1 Jáaŋ 3 - Eka Eswhī

¹ Pɛ ejʉ́ɔ páʼ Ndém Mɔʼɔ́, a wɛɛ̄ á mía ŋkɔŋ ánɛ pímpɛ épúp. A le kɔ̄ɔ̄ŋ, ńtɔ́ŋ á yímpɛ lɛ, ewɔŋkhʉ̄ pí. Ḿpɛ é ké nzéŋ ŋgɔ́ epiɛ́. Epuɔ ŋgɔŋ puɔ, é lɛ te á Ndém zhɛ́, melaʼ épúp tɛ́ pɔ́ té zhɛ́ á légɛ, ḿpɛ é si ŋgɔ́ epɔ̄ Ndém ɛ́.

² Mepɔŋ mesoó pá, tɛ efhó tsetsɔŋɔ, ḿpɛ é si ŋgɔ́ epɔ̄ Ndém, táʼ, Ndém a zɛɛ́t te tswi á yímpɛ ntií zīi, ḿpɛ e láʼ egɔ́ eziɛ́. Ḿpɛ é si ŋké nzhɛ́ɛ á taʼ azō. Aleʼé zīi Klísto a ŋwaka, ḿpɛ egɔ́ páʼ yí lā, melaʼ mīi, ḿpɛ e láʼ enɔŋ ejʉ́ɔ á yí páʼ, a á épúp.

³ Ŋiŋ ntsem yīi a kuʼteé akwaŋte jʉɔ mɛ́t á ntē yí, a pɔŋteé á yí á lenāŋ té alɔ́ʼ, ńdeŋ ndeŋ páʼ Klísto méŋwɛ̄t a á te alɔ́ʼ.

⁴ Ŋiŋ ntsem yīi a ghʉʉ̄ mefa, a á páʼā, ńdɔkɔ ntʉ̄ɛ̄ athū á mbū Ndém, melaʼ mīi mefa é páʼā, ŋ́gɔ́ á lete athū á mbū Ndém.

⁵ Pɛ é si ŋké nzhɛ́ɛ á légɛ, Klísto a le shʉ̄ʼ á ŋgɔŋ, á efók mefa epuɔ menɔŋ. Yí méŋwɛ̄t, á ké te ŋgaŋ mefa á.

⁶ Ŋiŋ ntsem tɛ ndɛ̄tne ánɛ yí, a te zéŋ ŋghʉ̄ mefa á. Ŋiŋ ntsem yīi a ghʉʉ̄ mefa, a á páʼā, ńdɔkɔ te njʉ́ɔ á yí í, ńdɔkɔ te nzhɛ́ɛ á yí í.

⁷ Ewɔŋkhʉ̄ pá, ndɛ́ʼ pɛ ecʉ́ʼ, ŋiŋ á ghʉ pɛ efā nzhɛ. Ŋiŋ yīi a ghʉʉ̄ anu ndeŋ ndeŋ, a á ŋiŋ ndeŋ ndeŋ, páʼ Klísto a á ŋiŋ ndeŋ ndeŋ.

⁸ Ŋiŋ yīi a ghʉʉ̄ mefa, a á ŋiŋ Sɛ́ta, melaʼ mīi, Sɛ́ta a á ŋgaŋ mefa, tɛ efhó á anɔŋɔ́‑ŋgɔŋ. Melaʼ akɔ̄ Méŋ Ndém a lɛɛ́ eshʉʼɛ á ŋgɔŋ ŋ̄? A lɛɛ́ eshʉʼɛ, á ḿbīk mefaʼ Sɛ́ta.

⁹ Ŋiŋ ntsem yīi a á cʉ́ʼ á méŋ Ndém, a te zéŋ ŋghʉ̄ mefa á, melaʼ mīi, ashuŋne Ndém á ntē yí, ŋ́gɔ́ páʼ nzwɛt azō lā. Á lɔkɔ te nzɛ́ttɛ á yí, á lezēŋ ŋghʉ̄ mefa á, melaʼ mīi a á cʉ́ʼ á méŋ Ndém.

¹⁰ Ajū mīi á ghʉʉ̄, mɛ́ zhɛ́ kɛɛ ŋiŋ a á méŋ Ndém, kɛɛ ŋiŋ a á méŋ Sɛ́ta lɛ̄ɛ, a ajʉɔ: ŋiŋ ntsem yīi, a te si nzīŋɛ ndeŋ ndeŋ ɛ́, mbɔɔ ŋiŋ ntsem yīi, a te á méŋ mɔ́ yi kɔ̄ɔŋ, a á páʼā, ńdɔkɔ te ŋgɔ́ɔ á ŋiŋ Ndém ɛ́.

Ḿpɛ ekɔ̄ŋne mennɛ̄t mímpɛ nzeŋne zeŋné

¹¹ Anu zīi, pɛ le júʼ tɛ efhó páʼ pɛ le zī á lejūʼ ŋke mbɔŋ a ajʉɔ: ŋ́gɛ, ḿpɛ ekɔ̄ŋne mennɛ̄t mímpɛ nzeŋne zeŋné.

