1 Kɔlɛŋte 7 - Eka Eswhī

Menu ánɛ anu alaá‑ŋgyā

¹ Tsetsɔŋɔ, meŋ gɔ á ntsɔ́ʼ menu mīi, pɛ le tí akɛtte ndɔk nzɛ́tte á gá. Pɛ le lé ŋ́gɛ, á mbɔŋ á mbū ŋiŋ mbaŋa, á legɔ̄ le menzwí esé. Á épúp.

² Táʼ, á mbɔŋ ŋ́gɛ, ewiɛ́ ŋiŋ mbaŋa lɛ́, a ewɛ̄ á nzwí yi. Ewiɛ́ menzwí lɛ́, a ewɛ̄ á ndō yi, púp, ńdɔk mbɔ́k á agā.

³ Ndɛ́ʼ ŋiŋ mbaŋa á nɔŋ, ńtém nzem ŋgyá á mbū nzwí yi. Ndɛ́ʼ menzwí á nɔŋ, ńtém nzem ŋgyá á mbū ndō yi.

⁴ Mbe nnɛ̄t menzwí e te ezi í, é gɔ́ áa ezi ndō yi. Ndeŋ ndeŋ épúp, mbe nnɛ̄t ŋiŋ mbaŋa e te ezi í, e gɔ́ áa ezi nzwí yi.

⁵ Púp, ndɛ́ʼ mmɔʼ á lʉʼ á légɛ pɔ́ mmɔʼ e enɔ̄ŋ. Ńdaʼ yīi, pɔ́ yí é gɔ́ á taʼ nchu, tɛ́ ŋghʉ̄ épúp. Ŋgia e ké le zóko esāka á. Pɔ́ yí e eghʉ̄ épúp, ńdɔk ŋgwɛ̄ njhʉ̄ á leswīŋte Ndém, ńdɛ nzéŋ mbīŋ nzem ncʉ́ʼ á taʼ, ḿbɔ́k á wɔ́p á legɔ̄ le zéŋ ŋkūʼ, á lekūʼte mennɛ̄t mɔ́p ɔ́, Sɛ́ta á jhʉ́ apɛ, ńtáte á wɔ́p.

⁶ Anu zīi meŋ á shúŋ la, é té mmɔʼ lepé tsīi, meŋ néŋɛ, ŋ́gɛ mɛ́ pɔŋteé á lekūʼtɛ ɛ́, táʼ, ŋké ŋgɔ́ éyi pɛ ghʉɛ épúp, á gɔ́ mbɔŋ.

⁷ Á ké mmī mé meŋ, mbɔ meŋ á si ntsáa ŋ́gɛ, epuɔ metsem e enáŋ té menzwí, páʼ meŋ lā. Á piŋɛ ŋgɔ́ le épúp gɔ́, melaʼ mīi, Ndém a le yá ezi ntií lenāŋ awíɛ awíɛ, é tswhi. A á mbū emɔ̄ʼ epuɔ, ŋ́gyá á wɔ́p á lelā ŋgyā, ŋ́gɔ́ á mbū emɔ̄ʼ, ŋ́gyá á wɔ́p á lenāŋ pɔ́plépɔ̄p.

⁸ Tsetsɔŋɔ, meŋ á si ndʉ́ɛ́ á mbū ntswi ntswi, mbɔɔ á mbū mepfók wɔnzwí ŋ́gɛ, á mbɔŋ á mbū pɔ́p, á lenāŋ pɔ́plépɔ̄p, páʼ meŋ lā.

⁹ A piŋɛ ŋgɔ́ éyi, pɔ́ gɔ le kūʼ á lekūʼte mbe zɔp ɔ́, pɔ́ elɛ ndá ŋgyā. Á mbɔŋ ŋ́gɛ, ŋiŋ a elá ŋgyā, ńtɔ́k á yí á leshʉɔ wɔnzwí ká mbaŋa.

¹⁰ Ŋ́gɔ́ á mbū epuɔ Yɛɛ́so pīi, pɔ́ lē ndáʼ ndá ŋgyā, mbɔ lepé cʉɔ tsīi, meŋ gɔ á néŋɛ la, é té fhɔ́ɔ á mbū meŋ ɛ́. É fhɔ́ɔ á mbū Atsyapuɔ Yɛɛ́so: ndɛ́ʼ menzwí á gɔ́ aleʼé, ńtó á mbū ndō yi.

