1 Piɛ 4 - Eka Eswhī

Atswhī eswhī pɔ́ nzwiŋ atswhī é té azō wɛ

¹ Páʼ Klísto a le jʉ́ɔ ŋgʉɔ̄ʼ ánɛ mbap nnɛ̄t zi lā, pɛ méŋwɛ̄t azɛ́ e enéŋ á athū pɛ, á lezēŋ njʉ́ɔ azɛ́ ŋgʉɔ̄ʼ páʼ yí, melaʼ mīi ŋiŋ yīi, a á jʉɔ́ ŋgʉɔ̄ʼ ánɛ mbap nnɛ̄t zi, a gɔ le zéŋ mefa ŋghʉ̄ ɛ́.

² Púp, pɛ ezī tsetsɔŋɔ, ánɛ eleʼé tsīi pɛ zɛɛ́t ŋgɔ̄ elɔk enáŋ á esī atsetsáʼ ega, ńnáŋ páʼ Ndém a á si ŋkɔ̄ŋɔ ŋ́gɛ, pɛ enáŋ épúp. Pɛ é le zéŋ nnáŋ páʼ mbe nnɛ̄t zɛ, e é si ntshónɛ á wɛ́ ŋ́gɛ, pɛ enáŋ épúp ɔ́.

³ Pɛ lē ndáʼ mbí njhʉ̄, ńdɔk ŋghʉ̄ ajū mīi, wɔ te zhɛ́‑kwaʼ Ndém, é si ŋkɔ̄ŋɔ ŋ́gɛ mɛ́ eghʉ̄, tɛ á kuʼ. Pɛ lɛɛ́ nnáŋa á ntē agā, ntií ntiī ekwaŋte tepɔŋ é gɔ́ á ntē pɛ. Ŋ́gɔ́ wɔ núnú‑meluʼ, ńnɔŋ ŋkʉ̄ɔ ŋgɔŋ eleʼé metsem, ḿbú nnɔŋ nnúu meluʼ tɛ mbíatɛ, ńzéŋ nnɔŋ ŋgūʼtɛ emɔ̄ʼ etsō, ńtɔ́ŋɔ lɛ Ndém, á gɔ́ ajū mīi, á té á Ndém pɔŋ.

⁴ Á piīŋ ŋgɔ́ tsetsɔŋɔ, wɔ te zhɛ́‑kwaʼ Ndém mɛ́t, é cʉ́ʼɛ njʉ́ɔ ezɛ ntií lenāŋ, á kʉʼne á wɔ́p kʉʼne, melaʼ mīi pɛ a pɔ́p é té zɛ́t mbútɛ efʉ̄ʼtɛ etsiá menu esē ɛ́. Pɔ́ jʉ́ɔ épúp, ńcʉ́ʼɛ nzɔ̄tɛ á wɛ́ zɔte.

⁵ Táʼ, pɔ́ e láʼ etshí á mvhɔ Ndém, élɛʼ menu mɔ́p. Ndém mɛ́t a á ndáʼ ntshí á yí á lezāʼ ntsaŋ zɔp a epuɔ mete, mbɔɔ ezɔp a mepfhō.

⁶ Ŋ́gɔ́ mé epuɔ pīi, pɔ́ lē ŋkwhʉ́te, mbɔ pɔ́ le zɛ́t á ndo esī atsetsáʼ ega páʼa, Ndém á záʼ ntsaŋ zɔp a pɔ́p, páʼ a á si nzáʼa ntsaŋ zɔp tɛ mbɔɔ awɔ́ lɛ́. Pɔ́ le pīŋ ŋkwhʉ́te páʼā, Klísto á gʉɔ ntswī ŋke mbɔŋ á mbū pɔ́p, ńdɔkɔ efāʼa ŋ́gɛ, Azwakne Ndém a eghʉ̄, pɔ́ enáŋ páʼ Ndém a á si ŋkɔ̄ŋɔ épúp.

Páʼ epuɔ Yɛɛ́so é pɔŋteé á lenāŋ épúp á tsetsɛlɛ pɔ́p

⁷ A lɛɛ̄ nzɛ́t áa méŋ agáʼ afʉʼ lɛ, akʉ̄ɛ akʉ̄ɛ zīi á ŋgɔŋ ega lɛ́, a epú mmī. Melaʼ épúp tɛ́, ndɛ́ʼ leghi tsɛ́ é kʉ, pɛ ekúʼte nnɛ̄t zɛ, ńdɔk mbɔ́k azō á levɛ̄ne á wɛ́ á leswīŋte Ndém.

⁸ Mía ajū mīi á éwú, á gɔ́ áa lɛ, pɛ etswiʼne ekɔ̄ŋne mennɛ̄t mɛ́ efʉʼ metsem, melaʼ mīi, o wɛɛ̄ ŋkɔŋne á mbū ŋiŋ páʼā, ŋ́gákne ndēkne á atʉtʉ mefa mí.

⁹ Pɛ ekókne menɛ̄t mɛ́ nzeŋne zeŋné, té zwɛ́tte.

¹⁰ Ndém a le yá á awíɛ awíɛ eyí nthū. Awíɛ awíɛ a elɔ̄k eyí nthū yīi, Ndém a le yá á yí, ńtswíte emɔ̄ʼ epuɔ. Pɛ ghʉɛ épúp, pɛ gɔ́ wɔ zhɛ́‑lekūʼte ntií ntiī anu mbɔŋ zīi, Ndém a le yá á mbū pɛ.

