1 Timotɛ 1 - Eka Eswhī

Atsaʼte

¹ Akɛtte jʉɔ á fhɔ́ɔ á mbū meŋ Pɔ́ɔl, meŋ gɔ́ á nziŋ‑ntō Yɛɛ́so Klísto, páʼ Ndém mbɔɔ Klísto é le tswī épúp. Ndém a á si ŋgɔ́ á Ŋghʉɛ‑mɛ́‑tswɛ́t, Klísto á gɔ́ á ŋiŋ yīi, a ghʉɛ, akɔ̄ akɔ̄ lɛ́ zīi, ḿpɛ é si nzwíʼtɛ á mbū Ndém á puɔ.

² Meŋ tíi páʼa á mbū wu Timotɛ, kwaʼ méŋ ga á nzem Yɛɛ́so, páʼ pɔkɔ puú efɛ́ nnɛ̄t ŋgyá mé yí lā. Ŋ́gɛ Ndém Mɔʼɔ́ mbɔɔ Yɛɛ́so Klísto, á Atsyapuɔ yímpɛ, e elɛ ŋghʉ̄ anu mbɔŋ té ndhʉ á mbū wu, ŋ́gwɛ̄ atsāmezeŋɛ á mbū wu, ŋ́ghʉ̄ o enáŋ mé apwɛne.

Timotɛ, lʉʼ ajū mīi mɛ́ luptɛ nzíʼnɛ epuɔ, ńdɔkɔ ntsēŋtɛ anu Ndém

³ Páʼ meŋ nde gē egʉɔ mé apak ŋgɔŋ Maseduan, éshúŋ á wú tɛ ntswɛ̄te épúp lā, náŋ á tésɔŋ Efɛze, ńtɔ̄ʼ emɔ̄ʼ epuɔ pīi, pɔ́ é éwú ndūptɛ menu ánɛ anu Ndém, ńzíʼnɛ epuɔ, ŋ́gɛ ndɛ́ʼ pɔ́ zéŋ nzíʼne.

⁴ Lé á mbū pɔ́p ŋ́gɛ, pɔ́ etshī menu ŋgiŋte yiŋté, ánɛ páʼ ndhu te mi wɔ maŋgānjʉʼ pɔ́p, é ziīŋ épúp nnéŋ. Pɔ́ ghʉʉ̄ épúp páʼā, á néŋ áa aŋak á tsetsɛlɛ pɔ́p, ńtɔ́k á letswi á wɔ́p ajū mīi, Ndém a á si ŋkɔ̄ŋɔ. Leghʉ ajū mīi Ndém a á si ŋkɔ̄ŋɔ, á piŋ efhó áa ánɛ lefɛ̄ nnɛ̄t ŋgyá mé yí.

⁵ O etswī épúp, ńdɔkɔ efāʼa ŋ́gɛ, pɔ́ ekɔ̄ŋ epuɔ menɔŋ. Á si nzɛ́ttɛ ŋ́gɛ, ntē ŋiŋ e enɔŋ ndánɛ, akwaŋte zí a enɔ̄ŋ le ŋāka á yí í, ŋgaŋ a epiŋ nnɔ̄ŋ efíɛ́ nnɛ̄t ŋgyáa á mbū Ndém á anuúnē, tɛ́ ŋkɔ̄ŋ emɔ̄ʼ epuɔ.

⁶ Emɔ̄ʼ epuɔ é ke fhó ánɛ nzhɛ jʉɔ mɛ́t ntó, ńcʉ́ʼɛ nnéŋɛ athū áa ánɛ aŋak té methū.

⁷ Ńnɔŋ ŋkɔ̄ŋɔ á wɔ́p á lecʉ̄ʼ wɔ kɛ́ʼte‑mbé Ndém, tɛ́ nzi nnɔ̄ŋ te njúʼɔ anu zīi pɔ́ méŋwɛ̄t é shúŋɔ ɔ́, ńnɔŋ te nzhɛ́ɛ zīi, azi pɔ́ fóko akwɛ́ nzíʼnɛ epuɔ, á lɔkɔ ndʉ́ɛ́ ɛ́.

Kwaʼ ajū mīi lepé é ziʼneé epuɔ

⁸ Ḿpɛ é si nzhɛ́ɛ á légɛ, mbé Ndém é mbɔŋ, áa afʉʼ zīi ḿpɛ é ghʉ páʼ é si nzɛ́ttɛ.

⁹ Ḿpɛ echʉ́ nnɛ̄t nzhɛ́ á mbɔŋɔ́ á légɛ, Ndém a lɛɛ́ te nnéŋɛ lepé páʼā, melaʼ epuɔ pīi, pɔ́ ziīŋ ndeŋ ndeŋ páʼ a á si ŋkɔ̄ŋɔ ɔ́. A lɛɛ́ nnéŋɛ páʼā, melaʼ wɔ te kúʼte‑lepé, pɔ́ wɔ tʉɛ‑athū á mbū yí. Melaʼ wɔ te kwaŋ á Ndém pɔ́ megaŋ mefa. Melaʼ wɔ te yá‑mekuʼ Ndém pɔ́ wɔ te zhɛ́‑ajū mīi, á azi Ndém. Melaʼ wɔ zwhíte‑memɔʼɔ́ pɔ́p pɔ́ wɔ zwhíte‑memía pɔ́p. Melaʼ wɔ zwhíte‑epuɔ.

