1 Piɛ 3 - Eka Eswhī

Páʼ ŋiŋ Yɛɛ́so a gɔ enáŋ épúp ánɛ alaá‑ŋgyā zí

¹ Ndeŋ ndeŋ páʼ wɔ ghʉ‑afaʼ á mba epuɔ, é pɔŋteé á lenɔŋ nnɛ̄t á esī á mvhɔ memɔʼɔ́ afaʼ pɔ́p lā, ewíɛ́ menzwí lɛ́ a enɔ̄ŋ nnɛ̄t á esī á mvhɔ ndō yi, tɛ ŋgɔ́ yīi, azi ŋgɔ́ éyi emɔ̄ʼ mbaŋa, é kaá nnɔ̄ŋ njúʼɔ ashuŋne Ndém ɛ́, awɔ́ ŋiŋ wɔp lɛ́, á fhó ánɛ atswhī mbɔŋ nzwí yi, ŋ́kúmne ntē yí, té gɔ́ yīi, pɛ é lé á anu,

² melaʼ mīi pɔ́ é si njʉ́ɔ páʼ, pɛ wɛɛ̄ atswhī mbɔŋ, ńnɔŋ ŋgūʼtɛ a wɔ́p.

³ Ndɛ́ʼ akwaŋte zɛ́ á lɛ ntshí áa letswiŋ mbe nnɛ̄t zɛ, á nzem apɛ́: páʼ lekwɛ̄tte athū, páʼ lezwīk mekwáŋ pīi, mɛ́ lɔɔ̄k á gɔ́ɔl tɛ́ ncūŋte, páʼ lemaʼ memía menzhó.

⁴ Pɛ egē etswiŋ nnɛ̄t zɛ, a egɔ́ páʼ ntē wɛ́ é épúp. Ajū mīi á teē nzwiŋ á mbū Ndém, á si ŋgɔ́ á letswiŋ nnɛ̄t mé atswhī mbɔŋ zīi, á fhɔ́ɔ á atá ntē, ntií atswhī mɛ́t e gɔ le pék. Á ghʉʉ̄, ŋiŋ á pwɛ́ne nnáŋ té ŋak.

⁵ Á lɛ afʉʼ mvhɔ, wɔnzwí pīi, pɔ́ ntshií ntē wɔ́p ánɛ Ndém, ńnɔŋ néŋɛ ntē nzwíʼtɛ ajū mīi, Ndém a le laʼnēē, pɔ́ tswiŋ nnɛ̄t zɔ́p ánɛ ejʉɔ ntií mɛ́t, ńnɔŋ nnɔ̄ŋɔ nnɛ̄t zɔp á esī, á mvhɔ melō pɔ́p.

⁶ Saála á nzwí Ablaham a lɛ ntií menzwí jʉɔ mɛ́t. A le júʼ nchu ndō yi, tɛ ntɔ́ŋɔ á yí lɛ Ndi yi. Pɛ ghʉɛ menu mbɔŋ, té pɔ́k amɔ̄ʼ azō, mbɔ pɛ e cʉ́ʼ páʼ ewɔŋkhʉ̄ Saála lā.

⁷ Ŋgɔ́ á mbū pɛ mbaŋa, awíɛ awíɛ pɔ́ nzwí yi e enáŋ á mbɔŋɔ́. Ńnɔŋ nzhɛ́ɛ á légɛ, wɔnzwí é si ŋgɔ́ ajūɔ ndʉne lʉné. Pɛ ewūʼte á wɔ́p, melaʼ mīi lenāŋ leswhī tsīi, Ndém a á si ŋgyáa á mbū pɛ ndémndēm, a á si mbúu ŋgyáa á mbū pɛ a pɔ́p. Pɛ ghʉɛ épúp, mbɔ amɔ̄ʼ azō á gɔ le pú ntɛ́nne aswiŋte zɛ́, á mvhɔ Ndém ɛ́.

Ŋiŋ Yɛɛ́so a pɔŋteé á lejʉ̄ɔ ŋgʉɔ̄ʼ

⁸ Meŋ a ge emakne, élé gɛ, pɛ metsem e epú nnáŋ ŋ́gɔ́ á taʼ nchu. Awíɛ a ejʉ́ɔ anu ŋiŋ páʼ azí, ŋ́kɔ̄ŋne mennɛ̄t mɛ́ páʼ epɔ̄ taʼ ŋiŋ lā. Ŋ́gwɛ̄ atsāmezeŋɛ á nnɔ pɛ, ńnɔ̄ŋ nnɛ̄t á esī á nnɔ pɛ.

