋ nɔ̄ŋ ŋkɔ̄ŋɔ á gá á lezi mvhɔ, éshʉ̄ʼ á alāʼ pɛ, ŋgɔŋ é zéŋ mbɔ̄ŋ á wɛ́ mmɔʼ legʉɔ,

¹⁶ tɛ́ eshʉʼ efhó á alāʼ pɛ, ŋgʉ̄ɔ mé Maseduan, ḿbiŋ efhó á Maseduan, ńzéŋ eswáŋ nnɛ̄t á alāʼ pɛ, tɛ́ pɛ etswíte á gá á legʉɔ mé Yudéa.

¹⁷ Meŋ nde gē ekwaŋte épúp, ńcuŋtɛ nzhɛ́ɛ ajū mīi, meŋ ghʉɛ. Meŋ ndɛ te ŋkwāŋte menu páʼ epuɔ ŋgɔŋ puɔ, tɛ ŋgɔ́ yīi meŋ gɔ egē evéŋ anu, ńdɔkɔ ndʉ̄ʼɛ ɛ́.

¹⁸ Anu zīi meŋ shúŋɔ, meŋ tshií á mvhɔ Ndém tɛ́ eshúŋɔ. Anu zīi pek le shúŋ á wɛ́, á té si ŋgɔ́ á ŋŋ, ńzéŋ ŋgɔ́ á ŋ́ŋŋ́ ŋ́,

¹⁹ melaʼ mīi, Yɛɛ́so Klísto Méŋ Ndém, páʼ pek Silvɛŋ mbɔɔ Timotɛ é le shʉ̄ʼ á alāʼ pɛ, éshúŋ á wɛ́ á ŋiŋ yīi, a á ewiɛ́ lā, a te si ŋgɔ́ á ŋŋ, ńzéŋ ŋgɔ́ á ŋ́ŋŋ́ ŋ̄, a á efʉʼ metsem, ŋ́gɔ́ áa ŋŋ.

²⁰ Ajūɔ tsem zīi Ndém a le laʼnēē, á le zapá ánɛ Klísto tɛ́ mbō. Púp, ḿpɛ zeéŋ nzápa ánɛ Klísto mɛ́t, tɛ́ mvéŋ ŋ́gɛ, Á ÉPÚP á mbū Ndém, ńdɔkɔ ŋgūʼtɛ á yí.

²¹ Ndém mé le tsɔ́ʼ á yímpɛ, ńdɔk ŋghʉ̄ epuɔ pí, yí mé si ŋghʉ̄ɛ pek mbɔɔ pɛ, é kúʼtɛ á Klísto mé taʼ ntē.

²² Yí yīi a le tshí ayiŋne zí ánɛ pímpɛ, a le néŋ Azwakne zí á ntē pímpɛ, ńdɔkɔ ntswī á légɛ, ŋkwa mecū mīi, a le laʼnē á leyā mé pímpɛ, a a láʼ eyá.

²³ Ajū mīi á le ghʉ̄ tɛ meŋ te á Kɔlɛŋte shʉ̄ʉʼ, a ajʉɔ páʼa: meŋ nde nɔ̄ŋ te ŋkɔ̄ŋɔ á gá á leghʉ, ntē wɛ́ é záŋ á. A gɔ́ éyi meŋ ndátɛ, Ndém á lɛ nzwhí á gá.

²⁴ Á té ndɔ̄kɔ ŋ́gɛ, pek e ŋyɛt á wɛ́ ŋyɛt, tɛ́ pɛ efɛ́ nnɛ̄t ŋgyá mé Klísto ó. Pek lɔkɔ efāʼa á lenēŋ azék apū, ánɛ lepɔŋ tsɛ́. Pɛ é si ncuŋtɛ efíɛ́ nnɛ̄t, ŋ́gyáa á mbū Klísto.