1 Kɔlɛŋte 2 - Eka Eswhī

Ntií zīi Pɔ́ɔl a le lɔ̄k ntswi ŋke mbɔŋ á tésɔŋ Kɔlɛŋte

¹ Mbɔɔ meŋ azá me epɔ̄ memía, meŋ ndɛɛ́ eshʉʼɛ á alāʼ pɛ páʼā, meŋ te eshʉ̄ʼɛ á ntswiī pɛ ŋ́gɛ, meŋ zhɛɛ́ á leshūŋne ɛ́, meŋ te lɔ̄k memía ashuŋne tɛ́ eshúŋ á wɛ́ á anuúnē zīi, Ndém a le lʉ̄ɔ̄ ɔ́.

² Meŋ ndɛ á tsetsɛlɛ pɛ épúp, ńnéŋ á ntē meŋ, á leshūŋ á wɛ́ áa menu mīi, é cʉteē á Yɛɛ́so Klísto. Á Yɛɛ́so Klísto, páʼ mɛ́ le kwɛtē á yí, ánɛ mbaŋne paŋné lā.

³ Meŋ ndɛ á mvhɔ pɛ épúp, ńnɔŋ mbwɛ́t pwɛté, ńzéŋ nnɔŋ ncɔ̄ʼɔ, ńnɔŋ mvɛ̄tɛ lɛ lák lak lak.

⁴ Meŋ nde shuŋnéē, ŋ́gē etswii ŋke mbɔŋ á mbū pɛ, meŋ te lɔ̄k á azhɛ̄‑anu epuɔ menɔŋ tɛ́ ŋghʉ̄, pɛ evéŋ ɛ́. Azwakne Ndém mé nɔŋ ndɔ̄kɔ mete mí ŋghʉ̄ɛ, pɛ ezhɛ́ á légɛ, ŋke mɛ́t é anuúnē.

⁵ Púp, pɛ é le fhó ánɛ azhɛ̄‑anu epuɔ menɔŋ, tɛ́ efɛ́ nnɛ̄t ŋgyá á mbū Yɛɛ́so Klísto ó. Pɛ efhó ánɛ mete Ndém, tɛ́ efɛ́.

Azhɛ̄‑anu Ndém

⁶ Meŋ ké ndʉ́ɛ́ páʼa, pek nɔ̄ɔŋ nzíʼnɛ azhɛ̄‑anu, á mbū epuɔ Yɛɛ́so pīi pɔ́ é tswhí, ánɛ lefɛ̄ nnɛ̄t ŋgyá mbū Yɛɛ́so Klísto. Azhɛ̄‑anu mɛ́t, á gɔ te azi epuɔ ŋgɔŋ puɔ ɔ́. Á té azi wɔ pɔ́ŋ‑ŋgɔŋ jʉɔ ɔ́. Ndém a a láʼ eghʉ pɔ́ elákne.

⁷ Azhɛ̄‑anu zīi pek zíʼnɛ á wɛ́, á si ŋgɔ́ azhɛ̄‑anu, éfhɔ́ɔ á mbū Ndém. Ŋ́gɔ́ ntsem, mbɔ Ndém a le lʉ̄ɔ̄, tɛ nzɛ́t áa te nɔŋ ŋgɔŋ. Ńté njhʉ̄ ndʉ̄ɔ épúp, élɔk eshʉʼ eghʉ, ḿpɛ ekó á nte shʉ́shɔ́k yí.

⁸ Tsɔ taʼ ŋiŋ, ánɛ wɔ pɔ́ŋ‑ŋgɔŋ puɔ, a lɛ te azhɛ̄‑anu jʉɔ mɛ́t zhɛ́. Pɔ́ le wíʼe nzhɛ́, mbɔ pɔ́ lɛ te kwɛtē á Atsyapuɔ ŋgaŋ shʉ́shɔ́k ánɛ mbaŋne paŋné ɛ́.

