1 Piɛ 1 - Eka Eswhī

Atsaʼte

¹ Meŋ Piɛ nziŋ‑ntō Yɛɛ́so Klísto, mé tíi akɛtte jʉɔ páʼa. Ńtíi á mbū pɛ, épuɔ pīi Ndém a le kāŋ á wɔ́p, pɔ́ cʉ́ʼ epuɔ pí. Pɛ le sāŋ ejʉʼ, ŋ́gʉɔ nnáŋte ánɛ mepak ŋgɔŋ Lóma muɔ páʼa: á Pɔ́ɔŋ, á Ŋgalati, á Kapados, á Azíi, á Bitini, ŋ́gɔ́ mege.

² Ndém Mɔʼɔ́ a le té njhʉ̄ ŋkāŋ á wɛ́, páʼ a le zapá épúp. Azwakne zí á ghʉ, pɛ tswhi ncʉ́ʼ epuɔ pí. Ŋ́kāŋ á wɛ́ épúp, ŋ́gɛ pɛ ezīŋ ánɛ mekhu Yɛɛ́so Klísto, a elɔ̄k metshi mí esōk á wɛ́. Ŋ́gɛ Ndém a elɛ ŋghʉ̄ anu mbɔŋ té ndhʉ ánɛ pɛ. Ŋ́ghʉ̄ pɛ enáŋ á ntē apwɛne tɛ ntsékne.

Ḿpɛ esyákne páʼ Ndém a lē ŋghʉ, ḿpɛ tswɛ́t

³ Awuʼte a egɔ́ á mbū Ndém, á Mɔʼɔ́ Yɛɛ́so Klísto Atsyapuɔ yímpɛ. A le fhó ánɛ mía atsāmezeŋɛ zí, ńzápa ánɛ páʼ Yɛɛ́so Klísto á le zím ánɛ lewhʉ̄, ńzhí á yímpɛ leswhī leswhī. Melaʼ épúp tɛ́, ḿpɛ enéŋ á ntē pímpɛ á légɛ, ḿpɛ e fú ewɛ ajūɔ tsem zīi, Ndém a le phʉ́ʉ̄,

⁴ ákim mbɔŋ zīi, á gɔ le mīi, á le lʉ́, ḿbīŋ le zwīiŋ. Ndém a lē eféŋ akim mɛ́t, á mbū pɛ, á athʉ́ lephū.

⁵ A le féŋ á mbū pɛ pīi, pɛ fɛɛ́ nnɛ̄t ŋgyá mé yí, á lɔk mete mí ŋkápte á wɛ́. Tɛ mɛ́ eláʼ ánɛ nzoknzem aleʼé, ńjʉ́ɔ páʼ a á ghʉ pɛ tswɛ́t.

⁶ Púp, pɛ é ntē lekāk, tɛ á zi ŋgɔ́ éyi, pɛ e zéŋ emek ánɛ méŋ afʉʼ, melaʼ ntií ntiī ŋgʉɔ̄ʼ zīi, epuɔ menɔŋ é ghʉʉ̄, pɛ jʉ́ɔ.

⁷ Pɛ e jʉ́ɔ ŋgʉɔ̄ʼ mɛ́t épúp, tɛ́ mɛ́ ejʉ́ɔ kɛ pɛ zi ŋkwāʼ efɛ́ nnɛ̄t ŋgyá á mbū Yɛɛ́so lɛ́ɛ. Wɛ́ lefɛ̄ nnɛ̄t ŋgyá á mbū Yɛɛ́so, a teē nzwiŋ ntɔ́k á gɔ́ɔl. Mɛ́ gē ezhɛ́ á gɔ́ɔl mbɔŋ, ńtɔ̄ á yí á mmók. Á piŋ ŋké efú ndáʼ ḿbék péke. Ndém a a láʼ efhó ánɛ wɛ́ á lefɛ̄ nnɛ̄t ŋgyá á mbū Yɛɛ́so, tɛ́ ekɔ́ʼne nzwiŋ wɛ́, tɛ́ ewuʼte á wɛ́, tɛ́ eghʉ mekuʼ mɛ́, á aleʼé zīi, Yɛɛ́so Klísto yí méŋwɛ̄t, a ghʉɛ mɛ́ zhɛ́ɛ á yí.

⁸ Á yí yīi, pɛ é si ŋkɔ̄ŋɔ á yí, té zi ŋgɔ́ aleʼé ntshí lezēk ánɛ yí. Á yí yīi, pɛ fɛɛ́ nnɛ̄t ŋgyá á mbū yí, tɛ nzī nzɛ́t áa té jʉ́ɔ á yí. Melaʼ épúp tɛ́, pɛ é ntē lekāk té ndhʉ, ŋ́kák tɛ ŋgɔ́ yīi, mɛ́ gɔ le zhɛ́ páʼ, mɛ́ gɔ eshúŋ épúp ɔ́.

