1 Tesalonik 3 - Eka Eswhī

¹ Páʼ nzi zɛ e ke zɛ́t ntswiʼnɛ nzáŋa á wék záŋ lā, pek jʉ́ɔ ŋ́gɛ á mbɔŋ á wék á lezɛ̄t á tésɔŋ Atɛne, peklepek,

² ńtó á méŋ mɔ́ yímpɛ Timotɛ á mbū pɛ. Timotɛ wuɔ mɛ́t, pɔ́ Ndém mé si ŋghʉ̄ɛ afaʼ, á letswi ŋke mbɔŋ ánɛ Klísto á mbū epuɔ menɔŋ. Pek túɔ́ á yí épúp, ŋ́gɛ a eshʉʼ esēmte á wɛ́, ŋ́ghʉ̄, lefɛ̄ nnɛ̄t wɛ a etswhí ŋgʉ̄ɔ mé mvhɔ.

³ Tɛ́ a etsīa épúp, ŋiŋ wɛ a á le vɛ̄t ánɛ ŋgʉɔ̄ʼ zīi, mɛ́ é si ŋgyáa á wɛ́ tsetsɔŋɔ ɔ́, melaʼ mīi, pɛ é si nzhɛ́ɛ á légɛ, ḿpɛ gɔ le náŋ á ŋgɔŋ ega, ńnéŋ té jʉ́ɔ ŋgʉɔ̄ʼ ɔ́.

⁴ Pek lɛ á alāʼ pɛ páʼā, ńnɔŋ ntʉ́ɛ́ njhʉ̄, éshúŋɔ á wɛ́ ŋ́gɛ, ḿpɛ e jʉ́ɔ ŋgʉɔ̄ʼ. Pɛ é si nzhɛ́ɛ páʼ, pek le lé épúp páʼā, á shʉʼ nzéŋ ntó áa épúp.

⁵ Á melaʼ épúp tɛ́, meŋ kɛ te kūʼ á lezēŋ nzwíʼte á leshʉʼ njʉ́ɔ á wɛ́ ɛ́ páʼā, ńtó á Timotɛ, ŋ́gɛ a eshʉʼ njʉ́ɔ kɛ pɛ zɛɛ́t efíɛ́ nnɛ̄t, ŋ́gyáa á mbū Klísto lɛ̄ɛ, éswáŋ nnɛ̄t eshúŋ á gá. Meŋ nde gē etó á yí épúp, ńzéŋ nnɔŋ mbɔ́kɔ ŋ́gɛ, kɛ Ŋgaŋ Metáté a lē ŋghʉ, pɛ whʉ̄ʉ ánɛ táté, tɛ afaʼ zīi pek le ghʉ̄ʉ̄, á tó ndémndēm lɛ́.

⁶ Tsetsɔŋɔ, Timotɛ a á fhó á alāʼ pɛ mbīŋ nzem, éshúŋ á wék menu mbɔŋ, ánɛ páʼ pɛ fɛɛ́ nnɛ̄t épúp, mbɔɔ páʼ, pɛ wɛɛ̄ ŋkɔŋne épúp. A á shúŋ á wék ŋ́gɛ, pɛ zɛɛ́t ŋkímtɛ á wék á mbɔŋɔ́ kímte. Ŋ́gɛ pɛ é si eshʉ́ɛ́ á lezēŋ njʉ́ɔ á wék, ńdeŋ ndeŋ páʼ, pek azék, é si eshʉ́ɛ́ á lezēŋ njʉ́ɔ á wɛ́.

⁷ Epɔ̄ memía, pek ke júʼ menu mɛ́t, lefɛ̄ nnɛ̄t wɛ ŋgyá á mbū Yɛɛ́so, á maʼ azaŋne ánɛ pek, ánɛ ŋgʉɔ̄ʼ pɔ́ ŋgeŋge zīi, pek é ntē éwú.

⁸ Pek é tsetsɔŋɔ, mbɔ pek é zéŋ nzímte, melaʼ mīi, pɛ chʉʉ́ nnɛ̄t ndɛ̄tne ánɛ Atsyapuɔ.

⁹ Pɛ é si ŋghʉ̄ɛ, ntē wék é gáŋtɛ á mvhɔ Ndém yímpɛ. Pek zi mbú esyákne á yí, ánɛ athū zɛ́ melaʼ épúp tɛ ŋgā lɛ́, á le kūuʼ.

¹⁰ Pek é si ŋgē esyáknɛ á yí, ńnɔŋ eswíŋtɛ á yí etsōʼ pɔ́ ezokó, té ká, ŋ́gɛ a ezéŋ ntsɔ́ʼ á mɛnzhɛ, pek ezéŋ eshʉʼ njʉ́ɔ á wɛ́, ŋ́kó ntswīʼne ajū mīi, ánɛ lefɛ̄ nnɛ̄t wɛ ŋgyá á mbū Yɛɛ́so, ŋ́kíŋɛ.

¹¹ Ŋ́gɛ Ndém yí méŋwɛ̄t, á Mɔʼɔ́ yímpɛ, mbɔɔ Atsyapuɔ yímpɛ Yɛɛ́so, e elɛ ntsɔ́ʼ á mɛnzhɛ, pek eshʉʼ tɛ njʉ́ɔ á wɛ́.

¹² Ŋ́gɛ Atsyapuɔ a lɛ ŋghʉ̄, ŋkɔŋne zīi pɛ wɛɛ̄ á tsetsɛlɛ pɛ, mbɔɔ á mbū epuɔ metsem, e elɛ ntswhí, éfūŋ, páʼ ŋkɔŋne zīi pek wɛɛ̄ ánɛ pɛ lā.

¹³ Ŋ́gɛ a lɛ ŋghʉ̄, mentē mɛ́ e eŋímne nnáŋ té pɔ́k, tɛ ŋgɔ́ yīi Ndém a gɔ le wɛ́ laʼ. Ŋ́ghʉ̄, pɛ egɔ́ té alɔ́ʼ, á mvhɔ Mɔʼɔ́ yímpɛ Ndém, áleʼé zīi, Atsyapuɔ yímpɛ Yɛɛ́so, a piŋɛ nzem pɔ́ a mecɔʼ pí metsem. [Á épúp].