1 Kɔlɛŋte 8 - Eka Eswhī

Anu ncʉ̄te mbap zīi mɛ́ é lɔk ŋgwáʼ njʉʼ á mbū mesī

¹ Ŋ́gɔ́ ánɛ mbap zīi, mɛ́ é lɔk ŋgwáʼ njʉʼ á mbū ajūɔ tsem zīi, mɛ́ lɔkɔ ŋghʉ̄ɛ á Ndém, mbɔ pɛ é si ndʉ́ɛ́ ŋ́gɛ, ḿpɛ metsem é zhɛɛ́ azō éwú. Ńdʉ́ɛ́, á zéŋ ŋgɔ́ épúp. Táʼ, azō mɛ́t zīi, ḿpɛ é si nzhɛ́ɛ lā, á si ŋghʉ̄ɛ, ḿpɛ cʉ́ʼɛ ŋŋīa ŋia. Ajū mīi, á ké gɔ á tswíte á yímpɛ á legʉɔ mé mvhɔ, á si ŋgɔ́ á lewɛ ŋkɔŋne, á tsetsɛlɛ pímpɛ.

² Ŋiŋ a nɔŋ ŋkwāŋa ŋ́gɛ yí zhɛɛ́ azō, mbɔ ŋgaŋ a zɛɛ́t áa te zhɛ́ azō páʼ Ndém a á si ŋkɔ̄ŋɔ ŋ́gɛ, mɛ́ ezhɛ́ azō épúp.

³ Ŋiŋ yīi a piīŋ ŋkɔŋ á Ndém, yí tɛ́ Ndém a zhɛɛ́ á yí.

⁴ Tsetseŋɔ, ŋiŋ a gɔ epfɛ́t mbap zīi, mɛ́ lɔk ŋgwáʼ njʉʼ á mbū mesī i? Ḿpɛ metsem é si nzhɛ́ɛ á légɛ, melém é té azō á ndo esī atsetsáʼ á. Ńzéŋ nnɔŋ nzhɛ́ɛ á légɛ, Ndém a gɔ́ áa wɔ́mɔʼɔ́.

⁵ Ecū mīi, epuɔ é wuʼtɛ ndɔkɔ ŋghʉ̄ɛ á Ndém, á esī atsetsáʼ, mbɔɔ á athʉ́ lephū, é tɛ nzá tɛʼ. Á épúp, melém é esī atsetsáʼ ndó, metsyapuɔ é zéŋ ŋgɔ́ azɔ́p éwú ndó

⁶ Táʼ, ŋ́ké ŋgɔ́ mé pímpɛ, mbɔ Ndém a gɔ́ áa taʼ ndaʼ. A á Mɔʼɔ́ yímpɛ. Yí mé le pú ŋghʉ̄ ajūɔ tsem, ńzéŋ mbɔ́ á yímpɛ ŋ́gɛ, ḿpɛ e egɔ́ epuɔ pí. Atsyapuɔ yímpɛ a zeéŋ ŋgɔ́ áa taʼ ndaʼ, ŋ́gɔ́ á Yɛɛ́so Klísto. Ndém a le zapá ánɛ yí, tɛ́ ŋghʉ̄ etsō tsem, yí mé si ŋghʉ̄ɛ, ḿpɛ é gɔ́ɔ éwú.

⁷ Táʼ, emɔ̄ʼ epuɔ á nnɔ pímpɛ, é té si nzhɛ́ɛ á légɛ, melém é té etsō ɔ́. Pɔ́ lē ŋgūa mesī, tɛ ntshí mé ayáʼa. Pɔ́ pfɛɛ́t mbap zīi, mɛ́ lɔk ŋgwáʼ njʉʼ, ńjʉ́ɔ á gɔ́ páʼ, pɔ́ wuʼtɛ melém lā. Pɔ́ zɛɛ́t te tete ánɛ mɛnzhɛ Ndém. Á épúp tɛ́ pɔ́ kwaāŋ ŋ́gɛ, mbap mɛ́t zīi pɔ́ é pfɛ́t lā, e é tseŋ lenāŋ tsɔ́p a Ndém.

⁸ Ḿpɛ é si nzhɛ́ɛ á légɛ, etsō lejhʉ̄ mé gɔ le ghʉ̄, ḿpɛ tshóte nnɛ̄t mé lezēŋ Ndém ɛ́. Ḿpɛ pfɛ́tɛ, mbɔ amɔ̄ʼ azō á té tswiʼne ánɛ pímpɛ ɛ́. Ŋ́gɔ́ te pfɛ́t, mbɔ ḿpɛ ka amɔ̄ʼ azō, ánɛ lenāŋ yímpɛ pí í.

⁹ Pɛ kɔŋɔ, pɛ epfɛ́t ecū mīi, pɛ é kɔŋ. Táʼ, pɛ eké mbá. Pɛ ghʉʉ̄ épúp páʼā, ŋ́gɔ́ yīi ewiɛ́ legɔ̄, a gɔ eghʉ̄ʉ, epuɔ pīi, pɔ́ zɛɛ́t te tete ánɛ mɛnzhɛ Ndém, é fa nzhɛ.

¹⁰ Ḿpɛ elɛ ndé ŋ́gɛ, ŋiŋ yīi a zɛɛ́t te zhɛ́ anuúnē ánɛ melém, a jʉ́ɔ á wú, wu yīi o ó si nzhɛ́ɛ anuúnē, o náŋ á ŋgyā mesī mpfɛ́tɛ mbap zīi, mɛ́ lɔk ŋgwáʼ njʉʼ, mbɔ akwaŋte zí á té tshóne á yí, á legʉɔ mpfɛ́t azí lɛ̄?

¹¹ Ŋ́gɔ́ éyi a gʉɔ mpfɛ́t, mbɔ ajū mīi o ó gē eghʉ, ńnɔŋ nzhɛ́ɛ, á ghʉ, ŋiŋ yīi, a zɛɛ́t te tete ánɛ mɛnzhɛ Ndém, á lákne. Tɛ́ ŋké ŋgɔ́ á méŋ mɔ́ wu, mbɔ Klísto a le kwhʉ́ melaʼ mí.

¹² O faa ánɛ ejʉɔ ntií mɛ́t, á mbū méŋ mɔ́ wu, tɛ ntē yí é nɔ̄ŋ ŋŋāka á yí, páʼ a zɛɛ́t te tete ánɛ mɛnzhɛ Ndém lā, mbɔ o lɔkɔ efāa á mbū Klísto.

¹³ Melaʼ epúp tɛ́, a gɔ́ éyi, mbap zīi meŋ pfɛ́tɛ, é gɔ eghʉ̄ʉ, méŋ mɔ́ ga, á fa nzhɛ, meŋ mbú le fú nzéŋ mbap mpfɛ́t ɛ́, ńtɔ́k á gá leghʉ, méŋ mɔ́ á fa nzhɛ.