1 Timotɛ 6 - Eka Eswhī

Epuʼ é pɔŋteé á lejūʼ nchu memɔʼɔ́ pɔ́p

¹ Epuɔ metsem pīi pɔ́ é epuʼ, pɔ́ pɔŋteé á leghʉ mekuʼ tɛ ntsékne, á mbū epuɔ pīi é le zó á wɔ́p, tɛ́ ŋiŋ a á le shúŋne tépɔŋ, ánɛ Ndém ɛ́, ńzéŋ le anu zīi ḿpɛ zíʼnɛ waák.

² Epuʼ tsīi, epuɔ pīi é le zó á wɔ́p, é epuɔ Yɛɛ́so, ndɛ́ʼ pɔ́ lɔk á légɛ, pɔ́ a memɔʼɔ́ pɔ́p mɛ́t, é epɔ̄ memía á nzem Yɛɛ́so, ŋ́gwák á wɔ́p. A cʉ́ʼɛ épúp, pɔ́ chʉ́ nnɛ̄t njúʼ nchu wɔ́p, melaʼ mīi memɔʼɔ́ pɔ́p mɛ́t, é si ŋgɔ́ epuɔ Yɛɛ́so, pɔ́ a pɔ́p é lɔk ŋgɔ́ epɔ̄ memía, á ntē ŋkɔŋne. Pɔ́ elɔ̄k épúp, ńchʉ́ nnɛ̄t njúʼ nchu wɔ́p. Anu zīi o pɔŋteé á lezīʼne epuɔ, ńzéŋ ntswɛ̄te á wɔ́p á lekūʼte, a ajʉɔ páʼa.

Wɔ zíʼne epuɔ anu ndɛʼɛ, é temneé ethū epuɔ

³ Ŋiŋ yīi a á si nzíʼnɛ epuɔ anu ndɛʼɛ, ńnɔŋ te ŋkúʼtɛ á kwaʼ menu mīi, Atsyapuɔ yímpɛ Yɛɛ́so Klísto a le ziʼné ɛ̄, ńnɔ̄ŋ te nzīŋɛ ndeŋ ndeŋ páʼ menu mīi, ḿpɛ zíʼnɛ epuɔ ánɛ lenāŋ páʼ Ndém á si ŋkɔ̄ŋɔ, é si ndʉ́ɛ́ épúp ɔ́,

⁴ á páʼā, mbɔ leŋia a lē mbú njhʉ́ á yí. Ŋgaŋ a puú te tsɔ azō zhɛ́. Leshūŋ eswaáŋ eshuŋne pɔ́ lezɔŋ ashuŋne, é mbū ŋgaŋ tɛ ŋgɔ́ áa agɔ. Letshī ntē ánɛ ajūɔ ŋiŋ, ŋ́ghʉ̄ á aŋak, mbɔɔ lezɔte epuɔ, pɔ́ letā anu, é fhó áa ánɛ ntií atswhī jʉɔ mɛ́t.

⁵ Ńzéŋ mbú ŋ́ghʉ̄ mbɔɔ á letɔʼne azō, á tsetsɛlɛ pɔ́p efʉʼ metsem, melaʼ mīi akwaŋte zɔ́p á té pɔŋ. Pɔ́ té zhɛ́ ajū mīi á anuúnē ɛ́. Pɔ́ kwaāŋ ŋ́gɛ legɔ̄ á ŋiŋ Yɛɛ́so, é si ŋgɔ́ emɔ̄ʼ eshhʉ̄, á lelɔk efāʼ ajū mīi a kó á apa.

⁶ Á ké nzi ŋgɔ́ anuúnē á légɛ, ŋiŋ a gɔ́ɔ á ŋiŋ Ndém, mbɔ ŋgaŋ a wɛɛ̄ lewūʼ, éyi a gɔ́ éyi, ŋgɔŋ e pɔɔ̄ŋ á ŋgaŋ ánɛ ajū mīi, a wɛ̄ɛ.

