1 Kɔlɛŋte 15 - Eka Eswhī

Anu ánɛ páʼ Klísto a le zím ánɛ lewhʉ̄

¹ Epɔ̄ memía, meŋ á si ŋkímtɛ á wɛ́ ŋke mbɔŋ yīi, meŋ nde tswī á mbū pɛ, pɛ ejúʼ mvéŋ, ńzéŋ nzīŋ páʼ é si ndʉ́ɛ́ épúp.

² Ndém a a láʼ ezápa ánɛ ŋke mbɔŋ mɛ́t, tɛ́ eghʉ pɛ etswɛ́t, éyi á gɔ́ yīi, pɛ kuʼteé ndeŋ ndeŋ páʼ, meŋ nde ziʼné á wɛ́ épúp. Tɛ á té épúp ɔ́, mbɔ pɛ le júʼ mvéŋ páʼā, á gɔ́ áa ndémndēm.

³ Meŋ nde zī mvhɔ, ńzíʼne á wɛ́ ajū mīi, mɛ́ le tsekné mé meŋ, anu mɛ́t á gɔ́ lɛ: Klísto a le kwhʉ́ melaʼ mefa mímpɛ, á gɔ́ páʼ mɛ́ le tí á ntē aŋwaʼne Ndém épúp.

⁴ Mɛ́ le túŋ á yí, Ndém á piŋ ŋghʉ̄, á zím ánɛ lewhʉ̄, ánɛ páte eleʼé tɛ́t, ńdeŋ ndeŋ páʼ, mɛ́ le tí á ntē aŋwaʼne Ndém épúp.

⁵ A le zím épúp, ńtswī nnɛ̄t zi á mbū Piɛ, ńzéŋ mbú ntswīi á mbū emɔ̄ʼ meziŋ‑ntō.

⁶ A le zéŋ ntshí á taʼ legʉɔ, ńtswī nnɛ̄t zi á mbū epɔ̄ memía ŋkhʉ táa tɛ ntɔ́k. Emɔ̄ʼ epuɔ á nnɔ pɔ́p, é zɛɛ́t á ŋgɔŋ tɛ ntshí ayáʼa, mbɔ emɔ̄ʼ é lē ŋkwhʉ́te.

⁷ A le zéŋ ntswī nnɛ̄t zi á mbū Jáak, mbɔɔ á mbū meziŋ‑ntō metsem.

⁸ A le gē ezoko, ńtswī nnɛ̄t zi á mbū meŋ azá, tɛ́ meŋ eké ŋgɔ́ páʼ mɔ́ yīi, mɛ́ é zhí té kuʼ lā.

⁹ Meŋ á páʼ mɔ́ yīi, mɛ́ le zhí te kuʼ melaʼ mīi, meŋ á nzoknzem ánɛ meziŋ‑ntō. Meŋ zi te kūʼ yīi, mɛ́ gɔ etɔ́ŋ á gá lɛ nziŋ‑ntō ɔ́, melaʼ mīi meŋ nde lʉɔ́ʼ epuɔ Ndém.

¹⁰ Táʼ, Ndém a le ké nzápa ánɛ apɔŋɔ́ ntē te ndhʉ zí, tɛ́ ŋghʉ̄ meŋ ecʉ́ʼ ajū mīi, meŋ á ayáʼa ŋgɔ́ aziɛ́ la. Apɔŋɔ́ ntē te ndhʉ mɛ́t zīi, a le wɛ̄ ánɛ meŋ, á lɛ te ndémndēm azō ɔ́. A cʉ́ʼɛ épúp mbɔ, meŋ nde ghʉ̄ afaʼ ntɔ́k meziŋ‑ntō metsem. Meŋ te ndʉ́ɛ́, ńdɔ̄k mete má tɛ́ ŋghʉ̄ afaʼ á, mete Ndém mé le tswité á gá á leghʉ.

¹¹ A zi ŋgɔ́ éyi meŋ mé le tswī ŋke mbɔŋ á mbū pɛ loo, ŋ́gɔ́ éyi pɔ́p mé le tswī loo, mbɔ pek é si sáʼa eshúŋɔ áa taʼ azō, á piŋ ŋgɔ́ anu zīi pɛ le veŋéē.

