1 Kɔlɛŋte 4 - Eka Eswhī

Ezi ntií Pɔ́ɔl á tsetsɛlɛ epuɔ Kɔlɛŋte

¹ Meŋ á si ŋkɔ̄ŋɔ ŋ́gɛ, epuɔ ezhɛ́ á légɛ, pek é megaŋ afaʼ Klísto, mbɔ Ndém a le tsekné anuúnē zīi, á le lʉ̄ɔ̄, ŋ́gɛ pek ezíʼne á wɛ́.

² Ajū mīi mɛ́ é si nzwíʼtɛ á mbū ŋiŋ yīi, mɛ́ é tsékne anu á mbū yí, á si ŋgɔ́ á légɛ, ŋgaŋ a egɔ́ á te sɛt nzem.

³ Ŋ́gɔ́ mé meŋ, mbɔ pɛ nɔŋɔ efāʼa á lezhɛ̄ kɛ meŋ á ŋiŋ ndeŋ ndeŋ, kɛ meŋ te ewiɛ́ lɛ̄ɛ, kɛ ŋiŋ á nɔ̄ŋ efāʼa á leŋak á gá á mvhɔ asāʼ lɛ́ɛ, mbɔ á té si mbúu eshúŋɔ á gá azō ɔ́. Meŋ méŋwɛ̄t é zi nnɔ̄ŋ te efāʼa á lezhɛ̄, kɛ meŋ á ghʉ á mbɔŋɔ́ kɛ tépɔŋ lɛ́ ɛ̄.

⁴ Meŋ á ntē meŋ nzhɛ́ á légɛ, meŋ ke ghʉ̄ afaʼ zīi, Ndém a le tsekné á mbū meŋ á mbɔŋɔ́. Táʼ, á té ndɔkɔ ŋ́gɛ, meŋ á ŋiŋ ndeŋ ndeŋ á mvhɔ Ndém ɛ́. Ŋiŋ yīi a a láʼ elé egɛ, meŋ á ŋiŋ ndeŋ ndeŋ, kɛ meŋ te ewiɛ́ lɛ́ɛ, a gɔ́ áa Atsyapuɔ.

⁵ Ńdɔkɔ ŋ́gɛ, ndɛ́ʼ pɛ efāaʼ á lezhɛ̄, kɛ ŋiŋ a á ghʉ á mbɔŋɔ́ kɛ ŋgáŋ lɛ́ ɛ. Pɛ ezwíʼte, afʉʼ a eláʼ ŋkūʼ. Pɛ ezwíʼte tɛ Atsyapuɔ a eláʼ mbīŋ nzem. Á láʼ aleʼé mɛ́t, a ekɛ̄ʼɛ á akʉ̄ɛ akʉ̄ɛ zīi, á tsetsɔŋɔ ŋgɔ́ ndʉɔne lʉɔne á ntē amɔ nzém. Ajū mīi epuɔ é lʉɔ̄ á ntē pɔ́p, a epú nzéŋ ŋ́ghʉ̄, mɛ́ ezhɛ́. Púp, Ndém a efhó ánɛ afaʼ awíɛ awíɛ, tɛ́ ŋgūʼte á yí.

⁶ Epɔ̄ memía, meŋ shúŋɔ á wɛ́ menu muɔ ntsem ánɛ meŋ, mbɔɔ ánɛ Apolos páʼa, ńdɔkɔ ŋghítɛ á wɛ́ á anu. Meŋ á si ŋkɔ̄ŋɔ ŋ́gɛ, pɛ epɛ́ efʉʼ ánɛ pek, ńzīŋ ánɛ mɛnzhɛ mbɔŋ, páʼ mɛ́ le tí á ntē aŋwaʼne Ndém épúp. Ńzéŋ nnɔŋ ŋkɔ̄ŋɔ ŋ́gɛ, ndɛ́ʼ ŋiŋ á ŋáʼne á tsetsɛlɛ pɛ, melaʼ mīi a á nzem mɛ́tɛki ŋiŋ, mbiŋ nnɔ̄ŋ ŋgwáka mmɔʼ ŋiŋ.