⁹ Mɛ́ le ké ntí á ntē aŋwaʼne Ndém ŋ́gɛ: «Ajū mīi ŋiŋnɔŋ a la lɔ̄k lezēk njʉ́ɔ ɔ́, a te lɔ̄k letuúŋ njúʼ ú. Ajū mīi ŋiŋnɔŋ a laá nzi ŋkwāŋte á ntē yí í, aziɛ́ mé si ŋgɔ́ ajū mīi, Ndém a le féŋ á mbū epuɔ pīi, é kɔɔ̄ŋ á yí. »

¹⁰ Ndém a le lɔ̄k Azwakne zí, tɛ́ ntswī etsō mɛ́t áa mbū pek, melaʼ mīi Azwakne mɛ́t, á zhɛɛ́ akʉ̄ɛ akʉ̄ɛ tɛ ntsékne, tɛ mbɔɔ ajū mīi, Ndém a á ntē yí ŋkwāŋtɛ.

¹¹ Pɛ enáʼ ŋkwāŋte á tsetsɛlɛ pɛ njúʼ, awɔ́ ŋiŋnɔŋ a gɔ ezhɛ́ ajū mīi, á ntē mmɔʼ ē? Ŋiŋ yí méŋwɛ̄t mé gɔ ezhɛ́ anu zīi, á ntē yí. Á zeéŋ ŋgɔ́ ndeŋ ndeŋ épúp, ajū mīi Ndém a á si nzhɛ́ɛ, ŋiŋ a gɔ le zhɛ́, ńdaʼ Azwakne zí méŋwɛ̄t.

¹² Ŋ́gɔ́ mé pek, mbɔ Azwakne Ndém zīi, a le yá me pek, á lɛ te fhó á mbū epuɔ ŋgɔŋ puɔ ɔ́. Á lɛ Azwakne Ndém méŋwɛ̄t. Ndém a lɛɛ́ ŋgyáa épúp ŋ́gɛ, pek elɔk nzhɛ́ menu mbɔŋ mīi, a yáa á mbū pímpɛ ndémndēm.

¹³ Á épúp, tɛ́ pek ka lɔ̄k á azhɛ̄‑anu zīi, á fhɔ́ɔ á mbū epuɔ menɔŋ, tɛ́ eshúŋ menu mɛ́t ɛ́. Pek é si ndɔ̄kɔ áa ashuŋne zīi, Azwakne Ndém á le yá me pek. Púp, pek é si eshúŋɔ anuúnē zīi, á fhɔ́ɔ á mbū Azwakne Ndém, á mbū epuɔ pīi, Azwakne mɛ́t á ntē pɔ́p.

¹⁴ Ŋiŋ yīi Azwakne Ndém á té á ntē yí í, a gɔ le véŋ anuúnē zīi, á fhɔ́ɔ á mbū Azwakne Ndém ɛ́, ńzī le júʼ. Anuúne mɛ́t á mbū yí, ŋ́gɔ́ áa apiá‑anu, melaʼ mīi, ŋiŋ yīi Azwakne Ndém ánɛ yí mé gɔ etsāaʼ, tɛ ŋkúʼte á anuúnē.

¹⁵ Ŋiŋ yīi Azwakne Ndém ánɛ yí, a tsaāʼ menu ntsem, ńzhɛ́ emi mbɔŋ, ńzhɛ́ emi tepɔŋ, ḿbiŋ ŋgɔ́ yīi, ŋiŋ a gɔ le menu mí tsaʼ.

¹⁶ Mɛ́ le tí á ntē aŋwaʼne Ndém ŋ́gɛ: «Ŋiŋ a gɔ le zhɛ́ ajū mīi, Atsyapuɔ a á si ŋkwāŋtɛ ɛ. Ŋiŋ a gɔ le á yí ték. » Ŋ́ké ŋgɔ́ mé pek, mbɔ pek wɛɛ̄ akwaŋte zīi, Klísto a wɛ̄ɛ.