1 Timotɛ 3 - Eka Eswhī

Anu ánɛ wɔ tshí‑mvhɔ ánɛ alúŋ epuɔ Yɛɛ́so

¹ Anu jʉɔ zīi meŋ gɔ̄ á ndʉ́ɛ́ la, á ajʉʼ éwú ŋgɔ́ épúp. Ŋiŋ a nɔŋ ŋkɔ̄ŋɔ á yí á legɔ̄ á ntshi‑mvhɔ ánɛ ŋgyā alúŋ epuɔ Yɛɛ́so, mbɔ á si ŋgɔ́ á afaʼ mbɔŋ zīi, a shʉ́ɛ́.

² Melaʼ épúp tɛ́, á si nzɛ́ttɛ ŋ́gɛ, ntshi‑mvhɔ ánɛ ŋgyā alúŋ epuɔ Yɛɛ́so, a egɔ́ á ŋiŋ yīi, mɛ́ té si ndāʼa á yí í. Á ŋiŋ yīi, a wɛɛ̄ á taʼ menzwí ndaʼ. Á ŋiŋ yīi, a ghʉʉ̄ azi akɔ̄ lɛ́, ŋ́kuʼne kuʼne. Á ŋiŋ yīi, a zhɛɛ́ á yí á lekwaŋte anu tɛ́ ŋghʉ̄. Á ŋiŋ yīi, a wɛɛ̄ atswhī mbɔŋ. Á ŋiŋ yīi, a zhɛɛ́ á lekōkne epuɔ. Á ŋiŋ yīi, a zhɛɛ́ á yí á lezīʼne emɔ̄ʼ epuɔ.

³ Ndɛ́ʼ á gɔ́ á núnú‑meluʼ. Ndɛ́ʼ á gɔ́ á ndhʉ‑mekwɛt, a cʉ́ʼɛ épúp, á gɔ́ apwɛnɛ́ ŋiŋ. Á ŋiŋ yīi, a te ntsaŋ fāaʼ. Ndɛ́ʼ á gɔ́ á ŋiŋ yīi, a tshií ntē yí ánɛ ŋkāp.

⁴ Á mbɔŋ ŋ́gɛ, a egɔ́ á ŋiŋ yīi, a zhɛɛ́ á letɛ̄ne á ŋiŋ ntsem yīi, a á mba yí. Ńzhɛ́ á lezīʼne ewɔŋkhʉ̄ pí á lege ejúʼ nchu yí, ńnɔŋ ŋghʉ̄ɛ mekuʼ mí.

⁵ Ŋiŋ a nɔŋ te nzhɛ́ɛ á letɛ̄ne epuɔ pīi, é kwaʼ mba yí í, mbɔ a gɔ eghʉ̄ʉ páʼ lā, ńtɛ́ne alúŋ epɔ̄ Ndém ḿ?

⁶ Ndɛ́ʼ ŋgaŋ á gɔ́ á ŋiŋ yīi, a ke zɛ́t efíɛ́ nnɛ̄t ŋgyáa á mbū Yɛɛ́so, ḿbɔ́k á yí á leŋia, Ndém á néŋ ndɔ á athū yí, páʼ a lē nnéŋ á athū Sɛ́ta lā.

⁷ Á si nzéŋɛ nzɛ́ttɛ ŋ́gɛ, epuɔ pīi, é té epuɔ Yɛɛ́so ó, e ekím lezēŋ ŋgaŋ á mbɔŋɔ́, ḿbɔ́k á mɛ́ lewāk á yí, ḿbɔ́k á yí á lewhʉ ánɛ letā Sɛ́ta.

Wɔ tswíte á ntshi‑mvhɔ ánɛ ŋgyā alúŋ epuɔ Yɛɛ́so ánɛ afaʼ

⁸ Á si nzéŋ ŋgɔ́ ndeŋ ndeŋ épúp, á mbū wɔ tɛ́ne‑menu, ánɛ alúŋ epuɔ Yɛɛ́so. Pɔ́ pɔŋteé á legɔ̄ epuɔ pīi, mɛ́ ghʉʉ̄ mekuʼ mɔ́p. Ŋ́gɔ́ megaŋ anuúnē. Ndɛ́ʼ pɔ́ gɔ́ wɔ núnú‑meluʼ. Ndɛ́ʼ pɔ́ gɔ́ epuɔ pīi, pɔ́ kɔɔ̄ŋ á lefʉte epuɔ, ńdɔk ŋgwɛ̄ ŋkāp.

