1 Kɔlɛŋte 9 - Eka Eswhī

Ajū mīi nziŋ‑ntō a pɔŋteé á yí á leghʉ

¹ Páʼ meŋ naáŋ á ŋga athū meŋ lā, páʼ meŋ á nziŋ‑ntō lā, páʼ meŋ nde jʉ́ɔ á Yɛɛ́so Atsyapuɔ yímpɛ mé menēk lā, páʼ pɛ mé si ŋgɔ́ ayiŋne mefaʼ Atsyapuɔ mīi, meŋ ke ghʉ̄ lā,

² a piŋɛ ŋgɔ́ éyi á mbū emɔ̄ʼ epuɔ, meŋ gɔ́ te á nziŋ‑ntō ɔ́, mbɔ á mbū pɛ, meŋ ŋké ŋgɔ́ ewiɛ́. Á épúp melaʼ mīi, páʼ pɛ lɛtneē ánɛ Atsyapuɔ lā, pɛ elɔ̄ɔk ŋgɔ́ ayiŋne zīi, á tswii á légɛ, meŋ á nziŋ‑ntō.

³ Ega lelhʉ athū zá á mvhɔ epuɔ pīi, pɔ́ sɛ́ʼɛ á gá, a gɔ á ŋgɔ́ ewuɔ páʼa:

⁴ pek te pɔŋté á wék á lepfɛ̄t azō nzéŋ nnú, melaʼ afaʼ zék lɛ̄?

⁵ Awíɛ awíɛ á nnɔ pek, a te pɔŋté á lelɔk menzwí yīi, a á ŋiŋ Yɛɛ́so, ŋ́ghʉ̄ á nzwí yi, páʼ emɔ̄ʼ meziŋ‑ntō é si ŋghʉ̄ɛ épúp ɔ́ lɛ̄? Páʼ epɔ̄ memía Atsyapuɔ Yɛɛ́so mbɔɔ Piɛ, é si ŋghʉ̄ɛ azɔ́p épúp ɔ́ lɛ̄?

⁶ Meŋ mbɔɔ Baanabas é té pɔŋté á lewɛ ajū mīi, pek gɔ elɔk ŋgɔ́ éwú azék, té ghʉ amɔ̄ʼ afaʼ ndɛʼɛ ɛ́ lɛ́?

⁷ Mɛ́ lé zi njʉ́ɔ égɔ́, taʼ mmaʼ‑ncu, á fók ŋkāp ndɔk mbɛ́ á athū nnɛ̄t zí méŋwɛ̄t é? Awɔ́ ŋiŋ, a gɔ ekʉɔ́ʼ ŋkāʼ yí, ḿbhī etsō éwú, éshʉʼ enéŋ té pfɛ́t ecū mīi, é fhɔ́ɔ á ŋkāʼ mɛ́t é? Ŋ́ké te épúp ɔ́ mbɔ, ewiɛ́ pfɛnne‑mefɔŋ, a gɔ enéŋ té nú mbē mefɔŋ mɛ́t é?

⁸ Menu mīi meŋ shúŋɔ lāa, é té lɛ ŋgɔ́ áa menu mīi epuɔ menɔŋ mé kwaŋtɛ ɛ́, é si ŋgɔ́ menu, mbɔ mɛ́ le zéŋ ntí á ntē aŋwaʼne mbé Ndém épúp.

⁹ Mɔɔ́sɛ a le tí lepé mɛ́t ŋ́gɛ: «Te néŋ á kwáŋ á nchu efɔŋ zīi, e é si nnēŋɛ mekō tɛ mɛ́ ecʉ́ʼɛ efʉɔ́k fʉɔké. » Ndém a le gē elé á anu jʉɔ mɛ́t, a te lɛ̄ ŋkwāŋte áa mefɔŋ ndaʼ á.

¹⁰ A lɛɛ́ ndʉ́ɛ́ épúp páʼā, ńdɔkɔ nzéŋɛ ndʉ́ɛ́ á mbū pímpɛ. Á anuúnē, é melaʼ mímpɛ tɛ́ mɛ́ le tí anu jʉɔ mɛ́t. Ŋiŋ yīi a á kʉɔ́ʼ ŋkāʼ yí, ḿbhī etsō éwú, ntē yí é pɔŋteé á letshī ánɛ ecū mīi, é shʉʼ etó á ŋkāʼ mɛ́t. Ŋiŋ yīi a púʼu mekō ŋiŋ, ntē yí é pɔ́ŋte á letshī ánɛ emi, mɛ́ e kó eyá á yí.

¹¹ Pek le phī anu Ndém á ntē pɛ. Pɛ piŋɛ ŋgyá á wék etsō tsɛ́, alɔ́ʼ á gɔ́ akɔ̄?