⁹ Ŋ́káka épúp melaʼ mīi, pɛ wɛɛ̄ ajū mīi, pɛ lɛɛ́ efíɛ́ nnɛ̄t ŋgyáa á mbū Yɛɛ́so páʼā, melaʼ aziɛ́. Azō mɛ́t á gɔ́ páʼ Ndém a á ghʉ, pɛ tswɛ́t.

¹⁰ Ŋ́gɔ́ mé Ndém á leghʉ epuɔ tswɛ́t, mbɔ metswi‑ŋke Ndém é le fāʼ páʼ a láʼ etɔ́k épúp. Ńtúŋ atseŋ, tɛ́ nté njhʉ̄ eshúŋ á wɛ́ anu mbɔŋ té ndhʉ jʉɔ mɛ́t zīi, Ndém a le zapáā, á lelāʼ ŋghʉ̄ ánɛ pɛ.

¹¹ Azwakne Klísto á lɛ ánɛ metswi‑ŋke Ndém, ńnɔŋ ŋghʉ̄ɛ, pɔ́ tʉ́ɛ́ njhʉ̄ eshúŋɔ epuɔ ŋgʉɔ̄ʼ zīi, Klísto a shʉʼ ejʉ́ɔ, tɛ́ ekó á ntē lewūʼ tsí. Pɔ́ le nɔ̄ŋ efaʼa á lezhɛ̄ afʉʼ alāʼ, pɔ́ meyiŋne mīi, e shʉʼ enɔŋ etsiatɛ, tɛ́ mɛ́ elɔk nzhɛ́ á légɛ, njhʉ̄ menu mīi, Azwakne Klísto á le phʉ́ʉ̄, e é kuʼ.

¹² Ndém a le kɛʼté eshúŋ á wɔ́p ŋ́gɛ, ŋke yīi mɛ́ le gɛ, pɔ́ egʉɔ ntswī, é té cʉ̄te á wɔ́p pɔ́p méŋwɛ̄t ɛ́, ŋ́ké mbiŋ ncʉ̄te á wɛ́. Ŋke mɛ́t, tɛ́ wɔ shúŋ‑anu Ndém, ŋ́ke mbɔŋ, pɔ́ é ayáʼa ntswīi, á mbū pɛ. Ŋké ndɔ̄kɔ áa mete Azwakne Ndém, páʼ Ndém a le fhó á lephū ŋgyá lā, tɛ́ ntswīi. Mecɔʼ Ndém, é zeéŋ nnɔŋ eshʉ́ɛ́ azɔ́p, á lezhɛ̄ ŋke wuɔ mɛ́t.

Pɛ ewɛ̄ á atswhī zīi á pɔŋ á Ndém

¹³ Melaʼ menu mɛ́t ntsem tɛ́, ndɛ́ʼ leghi tsɛ́ é kʉ, athū zɛ́ a etshí áa leghʉ afaʼ Ndém. Pɛ enéŋ ntē wɛ́, ńzwíʼte anu mbɔŋ té ndhʉ zīi, Ndém a a shʉʼ eghʉ ánɛ pɛ. A egɔ́ á leghʉ pɛ etswɛ́t, á afʉʼ zīi Yɛɛ́so Klísto a ghʉɛ mɛ́ zhɛ́ɛ á yí.

¹⁴ Pɛ ejúʼ nchu Ndém, páʼ ewɔŋkhʉ̄ pīi, é júʼɔ nchu memɔʼɔ́ pɔ́p lā. Pɛ etó ánɛ ecū mīi, pɛ ke zɛ́t te zhɛ́ á Klísto, ntē wɛ́ é nɔŋ ntshónɛ á wɛ́, pɛ ghʉ̄ɛ.

¹⁵ Á gɔ́ áa lɛ, pɛ egɔ́ té alɔ́ʼ, ánɛ meziŋɛ́ mɛ́ ntsem, ńdeŋ ndeŋ páʼ Mɔʼɔ́ wɛ Ndém, páʼ a le tɔ́ŋ wɛ lā, a á azí té alɔ́ʼ.

