1 Jáaŋ 2 - Eka Eswhī

¹ Ewɔŋkhʉ̄ pá, meŋ tíi páʼa, ńdɔkɔ eshúŋɔ á wɛ́ ŋ́gɛ, ndɛ́ʼ pɛ ezéŋ ŋghʉ̄ mefa. Ŋiŋ wɛ a pikɛ tɛ ŋgwhʉ̄ ánɛ mefa, mbɔ ḿpɛ wɛɛ̄ á ntɔk‑nzem yímpɛ, á mvhɔ Ndém Mɔʼɔ́, á gɔ́ Yɛɛ́so Klísto, ŋiŋ ndeŋ ndeŋ.

² A á si ŋgɔ́ á ŋiŋ yīi, a le yá athū nnɛ̄t zí, Ndém á lɔk esōk mefa mímpɛ. A lɛ te sōk mefa mímpɛ ndaʼá, a le sōk mefa epuɔ ŋgɔŋ ntsem.

Ajū mīi á tswiī á légɛ ḿpɛ kɔɔ̄ŋ á Ndém

³ Pɛ ejʉ́ɔ páʼ ḿpɛ pɔŋteé á lefhō épúp, tɛ́ nzhɛ́ á légɛ, ḿpɛ zhɛɛ́ á yí. Á si ŋgɔ́ á lege enáŋ, ńnɔŋ ŋkúʼtɛ mbé mí.

⁴ Ŋiŋ a nɔŋ ndʉ́ɛ́ ŋ́gɛ, yí é si nzhɛ́ɛ á yí, ḿbiŋ nnɔ̄ŋ te ŋkúʼtɛ mbé mí í, mbɔ ŋgaŋ a á si ŋgɔ́ á ŋgaŋ mela, anuúnē á té á ntē yí í.

⁵ Ŋiŋ a piŋɛ nzīŋ páʼ, ashuŋne Ndém á si ndʉ́ɛ́ épúp, mbɔ ŋgaŋ a lɔkɔ ŋkɔ̄ŋɔ á Ndém tɛ nzōko. Á páʼā ŋgɔ́ páʼ, ḿpɛ gɔ eghʉ̄ʉ épúp, tɛ́ nzhɛ́ á légɛ, ḿpɛ lɛtneē ánɛ Ndém.

⁶ Ŋiŋ a nɔŋ ndʉ́ɛ́ ŋ́gɛ, yí lɛtneē ánɛ Ndém, ŋgaŋ á ziŋ azí ánɛ mɛnzhɛ yīi, Yɛɛ́so a le zīŋ azí éwú.

Lepé leswhī

⁷ Mepɔŋ mesoó pá, ecʉɔ é té lepé leswhī tsīi, meŋ tíi ŋgyáa á mbū pɛ ɛ́, é gɔ́ áa nzwiŋ lepé tsīi, pɛ é si nzhɛ́ɛ tɛ efhó páʼ pɛ le zī á lejūʼ ŋke mbɔŋ. Nzwiŋ lepé mɛ́t, é si ŋgɔ́ ŋke mbɔŋ yīi, pɛ gɛ njúʼɔ.

⁸ Anu zīi meŋ eké ntíi ŋgyáa á mbū pɛ, á ké mbiŋ ŋgɔ́ páʼ lepé leswhī lā. Yɛɛ́so a le lɔ̄k meziŋɛ́ mí ntswī, atswhī zɛ́ á zéŋ nnɔ̄ŋ ntswīi épúp, melaʼ mīi, nzém e é si mmīi, mbɔ njhʉ̄ e é ndáʼ nnɔŋ nzī á lelā.

⁹ Ŋiŋ a nɔŋ ndʉ́ɛ́ ŋ́gɛ, yí é si nzīŋɛ á ntē ŋkaʼ, mbīŋ nnɔ̄ŋ mbāa á méŋ mɔ́ yi, mbɔ ŋgaŋ a zɛɛ́t áa ntē nzém.

¹⁰ Ŋiŋ a nɔŋ ŋkɔ̄ŋɔ á méŋ mɔ́ yi, mbɔ ŋgaŋ a á si ndɔ̄kɔ ŋkaʼ tɛ́ nzīŋɛ. Púp, ŋ́gɔ́ yīi, amɔ̄ʼ azō á gɔ le ghʉ̄ tɛ á fa nzhɛ ɛ́. »

¹¹ Ŋiŋ yīi, a ké mbiŋ mbā á méŋ mɔ́ yi, á si ŋgɔ́ á ŋiŋ yīi, a naáŋ á ntē nzém. A á si nzīŋɛ á ntē nzém, a te nzhɛ́ɛ ajʉʼ zīi, a gʉɔ mé éwú ú, melaʼ mīi, nzém e é vɛ́ne á yí, á lezēŋ njʉ́ɔ ejʉʼ.

