1 Timotɛ 5 - Eka Eswhī

Ntií zīi Timotɛ a pɔŋteé á lelɔk nnáŋ á nnɔ epuɔ Yɛɛ́so

¹ Nzwiŋ ŋiŋ a ghʉɛ ajū mīi á ka pɔ̄ŋ ɔ́, ndɛ́ʼ o eshúŋne á mbū yí ncɔ́k cɔké. A cʉ́ʼɛ épúp, o eshúŋne á mbū yí, páʼ o shúŋnɛ á mbū mɔʼɔ́ wu lā. Jʉ́ɔ́ epɔ̄ ŋgwɛso, páʼ metsiʼnzem pú lā.

² Ńjʉ́ɔ wɔnzwí pīi pɔ́ é tswhí, páʼ memía pú lā. Ńjʉ́ɔ ŋgwɛŋgɔ, páʼ metsiʼnzem pú lā, ndɛ́ʼ o ewɛ̄ɛ akwaŋte ndɛʼɛ ánɛ pɔ́p.

Ntí zīi Timotɛ a pɔŋteé á lelɔk njʉ́ɔ mepfók

³ Ŋ́ghʉ̄ mekuʼ á mbū mepfók. Á mpfók yīi o ó zhɛ́ á légɛ, ntɔ̄ zi e te éwú ú.

⁴ Taʼ mpfók menzwí a piŋɛ ŋgwɛ̄ ewɔŋkhʉ̄, ká ewɔŋkhʉ̄ ewɔŋkhʉ̄, mbɔ pɔ́ mé pɔɔ́ŋ á lezi mvhɔ, ńzíʼne á lenāŋ á ŋgyā pɔ́p, páʼ Ndém a á si ŋkɔ̄ŋɔ. Ńtúŋne memɔʼɔ́ pɔ́p ká memɔʼɔ́ mɔʼɔ́ pɔ́p, ńdeŋ ndeŋ páʼ memɔʼɔ́ pɔ́p, é le tuŋné á wɔ́p azɔ́p épúp. Á páʼa ŋgɔ́ á ajū mīi, á pɔɔ̄ŋ á Ndém.

⁵ Ŋ́gɔ́ mé menzwí yīi ntɔ̄ zi e te éwú ú, á menzwí yīi a puú nnáŋ yíléyī, mbɔ a saáŋ azí anu, ńtsóʼne áa ánɛ Ndém. Ŋ́kāk ete ezokó pɔ́ etsōʼ á leswīŋte ŋ́gɛ, Ndém a etswíte á yí.

⁶ Ḿbiŋ ŋgɔ́ mé mpfók yīi, a kɔɔ̄ŋ á leghʉ áa páʼ mbe nnɛ̄t zi, e é si nzɛ́ttɛ á yí, mbɔ a lē ndáʼ ŋkwhʉ́, tɛ azi ŋgɔ́ éyi, a zɛɛ́t nnáŋ á ŋgɔŋ.

⁷ Á páʼa ŋgɔ́ anu zīi, o pɔŋteé á leshūŋ á wɔ́p, tɛ́ pɔ́ lɔk ŋgɔ́ epuɔ pīi, mɛ́ té si ndāʼa á wɔ́p ɔ́.

⁸ Ŋiŋ a gɔ te túŋne memɔʼɔ́ pí, ńtswhi ntúŋne epuɔ pīi, pɔ́ é mba yí í, mbɔ ŋgaŋ a á páʼa, ńdɔkɔ te nzīŋɛ ánɛ mekhu Ndém ɛ́. Anu ŋgaŋ, á pú mbék ńtɔ́k anu ŋiŋ yīi, a laá nzi efɛ́ nnɛ̄t ŋgyá á mbū Yɛɛ́so ó.

