1 Piɛ 2 - Eka Eswhī

Ndém a lē ntsɔ́ʼ á wɛ́ ŋ́gɛ pɛ egɔ́ epuɔ pí

¹ Melaʼ épúp tɛ́, pɛ etó ánɛ ntií ntiī esɔ̄, ńdʉ̄ʼ á legɔ̄ megaŋ mekɛ̄t. Ńdʉ̄ʼ á legɔ̄ megaŋ ŋkɔŋ menēk, ńdʉ̄ʼ á letshī ntē ánɛ ajūɔ ŋiŋ, ńdʉ̄ʼ á lesɛ̄ʼ epuɔ.

² Páʼ epɔ̄ meswī pīi, mɛ́ zɛɛ́t nzhíɛ á wɔ́p, é shʉ́ɛ́ lepē lā, pɛ esé azɛ́ á lejūʼ ashuŋne Ndém efʉʼ metsem. Aziɛ́ mé kwaʼ lepē tsīi, alɔ́ʼ á té éwú ú. Pɛ enɔ́ŋ lepē mɛ́t, ńdɔk ntswhí, tɛ́ Ndém a eláʼ ŋghʉ̄, pɛ etswɛ́t.

³ Aŋwaʼne Ndém á leé ŋ́gɛ: «Pɛ kʉʉ̄ŋ nzwíʼ tɛ nzhɛ́ páʼ Atsyapuɔ a pɔɔ̄ŋ épúp. »

⁴ Pɛ etshóte nnɛ̄t mbáte á Atsyapuɔ Yɛɛ́so. Yí mé si ŋghʉ̄ɛ mɛ́ gɔ́ɔ éwú. Yí mé tɔ́, mbɔ epuɔ menɔŋ é le pīŋ ŋgwáʼ, Ndém á kaŋ, melaʼ mīi, a á si nzhɛ́ɛ nzwiŋ yí.

⁵ Pɛ azɛ́, pɛ ecʉ́ʼ páʼ metɔ́ nte lā. Ńcʉ́ʼ, Ndém a elɔ̄k á wɛ́ ŋkwɛ́t ŋgyā zi. Ŋgyā mɛ́t, Azwakne Ndém mé naáŋ éwú. Pɛ egɔ́ á ŋgyā mɛ́t, ŋ́gɔ́ nnɔ wɔ nɔŋ‑epɔʼ Ndém, Azwakne Ndém a etshóne á wɛ́, pɛ eyá etsō epɔʼ á mbū Ndém, étsō epɔʼ tsīi e pɔŋ á Ndém, a etswí melaʼ Yɛɛ́so Klísto.

⁶ Mɛ́ le tí á ntē aŋwaʼne Ndém ŋ́gɛ: «A awuɔ yīi, meŋ á kaŋ á tɔ́ yīi a teē nzwiŋ, ńnɔ̄ŋ á yí, á tésɔŋ Siɔŋ lā. Tɔ́ mɛ́t, á gɔ́ á tɔ́ lezhō ŋgyā. Ŋiŋ a fíɛ́ nnɛ̄t ŋgyá mé tɔ́ wuɔ mɛ́t, mbɔ a te e láʼ etapne ɛ́. »

⁷ Tɔ́ wuɔ mɛ́t a á mbū pɛ pīi, é fɛɛ́ nnɛ̄t, ŋ́gɔ́ ajūɔ tee nzwiŋ. Ḿbiŋ ŋgɔ́ á mbū epuɔ pīi, pɔ́ lʉʉ̄ʼ á wɔ́p á lefɛ̄ nnɛ̄t ŋgyá á mbū yí, mbɔ aŋwaʼne Ndém á si ndʉ́ɛ́ ŋ́gɛ: «Tɔ́ yīi, mepɔɔ‑ŋgyā é le kʉŋtē ŋgwáʼ, ewiɛ́ mé le shʉ̄ʼ ncʉ́ʼ á tɔ́ lezhō ŋgyā. »

⁸ Á zéŋ ndé ŋ́gɛ: «Tɔ́ mɛ́t a zeéŋ ŋgɔ́ á tɔ́ yīi, a ghʉʉ̄ mɛ́ kwate. Á mía mía tɔ́ yīi, a ghʉʉ̄ ŋiŋ á whʉ á esī. » Epuɔ é kwate éwú, melaʼ mīi, pɔ́ é lʉʼ á lejūʼ ashuŋne Ndém, ḿvéŋ. Á gɔ́ anu zīi, Ndém a le zapá ŋ́gɛ, a fú eláʼ egɔ́ épúp, á mbū pɔ́p.

