1 Jáaŋ 5 - Eka Eswhī

Ŋiŋ a fɛɛ́ nnɛ̄t ŋgyá á mbū Ndém páʼā, ńdɔkɔ njhʉ́ɛ ŋgɔŋ

¹ Ŋiŋ ntsem yīi, a veéŋ á légɛ, Yɛɛ́so a á Nzaʼ‑Ŋkhʉ, ŋiŋ wuɔ mɛ́t, a á méŋ Ndém. Ŋiŋ ntsem yīi, a kɔɔ̄ŋ á Ndém Mɔʼɔ́, a zeéŋ ŋkɔŋ á ŋiŋ ntsem yīi, a á méŋ Ndém.

² Ḿpɛ gē ezhɛ́ á légɛ, ḿpɛ kɔɔ̄ŋ epɔ̄ Ndém, ńjʉ́ɔ, ńnɔŋ ŋkɔ̄ŋɔ á Ndém, ńzéŋ nnɔŋ nzīŋɛ páʼ, mbé mí é si nzɛ́ttɛ épúp.

³ Ŋiŋ a nɔŋ ŋ́gɛ, yí kɔɔ̄ŋ á Ndém, á kúʼte mbé mí. Mbé Ndém, é té apiʼ á mbū pímpɛ ɛ́,

⁴ melaʼ mīi, ŋiŋ ntsem yīi, a á méŋ Ndém, a á si ŋgɔ́ á asaʼa‑ndʉɔ́ʼ á ntē ŋgɔŋ ega. Ajū mīi á piŋɛ ŋghʉ̄ɛ, ḿpɛ elʉɔ́ʼɔ ŋgɔŋ jʉɔ, ńjhʉ́ɛ, á si ŋgɔ́ páʼ, ḿpɛ le fɛ́ nnɛ̄t ŋgyá á mbū Klísto.

⁵ Awɔ́ a á ŋgɔŋ ega, ŋ́gɔ́ á asaʼa‑ndʉɔ́ʼ é? A te gɔ́ áa ŋiŋ yīi, a á véŋ á légɛ, Yɛɛ́so a á si ŋgɔ́ á Méŋ Ndém lɛ̄?

Meyiŋne mɛ́ntɛ́t é tswiī anuúne ánɛ Yɛɛ́so

⁶ Yí Yɛɛ́so Klísto, a le shʉ̄ʼ á ŋgɔŋ ega, mɛ́ noʼ á yí á ntshi, á shʉʼ mpfɛ̄tte metshi mí. Mɛ́ ka gɛ, ńnōʼ á yí á ntshi ndaʼá, mɛ́ é gɛ, ńnōʼ á yí á ntshi, á shʉʼ mpfɛ̄tte metshi mí. Ŋiŋ yīi a piŋɛ eshúŋɔ menu muɔ mɛ́t, a á si ŋgɔ́ á Azwakne Ndém, melaʼ mīi, Azwakne Ndém á si ŋgɔ́ á ŋgaŋ anuúnē.

⁷ Meyiŋne mɛ́ntɛ́t, é si ŋghítɛ kwaʼ anuúnē ánɛ Yɛɛ́so:

⁸ ŋ́gɔ́ Azwakne Ndém, ŋ́ghʉ̄ ntshi, ŋ́ghʉ̄ metshi. Meyiŋne muɔ mɛ́ntɛ́t, é puú ŋgɔ́ si eshúŋɔ áa taʼ azō.

⁹ Epuɔ menɔŋ é shuúŋ ajū mīi pɔ́ njʉ́ɔ, ḿpɛ egákne mvéŋ. Anu zīi Ndém a shúŋɔ, á gɔ́ á ajʉʼ éwú ŋgɔ́ épúp, á piŋ efáŋ ntɔ́k azi epuɔ menɔŋ. Anu mɛ́t zīi Ndém a shúŋɔ, á gɔ́ á ajʉʼ éwú ŋgɔ́ épúp, á si ŋgɔ́ anu, ńcʉ̄te á Méŋ yi.

¹⁰ Ŋiŋ a fíɛ́ nnɛ̄t ŋgyá á mbū Méŋ Ndém, ŋgaŋ á lɔkɔ mvéŋɛ á légɛ, anu zīi Ndém a shúŋɔ, á si ŋgɔ́ anuúnē. Ŋiŋ yīi a te fɛ́ nnɛ̄t ŋgyá á mbū Ndém ɛ́, ŋgaŋ a á páʼā, ńdɔkɔ ndʉ́ɛ́ ŋ́gɛ, Ndém a á ŋgaŋ mela, melaʼ mīi, ŋgaŋ a te si mvéŋɛ anu zīi, Ndém a shúŋɔ ánɛ Méŋ yí í.