⁹ Á si nzɛ́ttɛ ŋ́gɛ, pɔ́ ekúʼte mé taʼ ntē, á anuúnē zīi, Ndém a le shúŋ á yímpɛ ánɛ lefɛ̄ nnɛ̄t.

¹⁰ Á si nzɛ́ttɛ ŋ́gɛ, mɛ́ ezī mvhɔ, ńzwíʼ á wɔ́p, tɛ nnɔ̄ŋ le ndāʼa á wɔ́p ánɛ amɔ̄ʼ azō ɔ́, tɛ́ ŋké ntswī, pɔ́ etswíte á leghʉ afaʼ.

¹¹ Á zéŋ ŋgɔ́ ndeŋ ndeŋ épúp á mbū wɔnzwí. Á si nzɛ́ttɛ ŋ́gɛ, e egɔ́ wɔnzwí pīi, mɛ́ ghʉʉ̄ mekuʼ mɔ́p. Éwɔnzwí pīi, pɔ́ té epuɔ sɛɛ́ʼ, ŋ́ghʉ̄ azɔ́p akɔ̄ lɛ́, ŋ́kuʼne kuʼne. Éwɔnzwí pīi, mɛ́ gɔ́ etém nzem ŋgyá mé pɔ́p, ánɛ ajūɔ tsem.

¹² Á si nzɛ́ttɛ ŋ́gɛ, wɔ tswíte á leghʉ afaʼ ánɛ ŋgyā alúŋ epuɔ Yɛɛ́so, e egɔ́ epuɔ pīi, pɔ́ wɛɛ̄ áa taʼ menzwí ndaʼ. Ŋ́gɔ́ epuɔ pīi, pɔ́ tɛneé ewɔŋkhʉ̄ pɔ́p á mbɔŋɔ́. Épuɔ pīi pɔ́ tɛneé epuɔ pīi, é mba pɔ́p á mbɔŋɔ́.

¹³ Wɔ tɛ́ne‑menu ánɛ alúŋ epuɔ Yɛɛ́so pīi pɔ́ ghʉʉ̄ afaʼ zɔ́p á mbɔŋɔ́, mɛ́ ghʉʉ̄ mekuʼ mɔ́p. Pɔ́ shuúŋ anu Yɛɛ́so Klísto té pɔ́k, melaʼ mīi pɔ́ fɛɛ́ nnɛ̄t ŋgyá mé yí.

Mía anu yīi Ndém a le ghʉ̄ mɛ́ zhɛ́.

¹⁴ Timotɛ, meŋ á tí akɛtte jʉɔ ŋgyá á mbū wu páʼa, ŋ́ké nnɔŋ ntsáa á gá á legɔ̄ le zéŋ nnáŋ, á leshʉʼ ntswɛ́tte á wú ú.

¹⁵ Ńdaʼ ŋ́gɛ, meŋ mbiŋɛ nnáŋ á gá á leshʉʼ, o efhó ánɛ akɛtte jʉɔ mɛ́t, ńzhɛ́ páʼ o gɔ ezīŋ épúp, ánɛ atseŋ ŋgyā Ndém. Atseŋ ŋgyā Ndém á páʼā, ŋ́gɔ́ alúŋ epɔ̄ Ndém yīi a naáŋ ntē. Á zeéŋ ŋgɔ́ ntɔ̄ zīi, ŋke mbɔŋ é zapneé éwú, ŋ́gɔ́ ntɔ̄ apuúŋ zīi, e piīʼ ŋke mbɔŋ páʼ é anuúnē.

¹⁶ Kwaʼ anuúnē, mía anu ndʉɔne lʉɔne yīi ḿpɛ pɔŋteé á lekūʼte, á cʉte á Yɛɛ́so, Ndém a le ghʉ̄ ḿpɛ zhɛ́, ńzéŋ nnɔ̄ŋ eshúŋɔ á yímpɛ páʼ, ḿpɛ náŋa épúp, á pɔŋ á yí. Yɛɛ́so a le cʉ́ʼ á ŋiŋnɔŋ, Azwakne Ndém á shúŋ á yímpɛ ŋ́gɛ, a á si ŋgɔ́ á ŋiŋ ndeŋ ndeŋ. Mecɔʼ Ndém é le jʉ́ɔ á yí. Epuɔ é sáʼ anu zí, á mbū ŋgɔŋ ŋgɔŋ. Mɛ́ fɛɛ́ nnɛ̄t ŋgyá mé yí, á ntē ŋgɔŋ. Ndém á kɔ́ʼne á yí, nnáŋ á ntē shʉ́shɔ́k yi.