¹¹ A piŋɛ ŋgɔ́ éyi, a lē ndáʼ ntó á mbū ndō yi, á náŋ épúp. Ŋ́ké te épúp ɔ́, á piŋ nzem njʉ́ɔ á yí, pɔ́ yi é cuŋte ntsaŋ. Ŋ́gɔ́ mé mbaŋa, mbɔ ndɛ́ʼ ŋiŋ mbaŋa, á juŋ á nzwí yi.

¹² Éshʉ̄ʼ á mbū emɔ̄ʼ epuɔ, mbɔ anu zīi, meŋ gɔ á ndʉ́ɛ́ la, á té efhɔ́ɔ á mbū Atsyapuɔ Yɛɛ́so ó, á fhɔ́ɔ á mbū meŋ: ŋiŋ Yɛɛ́so a wiɛ á nzwí yi, menzwí mɛ́t á gɔ́ te ŋiŋ Yɛɛ́so ó, ḿbīŋ mvéŋ ŋ́gɛ, pɔ́ yí e enáŋ, ndɛ́ʼ ŋgaŋ á juŋ á yí.

¹³ Menzwí a gɔ́ á ŋiŋ Yɛɛ́so, ŋ́gwɛ̄ á ndō yi, á gɔ́ te ŋiŋ Yɛɛ́so ó, ŋ́ké mvéŋ ŋ́gɛ, pɔ́ yí e enáŋ, ndɛ́ʼ menzwí mɛ́t á lʉʼ á yí.

¹⁴ Meŋ ndʉ́ɛ́ páʼa melaʼ mīi, ndō wɔ̄ yīi a zɛɛ́t te gɔ́ á ŋiŋ Yɛɛ́so lā, a á cʉ́ʼ á ŋiŋ Ndém melaʼ nzwí yi, páʼ a á ŋiŋ Yɛɛ́so lā. Ndeŋ ndeŋ épúp, menzwí yīi, a zɛɛ́t te gɔ́ á ŋiŋ Yɛɛ́so, a á cʉ́ʼ á ŋiŋ Ndém melaʼ ndō yi, páʼ a á ŋiŋ Yɛɛ́so lā. Á piŋɛ te épúp ɔ́, mbɔ ewɔŋkhʉ̄ pɔ́p e gɔ́ páʼ, pɔ́ a Ndém é té nnɔ ɔ́ lā, tɛ́ pɔ́ ké ŋgɔ́ ewɔŋkhʉ̄ Ndém.

¹⁵ Ŋiŋ yīi a te ŋiŋ Yɛɛ́so ó, a nɔŋ ŋkɔ̄ŋɔ á yí á lefakne pɔ́ ŋiŋ yīi, a á ŋiŋ Yɛɛ́so, á lɛ efāk nnɛ̄t. Á pikɛ tɛ ŋgɔ́ épúp, mbɔ é té lepé á mbū ŋiŋ mbaŋa kɛ́ menzwí yīi, a á ŋiŋ Yɛɛ́so lā, á lenāŋ pɔ́ ŋiŋ yīi, a á gʉɔ lā á, melaʼ mīi, Ndém a lɛɛ́ ndɔkɔ á wɛ́ ŋghʉ̄ɛ epuɔ pí, ŋ́gɛ pɛ enáŋ mé apwɛne.

¹⁶ Wu menzwí, ŋgɔ́ á ŋiŋ Yɛɛ́so, o gɔ le zhɛ́ kɛ Ndém a gɔ ezápa ánɛ wu, ŋ́ghʉ̄ ndō wu á tswɛ́t kɛ ŋgáŋ lɛ́ɛ̄. Wu ŋiŋ mbaŋa, o ó le zhɛ́ kɛ, Ndém á gɔ ezápa ánɛ wu, ŋ́ghʉ̄ nzwí wu á tswɛ́t kɛ ŋgáŋ lɛ́ɛ̄.