¹² Emɔ̄ʼ epuɔ é si nzwíʼtɛ etsō á mbū pɛ. Pek mé piŋ nzī mbɔ́ŋte á lezwīʼte etsō á mbū pɛ, ńtɔ́k á wɔ́p. Táʼ, pek le ké te épúp ghʉ. A cʉ́ʼɛ épúp, mbɔ pek é si ŋkwɛ́tɛ ntē, ánɛ ntií ntiī ŋgʉɔ̄ʼ zīi, e shʉʉ̄ʼ ánɛ pek, ńdɔkɔ mbɔ́kɔ á leghʉ ajū mīi, á gɔ evɛ́ne á ŋiŋ, á lejūʼ ŋke mbɔŋ ánɛ Klísto.

¹³ Pɛ é si nchʉ́ɛ nnɛ̄t nzhɛ́ɛ á mbɔŋɔ́ á légɛ, epuɔ pīi pɔ́ ghʉɛ afaʼ, á Mía Ŋgyā Ndém, etsō tsɔ́p é fhó áa ánɛ ecū mīi, epuɔ é ŋgyá á Mía Ŋgyā Ndém mɛ́t. Epuɔ pīi pɔ́ nɔŋɔ epɔʼ, etsɔ́p etsō é fhó áa ánɛ ecū mīi, mɛ́ é lɔk nnɔ̄ŋ epɔʼ.

¹⁴ Á zeéŋ ŋgɔ́ ndeŋ ndeŋ épúp, á mbū epuɔ pīi, pɔ́ tswii ŋke mbɔŋ. Atsyapuɔ a le lé ŋ́gɛ, pɔ́ pɔŋteé á lelɔk afaʼ zīi pɔ́ ghʉɛ, ńdɔk ŋgɔ́ éwú.

¹⁵ Táʼ, meŋ nde ké te zīŋ páʼ mɛ́ le lé épúp lā á, ḿbiŋɛ te ntíi akɛtte jʉɔ páʼa, ńdɔkɔ ŋkía amɔ̄ʼ azō á mbū pɛ ɛ́. A cʉ́ʼɛ épúp mbɔ, mbɔŋ a á gá á lekwhʉ̄, ńtɔ́k á gá á lelɔ̄ azō á mbū ŋiŋ. Ndɛ́ʼ ŋiŋ á ták ajū mīi, á ghʉɛ meŋ ekāʼtɛ.

¹⁶ Legɔ̄ yīi meŋ á si ntswīi ŋke mbɔŋ mé té si ŋghʉ̄ɛ meŋ ekāʼtɛ ɛ́. Meŋ tswii, melaʼ mīi, á si ŋgɔ́ afaʼ zīi, Ndém a le tsekné á mbū meŋ. Meŋ mbiŋɛ te ŋke mbɔŋ ntswīi, mbɔ ndɔ e é athū meŋ.

¹⁷ Á ŋgwíʼe ŋgɔ́ éyi, meŋ méŋwɛ̄t mé le kāŋ afaʼ letswi ŋke mbɔŋ, mbɔ á mbɔŋ ŋ́gɛ, mɛ́ eyá ntsɔʼɔ́ afaʼ gá. Páʼ á ké mbiŋ ŋgɔ́ azō, mbɔ Ndém a le lɔ̄k ŋŋyɛt á gá ŋyɛt lā, meŋ a ŋímne eghʉ páʼ, a le tsekné á mbū meŋ épúp.

¹⁸ Tɛ egá ntsɔʼɔ́‑afaʼ, é si ŋgɔ́ áa akɔ̄? É si ŋgɔ́ á gá á letswi ŋke mbɔŋ á mbū epuɔ ndémndēm. Meŋ á mbɔ́ŋte á gá á lelē ŋ́gɛ, mɛ́ eyá azō á mbū meŋ, melaʼ ŋke mbɔŋ yīi meŋ tswii, táʼ, meŋ ké ka épúp zɛ́ttɛ ɛ́.

¹⁹ Meŋ á si ŋgɔ́ á ŋiŋ, ńnáŋ á ŋga athū meŋ, meŋ te ŋkwa ŋiŋ ɛ́, táʼ, meŋ á ke ŋkɔ̄ŋ, ńcʉ́ʼ ŋkwa epuɔ metsem, ńdɔkɔ efāʼa ŋ́gɛ, epuɔ tɛ nzáne, e efɛ́ nnɛ̄t ŋgyá á mbū Atsyapuɔ Yɛɛ́so.

²⁰ Meŋ gʉɔ̄ tɛ ŋkó á nnɔ epuɔ Yúda, ńcʉ́ʼɛ nnáŋa áa páʼ pɔ́p lā, ńdɔkɔ efāʼa á leghʉ pɔ́ fɛ́ nnɛ̄t ŋgyá á mbū Atsyapuɔ Yɛɛ́so. Meŋ gɛ te njúʼu lepé Mɔɔ́sɛ ɛ́. Táʼ, afʉʼ zīi meŋ á piŋ ŋgʉ̄ɔ tɛ ŋkó á nnɔ epuɔ pīi, pɔ́ gɛ njúʼu lepé cʉɔ mɛ́t, meŋ ecʉ́ʼɛ nnáŋa áa páʼ pɔ́p lā, ńdɔkɔ efāʼa ŋ́gɛ, pɔ́ efɛ́ nnɛ̄t ŋgyá á mbū Atsyapuɔ Yɛɛ́so.

