1 Timotɛ 4 - Eka Eswhī

Epuɔ pīi pɔ́ zíʼnɛ menu ndupte lupte

¹ Azwakne Ndém á cuŋteē ndé ŋ́gɛ: a fú egɔ́ ánɛ mezoknzem eleʼé, emɔ̄ʼ epuɔ é le zéŋ fɛ́ nnɛ̄t ŋgyá á mbū Yɛɛ́so ó. Pɔ́ ecʉ́ʼɛ nnéŋɛ ntē wɔ́p áa ánɛ mesī, mégaŋ mepɔp. Ńcʉ́ʼɛ nnéŋɛ athū zɔ́p áa ánɛ anu zīi, mesī é tshónɛ epuɔ menɔŋ, pɔ́ zíʼnɛ.

² Epuɔ puɔ mɛ́t e shʉʼ ecʉ́ʼe, megaŋ ŋkɔŋ menēk, ŋ́gɔ́ megaŋ mela, é eghʉ, pɔ́ efā nzhɛ. Megaŋ ŋkɔŋ menēk mɛ́t, é si ŋgɔ́ epuɔ pīi, athū zɔ́p á lē mbék, páʼ mɛ́ tɔɔ azō á mmók tɛ á pékɛ lā, tɛ ŋgɔ́ yīi, akwaŋte zɔ́p á nɔŋ ntswáa á wɔ́p, pɔ́ le zéŋ nzhɛ́ ɛ́.

³ Megaŋ mela puɔ mɛ́t, é si ntáŋa mela ŋ́gɛ, ndɛ́ʼ mɛ́ zéŋ ndá ŋgyā. Ŋ́gɛ ndɛ́ʼ mɛ́ zéŋ mpfɛ́t emɔ̄ʼ etsō lejhʉ̄, tɛ́ mbɔ Ndém a le ké ŋghʉ̄ etsō mɛ́t ŋ́gɛ, epuɔ pīi é ziŋɛ ánɛ mɛnzhɛ yi, épuɔ pīi pɔ́ cuŋteē ŋkúʼte ŋke mbɔŋ páʼ é anuúnē, e egē epfɛ́t, ńnɔŋ esyáknɛ á yí.

⁴ Ajūɔ tsem zīi Ndém a le ghʉ̄ʉ̄, á puú ŋgɔ́ áa mbɔŋ. Amɔ̄ʼ ajū mīi mɛ́ gɔ ewáʼ, á té éwú ú. Á si ŋké nzɛ́ttɛ ŋ́gɛ, mɛ́ esyákne á Ndém ánɛ ajū mīi, a á yá á mbū pímpɛ.

⁵ Anu zīi Ndém a le lé á ntē aŋwaʼne yí, mbɔɔ aswiŋte, á ghʉʉ̄, ajūɔ tsem á cʉ́ʼ mbɔŋ á mbū yí.

Mbɔŋ ŋgaŋ afaʼ Yɛɛ́so Klísto

⁶ Shúŋ menu muɔ mɛ́t ntsem, á mbū epɔ̄ memía, púp, ńdɔk ŋgɔ́ á mbɔŋ ŋgaŋ afaʼ Yɛɛ́so Klísto. Ńzīŋ páʼ ashuŋne Ndém zīi, ḿpɛ kuʼteé tɛ á te, á si ndʉ́ɛ́ épúp. Ŋ́kúʼte menu ntsem mīi, mɛ́ ke ziʼné á wú.

⁷ Ḿbiŋ ŋgɔ́ mé menu ŋgiŋte yiŋté, mbɔ é gɔ́ áa menu te athū, é té tswíte á lefɛ̄ nnɛ̄t ŋgyá á mbū Yɛɛ́so ó. Te néŋ ntē wú éwú. A cʉ́ʼɛ épúp, o efók ŋkwɛ nnáŋ páʼ Ndém a á si ŋkɔ̄ŋɔ.