Ndɛ́ʼ ŋiŋ á tshí ntē, ánɛ tsitsi ŋgɔŋ wuɔ

¹² Ewɔŋkhʉ̄ pá, meŋ tíi akɛtte jʉɔ páʼa, á mbū pɛ, ńdɔkɔ eshúŋɔ á wɛ́ ŋ́gɛ, Ndém a zapaá ánɛ Yɛɛ́so Klísto, ńdēkne mefa mɛ́.

¹³ Meŋ tíi á mbū pɛ memɔʼɔ́, pɛ é si nzhɛ́ɛ á ŋiŋ yīi, Ndém a le gē enɔŋ ŋgɔŋ, á gɔ́ áa éwú. Meŋ tíi páʼa, á mbū pɛ ŋkaŋa ŋkhʉ̄, pɛ lē njhʉ́ á Efɔ menu tepɔŋ.

¹⁴ Ewɔŋkhʉ̄ pá, meŋ á tí ndɔk eshúŋ á wɛ́. Pɛ é si nzhɛ́ɛ á Ndém Mɔʼɔ́. Meŋ á tí á mbū pɛ memɔʼɔ́, ńdɔk eshúŋ á wɛ́. Pɛ é si nzhɛ́ɛ á ŋiŋ yīi, Ndém a le gē enɔŋ ŋgɔŋ, á gɔ́ áa éwú. Meŋ á tí á mbū pɛ ŋkaŋa ŋkhʉ̄, ńdɔk eshúŋ á wɛ́. Pɛ wɛɛ̄ mete, melaʼ mīi, ashuŋne Ndém á ntē pɛ, pɛ lē njhʉ́ á Efɔ menu tepɔŋ.

¹⁵ Ndɛ́ʼ pɛ enéŋ ntē wɛ́ ánɛ menu ŋgɔŋ, mbɔɔ ánɛ tsitsi ŋgɔŋ. Ŋiŋ a néŋɛ ntē yí, ánɛ menu ŋgɔŋ, mbɔ a gɔ le zéŋ ŋkūʼ á lekɔŋ á Ndém Mɔʼɔ́ ɔ́.

¹⁶ Menu ntsem mīi, mɛ́ jʉɔ́ á ntē ŋgɔŋ, e emuɔ páʼa: kegʉɔʼ, páʼ mbe nnɛ̄t e tshónɛ á ŋiŋ, á wiɛ lā. Lewɛ á kegʉɔʼ ánɛ ajūɔ ŋiŋ zīi, o ó si ndɔ̄kɔ menēk njʉ́ɔ. Lelɔk lewūʼ ŋŋīa. Menu muɔ mɛ́t ntsem, é té fhó á mbū Ndém Mɔʼɔ́ ɔ́, é fhɔ́ɔ áa ŋgɔŋ ega.

¹⁷ Ŋgɔŋ e é si ntsīa tsia, ajūɔ tsem zīi mɛ́ wɛɛ̄ á kegʉɔʼ éwú, á zéŋ nnɔ̄ŋ ntsīa azí. Táʼ, ŋiŋ yīi a ké nziŋ páʼ, Ndém a á si ŋkɔ̄ŋɔ, á naáŋ á lemiʼɛ.

Pɛ epá megaŋ mbo Klísto

¹⁸ Ewɔŋkhʉ̄ pá, njhʉ̄ zīi ŋgɔŋ e gɔ̄ á mmiī, e é tshóte tɛ mbáte. Pɛ́ lé júʼ á légɛ, ŋgaŋ mbo Klísto a á si eshʉ̄ʼɛ. Á tsetsɔŋɔ, mbɔ megaŋ mbo Klísto é kʉʉ̄ŋ ŋké eshʉʼ nzáne, ńdɔkɔ eshúŋɔ á yímpɛ ŋ́gɛ, ŋgɔŋ e é si ŋgɔ́ á mmiī.

¹⁹ Epuɔ puɔ mɛ́t, é le fhó á nnɔ pímpɛ ntó, pɔ́ le zī te epuɔ pímpɛ ɛ́. Pɔ́ le wíʼe ŋgɔ́ epuɔ pímpɛ, mbɔ ḿpɛ a pɔ́p é zɛ́t nnɔ. Pɔ́ le pīŋ efhó á nnɔ pímpɛ ntó épúp, tɛ́ á lɔk ntswī ndeŋ ndeŋ á légɛ, tsɔ ŋiŋ wɔp, a lɛ te á ŋiŋ nnɔ yímpɛ ɛ́.