⁹ Ŋ́gɔ́ mé pɛ, mbɔ pɛ é si ŋgɔ́ nzwɛt epuɔ pīi, Ndém a le kāŋŋ̄, ŋ́gɔ́ nnɔ wɔ nɔŋ‑epɔʼ Efɔ ŋgɔŋ, ŋ́gɔ́ á alāʼ zīi, á azi Ndém, ŋ́gɔ́ epuɔ pīi, pɔ́ é epuɔ Ndém. A le ghʉ̄ pɛ fhó á ntē nzém, ŋ́kó á ntē ajʉʼ zīi á fók lɛ púú. Ŋghʉ̄ɛ épúp páʼa ŋ́gɛ, pɛ esáʼ eshúŋ á mɛgém ajū mīi, a le ghʉ̄ʉ̄.

¹⁰ Á lɛ amɔ̄ʼ afʉʼ, pɛ zɛ́t té gɔ́ epuɔ Ndém. Á piīŋ ŋgɔ́ tsetsɔŋɔ, pɛ gɔ́ epuɔ Ndém. Á lɛ amɔ̄ʼ afʉʼ, Ndém á nɔŋ te ntsáa mezeŋɛ mɛ́ ɛ́. A piīŋ ŋgɔ́ tsetsɔŋɔ, ńnɔŋ ntsáa mezeŋɛ mɛ́.

Pɛ egɔ́ megaŋ afaʼ Ndém

¹¹ Mepɔŋ mesoó pá, pɛ ekímte páʼ pɛ é ndo esī atsetsáʼ ega, ŋ́gɔ́ áa mege, ŋ́gɔ́ áa metsia nzhɛ. Meŋ á si ntékɛ á wɛ́ ŋ́gɛ, pɛ epá á ntií ntiī ekwaŋte tepɔŋ tsīi, é ntē pɛ. É si ntɛ́nnɛ á wɛ́ á leghʉ ajū mīi, a pɔŋ á Ndém.

¹² Pɛ ewɛ̄ á atswhī mbɔŋ á tsetsɛlɛ wɔ te zhɛ́‑kwaʼ Ndém, tɛ ŋgɔ́ yīi, pɔ́ zi ncɔ̄p á wɛ́ ŋ́gɛ, pɛ é ghʉ anu tepɔŋ, pɔ́ fhó ánɛ mefaʼ mbɔŋ mɛ́, ŋ́gūʼte á Ndém, á aleʼé zīi Ndém a shʉʼɛ, á nzáʼ ntsaŋ.

Ajū mīi epuɔ Yɛɛ́so é pɔŋteé á leghʉ

¹³ Páʼ pɛ é si nzīŋɛ ánɛ mekhu Atsyapuɔ lā, pɛ ejúʼ nchu epuɔ metsem pīi, pɔ́ sáʼa alāʼ, ńjúʼ nchu efɔ, á esaʼa‑alāʼ, ŋ́gɔ́ á ŋwɛ́t.

¹⁴ Ńjúʼ nchu epɔ̄ melʉɛ pīi, efɔ a le zāp ŋkaʼte wɔ́p. Yí mé le tsɔ́ʼ á wɔ́p ŋ́gɛ, pɔ́ etswá ŋgʉɔ athʉ́ lepé ánɛ epuɔ tepɔŋ, ḿbiŋ ŋgūʼte epuɔ pīi, pɔ́ é si ŋghʉ̄ɛ anu mbɔŋ.

¹⁵ Pɛ eghʉ̄ épúp, melaʼ mīi Ndém a á si ŋkɔ̄ŋɔ ŋ́gɛ, pɛ eghʉ̄ anu mbɔŋ, ńdɔk ntsɛ́t nchu wɔ te véŋ‑anuúnē, métsetseŋ.

