1 Kɔlɛŋte 3 - Eka Eswhī

Afaʼ wɔ kɛ́ʼte‑ŋke mbɔŋ eshúŋ

¹ Epɔ̄ memía, ŋ́gɔ́ mé meŋ, meŋ ndɛ á tsetsɛlɛ pɛ páʼā, meŋ te shúŋne á mbū pɛ, páʼ mɛ́ shúŋnɛ á mbū epuɔ pīi, Azwakne Ndém ánɛ pɔ́p ɔ́. Meŋ nde shuŋné á mbū pɛ áa páʼ, mɛ́ shúŋnɛ á mbū epuɔ ŋgɔŋ puɔ lā, melaʼ mīi, pɛ le zɛ́t páʼ mezízí ewɔŋkhʉ̄ pīi, mɛ́ zɛɛ́t ntsaŋa á wɔ́p, ánɛ mɛnzhɛ Klísto lā.

² Ajū mīi meŋ nde ziʼné á wɛ́, á lɛ páʼ lepē tsīi, mɛ́ yáa á mbū mɔ́ lā. Á lɛ te páʼ etsō lejhʉ̄ ntete tete lā á, melaʼ mīi pɛ le gɔ, pɛ é le kūʼ á wɛ́ á lezho mpfɛ́t ɛ́. Tɛ mbɔɔ ayáʼa, pɛ gɔ le kūʼ á wɛ́ á lezho mpfɛ́t ɛ́,

³ melaʼ mīi, pɛ zɛɛ́t nziŋɛ, áa páʼ lenāŋ wɛ a zɛɛ́t páʼ, eyi epuɔ ŋgɔŋ puɔ lā. Sɛ́h ntē pɔ́ mentsaŋ, é zɛɛ́t á tsetsɛlɛ pɛ páʼā, pɛ elɔ̄kɔ te ntswīi á légɛ, pɛ zɛɛ́t nziŋɛ áa páʼ, mbe nnɛ̄t zɛ e é si ntshónɛ á wɛ́ ɛ́ lɛ̄? Pɛ elɔ̄kɔ te ntswīi á légɛ, pɛ zɛɛ́t áa epuɔ ŋgɔŋ puɔ ɔ́ lɛ̄?

⁴ Pɛ é tsetsɛlɛ pɛ, ŋiŋ á lé ŋ́gɛ, meŋ á ŋiŋ Pɔ́ɔl, eyi mmɔʼ á gɛ: «Meŋ á ŋiŋ Apolos», páʼā, pɛ elɔ̄kɔ te nzɛ́t ŋgwɛ̄ áa atswhī epuɔ ŋgɔŋ puɔ ɔ́ lɛ̄?

⁵ Apolos a á awɔ́, tɛ́ meŋ Pɔ́ɔl meŋ gɔ́ á awɔ́? Pek yí é gɔ́ áa megaŋ afaʼ pīi, Ndém a le tóō, ŋ́gɛ pek eshʉʼ ntswī ŋke mbɔŋ á mbū pɛ, tɛ́ pɛ ezápa ánɛ ŋke mɛ́t, éfɛ́ nnɛ̄t ŋgyá á mbū Klísto. Awɔ́ ŋiŋ wek lɛ́, a le ké ŋgē eghʉ azí afaʼ mɛ́t, éfhó áa ánɛ meshhʉ̄ mīi, Atsyapuɔ a á yá á yí.

⁶ Á si ndɔ̄kɔ ŋgɔ́ páʼ, mejʉʼ‑ŋgɔ̄ŋ lā. Meŋ nde phīī, Apolos á pfɛtte, Ndém mé ke nnɔ̄ŋ ŋghʉ̄ɛ, afaʼ zék á tswhíɛ.

⁷ Púp, ŋiŋ yīi a phiɛ, á te azō ɔ́. Ŋiŋ yīi a pfɛttɛ, á te azō ɔ́. Ndém ndaʼ mé si ŋgɔ́ ŋkwɛ, melaʼ mīi, yí mé ghʉʉ̄ tɛ́ azō á tswhí.

⁸ Ŋiŋ yīi a phiɛ, pɔ́ ŋiŋ yīi a pfɛttɛ, é gɔ́ áa taʼ azō. Ndém a á ké eláʼ efhó áa ánɛ páʼ awíɛ, a á ghʉ azí afaʼ épúp, tɛ́ eyá eyí ntaŋá.

⁹ Pek yí é páʼā, ńnɔŋ mbútɛ ŋghʉ̄ɛ afaʼ Ndém, pɛ gɔ́ páʼ ŋkaʼ Ndém lā, ŋ́gɔ́ páʼ ŋgyā zīi, Ndém a á si ŋkwɛ́tɛ lā.

¹⁰ Ndém a le yá á gá meshhʉ̄, tɛ́ meŋ ndɔ̄ɔk ŋkūʼ á gá á lenɔŋ atseŋ ŋgyā mɛ́t, á tsetsɛlɛ pɛ, páʼ mbɔŋ mbɔɔ‑ŋgyā lā. Mmɔʼ ŋiŋ á shʉʼ ŋkɔ́ʼne mbe. Táʼ, awíɛ a eké ndāk athū zí, ánɛ ntií zīi, a lɔkɔ ŋkɔ́ʼnɛ mbe ŋgyā mɛ́t.

¹¹ Ŋ́gɔ mé atseŋ ŋgyā zīi, Ndém a le nɔŋēē, á gɔ́ á Yɛɛ́so Klísto, mbɔ ŋiŋ a gɔ le zéŋ nnɔ̄ŋ azi ndɛʼɛ ɛ́.