⁷ Wu yīi, o ó si ŋkwāŋa ŋ́gɛ, o tɔɔ́k emɔ̄ʼ epuɔ, o ó awɔ́? O wɛɛ̄ akɔ̄ zīi, Ndém mé lɛ te á wú yá ā? Páʼ ajūɔ tsem zīi, o wɛ̄ɛ, Ndém mé le pú ŋgyá á wú lā, melaʼ akɔ̄, o piŋɛ ndɔ̄kɔ azō mɛ́t ŋŋáʼnɛ, páʼ o ó lɔk mbʉʼ ju tɛ́ ŋgwɛ̄ ɛ́?

⁸ Á mbɔŋ páʼ pɛ é si ŋkwāŋa ŋ́gɛ, pɛ é ndáʼ ŋgwɛ̄ ajū mīi, Ndém a gɔ eyá á ŋiŋ, tɛ á kuʼ lā mbōo? Páʼ pɛ é si ŋkwāŋa ŋ́gɛ, pɛ lē ŋkuʼ ánɛ anu Ndém lā mbōo? Pɛ é si ŋghʉ̄ɛ páʼ pɛ kʉʉ̄ŋ ncʉ́ʼ mefɔ lā. Ŋ́gɔ́ mé pek, mbɔ pek ké te mefɔ ɔ́. Meŋ á si ŋke ntsáa ŋ́gɛ, pɛ egɔ́ mefɔ, ńzhɛ́ páʼ pek ecʉ́ʼ azék mefɔ.

⁹ Ḿpek é si ŋgɔ́ meziŋ‑ntō Yɛɛ́so Klísto, táʼ, á si ŋgɔ́ páʼ Ndém a lē ŋghʉ, pek pú ŋgɔ́ mezoknzem á nnɔ epuɔ metsem lā. Pek pú ncʉ́ʼ páʼ epuɔ pīi, mɛ́ é záʼ ntsaŋ ŋ́gɛ, mɛ́ ezwhí á wɔ́p á ntentā lā. Ńdɔkɔ ŋ́gɛ, pek pú ncʉ́ʼ awaʼá‑azō, á mvhɔ epuɔ menɔŋ á ŋgɔŋ ega, mbɔɔ á mvhɔ mecɔʼ Ndém, áwaʼá‑ajū mīi, mɛ́ tʉɔ́ʼɔ njʉ́ɔ.

¹⁰ Epuɔ ŋgɔŋ puɔ é si njʉ́ɔ á wék páʼ epia lā, melaʼ mīi pek é si ntswīi ŋke mbɔŋ Klísto. Ŋ́ké ŋgɔ́ mé pɛ, pɛ enɔ̄ɔŋ ŋkwāŋa ŋ́gɛ, pɛ é megaŋ azhɛ̄‑anu, melaʼ mīi pɛ a Klísto é nnɔ ká? Epuɔ é kwaāŋ ŋ́gɛ, pek é si ŋgɔ́ epuɔ mbwɛ́t pwɛté. Pɛ piŋ ŋkwāŋ ŋ́gɛ, pɛ é si ŋgɔ́ epuɔ ntē tɛʼ ká? Epuɔ menɔŋ é si nzwīi á wék, ḿbiŋ nnɔ̄ŋ ŋgūʼtɛ á wɛ́ ká?

¹¹ Tɛ ntshí ayáʼa, nzi e zɛɛ́t nzáŋ á wék záŋ, agāk zék á zɛ́t eshhʉ́ shhʉʉ́. Pek é si nzīŋɛ atseŋ te nzhó, mɛ́ nɔŋ ŋgēnɛ á wék, pek zi mbú ŋgɔ́ áa wɔ tɛŋkɛt‑alāʼ.

¹² Pek é si ŋkɔ́ŋɔ aziʼne, ńdɔ̄kɔ mbū mék ŋghʉ̄ɛ afaʼ, tɛ́ ŋkūʼu á lepfɛ̄t azō. Epuɔ ezɔ̄te á wék, pek eswíŋte ŋ́gɛ, Ndém a egɔ́ mé pɔ́p. Epuɔ emāaʼ ŋgʉɔ̄ʼ á athū pek, pek ekwɛ́t ntē ŋŋímne nnáŋ.

