1 Jáaŋ 4 - Eka Eswhī

Ŋiŋ a gɔ eghʉ̄ʉ páʼ lā, tɛ́ nzhɛ́ ŋ́gɛ, Azwakne Ndém a ajʉɔ ɔ̄?

¹ Mepɔŋ mesoó pá, ndɛ́ʼ ŋiŋ á lɛ ŋgē égɛ, Azwakne Ndém á ánɛ yí, pɛ lɛ mvéŋ véŋ. Ŋiŋ a lʉ́ɛ́ épúp, pɛ echʉ́ nnɛ̄t, ńtsāʼ á mbɔŋɔ́, ńjʉ́ɔ kɛ Azwakne Ndém á zi ŋgɔ́ ánɛ yí lɛ́ɛ. Meŋ ndʉ́ɛ́ páʼa melaʼ mīi, wɔ táŋ‑mela ŋ́gɛ, pɔ́ é metswi‑ŋke Ndém, é kʉʉ̄ŋ ŋkó tɛ ŋgɔŋ é ló.

² Pɛ ejʉ́ɔ páʼ, pɛ gɔ eghʉ̄ʉ épúp tɛ́ nzhɛ́, kɛɛ Azwakne Ndém ánɛ ŋiŋ, kɛɛ ŋgáŋ lɛ́ɛ. Pɛ jʉ́ɔ ŋiŋ á nɔ̄ŋ ncuŋtɛ mvéŋɛ á légɛ, Yɛɛ́so Klísto a á Ndém, mbɔ a le pīŋ esɛt ncʉ́ʼ á ŋiŋnɔŋ, éshʉ̄ʼ á ndo esī atsetsáʼ, pɛ zhɛ́ á légɛ, Azwakne Ndém ánɛ ŋgaŋ.

³ Ŋiŋ a piŋɛ nnɔ̄ŋ te mvéŋɛ épúp ánɛ Yɛɛ́so ó, pɛ zhɛ́ á légɛ, Azwakne Ndém á té ánɛ yí í. Pɛ zhɛ́ á légɛ, ŋgaŋ a wɛɛ̄ áa azwakne Ŋgaŋ Mbo Klísto. Pɛ lē ndáʼ njúʼ á légɛ, Ŋgaŋ Mbo Klísto a á si eshʉ̄ʼɛ, a á tsetsɔŋɔ, mbɔ a lē ndáʼ eshʉ̄ʼ, tɛ a á ntē ŋgɔŋ.

⁴ Ŋ́ké ŋgɔ́ mé pɛ me ewɔŋkhʉ̄ pá, mbɔ pɛ é si ŋgɔ́ epuɔ Ndém. Pɛ lē ndáʼ njhʉ́ wɔ táŋ‑mela puɔ mɛ́t, melaʼ mīi, Azwakne Ndém, páʼ á ánɛ pɛ lā, á faáŋ ntɔ́k á ŋgaŋ mbo Klísto yīi, a á ntē ŋgɔŋ lā.

⁵ Wɔ táŋ‑mela ŋ́gɛ, pɔ́ é metswi‑ŋke Ndém, pɔ́ é si ŋgɔ́ epuɔ ŋgɔŋ puɔ, melaʼ épúp tɛ́, pɔ́ shuŋneé páʼ epuɔ ŋgɔŋ puɔ lā. Epuɔ ŋgɔŋ puɔ é juúʼ á wɔ́p.

⁶ Ḿbiŋ ŋgɔ́ mé pímpɛ, mbɔ ḿpɛ é si ŋgɔ́ epuɔ Ndém. Ŋiŋ yīi a á si nzhɛ́ɛ á Ndém, a juúʼ ashuŋne zímpɛ. Ŋiŋ yīi a te ŋiŋ Ndém ɛ́, a te ashuŋne zímpɛ júʼ. Á páʼa tɛ́, ḿpɛ pɔŋteé á lezhɛ̄ kɛɛ Azwakne Ndém mé ánɛ ŋiŋ, ńtshónɛ á yí á lezhɛ̄ anuúnē ánɛ Ndém lɛ́ɛ, kɛɛ azwakne Ŋgaŋ Mbo mé ánɛ yí, ńtshónɛ á yí á letāŋ mela lɛ́ɛ.

Ŋkɔŋne e é páʼā, éfhó áa mbū Ndém

⁷ Mepɔŋ mesoó pá, ḿpɛ ekɔ̄ŋne mennɛ̄t mímpɛ nzeŋne zeŋné, melaʼ mīi, ŋkɔŋne e fhoó áa mbū Ndém. Tɛ mbɔɔ awɔ́ lɛ́ yīi, a wɛɛ̄ ŋkɔŋne, a á si ŋgɔ́ á méŋ Ndém, ńzéŋ nnɔŋ nzhɛ́ɛ á Ndém.

⁸ Ŋiŋ yīi a te epuɔ kɔ̄ɔŋ, a á si ŋgɔ́ á ŋiŋ yīi, a te Ndém zhɛ́, melaʼ mīi, Ndém a á si ŋgɔ́ ŋkɔŋ.

