1 Kɔlɛŋte 16 - Eka Eswhī

Ncup zīi mɛ́ le māʼ ndɔk ntswíte epuɔ Yɛɛ́so á Yelósalɛm

¹ Ŋ́gɔ́ mé ncup, á lelɔk ntswíte epuɔ Yɛɛ́so á Yelósalɛm, mbɔ pɛ eghʉ̄ ndeŋ ndeŋ páʼ, meŋ nde lé ŋ́gɛ, mɛ́ eghʉ̄ épúp, ánɛ melúŋ epuɔ Yɛɛ́so, á tésɔŋ Ŋgalati.

² A efú ŋgɔ́ɔ mvhɔ aleʼé ánɛ ŋgap alāʼ, awíɛ awíɛ a eféŋɛ azō ánɛ páʼ, a á kuʼ éwú, tɛ pɛ é le láʼ nzóko nzwíʼtɛ ŋ́gɛ, meŋ eshʉ̄ʼ, tɛ́ pɛ emāʼ ncup ɔ́.

³ Meŋ a shʉʼ eshʉʼe tɛ e kó egā, étí mekɛtte, élɔk etó epuɔ pīi pɛ é tsɔ́ʼ, pɔ́ egʉɔ ŋgyá ajū mīi, pɛ é cúʼte, á mbū alúŋ epuɔ Yɛɛ́so á Yelósalɛm.

⁴ Á shʉʼɛ ŋgɔ́ mbɔŋ ŋ́gɛ, meŋ méŋwɛ̄t e egʉ̄ɔ éwú, mbɔ pek a pɔ́p é gʉɔ.

Leziŋ yīi Pɔ́ɔl a á si efāʼa á legʉɔ

⁵ Meŋ a shʉʼ ege eshʉʼe á alāʼ pɛ, été njhʉ̄ egʉɔ á Maseduan. Meŋ a shʉʼ efhó éwú tɛ́ eshʉʼe.

⁶ A gɔ́ aleʼé, meŋ eshʉ̄ʉʼ tɛ nnáʼ nnáŋ á alāʼ pɛ, tɛ ŋgɔ́ amɔ̄ʼ, meŋ mbú nnáŋ éwú, tɛ afʉʼ mbeŋ á láʼ mmī. A egɔ́ épúp, pɛ etswíte á gá á lelɔk á leziŋ ga ŋgʉ̄ɔ mé mvhɔ.

⁷ Meŋ te si ŋkɔ̄ŋɔ á gá á lege ejʉ́ɔ á wɛ́ tsetsɔŋɔ, ńnɔŋ ŋkʉ̄ne kʉne ɛ́. Meŋ á si ŋkɔ̄ŋɔ ŋ́gɛ, Atsyapuɔ a véŋɛ, ḿpɛ enáʼ nnáŋ.

⁸ Táʼ, meŋ á si ŋké ŋkɔ̄ŋɔ á gá á lenāŋ á tésɔŋ Efɛze ega, tɛ lekāk Paŋtekɔt é láʼ ntɔ́k.

⁹ Ńnáŋa éwú épúp, melaʼ mīi, mmɔʼ mbɔŋ mɛnzhɛ a ke tsɔ́ʼɔ̄ á mbū meŋ éwú, á lelɔk afaʼ zá ŋgʉ̄ɔ mé mvhɔ, tsya áa légɛ, megaŋ mbo pá é éwú tɛ nzáne.

¹⁰ Timotɛ a shʉʼɛ, pɛ eghʉ̄ʉ tɛ a á le pɔ́k amɔ̄ʼ azō á nnɔ pɛ ɛ́. Pɛ eghʉ̄ épúp, melaʼ mīi a á si ŋghʉ̄ɛ azí afaʼ Atsyapuɔ, páʼ meŋ.

¹¹ Púp, ndɛ́ʼ ŋiŋ á ŋé á yí. Pɛ etswíte á yí á lege eshʉʼ me lezēŋ tsá, ŋ́gɔ́ á ntē apwɛne. Pek a epɔ̄ memía é ega nzwíʼtɛ á yí.