¹⁶ Ndém a leé á ntē aŋwaʼne yí ŋ́gɛ: «Pɛ egɔ́ té alɔ́ʼ, páʼ yí méŋwɛ̄t azí a á te alɔ́ʼ. »

¹⁷ Pɛ é ntē aswiŋte pɛ, ńtɔ́ŋ á Ndém é lɛ Mɔʼɔ́ wɛ. A te wɛ̄ atɛʼte ánɛ epuɔ ɔ́, ŋ́ké mbiŋ efhó ánɛ eyi leghʉ awɔ́ lɛ́, tɛ́ nzáʼ ntsaŋ zi. Púp, pɛ elɔ̄k meleʼé mīi, pɛ zɛɛ́t ŋgɔ̄ elɔk enáŋ á esī atsetsáʼ ega, ńdɔ̄k meziŋɛ́ mɛ́, ńtswī á légɛ, pɛ é si ŋgūʼtɛ á Ndém.

¹⁸ Pɛ é si nzhɛ́ɛ nzwiŋ yīi, Ndém a le lɔ̄k ncuʼ á wɛ́, ŋ́ghʉ̄ pɛ fhó á ntē mɛt tepɔŋ yīi, wɔ maŋgānjʉʼ pɛ́ é le ziʼné á wɛ́, ńtó. A lɛ te lɔ̄k ajū mīi á gɔ epék, ázō páʼ gɔ́ɔl, páʼ ŋkāp lā, tɛ́ ncūʼ á wɛ́ ɛ́.

¹⁹ A le lɔ̄k á tee nzwiŋ metshi Klísto, tɛ́ ncūʼ á wɛ́. Klísto wuɔ mɛ́t, a á páʼ mɔ́ njʉnjhʉ te alɔ́ʼ yīi, mɛ́ lɔkɔ nnɔ̄ŋɔ epɔʼ lā. Á mɔ́ njʉnjhʉ yīi, tsɔ anu tepɔŋ, á té ánɛ yí í.

²⁰ Ndém a le pú nzɛ́t áa te nɔŋ ŋgɔŋ, ńté njhʉ̄ ŋkāŋ á yí. Á piŋ ŋkūʼ tsetseŋɔ yīi, ŋgɔŋ é si ŋgɔ̄ á mmiī la, á fók á yí á tentā, ŋ́gɛ a etswíte á wɛ́.

²¹ Pɛ zapaá ánɛ yí tɛ́ efɛ́ nnɛ̄t ŋgyá á mbū Ndém. Ndém mé le ghʉ̄ á zím ánɛ lewhʉ̄, yí mé yá á yí lewūʼ te mi, tɛ́ pɛ egē efɛ́ nnɛ̄t eyá á mbū Ndém, ńnɔŋ nzhɛ́ɛ á légɛ, pɛ é ndáʼ ŋgwɛ̄ ajū mīi, pɛ é si eshʉ́ɛ́.

Pɛ enáŋ páʼ epɔ̄ Ndém é pɔŋteé á lenāŋ épúp

²² Pɛ ke lɔ̄k á leziŋ páʼ ashuŋne Ndém á si ndʉ́ɛ́ épúp, ésōk ntē wɛ́, ńdɔkɔ efāʼa á lewɛ kwaʼ ŋkɔŋne á tsetsɛlɛ epɔ̄ memía, ŋ́kɔŋne te sɛt. Púp, pɛ elɔ̄k á taʼ ntē, ńchʉ́ nnɛ̄t ŋkɔ̄ŋne mennɛ̄t mɛ́, éfʉʼ metsem.

²³ Pɛ ezhɛ́ á légɛ, ashuŋne Ndém á naáŋ á lemiʼɛ. Aziɛ́ mé ghʉʉ̄, mɛ́ gɔ́ éwú. Á ghʉʉ̄ mɛ́ zéŋ nzhí á wɛ́ leswhī leswhī, pɛ pú ncʉ́ʼ ewɔŋkhʉ̄ ŋiŋ yīi, a gɔ le kwhʉ́. Ŋiŋ mɛ́t mé le zéŋ nzhí á wɛ́, ŋiŋ yīi a gɔ ekwhʉ́ mé lɛ te zéŋ á wɛ́ nzhí ɛ́.

²⁴ Mɛ́ tií á ntē aŋwaʼne Ndém ŋ́gɛ: «Ŋiŋnɔŋ ntsem a á páʼ mvēŋ lā, lewūʼ tsí ntsem, é gɔ́ páʼ mesa mvēŋ. Mvēŋ e zoó, ŋ́kwhʉ́, mesa mí é kwhʉne mbwɛ̄t á esī.

²⁵ Táʼ, ashuŋne Atsyapuɔ á piŋɛ ŋgɔ́ á le mīi. » Ashuŋne mɛ́t, á si ŋgɔ́ ŋke mbɔŋ yīi, wɔ shúŋ‑anu Ndém é ke tswī á mbū pɛ.