²¹ Meŋ gʉɔ̄ tɛ ŋkó á nnɔ epuɔ pīi, pɔ́ gɛ te njúʼu lepé Mɔɔ́sɛ ɛ́, ńcʉ́ʼɛ nnáŋa áa páʼ pɔ́p la, ńdɔkɔ efāʼa ŋ́gɛ wɔ te júʼ‑lepé, e efɛ́ nnɛ̄t ŋgyá á mbū Atsyapuɔ Yɛɛ́so. Meŋ te ndɔ̄kɔ ŋ́gɛ, meŋ gɛ te njúʼu lepé Ndém ɛ́, ŋgáŋ, meŋ gɛ njúʼu, melaʼ mīi, Klísto a puú ŋgɔ́ etsá lepé tsem.

²² Meŋ gʉɔ̄ tɛ ŋkó á nnɔ epuɔ pīi, pɔ́ zɛɛ́t te tete ánɛ mɛnzhɛ Ndém, ńcʉ́ʼɛ nnáŋa áa páʼ pɔ́p lā, ńdɔkɔ efāʼa ŋ́gɛ, pɔ́ efɛ́ nnɛ̄t ŋgyá á mbū Atsyapuɔ Yɛɛ́so. Meŋ mbúu ŋgʉɔ tɛ ŋkó akɔ̄ ajʉʼ lɛ́, ńcʉ́ʼɛ nnáŋa áa páʼ, epuɔ ajʉʼ mɛ́t é si nnáŋa épúp, ńdɔkɔ efāʼa á lelɔk meshhʉ̄ metsem, ŋ́ghʉ̄ tɛ, kɛ emɔ̄ʼ epuɔ é gɔ etó éwú, éfɛ́ nnɛ̄t ŋgyá á mbū Atsyapuɔ Yɛɛ́so, Ndém á ghʉ pɔ́ tswɛ́t lɛ́ɛ.

²³ Menu muɔ mɛ́t mīi meŋ mbúu ŋghʉ̄ɛ la, meŋ ghʉɛ ndɔkɔ efāʼa ŋ́gɛ, ŋke mbɔŋ e epú efūŋ ejʉʼ tsem, meŋ mbiŋ ŋgwɛ̄ azá afuʼ zīi, á ntē éwú.

Lezhɛ̄ á lekīmne mbe nnɛ̄t

²⁴ Pɛ é si nzhɛ́ɛ páʼ wɔ ghʉɛ‑mɛntáʼa ntáʼa ánɛ atetá zīi mɛ́ kʉʉ éwú, pɔ́ kʉʉ̄ metsem páʼā, mɛ́ kó ntáŋ áa ŋiŋ yīi, a á kʉ á lelʉɛ. Púp, pɛ efók mbʉʼ ŋkʉ̄, tɛ eshʉ̄ʼ ntswí ntaŋá.

²⁵ Ŋiŋ ntsem a nɔɔ̄ŋ ŋgʉ̄ɔ mé ŋghʉʉ̄ á mɛntáʼa ntáʼa, ńté njhʉ̄ ŋkúʼte mbe zi ánɛ emɔ̄ʼ ntií metsō, ńzéŋ nté njhʉ̄ nzíʼne á mbɔŋɔ́ mbɔŋɔ́, éfāʼa á leshʉʼ njhʉ́ ntaŋá. Ntaŋá yí mɛ́t, é si ŋgɔ́ ajū mīi á gɔ epék. Ḿbiŋ ŋgɔ́ mé pímpɛ, mbɔ ḿpɛ é si ŋghʉ̄ɛ á mɛntáʼa ntáʼa, ńdɔkɔ efāʼa ntaŋá yīi, é gɔ le láʼ mbék ɛ́.

²⁶ Melaʼ épúp tɛ́, meŋ á si ŋgē ekʉʉ azá, nzhɛ́ɛ ajū mīi meŋ faʼa, ńzéŋ ŋgɔ́ páʼ ntem‑lekwɛt yīi, a á si ŋgē etémɛ apū, ńzhɛ́ ajʉʼ zīi, a témɛ éwú lā.

²⁷ Meŋ gē ekuʼ á lekīmne mbe za tɛ ŋkímne, ńjʉ́ɔ ŋgʉɔ̄ʼ tɛʼ, ńdɔkɔ efāʼa ŋ́gɛ, ndɛ́ʼ Ndém a láʼ efók á gá á nnɔ, á gá yīi meŋ mé le ntswī ŋke yí á mbū emɔ̄ʼ epuɔ.