¹² Ndɛ́ʼ ḿpɛ eké eswhí á Kaɛŋ. A lɛ á nzem Efɔ menu tepɔŋ. A le zwhí á ntsiʼnzem yi. Ńzwhíɛ á yí épúp melaʼ akɔ̄? Ńzwhíɛ á yí melaʼ mīi, ntsiʼnzem yi mɛ́t, a le nɔ̄ŋ ŋghʉɛ mefaʼ mbɔŋ, á piŋ nnɔ̄ŋ ŋghʉ̄ɛ mefaʼ tepɔŋ.

¹³ Epuɔ ŋgɔŋ puɔ é nɔŋ mbāa á wɛ́, ndɛ́ʼ á kʉʼne á wɛ́ me epɔ̄ memía.

¹⁴ Páʼ ḿpɛ a epɔ̄ memía pímpɛ, é kɔŋneē lā, á páʼā ndɔkɔ ntswīi á légɛ, ḿpɛ le kwhʉ́ʉ̄, ḿpɛ eké ŋgɔ́ á ayáʼa, ŋ́gɔ́ nte. Ŋiŋ a te mmɔʼ kɔ̄ɔŋ páʼā, ńdɔkɔ nzɛ́t áa mpfhō.

¹⁵ Ŋiŋ a paā á méŋ mɔ́ yi páʼā, ńdɔkɔ ŋgɔ́ á nzwhi‑ŋiŋ. Pɛ é si mbiŋɛ nzhɛ́ɛ á légɛ, tsɔ taʼ nzwhi‑ŋiŋ, a te ewɛ̄ azí ajʉʼ, á lezēŋ Ndém ɛ́.

¹⁶ Ḿpɛ ejʉ́ɔ á ajū mīi, ŋkɔŋne e é si ŋgɔ́ aziɛ́: Yɛɛ́so a le yá athū nnɛ̄t zí, melaʼ mefa mímpɛ. Ḿpɛ azímpɛ, é pɔŋteé á leyā athū nnɛ̄t zímpɛ, melaʼ epɔ̄ memía pímpɛ.

¹⁷ Ŋiŋ a pú ŋgwɛ̄ lewūʼ ŋgɔŋ ntsem, ńjʉ́ɔ méŋ mɔ́ yi á nɔ̄ŋ mbúŋɔ azō, á pīŋ te á yí tswíte, mbɔ a gɔ eghʉ̄ʉ páʼ lā, ńdé ŋ́gɛ, ŋkɔŋne zīi Ndém a á si ŋkɔ̄ŋɔ ŋ́gɛ mɛ́ ewɛ̄, e é ntē yí í?

¹⁸ Ewɔŋkhʉ̄ pá, ndɛ́ʼ ḿpɛ elɔ̄k mekup nchu, mbɔɔ mesisia meshuŋne tɛ́ ŋkɔ̄ŋne. Ḿpɛ elɔ̄k á leghʉ, tɛ́ ntswī ŋkɔŋne. Ŋ́kɔ̄ŋne á kwaʼ anuúnē.

Epɔ̄ Ndém é gɔ le cɔ̄ʼ á letshī á mvhɔ yí í

¹⁹ Ḿpɛ ghʉɛ épúp, mbɔ ḿpɛ e zhɛ́ á légɛ, ḿpɛ é si ŋgɔ́ megaŋ anuúnē, ntē yímpɛ e epiŋ nnáŋ mé apwɛne, á mvhɔ Ndém.

²⁰ Ntē yímpɛ é zi nnɔ̄ŋ ŋŋāka á yímpɛ, ḿpɛ zhɛ́ á légɛ, Ndém a faáŋ ntɔ́k ntē yímpɛ, ńzéŋ nzhɛ́ etsō tsem.

²¹ Mepɔŋ mesoó pá, ntē yímpɛ é nɔŋ te ŋŋāka á yímpɛ ɛ́, mbɔ ḿpɛ e tshí á mvhɔ Ndém, té pú mbɔ́k amɔ̄ʼ azō.

²² Ajūɔ tsem zīi ḿpɛ é piŋ ndɔ́ á yí, a eyá á mbū pímpɛ, melaʼ mīi ḿpɛ é si ŋkúʼtɛ mbé mí, ńzéŋ nnɔŋ ŋghʉ̄ɛ ajū mīi, a á si ŋkɔ̄ŋɔ.

²³ Pɛ eké njʉ́ɔ lepé tsí mɛ́t: é si ŋgɔ́ á lefɛ̄ nnɛ̄t ŋgyá á mbū Méŋ yi Yɛɛ́so Klísto, ńzéŋ ŋkɔ̄ŋne mennɛ̄t mímpɛ nzeŋne zeŋné, páʼ Klísto a le tswī á mbū pímpɛ épúp.

²⁴ Ŋiŋ a kuʼteé mbé mí páʼā, ńdɔkɔ ndɛ̄tnɛ ánɛ yí, á gɔ́ mé ŋgaŋ. Púp, ḿpɛ lɔ̄ɔk nzhɛ́ á légɛ, a á me pímpɛ, melaʼ mīi, a le yá Azwakne zí á mbū pímpɛ.