1 Tesalonik 2 - Eka Eswhī

Ntií zii, Pɔ́ɔl a le lɔ̄k ntswī ŋke mbɔŋ á tésɔŋ Tesalonik

¹ Epɔ̄ memía, pɛ méŋwɛ̄t é si nzhɛ́ɛ á mbɔŋɔ́ á légɛ, wék á leshʉʼ á alāʼ pɛ, a lɛ te tó ndémndēm ɛ́.

² Pɛ é si nzéŋɛ nzhɛ́ɛ á légɛ, pek le kó á tésɔŋ Fílíio, ńjʉ́ɔ ŋgʉɔ̄ʼ tɛʼ, mɛ́ zéŋ ndʉɔ́ʼ á wék éwú. Pek náŋ tɛ efhó éwú eshʉ̄ʼ, Ndém á ké ŋghʉ̄, pek kāak ete, ńtswī ŋke mbɔŋ yí á mbū pɛ, tɛ mbɔɔ páʼ, mɛ́ lɛ si ndʉɔ́ʼɔ á wék.

³ Anu zīi pek lɔkɔ esēmtɛ epuɔ, á lekūʼte ŋke mbɔŋ, á té si ŋgɔ́ epoó‑anu ú, á té si ŋgɔ́ anu, pek lɔ̄kɔ efāʼa anu ndɛʼɛ ɛ́, á té si ŋgɔ́ anu, pek lɔ̄kɔ efāʼa á lepɔp á ŋiŋ ɛ́.

⁴ Ŋgáŋ, Ndém a le zwíʼ á wék tɛ njʉ́ɔ, tɛ́ ntsékne ŋke mɛ́t á mbū pek. Pek é si ntswīi páʼ á zɛ́tte épúp. Pek te si ŋghʉ̄ɛ ajū mīi, a pɔŋ epuɔ menɔŋ ɔ́. Pek é si ŋghʉ̄ɛ áa azi, a pɔŋ á Ndém. Ndém mɛ́t, a zhɛɛ́ ajū mīi, á mentē pek.

⁵ Pɛ é si ncuŋtɛ nzhɛ́ɛ á légɛ, pek la gɔ́ aleʼé, éshúŋ ashuŋne á lelɔk ndʉ̄te epuɔ ɔ́. Pek te gɔ́ aleʼé, ŋ́gē eshúŋne, akwaŋte zék á tshí ánɛ amɔ̄ʼ apɛ zīi, pek gʉɔ mé njhʉ́ɛ ɛ́. Ndém a á si nzhɛ́ɛ ŋ́gɛ, á anuúnē.

⁶ Pek la gɔ́ aleʼé, éfāʼ á légɛ, epuɔ menɔŋ e eghʉ̄ mekuʼ mék ɛ́. Pek te fāʼ á légɛ, pɛ eghʉ̄ mekuʼ mék ɛ́. Pek te fāʼ á légɛ, emɔ̄ʼ epuɔ e eghʉ̄ mekuʼ mék ɛ́.

⁷ Tɛ́ á piŋ ŋgɔ́ yīi, a le gɔ́, pek elɔ̄ɔk á legɔ̄ meziŋ‑ntō Klísto, ŋ́kía ŋ́gɛ, mɛ́ eghʉ̄ mekuʼ mék. Pek le ké te épúp ghʉ, pek le lɔ̄k áa apwɛne, tɛ́ nnáŋ á tsetsɛlɛ pɛ. Ńnáŋ páʼ mía mɔ́, a kóktɛ ewɔŋkhʉ̄ pí lā.

⁸ Ntē wék é le pú ntshí ánɛ pɛ tshíi, tɛ ŋgɔ́ yīi pek le gɔ́, pek é le lɛ̄ ntswī áa ŋke mbɔŋ Ndém, á mbū pɛ ndaʼ á. Pek le tshí á lezēŋ ŋgyá athū nnɛ̄t zék, melaʼ mɛ́, éfhó ánɛ páʼ, ŋkɔŋne zīi pek le wɛ̄ ánɛ pɛ, e le gɔ́ mbɔ e é fáŋ épúp.

⁹ Ázi ŋgē egɔ́ me epɔ̄ memía, pɛ nɔ̄ɔŋ ŋkímtɛ páʼ, pek lɛ á tsetsɛlɛ pɛ, afaʼ á nɔŋ eswɛ́tɛ á wék, pek nɔ̄ɔŋ njʉ́ɔ ŋgʉɔ̄ʼ épúp. Pek lɛ etsōʼ pɔ́ ezokó, ńnɔŋ ŋghʉ̄ɛ afaʼ, ńdɔkɔ te ŋkɔ̄ŋɔ á wék, á lege etswi ŋke mbɔŋ Ndém á mbū pɛ, ńcʉ́ʼ á apiʼ, á mbū ŋiŋ wɛ ɛ́.

¹⁰ Pɛ é si ŋgɔ́ wɔ njhʉɛ‑njʉ́ɔ, ánɛ atswhī zīi, pek kɛ á tsetsɛlɛ pɛ wɔ fɛ́‑nnɛ̄t, ŋ́gwɛ̄, Ndém á zéŋ nnɔ̄ŋ nzhɛ́ɛ azí. Atswhī zék á kɛ té alɔ́ʼ, ŋ́gɔ́ ndeŋ ndeŋ, ŋ́gɔ́ té atswɛ́t.

¹¹ Pɛ é si nzéŋɛ nzhɛ́ɛ páʼ, pek ke ghʉ̄ á mbū awɔ́ ŋiŋ wɛ lɛ́, ńdeŋ ndeŋ páʼ, mɔʼɔ́ mɔ́ a ghʉʉ̄ épúp, á mbū ewɔŋkhʉ̄ pí.