¹¹ A gɔ́ éyi Ndém a le yá eyi nthū ŋiŋ, é gɔ́ á yí á lezhɛ̄ á leshūŋne, ŋgaŋ á shúŋne ndɔ̄k ńtswī ŋke Ndém. Ŋ́gɔ́ éyi, eyi nthū mmɔʼ ŋiŋ é á letswīte emɔ̄ʼ epuɔ, á lɔk áa mete mīi, Ndém a le yá á yí, tɛ́ ntswíte. Pɛ eghʉ̄ épúp, tɛ́ epuɔ metsem e ezápa ánɛ Yɛɛ́so Klísto, ŋ́gūʼte á Ndém ánɛ ajūɔ tsem. Yɛɛ́so wuɔ mɛ́t mé saáʼ ajūɔ tsem. Awuʼte a egɔ́ á mbū yí, á meŋguʼ meŋguʼ. Á páʼa.

Mɛ́ nɔŋ ndʉɔ́ʼɔ á ŋiŋ melaʼ mīi a á ŋiŋ Yɛɛ́so mbɔ a á eshhʉ̄ mbɔŋ

¹² Mepɔŋ mesoó pá, pɛ zi mbú nnɔ̄ŋ áa ntē mmók, ndɛ́ʼ á kʉʼne á wɛ́. Á épúp páʼā, Ndém á lɔkɔ nzwíʼɛ njʉ́ɔ ntií zīi, pɛ lɔɔ̄k efɛ́ nnɛ̄t ŋgyá á mbū yí épúp. Ndɛ́ʼ á gɔ́ á mbū pɛ, ŋ́gɔ́ á ŋge anu.

¹³ Á cʉ́ʼɛ épúp, ntē wɛ́ é gáŋte, páʼ pɛ é si njʉ́ɔ ŋgʉɔ̄ʼ, páʼ Klísto a le jʉ́ɔ azí épúp. Tɛ́ a eláʼ aleʼé zīi, Klísto a ghʉɛ mɛ́ jʉ́ɔ á shʉ́shɔ́k yi, ntē wɛ́ e echʉ́ nnɛ̄t ŋgáŋte ŋkák.

¹⁴ Epuɔ menɔŋ é nɔŋ nzɔ̄tɛ á wɛ́ melaʼ mīi, pɛ é epuɔ Yɛɛ́so, mbɔ pɛ é meshhʉ̄ mbɔŋ. Mɛ́ nɔɔ̄ŋ nzɔtɛ á wɛ́ páʼā, Azwakne Ndém, á Ŋgwɛ‑Shʉ́shɔ́k á gɔ́ mé pɛ.

¹⁵ Ndɛ́ʼ ŋiŋ nnɔ wɛ á ge ejʉ́ɔ ŋgʉɔ̄ʼ, á gɔ́ melaʼ mīi a á nzwhí á ŋiŋ, kɛɛ́ melaʼ mīi a á njʉ̄ lɛ́, kɛɛ́ melaʼ mīi a á ŋghʉ̄ anu tepɔŋ ndɛʼɛ lɛ̄ɛ, kɛ mbɔɔ melaʼ mīi a á kɔŋ á yí á lekō ánɛ menu mīi, é té á yí cʉte lɛ̄ɛ.

¹⁶ Ŋiŋ a ké ŋgē ejʉ́ɔ ŋgʉɔ̄ʼ, á gɔ́ melaʼ mīi ŋgaŋ a á ŋiŋ Klísto, ndɛ́ʼ esē é kú á yí. A cʉ́ʼɛ épúp, ŋgaŋ á wuʼte á Ndém melaʼ mīi, mɛ́ é si ntɔ́ŋɔ á yí lɛ ŋiŋ Klísto.

¹⁷ Njhʉ̄ e é kuʼ zīi, Ndém a gʉɔ me nzaáʼ ntsaŋ zɔp a epuɔ menɔŋ. A á ké ezi mvhɔ, ézáʼ ezi epuɔ alāʼ pí. A piŋɛ nzī á lezāʼ ezímpɛ épúp, mbɔ a a kó ánɛ epuɔ pīi, pɔ́ é si ndʉ̄ʼɛ á wɔ́p á levēŋ ŋke mbɔŋ yí, azɔ́p anu a egɔ́ é lɛ akɔ̄?

¹⁸ Mɛ́ le tí á ntē aŋwaʼne Ndém ŋ́gɛ: «Ŋiŋ ndeŋ ndeŋ a jʉ́ɔ ŋgʉɔ̄ʼ tɛʼ, tɛ́ Ndém á ghʉ̄ á tswɛ́t, mbɔ a láʼ egɔ́ lɛ akɔ̄, á mbū wɔ te júʼ‑nchu Ndém, mbɔɔ á mbū megaŋ mefa ā?»

¹⁹ Melaʼ épúp tɛ́, epuɔ pīi pɔ́ jʉɔ́ ŋgʉɔ̄ʼ melaʼ mīi, pɔ́ é si nzīŋɛ páʼ Ndém a á si kɔŋɔ épúp, pɔ́ etswiʼne ŋghʉ̄ anu mbɔŋ, ńdɔk ŋgʉ̄ɔ mé mvhɔ. Ńtsékne azɔ́p anu ntsem á mbū Ndém, yí mé le pɔ́ á wɔ́p. A á ŋiŋ, ńdāʼne á anu, ŋ́ghʉ̄.