⁹ O nɔŋ ŋgɔ̄ á ntí lezēŋ menzwí, ánɛ nnɔ mepfók pīi, mɛ́ gʉɔ mé ntswíte pɔ́p, á gɔ á menzwí yīi, a á tswhí, tɛ ŋgwɛ̄ ajūɔ ŋguʼ megēm ntokó, mbɔ a le zhɛ́ áa ndaʼ ndō yi.

¹⁰ Á mbɔŋ ŋ́gɛ a egɔ́ á menzwí yīi, mɛ́ zhɛɛ́ á yí melaʼ mefaʼ membɔŋ mí. Á menzwí yīi, a le zhɛ́ á lekɔ̄ʼte ewɔŋkhʉ̄ pí, ńzhɛ́ á lekōkne á ŋge. Á menzwí yīi, a soʼneé nnɛ̄t, ésōk mekhu epuɔ Yɛɛ́so, ńtswíte megaŋ ŋgʉɔ̄ʼ. Á menzwí yīi, a á efʉʼ metsem, ŋ́ghʉ̄ mefaʼ membɔŋ.

¹¹ Ŋ́gɔ́ mé wɔnzwí pīi, pɔ́ ke gē ecʉ́ʼ mepfók, ńzɛ́t ewɔŋkhʉ̄, te tí nzēŋ mɔ́p, melaʼ mīi anu lezēŋ ndá ŋgyā, á náŋa tɛ ŋkɔ́ʼ á athū pɔ́p, mbɔ pɔ́ e wáʼ afaʼ zīi, pɔ́ ke nɔ̄ŋ ŋghʉɛ á nzem Klísto, égʉɔ elá ŋgyā.

¹² Púp, élɔkɔ ewhʉɛ mefa melaʼ mīi, pɔ́ é kúmne anu zīi, pɔ́ le zī mvhɔ, ḿvéŋ á leghʉ á mbū Klísto.

¹³ Mɛ́ wíʼe ntí nzēŋ mɔ́p, mbɔ pɔ́ e cʉ́ʼɛ elɔ́ŋne lɔŋné, élɛ ezi á letɔ̄kte á memba memba. Pɔ́ le lɛ ndɔ́ŋne lɔŋné ndaʼ á, ézéŋ enɔŋ esɛ́ʼɛ epuɔ, ŋ́gɔ́ wɔ sia‑nchu. Éshúŋ menu mīi, é té á wɔ́p cʉte.

¹⁴ Púp tɛ́, meŋ á lé ŋ́gɛ, mepfók wɔnzwí pīi, pɔ́ zɛɛ́t ewɔŋkhʉ̄, pɔ́ ezéŋ ndá ŋgyā, ńzhíte ewɔŋkhʉ̄, ńtúŋne ŋgyā zɔp. Pɔ́ le yá eshhʉ̄ á mbū megaŋ mbo, á lesɛ̄ʼ á yímpɛ ɛ́.

¹⁵ Meŋ ndʉ́ɛ́ páʼa melaʼ mīi, lelʉɛ mepfók wɔnzwí pīi, pɔ́ zɛɛ́t ewɔŋkhʉ̄, é kʉʉ̄ŋ efhó á nzem Ndém ntó, ńcʉ́ʼɛ ntsɔ́ʼɔ áa akhu Sɛ́ta.

¹⁶ Ŋiŋ Yɛɛ́so eyi menzwí, a wiɛ mepfók wɔnzwí ánɛ atseŋ ŋgyā zí, á túŋne á wɔ́p á mbɔŋɔ́. A á le tsékne aziɛ́ apiʼ, á mbū alúŋ epuɔ Yɛɛ́so ó. Púp, ńdɔk ŋgyá eshhʉ̄, á mbū alúŋ epuɔ Yɛɛ́so, á letūŋne mepfók pīi, pɔ́ te ntɔ̄ anuúnē wɛ.

