1 Piɛ 5 - Eka Eswhī

Ntí zīi wɔ tshí‑mvhɔ é gɔ elɔ̄ɔk ntɛ́ne alúŋ epuɔ Yɛɛ́so

¹ Meŋ ŋgyáa ntekné jʉɔ tsetsɔŋɔ páʼa, á mbū epɔ̄ melʉɛ pīi é nnɔ pɛ, ánɛ alúŋ epuɔ Yɛɛ́so. Meŋ méŋwɛ̄t azá, meŋ á mɔ́ ndʉɛ, ńzéŋ ŋgɔ́ á njhʉɛ‑njʉɔ́ ánɛ ŋgʉɔ̄ʼ zīi, Klísto a le jʉ́ɔ̄. Meŋ a fú ewɛ azá akim ánɛ shʉ́shɔ́k Klísto, á aleʼé zīi Ndém a ghʉɛ, mɛ́ jʉ́ɔ á shʉ́shɔ́k mɛ́t. Meŋ á si ntékɛ á wɔ́p ndʉ́ɛ́ ŋ́gɛ:

² pɛ etúŋne epuɔ menɔŋ pīi, Ndém a le tsekné á mbū pɛ, ńcʉ̄te á wɔ́p á mbɔŋɔ́, pɔ́ é si ŋgɔ́ páʼ memvhō Ndém lā. Ńdɔ̄k ntē mbɔŋ tɛ́ ncʉ̄te á wɔ́p, páʼ Ndém a á si ŋkɔ̄ŋɔ. Pɛ é le cʉ̄te á wɔ́p páʼ mɛ́ gɔ á wɛ́ gɔ lā á. Ndɛ́ʼ pɛ gē ecʉte á wɔ́p, ńdɔ̄kɔ efāʼa ŋkāp. Pɛ gē ecʉte á wɔ́p, a egɔ́ áa páʼ, pɛ le véŋ épúp.

³ Ndɛ́ʼ pɛ ge esáʼ epuɔ pīi, Ndém a le tsekné á mbū pɛ, ńnɔŋ eswɛ́tɛ á wɔ́p. A cʉ́ʼɛ épúp, meziŋɛ́ mɛ́ e gɔ́ emi, pɔ́ é gɔ efʉ̄ʼne.

⁴ Pɛ ghʉɛ épúp, mbɔ aleʼé zīi efɔ mepio‑memvhō a túɔ́ á ntentā, a eyá á wɛ́ ntaŋá yīi, é tɔɔ́k etsō tsem. Ntaŋá wuɔ mɛ́t, é gɔ le láʼ mbék ɛ́.

Epuɔ Yɛɛ́so é pɔŋteé á lesōʼne nnɛ̄t, ńtēte ánɛ lefɛ̄ nnɛ̄t

⁵ Ŋ́gɔ́ á mbū pɛ ŋkaŋa ŋkhʉ̄, pɛ ezīŋ páʼ epɔ̄ melʉɛ é si nzɛ́ttɛ épúp. Pɛ esóʼne nnɛ̄t zɛ ŋgyá á esī á nnɔ pɛ, ánɛ akʉ̄ɛ akʉ̄ɛ zīi, pɛ ghʉɛ. Pɛ ekímte páʼ mɛ́ le tí á ntē aŋwaʼne Ndém ŋ́gɛ: «Ndém a paā epuɔ pīi, pɔ́ kɔʼneé nnɛ̄t zɔp mé athʉ́, ḿbiŋ ŋghʉ̄ á anu mbɔŋ té ndhʉ, á mbū epuɔ pīi, pɔ́ soʼneé nnɛ̄t zɔp mé esī. »

⁶ Púp, pɛ esóʼne nnɛ̄t zɛ mé esī á mvhɔ Ndém, tɛ́ a ekɔ́ʼne á wɛ́ á afʉʼ zīi, a le zapáā. Yí mé ŋgaŋ mete ntsem.