⁹ Ŋiŋ a ghʉɛ á wɛ́ anu tepɔŋ, ndɛ́ʼ pɛ elɔ̄ɔk anu tepɔŋ mbʉ̄ʼ. Ŋiŋ a zɔtɛ á wɛ́, ndɛ́ʼ pɛ elɔ̄ɔk nzɔ mbʉ̄ʼ. A cʉ́ʼɛ épúp, o elɔ́ ŋ́gɛ Ndém a enéŋ mbwɛ́né, ánɛ ŋgaŋ. Ndém a lɛɛ́ ntɔ́ŋɔ á wɛ́ ŋ́gɛ pɛ eghʉ̄ épúp páʼa, éfāʼa á lenēŋ mbwɛ́né zīi, a le laʼnē ánɛ pɛ.

¹⁰ Pɛ enáŋ épúp, melaʼ mīi mɛ́ le tí á ntē aŋwaʼne Ndém ŋ́gɛ: «Ŋiŋ a nɔŋ ŋkɔ̄ŋɔ á legē enáŋ, ńnɔŋ njúʼɔ á mbɔŋɔ́, á lewɛ meleʼé alāʼ mbɔŋ, ŋgaŋ á pá ashuŋne tepɔŋ á letō á nchu yí. Ḿbá á yí á lelāʼ mbú éshúŋ mepɔp.

¹¹ Á pɔŋ ŋ́gɛ ŋgaŋ a elʉɔ́ʼte anu tepɔŋ, ńcʉ́ʼɛ ŋghʉ̄ɛ áa menu mbɔŋ. Ńnáŋ efʉʼ metsem, ŋ́gwɛ̄ apwɛne á nnɔ epuɔ, ŋ́kāk ete, ŋ́gwɛ ndɔ̄k ŋgʉ̄ɔ mé mvhɔ,

¹² melaʼ mīi Atsyapuɔ a tshií menēk mí ánɛ epuɔ pīi, meziŋɛ́ mɔ́p é ndeŋ ndeŋ, páʼ a á si ŋkɔ̄ŋɔ, ńnɔŋ ntéŋɛ metuúŋ njúʼɔ aswiŋte zɔ́p. Ḿbiŋ ŋgɔ́ mé epuɔ tepɔŋ, á pú ntém nzem zɔp. »

Mɛ́ nɔŋ ndʉɔ́ʼɔ á wɛ́, pɛ emāaʼ ŋgua ŋgyá áa mbū Ndém

¹³ Ntē wɛ́ é nɔŋ ŋkhʉ́nɛ á leghʉ anu mbɔŋ, mbɔ awɔ́ a gɔ epīiŋ ŋghʉ̄ anu tepɔŋ ánɛ pɛ ɛ̄?

¹⁴ Mɛ́ zi ŋgē enéŋ ŋgʉɔ̄ʼ á athū pɛ, á gɔ́ éyi, pɛ é ŋghʉ̄ ndeŋ ndeŋ páʼ Ndém a á si ŋkɔ̄ŋɔ, mbɔ pɛ é meshhʉ̄ mbɔŋ. Ndɛ́ʼ pɛ epɔ́k epuɔ menɔŋ pīi, pɔ́ yáa á wɛ́ ŋgʉɔ̄ʼ, ndɛ́ʼ pɛ ecʉ́ʼ, ntē wɛ́ é vɛt.

¹⁵ Tɛ ncʉ́ʼ épúp, pɛ ewūʼte á Klísto mé atá ntē zɛ́ ntsem. Yí mé Atsyapuɔ wɛ. Pɛ egɔ́ efʉʼ metsem mbíp, tɛ ŋgɔ́ yīi, ŋiŋ á zɛ́ttɛ á wɛ́ ŋ́gɛ, melaʼ akɔ̄ pɛ néŋɛ ntē wɛ́ ánɛ Atsyapuɔ Yɛɛ́so lɛ́, pɛ kɛ́ʼte eshúŋ á yí.