¹⁰ Melaʼ megaŋ agā, melaʼ mbaŋa zīi, pɔ́ a emɔ̄ʼ mbaŋa é nɔŋɔ, ká wɔnzwí pīi, pɔ́ a emɔ̄ʼ é nɔŋɔ. Melaʼ wɔ táŋ‑epuʼ, melaʼ wɔ táŋ‑mela. Melaʼ wɔ ge eka‑meka é gɔ́ mela, melaʼ epuɔ metsem pīi, pɔ́ shúŋɔ anu ndɔkɔ mbíktɛ anuúnē ánɛ anu Yɛɛ́so.

¹¹ Anu jʉɔ zīi, meŋ zíʼnɛ á wɛ́ la, á fhɔ́ɔ á ntē ŋke mbɔŋ páʼ Ndém a le tsekné á mbū meŋ épúp. Ndém wuɔ mɛ́t, a á ŋiŋ, shʉ́shɔ́k yi á gɔ́ éwú. A naáŋ efʉʼ metsem, á ntē lepɔŋ.

Pɔ́ɔl a á ega esyáknɛ anu mbɔŋ zīi, Ndém a ghʉʉ̄ ánɛ yí

¹² Meŋ á si mbúu esyáknɛ á Yɛɛ́so Klísto tɛʼ, á Atsyapuɔ yímpɛ, páʼ a le yá á gá mete, á lelɔk ŋghʉ̄ mefaʼ mí. Yí mé le jʉ́ɔ ŋ́gɛ, meŋ kuūʼ á ŋiŋ yīi, mɛ́ gɔ etém nzem ŋgyá mé yí, ńtsɔ́ʼ á gá ŋ́gɛ, meŋ eshʉʼ ŋghʉ̄ afaʼ zí.

¹³ Á gá yīi meŋ ndɛ efʉʼ mvhɔ, ńnɔŋ nzɔ̄ á yí zɔɔ, ńnɔŋ ndʉɔ́ʼɔ á yí lʉɔ́ʼe, ŋ́gɔ́ efwɛ̄t ánɛ yí. Ndém a le ké ntsá mezeŋɛ má, á gɔ́ páʼ meŋ nde gē eghʉ épúp, meŋ te nzhɛ́ɛ, ńzɛ́t té fɛ́ nnɛ̄t ŋgyá mé Yɛɛ́so.

¹⁴ Apɔŋɔ́ ntē te ndhʉ zīi, Atsyapuɔ yímpɛ a wɛɛ̄ ánɛ meŋ, á zá ntsia. A le ghʉ̄ʉ̄, meŋ efɛ́ nnɛ̄t ŋgyá mé yí, ŋ́ghʉ̄ meŋ ewɛ ŋkɔŋne zīi, epuɔ pīi é lɛtneē ánɛ yí mé wɛ̄ɛ.

¹⁵ Anu zīi meŋ gɔ á ndʉ́ɛ́ la, á ajʉʼ éwú, ŋ́gɔ́ épúp, ŋ́gɔ́ azi epuɔ metsem é gɔ evéŋ mé taʼ ntē: Yɛɛ́so Klísto, a le shʉ̄ʼ á ŋgɔŋ, ŋ́gɔ̄ á ŋghʉɛ́, megaŋ mefa e etswɛ́t. Meŋ á páʼa, ŋ́gɔ́ ŋgaŋ mefa té mmɔʼ.

¹⁶ Táʼ, Ndém a le ké ntsá mezeŋɛ má, a lɛɛ́ ŋghʉɛ épúp páʼā, ŋ́gɛ Yɛɛ́so Klísto, a ezápa ánɛ meŋ, ŋgaŋ mefa té mmɔʼ, ńtswī á légɛ yí zhɛɛ́ á lekwɛ̄t ntē. Púp, meŋ ndɔk ŋgɔ́ efʉʼ á mbū epuɔ pīi, pɔ́ e shʉʼ efɛ́ nnɛ̄t eyá mé yí, éfú eta á lezēŋ Ndém.

¹⁷ Awuʼte pɔ́ mekuʼ, e egɔ́ á mbū Ndém yīi, a á eséŋɛ lɛ́, ŋ́gɔ́ áa efɔ, á mbū Ndém te kwhʉ́, á te jʉ́ɔ‑eshhʉ̄ yí, á Ndém yīi a á yíléyī. A egɔ́ épúp á meŋguʼ meŋguʼ. Á páʼa.

Mbɔŋ ncu

¹⁸ Timotɛ, wu méŋ ga, meŋ á tsékne ajʉɔ afaʼ á mbū wu, ńdeŋ ndeŋ páʼ metswi‑ŋke Ndém, é le té njhʉ̄, ŋ́kím lezēŋ cú. Kímte meshuŋne mɛ́t, e eyá á wú ŋgate, o elɔk ndʉɔ́ʼ á mbɔŋ ncu.

¹⁹ Ŋ́gē elʉɔ́ʼe, ńnɔŋ efíɛ́ nnɛ̄t ŋgyáa á mbū Ndém, amɔ̄ʼ azō á nɔ̄ŋ le ŋŋāka akwaŋte jú ú. Emɔ̄ʼ epuɔ é le véŋ ŋ́gɛ azō a eŋāk akwaŋte zɔ́p, lefɛ̄ nnɛ̄t wɔp á pú mbí.

²⁰ Á nnɔ pɔ́p, mɛ́ jʉ́ɔ á ŋiŋ páʼ Imene mbɔɔ Alɛkzaŋdle lā. Meŋ ke tsekné á wɔ́p á mbū Sɛ́ta, tɛ́ pɔ́ elɔk nzíʼne á wɔ́p á legɔ̄ le fú nzéŋ ńzɔ̄te á Ndém ɛ́.