²⁰ Ŋ́ké mbiŋ ŋgɔ́ mé pɛ, mbɔ Klísto á le ghʉ̄ʉ̄, Azwakne Ndém á kó ánɛ pɛ, melaʼ épúp tɛ́, pɛ metsem é si nzhɛ́ɛ anuúnē.

²¹ Meŋ tíi á mbū pɛ páʼā, meŋ te ndɔ̄kɔ ŋ́gɛ, pɛ te si nzhɛ́ɛ anuúnē ɛ́. Pɛ é si nzhɛ́ɛ anuúnē, ńzéŋ ńnɔŋ nzhɛ́ɛ á légɛ, mela é gɔ le tó ánɛ anuúnē ɛ́.

²² Ŋgaŋ mela, a ké mbiŋ ŋgɔ́ á awɔ́? A á si ŋgɔ́ á ŋiŋ yīi, a á si ndʉ̄ʼɛ ŋ́gɛ, Yɛɛ́so a te Nzaʼ‑Ŋkhʉ ɛ́. Yí mé si ŋgɔ́ á Ŋgaŋ Mbo Klísto. Yí mé si ndʉ̄ʼɛ á levēŋ á Ndém Mɔʼɔ́, ńnɔŋ ndʉ̄ʼɛ á levēŋ á Méŋ yi.

²³ Ŋiŋ a nɔŋ ndʉ̄ʼɛ á levēŋ á Méŋ Ndém, mbɔ a lɔkɔ ndʉ̄ʼɛ á levēŋ á Ndém Mɔʼɔ́. Ŋiŋ a ké mbīŋ ndé ŋ́gɛ, yí é véŋ á Méŋ Ndém, mbɔ a lɔkɔ mvéŋɛ á Ndém Mɔʼɔ́.

²⁴ Melaʼ épúp tɛ́, ŋke yīi pɛ le júʼ tɛ efhó páʼ pɛ le zī á lejūʼ ŋke mbɔŋ, e epú ntā á ntē pɛ. Ŋke mɛ́t yīi, pɛ le júʼ tɛ efhó á nzií, é púu ntā á ntē pɛ, mbɔ pɛ azɛ́, e pú eta á nzem Méŋ Ndém, mbɔɔ á nzem Ndém Mɔʼɔ́.

²⁵ Pɛ eké njʉ́ɔ ajū mīi, Klísto a le laʼnē á mbū pímpɛ: á lefū ntā á lezēŋ Ndém.

²⁶ Á páʼā, ŋ́gɔ́ anu zīi, meŋ á kɔŋ á gá á letī eshúŋ á wɛ́, ánɛ epuɔ pīi, pɔ́ faʼa á lemaʼ á wɛ́ á aphʉ̄.

²⁷ Ŋké ŋgɔ́ mé pɛ, mbɔ Klísto a le ghʉ̄ʉ̄, Azwakne Ndém á kó á ntē pɛ, ḿbú ntā éwú. Púp, pɛ gɔ le lé ŋ́gɛ, mɛ́ ezóko nzéŋɛ nzíʼnɛ á wɛ́ azō ɔ́. Azwakne Ndém á si nzíʼnɛ á wɛ́ ajūɔ tsem. Ajū mīi a zíʼnɛ á wɛ́, á gɔ́ anuúnē, é té mela á. Melaʼ épúp tɛ́, pɛ ezīŋ páʼ anu zīi, a zíʼnɛ á wɛ́, á si ndʉ́ɛ́ épúp. Púp, ńdɔk ndɛ̄tne ánɛ Klísto.

²⁸ Púp me ewɔŋkhʉ̄ pá, pɛ elɛ̄tne ánɛ yí, ńzhɛ́ páʼ, aleʼé zīi a piŋɛ nzem, ḿpɛ é le amɔ̄ʼ azō pɔ́k, ńnɔŋ nzhɛ́ɛ á légɛ, a gɔ le fhó á mvhɔ yí, ńjūŋ á yímpɛ, esē é kú á yímpɛ aleʼé mɛ́t ɛ́.

Pɛ enáŋ páʼ, epɔ̄ Ndém é pɔŋteé á lenāŋ épúp

²⁹ Páʼ pɛ é si nzhɛ́ɛ á légɛ, Klísto a á ŋiŋ ndeŋ ndeŋ lā, pɛ ezéŋ nchʉ́ nnɛ̄t nzhɛ́ á légɛ, ŋiŋ ntsem yīi, a ghʉʉ̄ ajū mīi, á ndeŋ ndeŋ, a á si ŋgɔ́ á méŋ Ndém.