¹⁶ Ŋ́ké ncʉ́ʼ mé leshūŋ, ńdɔ̄k áa nda nda pɔ́ mekuʼ. Á mbɔŋ ŋ́gɛ, akwaŋte zɛ́ a enɔ̄ŋ le ŋŋāka á wɛ́ ɛ́, tɛ́ a etsīa épúp, esē e ekú epuɔ pīi, pɔ́ sɛ́ʼɛ á wɛ́. Épuɔ pīi pɔ́ shúŋnɛ té pɔŋ ánɛ pɛ, melaʼ mīi, pɛ é si nzīŋɛ ánɛ mɛnzhɛ Klísto, á mɛnzhɛ mbɔŋ.

¹⁷ Mbɔŋ a á ŋiŋ á lege ejʉ́ɔ ŋgʉɔ̄ʼ, mbɔ a á ŋghʉ̄ anu mbɔŋ, éyi Ndém a á kɔŋ épúp, ńtɔ́k á yí á lege ejʉ́ɔ ŋgʉɔ̄ʼ, mbɔ a á ŋghʉ̄ á anu tepɔŋ.

Epuɔ metsem é le jʉ́ɔ páʼ Yɛɛ́so a á asaʼa‑ndʉɔ́ʼ

¹⁸ Klísto yí méŋwɛ̄t a le jʉ́ɔ ŋgʉɔ̄ʼ, ńdɔk esōk mefa epuɔ metsem. A le ghʉ̄ épúp legʉɔ lemɔʼɔ́, á kuʼ épúp. Yí yīi, a lɛ á ŋiŋ ndeŋ ndeŋ, a le pīŋ ŋkwhʉ́ melaʼ megaŋ mefa, tɛ́ ndɔk ŋghʉ̄ pɛ ezéŋ ŋkūʼ á wɛ́, á lezēŋ ntshí á mvhɔ Ndém. Mɛ́ le zwhí áa mbap nnɛ̄t zi, táʼ, Azwakne Ndém á ké ŋghʉ̄, á zím ánɛ lewhʉ̄.

¹⁹ A le ké ŋgʉ̄ɔ ntswī ŋke mbɔŋ, á ŋgyā atʉɛ́, á mbū egega epuɔ pīi, pɔ́ lē ŋkwhʉ́te.

²⁰ Epuɔ puɔ mɛ́t, é si ŋgɔ́ epuɔ pīi, pɔ́ lɛ efʉʼ mvhɔ, ńtē athū á mbū Ndém. Afʉʼ zīi Noe a le kɔ́ akɛnūʼ, Ndém á nɔŋ nzwíʼtɛ té kyákte nnɛ̄t, ŋ́gɛ pɔ́ eshʉʼ ŋkó éwú, pɔ́ zɛ́t ntʉɛ athū tee. Emɔ̄ʼ ntaʼné epuɔ lefaá ndaʼ, mé kó á ntē akɛnūʼ. Ndém á ghʉ pɔ́ vuʼu ntshi.

²¹ Ntshi wuɔ mɛ́t, é lɛ ayiŋne á lenoʼ epuɔ á ntshi, páʼ Ndém a á ayáʼa, ńzápa éwú, ŋ́ghʉ̄ɛ pɛ tswɛ́tɛ lā. Lenoʼ pɛ á ntshi wuɔ mɛ́t, a te á lelɔk esōk nchʉ́ ánɛ mbe nnɛ̄t ɛ́, a gɔ́ áa á lelɔk ntswī á légɛ, pɛ é véŋ á lekūʼte á Ndém mé taʼ ntē. Ndém a á si nzápa ánɛ lenoʼ pɛ á ntshi, ŋ́ghʉ̄ɛ pɛ tswɛ́tɛ, melaʼ mīi, a le ghʉ̄ʉ̄, Yɛɛ́so á zím ánɛ lewhʉ̄.

²² A le zím épúp, ŋ́kɔ́ʼ mé lephū, ńnáŋ ánɛ ŋkɔʼɔ́ apū ete Ndém. A naáŋ éwú esáʼa mecɔʼ Ndém, mbɔɔ ntií ntiī ajūɔ tsem zīi, á wɛɛ̄ mete á athʉ́ lephū.