Anu ánɛ páʼ Ndém a a láʼ eghʉ epuɔ ezím ánɛ lewhʉ̄

¹² Pek é si esáʼa eshúŋɔ ŋ́gɛ, Ndém a le ghʉ̄ʉ̄, Klísto á zím ánɛ lewhʉ̄. Emɔ̄ʼ epuɔ á nnɔ pɛ é gɔ epīiŋ ŋghʉ̄ páʼ lā, ńdé ŋ́gɛ, mepfhō é té fú ezím ánɛ lewhʉ̄ ɛ̄?

¹³ A gɔ́ éyi mepfhō é té fú ezím ánɛ lewhʉ̄ ɛ́, mbɔ á páʼā ndɔkɔ ndʉ́ɛ́ ŋ́gɛ, Klísto azí, a lɛ te zím ánɛ lewhʉ̄ ɛ́.

¹⁴ A piŋɛ ŋgɔ́ éyi, Klísto a lɛ te zím ánɛ lewhʉ̄ ɛ́, mbɔ á páʼā ndɔkɔ ndʉ́ɛ́ ŋ́gɛ, ŋke yīi pek tswii, é gɔ́ áa ndémndēm. Wɛ́ á lefɛ̄ nnɛ̄t ŋgyá á mbū Ndém, á zéŋ ŋgɔ́ áa ndémndēm.

¹⁵ A gɔ́ éyi, á anuúnē á légɛ, mepfhō é té fú ezím ɛ́, mbɔ á páʼā ndɔkɔ ndʉ́ɛ́ ŋ́gɛ, pek é si ntáŋa mela ánɛ Ndém, melaʼ mīi pek ke lé á mbū epuɔ ŋ́gɛ, Ndém a le ghʉ̄ʉ̄, Klísto á zím ánɛ lewhʉ̄, té gɔ́ yīi, a le ghʉ̄ épúp.

¹⁶ Á ŋgɔ́ yīi, mepfhō é té fú ezím ánɛ lewhʉ̄ ɛ́, mbɔ Ndém a lɛ te ghʉ̄, Klísto á zím ánɛ lewhʉ̄ ɛ́.

¹⁷ A piŋɛ ŋgɔ éyi, Ndém a lɛ te ghʉ̄ Klísto á zím ánɛ lewhʉ̄ ɛ́, mbɔ wɛ́ lefɛ̄ nnɛ̄t ŋgyá á mbū Ndém, a gɔ́ áa ndémndēm. Mbɔ á páʼā, pɛ elɔ̄kɔ nzɛ́t áa á ntē mefa mɛ́.

¹⁸ Mbɔ á páʼā, ńdɔkɔ ŋ́gɛ, epuɔ pīi pɔ́ le gē ekwhʉ́, éfɛ́ nnɛ̄t ŋgyá á mbū Klísto, é lē ndákne.

¹⁹ A gɔ́ éyi, ḿpɛ le gē emaʼ ŋgua zímpɛ eyá á mbū Klísto, ńdɔkɔ efāʼa ŋghʉ̄ɛ áa lɛ, a elɛ ntswíte á yímpɛ á esī atsetsáʼ ega ndaʼ, mbɔ ḿpɛ é nnɔ epuɔ menɔŋ metsem, ŋ́gɔ́ á kwaʼ epuɔ pīi, mɛ́ gɔ ecʉ́ʼɛ ndāa á wɔ́p la.

²⁰ Ŋgáŋ, á té épúp ɔ́. Klísto a le zím ánɛ lewhʉ̄, ŋ́gɔ́ mvhɔ ŋiŋ zīi Ndém a ghʉɛ, á zímɛ ánɛ lewhʉ̄. Púp, epuɔ pīi pɔ́ le ŋkwhʉtéē, é láʼ ezéŋ ezím azɔ́p ánɛ lewhʉ̄.

²¹ Páʼ lewhʉ̄ a le zapá ánɛ taʼ ŋiŋ tɛ ŋkó á ŋgɔŋ lā, lezīm ánɛ lewhʉ̄ a le zéŋ nzī áa ánɛ taʼ ŋiŋ.

²² Páʼ epuɔ menɔŋ metsem é si ŋgɔ́ ndhu Ádam lā, pɔ́ e láʼ ekwhʉ́te azɔ́p. Ńdeŋ ndeŋ épúp, epuɔ pīi pɔ́ lɛtneē ánɛ Klísto, e láʼ ezím ánɛ lewhʉ̄.

²³ Éké ezím áa ánɛ azɔ́p afʉʼ. Klísto a lē ndáʼ nzī mvhɔ nzím. Epuɔ pīi é lɛtneē ánɛ yí, e láʼ epáte, á afʉʼ zīi, a piŋɛ nzem.