¹³ Epuɔ esɛ́ʼ á wék, pek eshúŋne á mbū pɔ́p nda nda. Epuɔ ŋgɔŋ puɔ, é si njʉ́ɔ á wék, páʼ ekaŋne lā. Tɛ ntshí á ayáʼa, pɔ́ é si ŋkwāŋa ŋ́gɛ, pek é ŋgɔŋ ega, ŋ́gɔ́ áa awaʼá‑azō.

Pɔ́ɔl a zapaá á nzem Klísto, ŋ́gɔ́ á mɔʼɔ́ epuɔ Yɛɛ́so á Kɔlɛŋte

¹⁴ Ajū mīi meŋ tíi lāa, meŋ te ntíi ndɔkɔ mmāʼa esē á athū pɛ ɛ́. Ŋgáŋ, meŋ tíi ndɔkɔ ntswɛ̄tɛ á wɛ́, á wɛ́ ewɔŋkhʉ̄ pá pīi, ntē gá é tshií ánɛ pɔ́p.

¹⁵ Pɛ zi mbú ŋgwɛ̄ atʉtʉ epuɔ tɛ nzá pīi, é gɔ ezíʼne á wɛ́ anu Yɛɛ́so Klísto, mbɔ mɔʼɔ́ wɛ a ké ŋgɔ́ áa taʼ ndaʼ. Meŋ mé le zhí á wɛ́, éfhó ánɛ páʼ meŋ mé le tswī ŋke mbɔŋ á mbū pɛ, tɛ pɛ a Yɛɛ́so Klísto é cʉ́ʼ nnɔ.

¹⁶ Púp, meŋ á si eswíŋtɛ á wɛ́, pɛ elɛ nzīŋ ánɛ mekhu má.

¹⁷ Melaʼ épúp tɛ́, meŋ a tó á Timotɛ á mbū pɛ. A a shʉʼ ezéŋ eshúŋ á wɛ́ leswhī leswhī, meziŋɛ́ má ánɛ mɛnzhɛ Yɛɛ́so Klísto. Ajū mīi, a gʉɔ mé nziʼné pɛ, á si ŋgɔ́ á zīi, meŋ á si nzíʼnɛ ejʉʼ etsem, ánɛ melúŋ epuɔ Yɛɛ́so ntsem. Timotɛ wuɔ mɛ́t, a ziīŋ ánɛ mekhu Yɛɛ́so, ŋ́gɔ́ á méŋ ga, meŋ etshí ntē gá ánɛ yí.

¹⁸ Emɔ̄ʼ epuɔ, á nnɔ pɛ é si ŋŋáʼnɛ melaʼ mīi, pɔ́ é si ŋkwāŋa ŋ́gɛ, meŋ te shʉʼ ezéŋ eshʉʼ á alāʼ pɛ, éwúa á wɛ́ ɛ́.

¹⁹ Táʼ, Ndém a véŋɛ, mbɔ meŋ te ezéŋ enáŋ á gá á leshʉʼ á alāʼ pɛ ɛ́. Éké le shʉ̄ʼɛ épúp, ŋ́gɔ̄ á njʉ́ɔ páʼ megaŋ leŋia puɔ mɛ́t, é zhɛɛ́ á leshūŋne épúp ɔ́, éshʉ̄ʼɛ épúp, ŋ́gɔ̄ áa njʉ́ɔ, kɛ pɔ́ zeéŋ nzhɛ́ á leghʉ amɔ̄ʼ ajūɔ ndɛʼɛ lɛ̄ɛ.

²⁰ Mɛ́ gē ezhɛ́ á légɛ, Ndém a á lɔk á ŋiŋ ŋghʉ̄ á ŋiŋ lefɔ yi, éfhó ánɛ leghʉ ŋgaŋ, éyi a tswii mete Ndém, mɛ́ té fhó ánɛ ashuŋne ŋgaŋ á.

²¹ Pɛ eshúŋ á gá ajū mīi, pɛ é si ŋkɔ̄ŋɔ. Ŋ́gɛ meŋ egē eshʉʼ á mbū pɛ, ŋ́gwɛ̄ ŋgʉɔ athʉ́, kɛ meŋ ndɔ̄k á nda nda eshʉ̄ʼ, ńdɔk ntswī á légɛ, ntē gá é tshií ánɛ pɛ ɛ̄?