Ntí zīi Timotɛ a pɔŋteé á lelɔk njʉ́ɔ epɔ̄ melʉɛ

¹⁷ Éshʉ̄ʼ ánɛ epɔ̄ melʉɛ pīi, pɔ́ tshií á athū mvhɔ ánɛ meŋgyā alúŋ epuɔ Yɛɛ́so, á nɔŋ nzɛ́ttɛ ŋ́gɛ, mɛ́ etúŋne á wɔ́p á mbɔŋɔ́. Ńtswhi ntúŋne epuɔ pīi pɔ́ neéŋ ntē wɔ́p, á leshūŋ anu Ndém, á lezīʼne epuɔ á mɛnzhɛ Ndém.

¹⁸ Aŋwaʼne Ndém á si nzi ndʉ́ɛ́ ŋ́gɛ: «Te néŋ á kwáŋ á nchu efɔŋ zīi, e é si nnēŋɛ mekō, tɛ mɛ́ ecʉ́ʼɛ efʉɔ́k fʉɔké. » Á zeéŋ ndé ŋ́gɛ: «Ŋgaŋ afaʼ a pɔŋteé á lewɛ ntsɔʼɔ́‑afaʼ yí. »

¹⁹ Ŋiŋ a shʉʼɛ eswīŋ á taʼ mɔ́ ndʉɛ á mbū wu, o ezɛ́t té júʼ nchu epuɔ mémpīa, ká epuɔ métɛ́t, ndɛ́ʼ o elɔ̄ɔk ntɔ́ŋ azō.

²⁰ Mɔ́ ndʉɛ a faa azō, o etshí á mvhɔ alāʼ, ŋ́kyákne á yí, ńzhɛ́ páʼ emɔ̄ʼ epuɔ e jʉ́ɔ épúp, épɔ́ke.

²¹ Meŋ á tshí á mvhɔ Ndém, mbɔɔ á mvhɔ Yɛɛ́so Klísto, mbɔɔ á mvhɔ mecɔʼ Ndém, páʼ Ndém a lē ŋkāŋ á wɔ́p, éswíŋte á wú ŋ́gɛ, o elɛ ŋkúʼte menu muɔ mɛ́t mīi, meŋ á shúŋ á wú la, té tɛʼte á ŋiŋ, té wɛ epií‑enu.

²² Ndɛ́ʼ o egákne nzápa mbū á athū ŋiŋ, ńdɔk ntsékne afaʼ á mbū yí. Zi mvhɔ, ńtsāʼ menaŋá ŋgaŋ á mbɔŋɔ́, ḿbɔ́k á ŋgaŋ á leghʉ, pɛ yí é zéŋne mefa mí. Pá ajūɔ tsem zīi, á gɔ etsēŋte á wú.

²³ Ndɛ́ʼ o lɛ nzéŋ nnú áa ntshi ndaʼ. Nú á méŋ agáʼ meluʼ, melaʼ levem cú tsīi, é gɛ ŋgēnɛ á wú lā, púp, o ó le zéŋ ŋgɔ̄tɛ ɛ́.

²⁴ Emɔ̄ʼ epuɔ é éwú, ŋ́ghʉ̄ mefa, mɛ́ lɛ njʉ́ɔ mé menēk, tɛ mɛ́ té zóko ŋŋāka á wɔ́p ŋake, tɛ́ nzhɛ́ ɛ́. Emɔ̄ʼ epuɔ é ghʉ mefa, mɛ́ láʼ ŋŋāk á wɔ́p, tɛ́ nzhɛ́.

²⁵ Á zeéŋ ŋgɔ́ ndeŋ ndeŋ épúp, ánɛ mefaʼ membɔŋ. O ghʉʉ̄ mefaʼ membɔŋ páʼā, mɛ́ jʉ́ɔ mé menēk. Mefaʼ membɔŋ mīi mɛ́ ka lɔ̄k menēk njʉ́ɔ ɔ́, e piŋɛ nzī ŋgɔ́ é le lʉɔ̄ne tɛ ndaʼ á.