⁷ Á zi ŋgē egɔ́ mbɔ, ḿpɛ lɛ te gē eshʉʼ á ŋgɔŋ ega, ŋ́gwɛ̄ amɔ̄ʼ azō ɔ́. Ndeŋ ndeŋ épúp, ḿpɛ eláʼ ege epiŋ nzem, ḿpɛ le azō lɔk.

⁸ Páʼ ḿpɛ ké mbiŋ ŋgwɛ̄ etsō lejhʉ̄ mbɔɔ menzhó lā, ḿpɛ pɔŋteé á lekāk, melaʼ épúp.

⁹ Ḿbiŋ ŋgɔ́ mé epuɔ pīi, pɔ́ é si ŋkɔ̄ŋɔ á wɔ́p á lewɛ atʉtʉ ŋkāp, mbɔ Sɛ́ta a lɛɛ̄ ŋgē etáte á wɔ́p, pɔ́ whʉ, páʼ na a whʉɛ ánɛ letā lā. Ntií ntiī ekwaŋte tepɔŋ, e é ntē pɔ́p, ékwaŋte te methū, ékwaŋte tsīi, é tseŋteē á ŋiŋ tseŋte, ńtshóne epuɔ menɔŋ, ńnéŋ á ntē ŋgʉɔ̄ʼ á lemiʼɛ,

¹⁰ melaʼ mīi, ntií ntiī menu tepɔŋ ntsem, e fhoó áa ánɛ letshī ntē ánɛ ŋkāp. Emɔ̄ʼ epuɔ é le kāŋ nzhɛ jʉɔ mɛ́t, ḿbiŋ mbú te zéŋ efɛ́ nnɛ̄t ŋgyá mé Yɛɛ́so ó. Púp, pɔ́ é efʉʼ metsem, ńjʉ́ɔ ŋgʉɔ̄ʼ, tɛ á gɔ́ páʼ mɛ́ sɔp á puʼ, á ntē pɔ́p lā.

Pɔ́ɔl a á ega ŋgyáa á nzoknzem ntekné á mbū Timotɛ

¹¹ Ŋ́ké ŋgɔ́ mé wu, wu ŋiŋ Ndém, mbɔ o pɔŋteé á wú á lekʉ ecʉɔ etsō mɛ́t. Ŋ́gɔ́ efʉʼ metsem, éfāʼ á wú á legɔ̄ ndeŋ ndeŋ á mvhɔ Ndém. Ńnáŋ páʼ Ndém a á si ŋkɔ̄ŋɔ, éfɛ́ nnɛ̄t ŋgyá á mbū Yɛɛ́so, ŋ́kɔ̄ŋ epuɔ menɔŋ. Ŋ́kāk ete á nzem Ndém, ńdɔ̄k apwɛne tɛ́ ŋghʉ̄ emú menu ntsem.

¹² Lʉɔ́ʼ á mbɔŋ ncu yīi, wɔ fɛ́‑nnɛ̄t ŋgyá mé Yɛɛ́so, é lʉɔɔ́ʼe. Gɔ́ efʉʼ metsem, ŋ́kúʼte á wú á lefū ntā á lezēŋ Ndém. Ndém a lɛɛ́ ntɔ́ŋɔ á wú páʼā, melaʼ épúp. Kúʼte á wú á lefū ntā á lezēŋ Ndém, páʼ o le tshí á mvhɔ atʉtʉ epuɔ, ḿvéŋ épúp.

¹³ Meŋ á tshí á mvhɔ Ndém yīi, yí mé ghʉʉ̄, ajūɔ tsem á gɔ́ éwú, mbɔɔ á mvhɔ Yɛɛ́so Klísto, páʼ a le tshí á mvhɔ Pɔ́ŋse Pilat eshúŋ á anuúnē, ńdé mé wu ŋ́gɛ:

¹⁴ ziŋ té alɔ́ʼ, páʼ anu tsem zīi Ndém a leé, á si nzɛ́ttɛ épúp. Te ghʉ̄ʉ ajū mīi, mɛ́ e lɔk ethú alɔ́ʼ jú. Kúʼte ecū muɔ mɛ́t, tɛ Atsyapuɔ yímpɛ Yɛɛ́so Klísto, a eláʼ mbīŋ nzem.