⁸ Ŋiŋ a kaʼteē, ńdɔk ŋkɛ́ʼte mbe zi páʼā, á lɛ ntswíte áa ndaʼ mbe nnɛ̄t zi. Ŋiŋ a piīŋ nnáŋ páʼ Ndém a á si ŋkɔ̄ŋɔ páʼā, á pú ntswíte á yí ánɛ meshhʉ̄ ntsem. Ŋiŋ a naáŋ páʼ Ndém a á si ŋkɔ̄ŋɔ páʼā, á tswíte á yí á lenāŋ á esī atsetsáʼ á mbɔŋɔ́, ńtswíte á ŋiŋ á lefū ntā á lezēŋ Ndém.

⁹ Anu zīi meŋ shúŋɔ lāa, á ajʉʼ éwú ŋgɔ́ épúp, ḿbiŋ mbɔ̄ŋ ŋ́gɛ, ŋiŋ ntsem a ejúʼ, ḿvéŋ tɛ ntsékne.

¹⁰ Pɔkɔ é si njʉ́ɔ ŋgʉɔ̄ʼ, ŋ́ké nnɔŋ ŋkāka ete páʼā, é gɔ́ melaʼ mīi pɔkɔ é si nzhɛ́ɛ ŋ́gɛ, akɔ̄ akɔ̄ lɛ́ zīi, pɔkɔ é si nzwíʼtɛ á mbū Ndém yīi a á nte, a epō. Yí mé Ŋghʉɛ‑epuɔ menɔŋ ntsem é tswɛ́t. Ńtswhi ŋgɔ́ á ŋghʉ̄ɛ epuɔ pīi, é fɛɛ́ nnɛ̄t ŋgyá á mbū Yɛɛ́so, é tswɛ́t.

¹¹ Á páʼa ŋgɔ́ á anu zīi, o pɔŋteé á leshūŋ á mbū epuɔ tɛ ntswɛ̄te, ŋ́gɛ pɔ́ ezīŋ épúp.

Timotɛ a pɔŋteé á legɔ̄ á ŋiŋ yīi mɛ́ gɔ epɛ́ efʉʼ ánɛ yí

¹² Ndɛ́ʼ o eghʉ̄ʉ, ŋiŋ á wák á wú ŋ́gɛ, o zɛɛ́t á mɔ́ ŋgwɛso. A cʉ́ʼɛ épúp, o etswīi á légɛ o ó efʉʼ, á mbū wɔ fɛ́‑nnɛ̄t ŋgyá á mbū Klísto. Éfʉʼ ánɛ ashuŋne jú, éfʉʼ ánɛ meziŋɛ́ mú, ánɛ ŋkɔŋne zīi o wɛɛ̄ ánɛ epuɔ menɔŋ. Éfʉʼ ánɛ lefɛ̄ nnɛ̄t ŋgyá á mbū Klísto, éfʉʼ ánɛ lelʉɔ̄ʼte ajū mīi, á gɔ etsēŋte á wú.

¹³ Ge ezwíʼte á gá á leshʉʼ, ńnɔŋ ntɔ́ŋɔ aŋwaʼne Ndém á mbū epuɔ té ká. Ńnɔŋ nzíʼnɛ á wɔ́p, ńnɔŋ esēmtɛ á wɔ́p á lekūʼte anu Ndém.

¹⁴ Kímtɛ á légɛ, Ndém a le yá mete té ndhʉ á mbū wu ndémndēm. A le zapá ánɛ anu zīi metswi‑ŋke pí é le léē, ńzápa ánɛ páʼ epɔ̄ melʉɛ é le zapá mbū á athū wu, tɛ́ ŋgyá.

¹⁵ É páʼa ŋgɔ́ menu mīi, o pɔŋteé á lenēŋ ntē wú éwú. E melaʼ épúp tɛ, o pɔŋteé á lekāk ete. Púp, epuɔ metsem e ejʉ́ɔ páʼ, o o si ŋgʉ̄ɔ á mvhɔ, ánɛ mɛnzhɛ Ndém.

¹⁶ Lak á athū jú, ánɛ ewu lenāŋ. Ńdāk athū jú, ánɛ anu zīi o zíʼnɛ epuɔ. Gɔ́ efʉʼ metsem, ńnɔŋ ŋkāka áa ete. O gɔ eghʉ épúp, tɛ́ Ndém a eláʼ ŋghʉ̄ o etswɛ́t, epuɔ pīi pɔ́ júʼɔ á wú, e etswɛ́t azɔ́p.