⁷ Pɛ elɔ̄k menu mɛ́ ntsem mīi, é si mbúu ntsyāa á wɛ́, éshʉʼ esóʼne á mvhɔ yí, melaʼ mīi, yí mé si mbúu ntúŋnɛ á wɛ́.

⁸ Ndɛ́ʼ pɛ ecʉ́ʼ, azō á kʉɛtɛ leghi tsɛ́. Ndɛ́ʼ pɛ elí. Sɛ́ta, á ŋgaŋ mbo wɛ, a á lezēŋ pɛ efʉʼ metsem, ŋ́kɛ́nnɛ efāʼa á ŋiŋ yīi, a a sɛt á yí. A á si ŋkɛ́nnɛ páʼ na nzwi yīi, a gaʼtɛ ŋkɛ́nnɛ efāʼa ajū mīi, a gʉɔ mé mpfɛ́tɛ lā.

⁹ Ndɛ́ʼ pɛ tsɔ́ʼ esa ŋgyá mé yí, ńnɔ̄ŋ ntswīʼnɛ efíɛ́ nnɛ̄t zɛ ŋgyáa á mbū Ndém. Pɛ ezhɛ́ á légɛ, emɔ̄ʼ epɔ̄ memía pɛ́, é egʉ́ɛ́ egʉ́ɛ́ á ntē ŋgɔŋ ega, ńzéŋɛ njʉ́ɔ ŋgʉɔ̄ʼ páʼ pɛ.

¹⁰ Pɛ e jʉ́ɔ ŋgʉɔ̄ʼ épúp, áa méŋ afʉʼ, Ndém, a eghʉ̄ akʉ̄ɛ akʉ̄ɛ a ezéŋ mbīŋ á menaŋá yí. A á Ŋghʉɛ‑anu‑mbɔŋ‑té ndhʉ. Yí mé le zapá ánɛ Klísto, ńtɔ́ŋ á wɛ́ nnéŋ á ntē te mi shʉ́shɔ́k yi. Ḿpfēŋ ndo zɛ. Pɛ echʉ́ nnɛ̄t ntēte ánɛ mɛnzhɛ wɛ, tɛ ŋgɔ́ yīi, amɔ̄ʼ azō á gɔ le zéŋ á wɛ́ ŋghʉ̄ ɛ́.

¹¹ Yí mé puú esáʼ ŋgɔŋ ntsem á meŋguʼ meŋguʼ. Á épúp.

Atsaʼte á lelɔk nzōko

¹² Méŋ atsém akɛtte wuɔ mɛ́t, a á páʼa, mbɔ Silvɛŋ mé ntswíte á gá á letī á mbū pɛ. A á si ŋgɔ́ á méŋ mɔ́ ga á nzem Klísto. Ŋ́gɔ́ á ŋiŋ yīi, mɛ́ gɔ etém nzem ŋgyá á mbū yí. Meŋ á ntíi, ńdɔkɔ ŋgyáa á wɛ́ ŋgate, ńzéŋɛ ndɔkɔ ŋkɛ́ʼtɛ eshúŋɔ á wɛ́ páʼ, Ndém a ghʉʉ̄ anu mbɔŋ té ndhʉ épúp, ánɛ pímpɛ. Pɛ echʉ́ nnɛ̄t ŋkúʼte épúp, ńdɔk nnáŋ.

¹³ Alúŋ epuɔ Yɛɛ́so á tésɔŋ Babilɔn ega, épuɔ pīi Ndém á le tsɔ́ʼ á wɔ́p páʼ pɛ azɛ́, á tsaʼte á wɛ́. Méŋ ga Málkúsi, a á zéŋ ntsāʼte á wɛ́ azí.

¹⁴ Pɛ etsāʼte mennɛ̄t mɛ́ ŋgyá á gá, awíɛ awíɛ a esēŋte á méŋ mɔ́ yi á mbɔŋɔ́. Ndém a elɛ nnéŋ apwɛne á ntē pɛ metsem pīi, pɛ é epuɔ Klísto.