¹⁵ A a láʼ epiŋ nzem ánɛ afʉʼ zīi, Ndém a le zapáā. Ndém mɛ́t, a á ŋwɛ́t lepɔŋ, ŋ́gɔ́ ndaʼ Lé‑Épúp ŋ́gɔ́ á Efɔ mefɔ, ŋ́gɔ́ á Atsyantsɔp.

¹⁶ Ŋ́gɔ́ ndaʼ ŋiŋ yīi, a á te kwhʉ́. A á ndaʼ ŋiŋ yīi, a naáŋ ánɛ ajʉʼ efók foké, tɛ ŋgɔ́ yīi, ŋiŋ a gɔ le tshóte nnɛ̄t mbátɛ ɛ́. Á ŋiŋ yīi, ŋiŋnɔŋ a laá njʉ́ɔ á yí í, ḿbiŋ ŋgɔ́ yīi, a zi ŋgɔ́ a á le á yí jʉ́ɔ. Awuʼte pɔ́ mete ntsem e egɔ́ á mbū yí, á lemiʼɛ. Á épúp.

Ntekné á mbū megaŋ lewūʼ

¹⁷ Éshʉ̄ʼ ánɛ epuɔ pīi, pɔ́ é megaŋ lewūʼ á ŋgɔŋ ega, tswi á mbū pɔ́p ŋ́gɛ, ndɛ́ʼ pɔ́ ŋia. Ŋ́gɛ ndɛ́ʼ pɔ́ tshí ntē wɔ́p ánɛ lewūʼ, melaʼ mīi é gɔ́ ezéŋ mmī. Ŋ́gɛ pɔ́ etshí ntē wɔ́p áa ánɛ Ndém. Yí mé yaá á yímpɛ etsō mbɔŋ tɛ nzáne, ŋ́gɛ e etswíte á yímpɛ.

¹⁸ Ŋ́gɛ pɔ́ eghʉ̄ anu mbɔŋ, ŋ́ghʉ̄ mefaʼ membɔŋ tɛ e ezáne. Apū zɔ́p a ezāŋne á leyā epuɔ azō. Ŋ́gɛ pɔ́ egāp azō, ŋ́gyá azi emɔ̄ʼ epuɔ.

¹⁹ Pɔ́ ghʉɛ épúp, mbɔ pɔ́ lɔkɔ ŋkʉ́ʼɛ á mbɔŋ ntenté lewūʼ tsɔ́p, á athʉ́ lephū, tɛ́ piŋ enáŋ páʼ Ndém a á si nzɛ́ttɛ.

Atsaʼte á lelɔk nzōko

²⁰ Timotɛ ga, pá á wú á lelɔk ajū mīi, Ndém a ke tsekné á mbū wu, ŋghʉ̄ mega. Pá meshuŋne mīi é cʉ́ʼɛ á letswīte á ŋiŋ, é tɔʼ epuɔ á lefɛ̄ nnɛ̄t ŋgyá á mbū Ndém. Ḿbá meshuŋne mīi, epuɔ é gē eshúŋ, ńnɔŋ ŋkwāŋa ŋ́gɛ, ashuŋne megaŋ azhɛ̄‑anu.

²¹ Emɔ̄ʼ epuɔ é le kwāŋ ŋ́gɛ, pɔ́ é megaŋ azhɛ̄‑anu ánɛ ejʉɔ ntií mɛ́t, púp, pɔ́ té zéŋ efɛ́ nnɛ̄t ŋgyá á mbū Yɛɛ́so ó. Meŋ a ge emakne, éswíŋte gɛ, Ndém a elɛ ŋghʉ̄ anu mbɔŋ tɛ́ ndhʉ á mbū pɛ.