¹² Ŋ́gɔ́ mé méŋ mɔ́ yímpɛ Apolos, mbɔ meŋ ndé zi ntswíʼte á yí tɛ́ʼ, ŋ́gɛ pɔ́ a emɔ̄ʼ epɔ̄ memía e eshʉ̄ʼ á alāʼ pɛ. A te si mbúu ŋkɔ̄ŋɔ á yí á leshʉʼ tsetsɔŋɔ ɔ́. A a shʉʼ ewɛ njhʉ̄, tɛ́ eshʉʼe.

Ashuŋne á lelɔk nzōko

¹³ Ndɛ́ʼ ŋiŋ á lí, pɛ echʉ́ nnɛ̄t ŋkúʼte anu Klísto tɛ a etē, pɛ egɔ́ á kwaʼ mbaŋa, ndɛ́ʼ amɔ̄ʼ azō á faŋne á wɛ́.

¹⁴ Ŋ́ké ndɔ̄k áa ŋkɔŋne, ŋ́ghʉ̄ ajūɔ tsem.

¹⁵ Epɔ̄ memía, amɔ̄ʼ ajū mīi, meŋ a zéŋ elɔk esemte á wɛ́, a a jʉɔ. Pɛ é si nzhɛ́ɛ páʼ Stefanas pɔ́ atseŋ ŋgyā zí, é si ŋgɔ́ mvhɔ epuɔ pīi, é le fɛ́ nnɛ̄t ŋgyá á mbū Yɛɛ́so, á apak ŋgɔŋ Akayi. Pɔ́ neéŋ athū á leghʉ afaʼ zīi, á tswíte epuɔ Yɛɛ́so.

¹⁶ Pɛ ejúʼ nchu ntií epuɔ jʉɔ mɛ́t, ńjúʼ nchu epuɔ pīi, pɔ́ ghʉʉ̄ afaʼ té ká páʼ pɔ́p.

¹⁷ Ŋgɔŋ e é si mbúu mbɔ̄ŋɔ á gá tɛʼ, páʼ Stefanas, ŋ́ghʉ̄ á Fɔɔtunátus mbɔɔ Akayikus, é shʉʼ tɛ ŋgɔ́ á lezēŋ meŋ. Nzi zɛ zīi, e é nnɔŋ nzáŋa á gá, pɔ́ é ghʉ é mi.

¹⁸ Pɔ́ é ghʉ ntē gá é ŋímne nnáŋ, ńdeŋ ndeŋ páʼ pɔ́ le ghʉ̄ʉ̄, ewɛ́ é ŋímne nnáŋ. Pɛ ezhɛ́ á wɛ́ á lewuʼ nzwiŋ ntií epuɔ jʉɔ mɛ́t.

¹⁹ Melúŋ epuɔ Yɛɛ́so mīi é apak ŋgɔŋ Azíi, é tsaʼte á wɛ́. Akilas pɔ́ Plisil, ŋ́ghʉ̄ megaŋ alúŋ epuɔ Yɛɛ́so pīi, pɔ́ gɛ ncúʼtɛ á ŋgyā pɔ́p, é chʉ́ nnɛ̄t ntsāʼtɛ á wɛ́, ánɛ lezēŋ Atsyapuɔ.

²⁰ Epɔ̄ memía metsem é tsaʼte á wɛ́. Pɛ etsāʼte mennɛ̄t mɛ́ nzeŋne zeŋné, ésēŋte á awɔ́ lɛ́ á nnɔ pɛ, á mbɔŋɔ́.

²¹ Meŋ méŋwɛ̄t Pɔ́ɔl, méŋ á lɔk apū zá ntí ajʉɔ ajʉʼ, ńdɔk ntsāʼte á wɛ́.

²² A gɔ́ éyi, ŋiŋ a te Atsyapuɔ kɔ̄ɔŋ, mbɔ Ndém a a láʼ eghʉ, ŋgaŋ a elákne. Malana ta.

²³ Ŋ́gɛ Atsyapuɔ Yɛɛ́so a elɛ ŋghʉ̄ anu mbɔŋ té ndhʉ, ánɛ pɛ.

²⁴ Meŋ ndɔɔ̄k páʼ, ḿpɛ metsem é lɛtneē ánɛ Yɛɛ́so Klísto, ŋ́kɔ̄ŋ á wɛ́ metsem.