Awíɛ a enáŋ páʼ, Ndém a ŋgē etɔ́ŋ á yí, á gɔ́ épúp

¹⁷ Amɔ̄ʼ anu zīi, meŋ a zéŋ etswiʼne, a a jʉɔ páʼa. Awíɛ awíɛ a enáŋ eyi lenāŋ, páʼ Atsyapuɔ Ndém a le kīa ŋ́gɛ, a enáŋ épúp, mbɔ a gɛ nzī nnáŋa épúp, tɛ efhó páʼ Ndém, a le lɔ̄k á yí ŋghʉ̄ á ŋiŋ yi. Lepé cʉɔ mɛ́t tsīi, meŋ ŋgyáa á mbū pɛ lāa, á si ŋgɔ́ ajū mīi, meŋ á si nzíʼnɛ ánɛ meŋgyā melúŋ epuɔ Yɛɛ́so ntsem.

¹⁸ Ńdɔkɔ ŋ́gɛ, a gɔ́ éyi Ndém a le gē elɔk á ŋiŋ eghʉ á ŋiŋ yi, mɛ́ zɛ́t té tém á yí, ndɛ́ʼ ŋgaŋ á lé ŋ́gɛ, mɛ́ etém á yí. Ŋ́gɔ́ éyi Ndém a le gē elɔk á ŋiŋ eghʉ á ŋiŋ yi, mbɔ mɛ́ lē ndáʼ ntém á yí, ndɛ́ʼ ŋgaŋ á lʉɔ.

¹⁹ A gɔ́ éyi mɛ́ lé tém á ŋiŋ lo, ŋ́gɔ́ éyi mɛ́ la á yí témɛ lo, mbɔ á te amɔ̄ʼ azō ɔ́. Mía azō á gɔ́ áa leziŋ, páʼ mbé Ndém é si ndʉ́ɛ́ épúp.

²⁰ Á mbɔŋ ŋ́gɛ, awíɛ awiɛ́ a egɔ́ páʼ, Ndém a le gē elɔk á yí eghʉ á ŋiŋ yi, á gɔ́ épúp.

²¹ A gɔ́ éyi, Ndém a le gē elɔk á wú eghʉ á ŋiŋ yi, o egɔ́ apuʼ, ndɛ́ʼ o ezóko nzāpa nnɛ̄t ju. Táʼ, o piŋɛ ŋgwɛ̄ eshhʉ̄ á lelɔk nzáʼ ŋkhʉ apuʼ mɛ́t á ntɔ̄ŋ wu, o elɛ̄ɛ nzáʼ.

²² Ndɛ́ʼ o zóko nzāpa nnɛ̄t ju melaʼ mīi, ŋiŋ yīi a á ŋgɔ́ á apuʼ, tɛ Atsyapuɔ Ndém á lɔk á yí ŋghʉ̄ á ŋiŋ yi, ŋgaŋ a te zɛ́t á apuʼ ɔ́, melaʼ mīi Atsyapuɔ Yɛɛ́so Klísto a á záʼ ŋkhʉ á ntɔ̄ŋ yí. Ndeŋ ndeŋ épúp, ŋiŋ yīi a á ŋgɔ́ á ŋga athū yí, Ndém á piŋ ndɔ̄k á yí ŋghʉ̄ á ŋiŋ yi, ŋgaŋ a cʉʉ́ʼ ŋkwa Klísto.

²³ Ndém a lē ndáʼ ŋgyá á azō tee nzwiŋ, ńdɔk ncūʼ á wɛ́, púp ndɛ́ʼ pɛ ezéŋ ncʉ́ʼ apuʼ epuɔ menɔŋ.

²⁴ Epɔ̄ memía, meŋ á páʼā, ńnɔŋ ndʉ́ɛ́ ŋ́gɛ, awíɛ awíɛ a egɔ́ á mvhɔ Ndém áa páʼ, Ndém a le gē elɔk á yí eghʉ á ŋiŋ yi, á gɔ́ épúp.

Anu ánɛ wɔ te lá‑ŋgyā, mbɔɔ wɔ faʼa‑lelā, mbɔɔ mepfók

²⁵ Éshʉ̄ʼ ánɛ epuɔ pīi, pɔ́ zɛɛ́t te lá ŋgyā, mbɔ meŋ te wɛ̄ emɔ̄ʼ ntekné zīi, e fhɔ́ɔ á mbū Atsyapuɔ Yɛɛ́so ó. Anu zīi meŋ gɔ á eshúŋɔ, á gɔ́ áa akwaŋte zá, pɛ pīŋ mbɔ́ŋte á lekūʼte anu mɛ́t, melaʼ mīi meŋ á si ŋgɔ́ á ŋiŋ, mbɔ Atsyapuɔ a le lɔ̄k apɔŋɔ́ ntē zí, ŋ́ghʉ̄ meŋ egɔ́ á ŋiŋ yīi, mɛ́ gɔ etém nzem ŋgyá mé yí.

