1 Jáaŋ 1 - Eka Eswhī

Yɛɛ́so a á si ŋgɔ́ ashuŋne zīi, á ghʉʉ̄ mɛ́ gɔ́ éwú

¹ Pek tíi akɛtte jʉɔ páʼa, ńdɔkɔ eshúŋɔ á wɛ́ ashuŋne zīi, á ghʉɛ mɛ́ gɔ́ɔ éwú, áshuŋne zīi mɛ́ le gē enɔŋ ŋgɔŋ, á gɔ́ áa éwú. Pek le júʼ ashuŋne mɛ́t, ńdɔ̄k menēk mék njʉ́ɔ, ńchʉ́ nnɛ̄t mbēte á yí, ńdɔ̄k mbū mék mpfēŋ á yí.

² Ŋiŋ mɛ́t yīi a ghʉɛ mɛ́ gɔ́ɔ éwú, a le tswī nnɛ̄t zi, pek jʉ́ɔ á yí, tɛ́ eshúŋɔ á wɛ́ ajū mīi, pek é si nzhɛ́ɛ ánɛ yí. A ghʉʉ̄, mɛ́ ta á lezēŋ Ndém Mɔʼɔ́, mbɔ á lɛɛ́ nnáŋa á lezēŋ yí. A le pīŋ ntswī nnɛ̄t zi, á mbū pek.

³ Ajū mīi pek le jʉ́ɔ̄, ńzéŋ njúʼ, aziɛ́ tɛ́ pek shúŋɔ á wɛ́ azɛ́, tɛ́ ḿpɛ elɔk ŋgɔ́ á táʼ nchu, ḿpɛ a Ndém Mɔʼɔ́, mbɔɔ Méŋ yi Yɛɛ́so Klísto, e epú nzéŋ ŋgɔ́ á taʼ nchu.

⁴ Pek tíi eshúŋɔ á wɛ́ páʼa, ŋ́gɛ ntē yímpɛ e egáŋte tɛ ntsékne.

Ndém a á si ŋgɔ́ ŋkaʼ

⁵ Ŋke yīi pek le júʼ á mbū Yɛɛ́so Klísto, ḿbiŋɛ ntswīi á mbū pɛ, e ewuɔ páʼa. Ndém a á si ŋgɔ́ ŋkaʼ, nzém e te ánɛ ŋghʉʉ́‑menu mí í.

⁶ Ḿpɛ nɔŋ ndʉ́ɛ́ ŋ́gɛ, ḿpɛ a pɔ́p é taʼ nchu, ḿbīŋ nnɔŋ ŋghʉ̄ɛ menu nzém, mbɔ ḿpɛ é megaŋ mela, mbɔ ḿpɛ te si ŋgɔ́ megaŋ anuúnē ɛ́.

⁷ Ḿpɛ piŋ nnɔ̄ŋ nzīŋɛ á ntē ŋkaʼ, ndeŋ ndeŋ páʼ Ndém a naáŋ á ntē ŋkaʼ lā, mbɔ ḿpɛ e gɔ́ á taʼ nchu á tsetsɛlɛ pímpɛ, metshi Méŋ yi Yɛɛ́so, e esōk mefa mímpɛ ntsem.

⁸ Ḿpɛ nɔŋ ndʉ́ɛ́ ŋ́gɛ, ḿpɛ te megaŋ mefa á, mbɔ á páʼā, ḿpɛ lɔ̄kɔ mbɔ̄ptɛ athū nnɛ̄t zímpɛ, ńdɔkɔ te ŋgɔ́ɔ megaŋ anuúnē ɛ́.

⁹ Ḿpɛ gɔ́ eké mvéŋ mefa mímpɛ, mbɔ Ndém, páʼ a laʼneē azō, ńdáʼ ŋghʉ̄, ńzéŋ ŋgɔ́ á ŋiŋ ndeŋ ndeŋ lā, a a lekne á mbū pímpɛ, ésok anu tepɔŋ ntsem ánɛ pímpɛ.

¹⁰ Ḿpɛ lʉ́ɛ́ ŋ́gɛ, ḿpɛ te megaŋ mefa á, mbɔ á páʼā, ḿpɛ nɔ̄ŋ ndɔ̄kɔ á Ndém, ńtɔ́ŋɔ á ŋgaŋ mela, ashuŋne zí á lɔkɔ te ŋgɔ́ɔ á ntē pímpɛ ɛ́.