1 Kɔlɛŋte 6 - Eka EswhīNdɛ́ʼ epuɔ Yɛɛ́so é swiŋ mentsaŋ á mbū wɔ te zhɛ́‑Ndém 1 Á gaā, ŋiŋ pɔ́ méŋ mɔ́ yi é wɛ ntsaŋ, á nnɔ pɛ, a te lɔ̄k ŋgʉɔ éswīŋ á mbū epuɔ Ndém, ŋ́gɛ pɔ́ eŋāk á, ḿbiŋ ŋgʉ̄ɔ éswīŋ áa mbū wɔ te zhɛ́‑kwaʼ Ndém ḿ? 2 Pɛ te si nzhɛ́ɛ á légɛ, epuɔ Ndém, e láʼ eŋak epuɔ metsem á ŋgɔŋ ega lɛ̄? Páʼ á ké mbiŋ ŋgɔ́ yīi, pɛ mé e láʼ eŋak epuɔ á ŋgɔŋ ega lā, á piŋ ŋgāa, pɛ te kūʼ á leŋak méŋ agáʼ ntsaŋ páʼa, á nnɔ pɛ ɛ̄? 3 Pɛ te si nzhɛ́ɛ á légɛ, ḿpɛ e láʼ eŋak mecɔʼ Ndém lɛ̄? Ḿpɛ e láʼ eŋak mecɔʼ Ndém, tɛ ŋgʉɔ shɔ́ʼɔ́, ánɛ menu esī atsetsáʼ muɔ ɔ̄? 4 Pɛ ké mbiŋ ŋ́gɔ́ á esī, ntsaŋ é lɛ ŋgē etó á tsetsɛlɛ pɛ á esī atsetsáʼ, pɛ elɔ̄ɔk ŋgʉ̄ɔ ńnɔ̄ŋ á mekhu epuɔ pīi, alúŋ epuɔ Yɛɛ́so á té lɔ̄k á wɔ́p ntɔ́ŋ azō ɔ́, ŋ́gɛ pɔ́ eŋāk. 5 Meŋ ndʉ́ɛ́ páʼa, ńdɔkɔ emāʼa esē á athū pɛ. Á páʼā, nziŋ‑ekém á lɔkɔ te ŋgɔ́ɔ á nnɔ pɛ, éyi a gɔ ecūŋte ntsaŋ, á tsetsɛlɛ ŋiŋ Yɛɛ́so pɔ́ mmɔʼ ɔ́ lɛ̄? 6 Ŋiŋ Yɛɛ́so a te pɔŋté á lelɔk mmɔʼ, ŋ́gʉ̄ɔ á mvhɔ asāʼ, éswīŋ á yí á mbū wɔ te zhɛ́‑kwaʼ Ndém ɛ́. 7 Á pú ŋgɔ́ lɛ akɔ̄ lɛ́, mbɔ ŋiŋ Yɛɛ́so á nnɔ pɛ, a lɔɔ̄k mmɔʼ ŋgʉ̄ɔ á mvhɔ asāʼ páʼā, á lɔkɔ ntswīi á légɛ, pɛ metsem, é si mbúu mbíi, ánɛ mɛnzhɛ Ndém. Ŋiŋ Yɛɛ́so, a gɔ le ghʉ̄ anu tepɔŋ á mbū wu, o ewák lɛ̄? A gɔ le pɔ̄pte á wú ntswí ajūɔ jú, o etsák á lɛ̄? 8 Pɛ te épúp eghʉ. A cʉ́ʼɛ épúp mbɔ, pɛ mé si ŋghʉ̄ɛ anu tepɔŋ ánɛ emɔ̄ʼ epuɔ. Pɛ mé zéŋ nnɔ̄ŋ mbɔ̄ptɛ á wɔ́p, ŋ́kúu etsō tsɔ́p, tɛ́ pɛ a pɔ́p é ké ŋgɔ́ epɔ̄ memía á nzem Yɛɛ́so. 9 Pɛ te si nzhɛ́ɛ á légɛ, wɔ ghʉ‑anu tepɔŋ, é té láʼ ewɛ azɔ́p ajʉʼ á ntē Lefɔ Ndém ɛ́ lɛ̄? Ndɛ́ʼ azō á kʉɛ leghi tsɛ́. Megaŋ agā, mbɔɔ epuɔ pīi, pɔ́ wuʼtɛ mesī, mbɔɔ wɔ wɛ‑mɛgap, mbɔɔ mbaŋa zīi, é véŋɛ ŋ́gɛ, mɛ́ elɔ̄k á wɔ́p ŋghʉ̄ wɔnzwí, mbɔɔ mbaŋa zīi, pɔ́ a emɔ̄ʼ mbaŋa é nɔŋɔ, ká wɔnzwí pīi, pɔ́ a emɔ̄ʼ é nɔŋɔ, 10 mbɔɔ metsɔ́ŋ, mbɔɔ wɔ pɔp‑epuɔ ŋkú etsō tsɔ́p, ŋ́ghʉ̄ wɔ núnú‑meluʼ, mbɔɔ wɔ sɛ́ʼ‑epuɔ, ŋ́ghʉ̄ wɔ pɔp‑epuɔ ndɔ̄k ŋgwɛ̄ ŋkāp. Epuɔ tepɔŋ puɔ mɛ́t metsem, é té láʼ ewɛ azɔ́p ajʉʼ, á ntē Lefɔ Ndém ɛ́. 