²⁴ Épáte, ŋgɔŋ e pú mmī. Klísto a a láʼ epík ajūɔ tsem zīi, á swɛ́tɛ epuɔ á esī atsetsáʼ, épík mefɔ pɔ́p, épík ajūɔ tsem zīi, á wɛɛ̄ mete, épík épúp, élɛ etsɔ́ʼ lefɔ eyá á mbū Mɔʼɔ́ yi Ndém.

²⁵ Á mbɔŋ ŋ́gɛ Klísto a esáʼ ŋgɔŋ, tɛ Ndém a eláʼ ŋghʉ̄, megaŋ mbo pí metsem e enɔ̄ŋte á mekhu yí.

²⁶ Nzoknzem ŋgaŋ mbo yīi, a a láʼ epíke, a á si ŋgɔ́ á lewhʉ̄.

²⁷ Ndém a le lé á ntē aŋwaʼne yí ŋ́gɛ, yí le yá mete á mbū Klísto á lelɔk esáʼ ajūɔ tsem. Púp, á lɔkɔ ntswīi ndeŋ ndeŋ á légɛ, Klísto a te eláʼ esáʼ á Ndém ɛ́, melaʼ mīi, yí Ndém mé le yá mete á mbū yí.

²⁸ Ndém a a láʼ egɔ́ tɛ eghʉ, Klísto a ecʉ́ʼɛ esáʼa ajūɔ tsem, yí Klísto Méŋ Ndém a ezɛ́t njúʼɔ áa mbū Ndém, páʼ a ke ghʉ̄ yí mé cʉ́ʼɛ esáʼa ajūɔ tsem lā. A egɔ́ épúp, Ndém mé lɔkɔ mbúu ncʉ́ʼɛ esáʼa azō ntsem.

²⁹ A gɔ́ éyi mɛ́ té e fú ezím ánɛ lewhʉ̄ ɛ́, mbɔ melaʼ akɔ̄ emɔ̄ʼ epuɔ é veéŋ ŋ́gɛ, mɛ́ enōʼ á wɔ́p á ntshi ánɛ ajʉʼ mepfhō ō? Pɔ́ véŋɛ ŋ́gɛ mɛ́ enōʼ á wɔ́p á ntshi, ánɛ ajʉʼ mepfhō páʼā, ńdɔkɔ efāʼa akɔ̄?

³⁰ A gɔ́ éyi mɛ́ té e fú ezím ánɛ lewhʉ̄ ɛ́, mbɔ melaʼ akɔ̄ pek é efʉʼ metsem, ḿvéŋ á wék á legɔ̄ á nchu lewhʉ̄ ʉ̄?

³¹ Epɔ̄ memía, á kwaʼ anuúnē, meŋ á efʉʼ metsem ŋgɔ́ áa nchu lewhʉ̄. Á zéŋ ŋgɔ́ á anuúnē á légɛ, ŋgɔŋ é si mbɔ̄ŋɔ á gá tɛʼ, páʼ pɛ lɛtneē ánɛ Yɛɛ́so Klísto Atsyapuɔ yímpɛ.

³² Pek a epuɔ menɔŋ pīi, é páʼ mena mbaʼ lā, é ke lʉɔ́ʼ á tésɔŋ Efɛze ega páʼa. Á ŋgwíʼe ŋgɔ́ éyi, meŋ nde gē elʉɔ́ʼ épúp, leghi tsá é tshí áa ánɛ menu ŋgɔŋ muɔ, mbɔ lelʉɔ̄ʼ mɛ́t, a a tswíte á gá ánɛ akɔ̄? A ŋgwíʼe ŋgɔ́ éyi, mepfhō é té fú ezím ánɛ lewhʉ̄ ɛ́, mbɔ meŋ gɔ elé azá páʼ emɔ̄ʼ epuɔ ŋ́gɛ: «Ḿpɛ epfɛ́t, ńnú, melaʼ mīi ḿpɛ e shʉʼ ezɔ́ mmɔʼ, ékwhʉ́. »

³³ Ndɛ́ʼ azō á kʉɛ leghi tsɛ́: «Pɛ ŋgaŋ atswhī tepɔŋ é nɔŋ nzīŋɛ, mbɔ o o láʼ egē emakne, éfʉʼne á yí. »

³⁴ Pɛ echʉ́ nnɛ̄t tɛ́ ŋgɔ̄ nnɛ̄t zɛ, ndɛ́ʼ pɛ ezéŋ ŋgwhʉ̄ ánɛ mefa. Emɔ̄ʼ epuɔ á nnɔ pɛ, é té á Ndém á mbɔŋɔ́ zhɛ́, á gɔ́ á anu esē tɛ́ʼ á mbū pɛ.

