1 Timotɛ 2 - Eka Eswhī

Leswīŋte á Ndém

¹ Púp, mvhɔ ajū mīi meŋ á si nzɛ́ttɛ á mbū pɛ, á si ŋgɔ́ á légɛ, pɛ egɔ́ á ntē aswiŋte, ńdɔ́ azō á mbū Ndém á athū ŋiŋ ntsem, ńdā á mbū yí á athū ŋiŋ ntsem, éswíŋte ŋ́gɛ, a etswíte á ŋiŋ ntsem, ésyákne á yí melaʼ menu mbɔŋ mí, á athū ŋiŋ ntsem.

² Éswíŋte ánɛ athū mefɔ, mbɔɔ ánɛ athū epuɔ pīi, pɔ́ wɛɛ̄ mete á lelɔk esáʼ alāʼ. Tɛ́ ḿpɛ elɔk nnáŋ mé apwɛne, té tákátáká, ńnáŋ páʼ Ndém a á si ŋkɔ̄ŋɔ, ńnɔŋ ŋgūʼtɛ mennɛ̄t mímpɛ.

³ Mɛ́ swíŋtɛ á Ndém ánɛ ejʉɔ ntií mɛ́t, á gɔ́ mbɔŋ, ŋ́gɔ́ ajū mīi Ndém yímpɛ, Ŋghʉɛ‑mɛ́‑tswɛ́t, a á si ŋkɔ̄ŋɔ.

⁴ A á si nzi ŋkɔ̄ŋɔ ŋ́gɛ, ŋiŋ ntsem a etswɛ́t, ńzhɛ́ anuúnē ánɛ yí.

⁵ Meŋ ndʉ́ɛ́ páʼa melaʼ mīi, taʼ Ndém mé éwú, taʼ nziŋ‑ekém mé zéŋ ŋgɔ́ éwú, á tsetsɛlɛ Ndém pɔ́ epuɔ menɔŋ. Ŋ́gɔ́ á ŋiŋnɔŋ, á Yɛɛ́so Klísto,

⁶ mbɔ a le yá athū nnɛ̄t zí, ńdɔk ncūʼ á ŋiŋ ntsem. A le ghʉ̄ épúp, ńdɔk ntswī á légɛ, Ndém a á si ŋkɔ̄ŋɔ ŋ́gɛ, epuɔ menɔŋ e etswɛ́t, ánɛ afʉʼ zīi, yí Ndém a le zapáā.

⁷ É melaʼ épúp tɛ́, Ndém a le tsɔ́ʼ á gá ŋ́gɛ, meŋ egɔ́ á ntswi‑ŋke yi, ŋ́gɔ́ á nziŋ‑ntō. A le tsɔ́ʼ á gá ŋ́gɛ, meŋ ezíʼne epuɔ pīi, é té epuɔ Yúda á, á lefɛ̄ nnɛ̄t ŋgyá á mbū yí, ńzéŋ nzíʼne á wɔ́p anuúnē ánɛ yí. Meŋ shúŋɔ anuúnē, meŋ te ŋghíɛ mela á.

Ntií zīi ŋiŋ mbaŋa ká menzwí a gɔ elɔ̄ɔk nnáŋ ánɛ alúŋ epuɔ Yɛɛ́so

⁸ A le tsɔ́ʼ á gá, melaʼ épúp tɛ́ meŋ á si ŋkɔ̄ŋɔ ŋ́gɛ, mbaŋa e egē eswíŋte á Ndém egʉ́ɛ egʉ́ɛ yīi, epuɔ Yɛɛ́so é cúʼte éwú, ŋ́gē ekɔ́ʼne mbū mɔ́p mé lephū, ntē wɔ́p e egɔ́ páʼ, Ndém a á si ŋkɔ̄ŋɔ. Lɔ́ŋ a á le á ntɔ̄ŋ pɔ́p ɔ́, ńnɔ̄ŋ le ntɔ̄ʼnɛ azō, á tsetsɛlɛ pɔ́p ɔ́.

⁹ Ŋ́gɔ́ mé wɔnzwí, meŋ enɔ̄ɔŋ ŋkɔ̄ŋɔ ŋ́gɛ, pɔ́ emāʼ menzhó mīi, é ghʉ pɔ́ evhóne. Ménzhó mīi, é gɔne ánɛ pɔ́p. Pɔ́ emāʼ menzhó mīi é mbɔŋ ánɛ pɔ́p. Ŋ́gē etswiŋ nnɛ̄t zɔp, pɔ́ le kwɛ́tte mmɔʼ ntií athū zīi, pɔ́ lɔkɔ efāʼa ŋ́gɛ mɛ́ ejʉ́ɔ á wɔ́p ɔ́. Pɔ́ le zwík etsō metuúŋ tsīi, mɛ́ le lɔk á gɔ́ɔl ká mbē, tɛ́ ncūŋte ɛ́. Ndɛ́ʼ pɔ́ emaʼ menzhó tɛ ndɔ̄kɔ ntswīi áa légɛ, pɔ́ é megaŋ azō.

¹⁰ A cʉ́ʼɛ épúp, pɔ́ lɔk mefaʼ membɔŋ mɔ́p, ńtswīŋ nnɛ̄t zɔp páʼ wɔnzwí pīi, pɔ́ ziīŋ á nzem Ndém, é ghʉʉ̄ épúp.

¹¹ Mɛ́ nɔŋ nzíʼnɛ epuɔ anu Ndém, menzwí á láŋte, ńnɔŋ nnɛ̄t á esī njúʼ.

¹² Meŋ ka kɔ̄ŋ ŋ́gɛ, menzwí a ezíʼne á ŋiŋ mbaŋa azō ɔ́. Meŋ te kɔ̄ŋ ŋ́gɛ, a esáʼ á ŋiŋ mbaŋa á. Púp, a pɔŋteé á leŋīmne nnáŋ, té zá á leghī.

¹³ Meŋ ndʉ́ɛ́ épúp melaʼ mīi, Ndém a le zī á Ádam, á ŋiŋ mbaŋa á lepɔ̄, tɛ́ mbɔ́ á Éva, á menzwí.

¹⁴ Nzi ŋgē egɔ́, mbɔ Sɛ́ta a lɛ te pɔ̄pte á Ádam á. A le pɔptē áa menzwí, á whʉ mefa á mbū Ndém.

¹⁵ Táʼ, Ndém a a ké eláʼ efhó ánɛ páʼ, a zhií, éghʉ a etswɛ́t. Ńdaʼ ŋ́gɛ, a ekúʼte á yí á lefɛ̄ nnɛ̄t ŋgyá á mbū Yɛɛ́so, ŋ́gwɛ̄ ŋkɔŋne, ńnáŋ páʼ á pɔŋ á Ndém, ŋ́gwɛ̄ nnɛ̄t zi mé mekuʼ.