11 É páʼa, ḿbú ŋgɔ́ ecū mīi, emɔ̄ʼ epuɔ á nnɔ pɛ, é lɛɛ́ mbúu ŋghʉ̄ɛ. Táʼ, Azwakne Ndém yímpɛ, á le sōk mefa mɛ́, ŋ́ghʉ̄ pɛ ecʉ́ʼ epuɔ Ndém, ńzéŋ ŋghʉ̄ pɛ ecʉ́ʼ epuɔ ndeŋ ndeŋ, ńzápa ánɛ Atsyapuɔ Yɛɛ́so Klísto, tɛ́ ŋghʉ̄ épúp. Pɛ ewɛ̄ mbe nnɛ̄t, tɛ nzhɛ́ légɛ pɛ lɔkɔ ŋgūʼtɛ á Atsyapuɔ 12 Pɛ é si ndʉ́ɛ́ ŋ́gɛ, pɛ gɔ eghʉ̄ʉ páʼ pɛ é kɔŋ. Pɛ eké nzhɛ́ á légɛ, ajūɔ tsem zīi, pɛ gɔ eghʉ̄ʉ, á gɔ le wɛ́ tswíte. Mbɔɔ meŋ azá, meŋ gɔ elé ŋ́gɛ, meŋ gɔ eghʉ̄ʉ ajū mīi, meŋ á kɔŋ. Táʼ, meŋ gɔ le véŋ, amɔ̄ʼ azō á lɔk á gá ŋghʉ̄ ŋkwa zí í. 13 Pɛ zeéŋ ndé ŋ́gɛ, Ndém a le ghʉ̄ etsō lejhʉ̄ melaʼ levem. Ŋ́ghʉ̄ levem, melaʼ etsō lejhʉ̄. Táʼ, pɛ eké nzhɛ́ á légɛ, Ndém a a láʼ aleʼé, éghʉ, levem pɔ́ etsō lejhʉ̄ e elákne. Ndém a lɛɛ́ te ŋghʉ̄ɛ mbe nnɛ̄t ŋ́gɛ, mɛ́ elɔk ŋghʉ̄ á agā á, á lɛɛ́ ŋghʉ̄ɛ ŋ́gɛ, mɛ́ elɔk ŋgūʼte á yí, yí mé piŋ ntúŋne mbe nnɛ̄t mɛ́t. 14 Yí mé láʼ ezéŋ elɔk mete mí eghʉ, ḿpɛ ezím azímpɛ ánɛ lewhʉ̄, páʼ a le ghʉ̄ʉ̄, Atsyapuɔ á zím ánɛ lewhʉ̄ lā. 15 Pɛ te si nzhɛ́ɛ á légɛ, mbe nnɛ̄t zɛ é si ŋgɔ́ mejʉʼ nnɛ̄t Klísto lɛ́? Ndɛ́ʼ ŋiŋ á piŋ mbúte á ajʉʼ nnɛ̄t Klísto, ánɛ azi ŋgaŋ agā. Ŋgáŋ, ndɛ́ʼ ŋiŋ á gɔ́ aleʼé, ŋ́ghʉ̄ ntií anu épúp. 16 Pɛ ka zhɛ́ á légɛ, ŋiŋ pɔ́ ŋgaŋ agā é nɔɔ̄ŋ páʼā, ńdɔkɔ mbútɛ ncʉ́ʼɛ á taʼ lɛ́? Pɛ é si ncuŋtɛ nzhɛ́ɛ épúp melaʼ mīi, mɛ́ le tí á ntē aŋwaʼne Ndém ŋ́gɛ: «Pɔ́ mémpīa e etēmte ncʉ́ʼ á taʼ. » 17 Ŋiŋ yīi, a á piŋ ndɛ̄tne nnɛ̄t zi ánɛ Atsyapuɔ, pɔ́ yí é pú ncʉ́ʼ á taʼ á ntē azwakne. 18 Pɛ epú mbíʼte á agā ŋgwáʼ. Emɔ̄ʼ mefa mīi ŋiŋnɔŋ a ghʉɛ, é gɔ áa nzem apɛ́, ánɛ mbe nnɛ̄t zi. Táʼ, ŋiŋ yīi a á piŋ ŋghʉ̄ á agā, á páʼā, ŋgaŋ á lɔkɔ efāa, ánɛ mbe nnɛ̄t zi méŋwɛ̄t. 19 Pɛ ka zhɛ́ á légɛ, mbe nnɛ̄t zɛ e é si ŋgɔ́ á Mía Ŋgyā Azwakne Ndém ɛ́ lɛ̄? Ndém a le yá Azwakne mɛ́t ŋ́gɛ, a egɔ́ á ntē pɛ. Púp, pɛ é le zéŋ mbɔ́ŋ mbe nnɛ̄t zɛ́ ɛ́, Ndém mé ecʉ́ʼɛ mbɔ́ŋɔ á wɛ́. 20 Ndém a lē ŋgyá ajūɔ tee nzwiŋ, ńdɔk ncūʼ á wɛ́. Tsetsɔŋɔ, pɛ ewɛ̄ mbe nnɛ̄t zɛ, tɛ nzhɛ́ á légɛ pɛ lɔkɔ ŋgūʼtɛ á yí. |
© CABTAL