²⁶ Anu mɛ́t a ajʉɔ, á mbɔŋ ŋ́gɛ, epuɔ e enáŋ té lá ŋgyā. Meŋ ndʉ́ɛ́ páʼa, éfhɔ́ɔ ánɛ ŋgʉɔ̄ʼ zīi, ḿpɛ é tsetseŋɔ njʉ́ɔ. Ŋŋ, meŋ á kwaŋ ŋ́gɛ, á mbɔŋ ŋ́gɛ, awíɛ awíɛ a enáŋ épúp.

²⁷ A gɔ́ éyi, ŋiŋ pɔ́ menzwí é le lá ŋgyā, ndɛ́ʼ ŋgaŋ á juŋ á yí. Ŋ́gɔ́ éyi ŋgaŋ a la ŋgyā lá á, ndɛ́ʼ á faʼ á yí á lelā ŋgyā.

²⁸ Meŋ ké ndʉ́ɛ́ páʼa, ŋ́gɔ́ éyi, ŋiŋ a láa ŋgyā, mbɔ ŋgaŋ a ka fā á. Ŋ́gɔ́ éyi, mɔ́ ŋgɔ a láa ŋgyā, mbɔ a zeéŋ ka fa á. Táʼ, pɛ eké nzhɛ́ á légɛ, epuɔ pīi, pɔ́ lé lá ŋgyā, pɔ́ jʉɔ́ ŋgʉɔ̄ʼ á ŋgɔŋ ega tɛ́ʼ. Meŋ á si mbiŋɛ ŋkɔ̄ŋɔ ŋ́gɛ, ndɛ́ʼ pɛ ekó á ntē ŋgʉɔ̄ʼ mɛ́t.

²⁹ Epɔ̄ memía, anu zīi meŋ ndɔkɔ ndʉ́ɛ́ a ajʉɔ páʼa. Njhʉ̄ e te zɛ́t nzá á. Púp, tɛ efhó tsetseŋɔ, ŋiŋ yīi a lé lá ŋgyā, a enáŋ páʼ a zi la ŋgyā lá á lā.

³⁰ Epuɔ pīi pɔ́ é si ndāa, e enáŋ páʼ pɔ́ té si mmēkɛ amɔ̄ʼ azō ɔ́ lā. Epuɔ pīi pɔ́ é si ŋkáka, e enáŋ páʼ pɔ́ zi te si ŋkáka lā. Epuɔ pīi pɔ́ é si njúɔ́ azō, e enáŋ páʼ azō mɛ́t, á té azɔ́p ɔ́ lā.

³¹ Epuɔ pīi pɔ́ é ŋgɔŋ ega njhʉ́ɛ apɛ, e enáŋ páʼ pɔ́ zi te si njhʉ́ɛ amɔ̄ʼ apɛ ɛ́ lā, melaʼ mīi ŋgɔŋ jʉɔ zīi, ḿpɛ jʉ́ɔ lāa, e te ezéŋ enáŋ tɛʼ, tɛ́ mi í.

³² Meŋ te si ŋkɔ̄ŋɔ ŋ́gɛ, pɛ emēk ánɛ amɔ̄ʼ azō ɔ́. Ŋiŋ yīi a la ŋgyā lá á, ntē yí é tshií áa leghʉ mefaʼ Atsyapuɔ Yɛɛ́so. Á ghʉɛ épúp páʼā, ńdɔkɔ efāʼa ŋ́gɛ, Atsyapuɔ a ekɔ̄ŋ á yí.

³³ Ŋiŋ yīi a lé piŋ ndá ŋgyā, ntē yí é tshií áa ánɛ menu ŋgɔŋ muɔ. Á ghʉɛ épúp páʼā, ńdɔkɔ efāʼa ŋ́gɛ, nzwí yi a ekɔ̄ŋ á yí.