¹² Emɔ̄ʼ epuɔ é lɔɔ̄k á gɔ́ɔl tɛ́ mbɔ́ ŋgyā, ánɛ atsék mɛ́t. Emɔ̄ʼ é lɔk atʉɛ́ ŋkāp tɛ́ mbɔ́ azɔ́p. Emɔ̄ʼ epuɔ é lɔk metɔ́ tee nzwiŋ. Ḿbiŋ ŋgɔ́ mé emɔ̄ʼ epuɔ, pɔ́ lɔk methʉ́. Emɔ̄ʼ é kó ndɔ̄k atsáʼ. Emɔ̄ʼ epuɔ é lɔk epíŋ.

¹³ A láʼ aleʼé zīi, Klísto a zéŋɛ eshʉ̄ʼɛ, ŋ́gɔ̄ á nzáʼ ntsaŋ zɔp a epuɔ menɔŋ, afaʼ awíɛ awíɛ a etó á ntentā. A láʼ aleʼé mɛ́t, mmók e etɔ́k ánɛ azi afaʼ awíɛ awíɛ, mɛ́ ejʉ́ɔ ntií afaʼ zīi, ŋgaŋ a le ghʉ̄ʉ̄.

¹⁴ Ŋ́gɔ éyi ŋgyā zīi, ŋgaŋ a le kwɛ́t ánɛ atsék mɛ́t, e ka eshhʉ́ ɛ́, Ndém á yá á ŋgaŋ ntaŋá.

¹⁵ Ŋ́ké mbiŋ ŋgɔ́ éyi ŋgyā zīi, ŋgaŋ a le kwɛ́tē, e é shhʉ́, Ndém a á le á yí ntaŋá yá. Mbɔ Ndém a a ghʉ, ŋgaŋ a evūʼu, ŋ́ké mvūʼu áa páʼ ŋiŋ yīi, mɛ́ saʼ á yí á mmók lā.

¹⁶ Pɛ ka zhɛ́ á légɛ, pɛ é si ŋgɔ́ ŋgyā Ndém, Azwakne zí á piŋ nnáŋ ánɛ pɛ ɛ́ lɛ̄?

¹⁷ Ŋiŋ a táka ŋgyā Ndém, mbɔ Ndém a eták á ŋgaŋ azí, melaʼ mīi ŋgyā Ndém e é si ŋgɔ́ á ajʉʼ zīi, Ndém a naáŋ éwú. Mɛ́ lʉ́ɛ́ ŋgyā Ndém mɛ́t páʼā, ńdʉ́ɛ́ á wɛ́.

¹⁸ Ndɛ́ʼ ŋiŋ méŋwɛ̄t, á pɔpte mbe nnɛ̄t zi. Ŋiŋ a gɔ́ɔ á tsetsɛlɛ pɛ, ńnɔŋ ŋ́gɛ yí é ŋgaŋ azhɛ̄‑anu, ánɛ ezi ntií epuɔ ŋgɔŋ puɔ, ŋgaŋ á lɛ ncʉ́ʼ áa páʼ apia lā, tɛ́ ndɔk ŋgwɛ̄ á kwaʼ azhɛ̄‑anu.

¹⁹ Melaʼ mīi, ajū mīi epuɔ ŋgɔŋ puɔ é kwaāŋ ŋ́gɛ, á si ŋgɔ́ azhɛ̄‑anu, á mvhɔ Ndém, ŋ́gɔ́ áa apiá‑anu. Meŋ ndʉ́ɛ́ páʼa, éfhɔ́ɔ ánɛ páʼ, Ndém a le lé á ntē aŋwaʼne yí ŋ́gɛ, yí lɔɔ̄k ŋgɛ́tté megaŋ azhɛ̄‑anu, tɛ́ ndɔk ŋgɔ̄ á wɔ́p.

²⁰ Ńzéŋ ndé éwú ŋ́gɛ, Atsyapuɔ a zhɛɛ́ ekwaŋte megaŋ azhɛ̄‑anu. Ńzhɛ́ á légɛ, ekwaŋte mɛ́t, é gɔ́ áa ndémndēm.

²¹ Á piŋɛ ŋgɔ́ épúp, ndɛ́ʼ ŋiŋ á zéŋ ndɔ̄k á légɛ, yí é nzem mɛ́tɛki, ŋ́ŋīa. Ndém a lē mbú ŋgyá epuɔ puɔ mɛ́t mé pɛ, tɛ mbɔɔ akʉ̄ɛ akʉ̄ɛ.

²² Tɛ mbɔɔ meŋ Pɔ́ɔl, mbɔɔ Apolos, mbɔɔ Sefas. Ajū mīi á ntē ŋgɔŋ ega, á gɔ́ áa azɛ́. Ajū mīi á ghʉɛ ŋiŋ á gɔ́ɔ éwú, mbɔɔ azi á gɔ eghʉ̄ʉ ŋiŋ á kwhʉ́, á pú ŋgɔ́ áa mbū pɛ. Ajū mīi á ayáʼa, kɛ azi á shʉʼ tɛ́ egɔ́ lɛ́ɛ, á pú ŋgɔ́ áa mbū pɛ, ńdɔkɔ ŋ́gɛ, ajūɔ tsem á pú ŋgɔ́ áa mbū pɛ.

²³ Ŋ́gɔ́ mé pɛ, mbɔ pɛ é epuɔ Klísto. Klísto á kó ŋgɔ́ á mbū Ndém.