1 Kɔlɛŋte 5 - Eka Eswhī

Taʼ anu tepɔŋ ánɛ alúŋ epuɔ Yɛɛ́so

¹ Meŋ á si njúʼu, mɛ́ nɔŋ eshúŋɔ emɔ̄ʼ ntií mele anu agā mīi, pɛ é nnɔ pɛ efʉ̄ʼtɛ, tɛ wɔ te zhɛ́‑kwaʼ Ndém, e zi ŋgɔ́ le épúp ghʉ. Ŋiŋ a gɔ eghʉ̄ʉ páʼ lā, ŋ́kāŋ á nzwí mɔʼɔ́ yi i?

² Pɛ ké mbiŋ ŋgɔ́ si ŋŋīa, á gɔ́ yīi a ké gɔ́, pɛ etshí lewhʉ̄ ndā, éfhó á nnɔ pɛ, ńjūŋ á ŋiŋ yīi, a fʉʼtɛ ejʉɔ ntií menu mɛ́t.

³ Ŋ́gɔ́ mé meŋ, mbɔ tɛ mbɔɔ páʼ, meŋ te egā lā, akwaŋte zá á ké ŋgɔ́ á nnɔ pɛ. Meŋ á ndáʼ nzáʼ ntsaŋ ŋiŋ yīi, a fʉʼtɛ ntií menu jʉɔ mɛ́t, tɛ á gɔ́ páʼ, meŋ á nnɔ pɛ lā.

⁴ Meŋ á záʼ ntsaŋ mɛ́t, ánɛ lezēŋ Atsyapuɔ yímpɛ Yɛɛ́so. Ńzáʼ lɛ akɔ̄? Pɛ epú ncúʼte ńnáŋ á esī, ńzhɛ́ á légɛ, meŋ á azá á nnɔ pɛ mé akwaŋte, mete Atsyapuɔ yímpɛ, é pú nzéŋ ŋ́gɔ́ azí éwú.

⁵ Ńcúʼte épúp, ńtsékne á ŋgaŋ á mbū Sɛ́ta, a epík mbap nnɛ̄t zi, ńzhɛ́ páʼ a láʼ aleʼé zīi, Atsyapuɔ yímpɛ a shʉʼɛ á esáʼ ŋgɔŋ, a eghʉ̄, agega zí a etswɛ́t azí.

⁶ Á ka pɔ̄ŋ ŋ́gɛ, pɛ ezéŋ ŋŋīa á. Pɛ ka zhɛ́ á légɛ, mefa é si ŋgɔ́ páʼ méŋ agáʼ levwi yīi, a ghʉɛ mblɛ é kɔ́ʼɔ lā lɛ̄.

⁷ Pɛ efhó á ntē pɛ, éfók mefa mīi é si ŋgɔ́ páʼ levwi mɛ́t lā, ńcʉ́ʼ epuɔ meswhī, melaʼ mīi, ŋgaŋ mefa a te zɛ́t á nnɔ pɛ ɛ́. Meŋ á si nzhɛ́ɛ á légɛ, Ndém a le zapá ánɛ lewhʉ̄ Yɛɛ́so Klísto, ŋ́ghʉ̄ ḿpɛ ecʉ́ʼ epuɔ meswhī. Yɛɛ́so mɛ́t, a á si ŋgɔ́ á mɔ́ njʉnjhʉ yīi, mɛ́ le zwhíī, ńdɔk njhʉ́ lekāk Páska.

⁸ Ḿpɛ eghʉ̄ azímpɛ lekāk mɛ́t, té nzwiŋ levwi. Ńdɔkɔ ŋ́gɛ, ḿpɛ ewáʼ esɔ̄, mbɔɔ menu tepɔŋ á tsetsɛlɛ pímpɛ, ńcʉ́ʼ epuɔ meswhī, ŋ́kúʼte á anuúnē. Ḿpɛ egē eghʉ lekāk mɛ́t, ńdɔ̄k mblɛ zīi, levwi a te éwú ú.

⁹ Meŋ ndɛ á ntē akɛtte zīi, meŋ nde tí á mbū pɛ, ńnɔŋ ndʉ́ɛ́ ŋ́gɛ, ndɛ́ʼ pɛ a megaŋ agā é gɔ́ nnɔ.

¹⁰ Meŋ ndɛɛ́ te ndʉ́ɛ́ epuɔ metsem pīi, pɔ́ é ŋgɔŋ ega ŋghʉ̄ agā á. Meŋ te ndʉ́ɛ́ epuɔ pīi, pɔ́ wɛɛ̄ á kegʉɔʼ ɔ́. Meŋ te ndʉ́ɛ́ wɔ fʉte‑epuɔ, ńdɔk ŋgwɛ̄ ŋkāp á. Meŋ te ndʉ́ɛ́ epuɔ metsem pīi, pɔ́ wuʼtɛ mesī í, melaʼ mīi, ŋiŋ a nɔŋɔ ŋ́gɛ, pɔ́ a ntií epuɔ jʉɔ mɛ́t é gɔ́ le náŋ, mbɔŋ á lɛ ŋgɔ́ á ŋgaŋ, á le fhó á ŋgɔŋ ega mbú ŋgʉ̄ɔ.

¹¹ Ŋgáŋ, meŋ ndɛɛ́ ntíi ndɔkɔ ndʉ́ɛ́ ŋghʉ̄ áa lɛ, ŋiŋ a gɔ́ɔ ŋiŋ Yɛɛ́so, ḿbīŋ nnɔŋ ŋghʉ̄ɛ agā, ḿbīŋ ŋgwɛ̄ á kegʉɔʼ, ńnɔ̄ŋ ŋgūʼtɛ mesī, ńnɔ̄ŋ ŋghíɛ mela, ŋ́gɔ́ á núnú meluʼ, ńnɔ̄ŋ mbɔ̄pɔ epuɔ ŋkúu etsō tsɔ́p, ndɛ́ʼ pɛ a pɔ́p é náŋ. Ndɛ́ʼ pɛ a pɔ́p, é zi mbúte etsō mpfɛ́t.

¹² Meŋ mé té pɔŋté á gá á lelē ŋ́gɛ, epuɔ pīi pɔ́ té epuɔ Yɛɛ́so ó, pɔ́ é epuɔ ndeŋ ndeŋ, kɛ pɔ́ té epiɛ́ lɛ̄ɛ. Pɛ mé piŋ mbɔ́ŋte á lecʉte, kɛ epuɔ nnɔ pɛ́, é si nzīŋɛ á mbɔŋɔ́, kɛ té pɔŋ lɛ̄ɛ.

¹³ Ndém mé pɔŋteé á lezāʼ ntsaŋ epuɔ pīi, é té epuɔ Yɛɛ́so ó. Pɛ eghʉ̄ páʼ Ndém a leé á ntē aŋwaʼne yí épúp. A leé éwú ŋ́gɛ: «Pɛ efhó á nnɔ pɛ, ńjūŋ á ŋiŋ tepɔŋ. »