³⁴ Á épúp páʼā, akwaŋte zí á tshí ánɛ etsō tsɛ́pīa. Á mbū wɔnzwí, ńzéŋ ŋgɔ́ áa épúp. Mɔ́ ŋgɔ mbɔɔ menzwí yīi, a la ŋgyā lá á, é tshií ntē wɔ́p áa leghʉ mefaʼ Atsyapuɔ Yɛɛ́so. Ŋ́ghʉ̄ɛ épúp páʼā, ńdɔkɔ efāʼa á lepū ŋgyá mbe nnɛ̄t zɔp, á mbū Ndém, ŋ́ghʉ̄ mefaʼ mí mé taʼ ntē. Táʼ, menzwí yīi a lé lá ŋgyā, ntē yí é tshií áa ánɛ menu ŋgɔŋ muɔ. Á ghʉɛ épúp páʼā, ńdɔkɔ efāʼa á légɛ, ndō yi a ekɔ̄ŋ á yí.

³⁵ Meŋ shúŋɔ á wɛ́ menu muɔ páʼā, efāʼ áa lelɔk ntswítɛ á wɛ́. Meŋ te ndɔ̄kɔ efāʼa ŋ́gɛ, pɛ ekwāte ɛ́. A cʉ́ʼɛ épúp mbɔ, meŋ ndɔkɔ eshúŋɔ á wɛ́ á mɛnzhɛ mbɔŋ yīi, pɛ gɔ egē eziŋ éwú, ńdɛ̄tne ánɛ Atsyapuɔ Yɛɛ́so, mé taʼ ntē.

³⁶ Pɛ ezéŋ njúʼ tsetsɔŋɔ. Mɔ́ ŋgwɛso a wiɛ amaʼ‑ephʉ zí, anu zí á gɔ́ á mbū yí tɛʼ, á piŋ nnɔŋ mbɔ́kɔ á leghʉ ánɛ yí páʼ, á té si nzɛ́ttɛ ŋ́gɛ, a eghʉ̄ épúp ɔ́, ńjʉ́ɔ ŋ́gɛ, anu á pɔŋteé á leziŋ páʼ a á si nzɛ́ttɛ, á lɛ ŋghʉ̄ páʼ, a á si ŋkwāŋtɛ épúp. A ghʉɛ épúp, mbɔ a ka amɔ̄ʼ anu efā á. Á mbɔŋ ŋ́gɛ, pɔ́ yí e elá ŋgyā.

³⁷ Táʼ, mɔ́ ŋgwɛso a piŋɛ nnéŋ á ntē yí á légɛ, yí e náŋ té lá ŋgyā, té gɔ́ yīi, ŋiŋ mé tshóne á yí, ńnɔ̄ŋ nzhɛ́ɛ á légɛ, yí gɔ ekūʼ á lekūʼte mbe nnɛ̄t zi, ŋ́gɔ́ éyi yí méŋwɛ̄t mé lé ŋ́gɛ, yí te pfeŋ amaʼ‑ephʉ zí í, mbɔ ŋgaŋ a á ghʉ á mbɔŋɔ́, páʼ a ka zéŋ ŋgyā ndá á.

³⁸ Ńdɔkɔ ŋ́gɛ, ŋiŋ yīi a á lɔ́ á menzwí, a á ghʉ á mbɔŋɔ́, ŋiŋ yīi a ka menzwí lɔ́ ɔ́, á kó ŋghʉ̄ á mbɔŋɔ́ ntɔ́k.

³⁹ Menzwí yīi ndō yi a zɛ́tē, a pɔŋteé á le lɛtne ánɛ yí efʉʼ metsem. Ndō yi a piŋɛ ŋkwhʉ́, á kɔ̄ŋ, á gʉɔ njʉ́ɔ mmɔʼ ndō ndɛʼɛ yīi, a á kɔŋ. Ńdaʼ ŋ́gɛ ndō mɛ́t, a eké ŋgɔ́ á ŋiŋ Yɛɛ́so.

⁴⁰ Táʼ, meŋ á jʉ́ɔ azá ŋ́gɛ, a ŋímnɛ nnáŋ, mbɔ a a júʼ á mbɔŋɔ́, étɔ́k á yí á legʉɔ njʉ́ɔ emɔ̄ʼ ndō. Meŋ á si nzhɛ́ɛ á légɛ, Azwakne Ndém ánɛ meŋ azá.