¹² Pek kɛ te néŋ té semte á wɛ ɛ́. Pek te néŋ te yá á wɛ́ ŋgate ɛ́. Ńchʉ́ nnɛ̄t nték á wɛ́, ŋ́gɛ pɛ ezīŋ ánɛ mɛnzhɛ yīi, Ndém a á si ŋkɔ̄ŋɔ. Yí mé si ntɔ́ŋɔ á wɛ́ ŋ́gɛ, pɛ eshʉ̄ʼ ŋkó á ntē Lefɔ yí, mbɔɔ á ntē lewūʼ tsí.

Pɔ́ɔl a á ega ŋgūʼtɛ epuɔ tésɔŋ Tesalonik, ánɛ wɔ́p á lefɛ̄ nnɛ̄t

¹³ Amɔ̄ʼ ajū mīi á zéŋɛ ŋghʉ̄ɛ, tɛ́ pek syáknɛ á Ndém té ká, ánɛ athū zɛ́, a ajʉɔ: pɛ le júʼ ashuŋne Ndém, páʼ pek le shúŋ á wɛ́ lā, ŋ́kúʼte á mbɔŋɔ́, pɛ te kuʼté páʼ ashuŋne zīi, á fhɔ́ɔ á mbū ŋiŋnɔŋ lā á, ŋ́kúʼte áa páʼ á ajʉʼ éwú ŋgɔ́ épúp, áshuŋne zīi, á fhɔ́ɔ á mbū Ndém méŋwɛ̄t lā. Ashuŋne mɛ́t, á zém ntá á ntē pɛ wɔ fɛ́‑nnɛ̄t.

¹⁴ Epɔ̄ memía, pɛ ke pɛ́ efʉʼ ánɛ elúŋ epuɔ Ndém tsīi, é apak ŋgɔŋ Yudéa. Elúŋ mɛ́t é lɛtneē ánɛ Yɛɛ́so Klísto. Pɛ ke pɛ́ efʉʼ ánɛ pɔ́p melaʼ mīi, kwaʼ epuɔ alāʼ pɛ́, é ke yá á wɛ́ ŋgʉɔ̄ʼ, ńdeŋ ndeŋ páʼ epuɔ Yúda, e le yá elúŋ epuɔ Ndém tsīi, é Yudéa ŋgʉɔ̄ʼ azɔ́p épúp.

¹⁵ Epuɔ Yúda mé le zwhí á Atsyapuɔ Yɛɛ́so pɔ́ metswi‑ŋke Ndém, pɔ́ le zéŋ ndʉɔ́ʼ á wék azék. Pɔ́ té ghʉ̄ ajū mīi, á pɔŋ á Ndém ɛ́. Pɔ́ é si ŋgɔ́ megaŋ mbo epuɔ menɔŋ metsem.

¹⁶ Pɔ́ é si mvɛ́nɛ á wék á letswi ŋke Ndém, á mbū epuɔ pīi, é té epuɔ Yúda á, ńdɔk ŋghʉ̄ pɔ́ láʼ ntswɛ́t azɔ́p. Ŋ́ghʉ̄ɛ épúp efʉʼ metsem páʼā, mefa mɔ́p é lɔkɔ ntswīʼnɛ ŋgáʼa mbū. Ndém a a ké eláʼ ege ezoko, ézáŋ á lɔ́ŋ ánɛ pɔ́p.

Pɔ́ɔl a á si ŋkɔ̄ŋɔ á yí a lezēŋ mbīŋ nzem á Tesalonik

¹⁷ Ŋ́gɔ́ mé pek me epɔ̄ memía, mbɔ pek le fhó á tsetsɛlɛ pɛ ŋgʉ̄ɔ áa ánɛ méŋ atsém njhʉ̄, ḿpɛ te zɛ́t ndɔ̄kɔ menēk njʉɔ́nɛ ɛ́, ntē yímpɛ é ké ŋgɔ́ áa taʼ. Pek ke nɔ̄ŋ ntsáa tɛʼ, á lezēŋ eshʉ̄ʼ njʉ́ɔ á wɛ́, melaʼ épúp tɛ pek ke kāk ete á leghʉ épúp.

¹⁸ Pek kɛ páʼā, ńnɔŋ ŋkɔ̄ŋɔ á lezēŋ eshʉ̄ʼ njʉ́ɔ á wɛ́, tɛ meŋ Pɔ́ɔl, meŋ zéŋ ntswhī efāʼ tɛ ŋgʉɔ é záne á leshʉʼ, tɛ́ Sɛ́ta á vɛ́ne á wék.

¹⁹ Pek kɔŋɔ á wék á lezēŋ eshʉ̄ʼ á alāʼ pɛ, melaʼ mīi, pɛ pwɔ̄, tɛ é té epuɔ mendɛʼɛ ɛ́, mé si ŋghʉ̄ɛ, pek zhɛ́ɛ á légɛ, pek gɔ le fú nnéŋ té wɛ ajū mīi, pek é si ntsáa á. Pɛ pwɔ̄ mé nɔŋ ŋghʉ̄ɛ, pek ewiɛ lekāk. Pɛ pwɔ̄ mé gɔ́ azék acɔʼ lefɔ zīi, pek gɔ elɔ̄k ŋkāʼte á mvhɔ Atsyapuɔ yímpɛ Yɛɛ́so, áleʼé zīi a piŋɛ nzem.

²⁰ Á épúp, pek lɔɔ̄k á wɛ́ tɛ́ ŋkāʼte. Pɛ mé si ŋghʉ̄ɛ, ntē wék é gáŋtɛ.