¹⁶ Pɛ egɔ́ páʼ epuɔ pīi, pɔ́ naáŋ á ŋga athū pɔ́p lā. Táʼ, ndɛ́ʼ pɛ ké ndɔ̄k épúp, ńjɔ́ʼɔ ŋkʉŋɛ́, ńdʉɔne ŋghʉ̄ menu tepɔŋ. A cʉ́ʼɛ épúp, pɛ eké ŋghʉ̄ áa páʼ megaŋ afaʼ Ndém, é pɔŋteé á leghʉ épúp.

¹⁷ Pɛ eghʉ̄ mekuʼ epuɔ metsem, ŋ́kɔ̄ŋ epɔ̄ memía pɛ́, épuɔ Yɛɛ́so. Ŋ́gē enáŋ, ńnɔŋ ŋgūʼtɛ á Ndém, ńjúʼ nchu efɔ.

Pɛ ezīŋ ánɛ mekhu Yɛɛ́so Klísto

¹⁸ Á mbū pɛ pīi, pɛ é megaŋ afaʼ á mba epuɔ, awíɛ awíɛ a ejúʼ á mbū mɔʼɔ́ afaʼ yi, ŋ́ghʉ̄ mekuʼ mí tɛ ntsékne. Pɛ é le lɛ̄ ŋghʉ̄ áa mbū ŋiŋ yīi, a ghʉʉ̄ á mbɔŋɔ́, ńzéŋ ŋgɔ́ á te ŋak á, pɛ eghʉ̄ tɛ mbɔɔ á mbū ŋiŋ yīi, a cɔkeé.

¹⁹ Pɛ lɔkɔ á légɛ Ndém a tshií menēk ánɛ pɛ, ŋ́kwɛ́t ntē ánɛ ŋgʉɔ̄ʼ zīi, mɛ́ néŋɛ á athū pɛ ndémndēm, mbɔ a pɔŋ á Ndém.

²⁰ O faa anu, tɛ mɛ́ nɔ̄ŋ ŋgɔ̄ á ntswá wu, o nɔ̄ŋ ŋkwɛ́tɛ ntē, mbɔ o o jhʉ́ á apɛ akɔ̄? Mɛ́ piŋɛ ŋgē etswá á wú, á gɔ́ éyi, o ó ŋghʉ̄ anu mbɔŋ, o pīŋ nnɔ̄ŋ ŋkwɛ́tɛ ntē, mbɔ á páʼā, o lɔkɔ ŋghʉ̄ɛ á mbɔŋɔ́ á mvhɔ Ndém.

²¹ Ndém a lɛɛ́ ntɔ́ŋɔ á wɛ́ páʼā, ŋ́gɛ pɛ eghʉ̄ épúp. Klísto a le jʉɔ́ azí ŋgʉɔ̄ʼ melaʼ mɛ́. Ńdɔkɔ ntswīi á wɛ́ efʉʼ, ŋ́gɛ pɛ enáŋa nzīŋɛ ánɛ mekhu mí.

²² Yí yīi a lɛ te fa, mela é piŋ nzī mbú te á nchu yí tó.

²³ Mɛ́ le zɔtē á yí, á piŋ te lɔ̄k nzɔ ntsɔ́ʼ ɔ́. Ńnɔŋ ŋgyáa á yí ŋgʉɔ̄ʼ, á piŋ te ŋiŋ nēek, ńtsékne azí anu áa mbū Ndɔk ndeŋ ndeŋ nzáʼ ntsaŋ.

²⁴ Klísto a le tswíʼ mefa mímpɛ mbīʼ á mbe nnɛ̄t yí, ńdɔk ŋkwhʉ́ ánɛ mbaŋne paŋné, tɛ́ ḿpɛ elɔ̄ɔk ŋkwhʉ́ ánɛ mefa mímpɛ, ḿbiŋ nzhɛ́ á leziŋ ndeŋ ndeŋ, páʼ Ndém a á si ŋkɔ̄ŋɔ. Pɛ le zapá ánɛ meféŋ mí tɛ́ ntē.

²⁵ Pɛ lɛɛ́ ŋgánɛ páʼ memvhō mīi, é fa nzhɛ lā. Tsetsɔŋɔ, pɛ kʉʉ̄ŋ ŋké mbīŋ nzem mé lezēŋ mpfɛnne‑memvhō, ŋ́gɛ a ekápte á wɛ́.