¹¹ Anu mɛ́t zīi Ndém a shúŋɔ, a ajʉɔ: Ndém a le yá á yímpɛ meshhʉ̄, á lelɔk ntā á lezēŋ yí. Ḿpɛ piŋ mbɔ́ŋte á lezāpa ánɛ Méŋ yi, tɛ́ ntā á lezēŋ yí mɛ́t.

¹² Ŋiŋ a piīk tɛ ŋkúʼte á Méŋ Ndém páʼā, ńdɔkɔ ntā á lezēŋ Ndém. Ŋiŋ yīi a te á yí kúʼte, ŋgaŋ a á páʼā, ńdɔkɔ te ntā á lezēŋ Ndém ɛ́.

Lelɔk ŋkwɛ́t methū

¹³ Meŋ tíi akɛtte jʉɔ, á mbū pɛ páʼa, ńdɔkɔ efāʼa ŋ́gɛ, pɛ ezhɛ́ á légɛ, pɛ pīi pɛ fɛɛ́ nnɛ̄t ŋgyá á mbū Méŋ Ndém, pɛ lē ndáʼ ntā á lezēŋ Ndém.

¹⁴ Ḿpɛ tshií á mvhɔ Ndém, ńnɔŋ te mbɔ́kɔ amɔ̄ʼ azō ɔ́, melaʼ mīi efʉʼ metsem yīi, ḿpɛ é lɔ́ á yí ajū mīi a á jʉ́ɔ ŋ́gɛ, á mbɔŋ á mbū pímpɛ, á yá azō mɛ́t.

¹⁵ Páʼ ḿpɛ zhɛɛ́ á légɛ, Ndém a juúʼ aswiŋte zímpɛ lā, ḿpɛ lɔ́ɔ á yí akɔ̄ lɛ́, ḿpɛ ezhɛ́ á légɛ, ḿpɛ é ndáʼ ŋgwɛ̄ azō mɛ́t zīi, ḿpɛ é lɔ́ á yí.

¹⁶ Ŋiŋ a jʉ́ɔ, méŋ mɔ́ yí, á gɔ́ á ntē mefa, méfa mīi é gɔ le ghʉ̄ á kwhʉ́ ɛ́, á swíŋte á Ndém á athū yí, Ndém á ghʉ, á gɔ́ éwú, éyi mefa mɛ́t, é gɔ́ le ghʉ̄ á kwhʉ́ ɛ́. Mmɔʼ mefa é éwú mīi, é gɔ eghʉ̄ʉ, ŋiŋ á kwhʉ́. Meŋ te ndʉ́ɛ́ ŋ́gɛ, mɛ́ eswíŋte á Ndém, ánɛ ejʉɔ ntií mefa mɛ́t ɛ́.

¹⁷ Anu tepɔŋ ntsem, á si ŋgɔ́ mefa, táʼ, mefa ntsem mé piŋ te ghʉ̄, ŋiŋ á kwhʉ́ ɛ́.

¹⁸ Ḿpɛ é si nzhɛ́ɛ á légɛ, ŋiŋ ntsem yīi, a á cʉ́ʼ á méŋ Ndém, á te zéŋ mefa ŋghʉ̄ ɛ́. Méŋ Ndém a á si ŋkáptɛ á yí, tɛ ŋgɔ́ yīi, Efɔ menu tepɔŋ a gɔ le á yí pfeŋ.

¹⁹ Ḿpɛ é si nzhɛ́ɛ á légɛ, ḿpɛ é si ŋgɔ́ epuɔ Ndém. Epuɔ ŋgɔŋ puɔ metsem, é gɔ́ á alá apū Efɔ menu tepɔŋ.

²⁰ Ḿpɛ é si nzhɛ́ɛ á légɛ, Méŋ Ndém a le shʉ̄ʼ á ŋgɔŋ, ŋ́gyá á yímpɛ leghi, á lelɔk nzhɛ́ á kwaʼ Ndém. Ḿpɛ pīiŋ nzápa ánɛ Yɛɛ́so Klísto Méŋ Ndém, ŋ́gɔ́ á alá apū kwaʼ Ndém mɛ́t. Yɛɛ́so mɛ́t a á si ŋgɔ́ á Ndém, ŋ́gɔ́ kwaʼ Ndém, ŋ́gɔ́ á Ŋghʉɛ mɛ́ ta á lezēŋ Ndém.

²¹ Ewɔŋkhʉ̄ pá, pɛ epá á wɛ́ á lewuʼte mesī.