⁹ Pɛ ejʉ́ɔ páʼ Ndém a le ghʉ̄ épúp, ńdɔk ntswī á légɛ, yí kɔɔ̄ŋ á yímpɛ: a le tó á tséŋ Méŋ yi, á ŋgɔŋ ega, ŋ́gɛ ḿpɛ ezápa ánɛ yí, ŋ́gɔ́ éwú.

¹⁰ Ḿpɛ ejʉ́ɔ ajū mīi, ŋkɔŋ e é si ŋgɔ́ eziɛ́: ḿpɛ mé lɛ te zī á lekɔŋ á Ndém ɛ́, yí mé le zī á lekɔŋ á yímpɛ, ńtó á tséŋ Méŋ yi ŋ́gɛ, a eshʉʼ ŋgyá á athū nnɛ̄t zí, ńdɔk esōk mefa mímpɛ.

¹¹ Mepɔŋ mesoó pá, páʼ Ndém a le kɔ̄ŋ á yímpɛ ejʉɔ ntií lā, ḿpɛ pɔŋteé azímpɛ, á lezēŋ ŋkɔ̄ŋne mennɛ̄t mímpɛ nzeŋne zeŋné.

¹² Ŋiŋ a la lezēk ánɛ Ndém tshí ɛ́. Táʼ, ḿpɛ ké ŋkɔ̄ŋne mennɛ̄t mímpɛ nzeŋne zeŋné, mbɔ a a gɔ́ mé pímpɛ, étswi á légɛ, yí kɔɔ̄ŋ á yímpɛ tɛ ntsékne.

¹³ Ḿpɛ gē ezhɛ́ á légɛ, Ndém a á me pímpɛ, ḿpɛ ezéŋ ŋgɔ́ mé yí, ńjʉ́ɔ, ŋ́gwɛ̄ Azwakne zí, páʼ a le néŋ á ntē pímpɛ lā.

¹⁴ Ndém Mɔʼɔ́ a le tó á Méŋ yi ŋ́gɛ, a eshʉʼ ŋghʉ̄, ŋgɔŋ e tswɛ́t. Pek le jʉ́ɔ á yí mé menēk, ńnɔŋ eshúŋɔ á légɛ á anuúnē.

¹⁵ Ŋiŋ a véŋɛ á légɛ, Yɛɛ́so a á Méŋ Ndém, mbɔ Ndém a á me ŋgaŋ, ŋgaŋ á zéŋ ŋgɔ́ mé yí.

¹⁶ Ŋ́gɔ́ mé pek, mbɔ pek é si nzhɛ́ɛ, ńnɔŋ mvéŋɛ ŋkɔŋ zīi, Ndém á wɛɛ̄ ánɛ pek. Ndém a á si ŋgɔ́ ŋkɔŋ. Ŋiŋ yīi a kɔɔ̄ŋ epuɔ, pɔ́ Ndém mé nnɔ, Ndém á gɔ́ mé yí.

¹⁷ A gɔ́ éyi, ḿpɛ kɔɔ̄ŋ á Ndém tɛ ntsékne, mbɔ a láʼ aleʼé zīi, Ndém a záʼa ntsaŋ, ḿpɛ enɔ̄ŋ le mbɔ́kɔ amɔ̄ʼ azō ɔ́, melaʼ mīi lenāŋ tsímpɛ á ndo esī atsetsáʼ, é swhií etsi Yɛɛ́so.

¹⁸ Ŋiŋ yīi a wɛɛ̄ ŋkɔŋne, a te amɔ̄ʼ azō pɔ́k, melaʼ mīi, kwaʼ ŋkɔŋne, e ghʉʉ̄, ecɔʼ é mi á ntē ŋiŋ. Ecɔʼ é á ntē ŋiŋ yīi, a á si mbɔ́kɔ á letswā á yí ŋgʉɔ athʉ́ lepé. Ŋiŋ a nɔɔ̄ŋ ncɔʼɔ páʼā, a te kɔ̄ŋ á Ndém tɛ ntséknɛ ɛ́.

¹⁹ Ŋ́gɔ́ mé pímpɛ, mbɔ ḿpɛ kɔɔ̄ŋ epuɔ, melaʼ mīi, Ndém a le té njhʉ̄, ŋ́kɔ̄ŋ á yímpɛ.

²⁰ Ŋiŋ a nɔŋ ndʉ́ɛ́ ŋ́gɛ, yí kɔɔ̄ŋ á Ndém, ḿbīŋ nnɔ̄ŋ mbāa á méŋ mɔ́ yi, mbɔ ŋgaŋ a gɔ́ áa ŋgaŋ mela. Ŋiŋ a nɔŋ te ŋkɔ̄ŋɔ á méŋ mɔ́ yi yīi, a á si njʉ́ɔ á yí mé menēk ɛ́, mbɔ a gɔ le kɔ̄ŋ á Ndém yīi, a te si njʉ́ɔ á yí ī.

²¹ Lepé tsīi, Ndém a le yá me pímpɛ ecʉɔ páʼa: ŋiŋ a nɔŋ ŋkɔ̄ŋɔ á Ndém, á zéŋ ŋkɔ̄ŋ á méŋ mɔ́ yi.