Mbe nnɛ̄t ŋiŋ yīi a á zím ánɛ lewhʉ̄, e e láʼ egɔ́ lɛ akɔ̄?

³⁵ Emɔ̄ʼ epuɔ é gɛ nzɛ́ttɛ ŋ́gɛ: «Ndém a a láʼ eghʉ, mepfhō e ezím ánɛ lewhʉ̄ lɛ akɔ̄ lɛ́? Ŋ́gɛ mbe nnɛ̄t ŋiŋ yīi, a a láʼ ezím ánɛ lewhʉ̄, e e láʼ egɔ́ lɛ akɔ̄?»

³⁶ O zɛ́ttɛ épúp, mbɔ o gɔ́ áa atsetseŋ, o te si nzhɛ́ɛ á légɛ, o phiī azō á esī páʼā, á zi mvhɔ, ŋ́kwhʉ́, tɛ́ mbiŋ esáʼ á lɛ̄?

³⁷ Ajū mīi o phiɛ, á lɛ ŋgɔ́ áa mvem azō. Ázō páʼ mvem ŋgesáŋ ká mvem amɔ̄ʼ azō ndɛʼɛ. Á té si ŋgɔ́ atɔ̄p ajū mīi, á kó ecʉ́ʼɛ etswhí tswhí ɛ́.

³⁸ O phiī mvem azō mɛ́t épúp, tɛ́ Ndém á kó ŋghʉ̄, é sáʼ, ńcʉ́ʼ atɔ̄p azō, páʼ a á kɔŋ. Eziɛ́ mvem azō lɛ́, e pɔɔ́ŋ azí atɔ̄p zīi, á mbɔŋ á mbū yí.

³⁹ Azō tɛ nnɔ̄ŋ ŋŋɛ̄nnɛ, á pɔɔ́ŋ ezi mbe nnɛ̄t, é tswhi tswhi. Mbe nnɛ̄t epuɔ menɔŋ e tswhīi, ezi mena é tswhi, ezi meséŋ é tswhi, ezi mesōh é tswhi.

⁴⁰ Etsō é athʉ́ lephū, emɔ̄ʼ é gɔ́ á esī atsetsáʼ. Ecū mīi é athʉ́ lephū, é pɔɔ̄ŋ ánɛ ezɔp ntií, etsi é esī atsetsáʼ é pɔŋ ánɛ ezɔp ntií.

⁴¹ Lezēk nu é ŋwaŋneē ánɛ ezi ntií, lezēk saŋ é ŋwaŋne ánɛ ezi ntií. Mecɔ̄ʼ saŋ é ŋwaŋne ánɛ ezɔp ntií. Tɛ mbɔɔ á nnɔ mecɔʼ saŋ, ewiɛ́ cɔʼ saŋ lɛ́, a ŋwaŋneē ánɛ ezi ntií.

⁴² A láʼ ezéŋ egɔ́ ndeŋ ndeŋ épúp, á afʉʼ zīi mepfhō é zímɛ ánɛ lewhʉ̄. Apfhō ŋiŋ zīi mɛ́ é túŋ, á koó á ntē esī, ńdʉ́. Ḿbiŋ nzím ánɛ lewhʉ̄ páʼā, á té fú nzéŋ ndʉ́ ʉ́.

⁴³ Mɛ́ le gē etúŋ, á gɔ́ awaʼá‑azō, á piŋ ŋgē ezím ánɛ lewhʉ̄, ńcʉ́ʼɛ ŋgɔ́ɔ áa ajūɔ ŋkɔ̄ʼ. Mɛ́ le gē etúŋ, á nɔŋ mbwɛ́tɛ, á piŋ ŋgē ezím ánɛ lewhʉ̄, ńnɔŋ ntʉ̄ɛ̄ lɛ túúúŋ.

⁴⁴ Mɛ́ tuúŋ apfhō ŋiŋ páʼā, é gɔ́ áa mbe nnɛ̄t ŋiŋnɔŋ zīi, mɛ́ néŋɛ á esī. Á piŋ ŋgē ezím ánɛ lewhʉ̄ páʼā, ŋ́gɔ́ mbe nnɛ̄t, Azwakne Ndém á gɔ́ éwú. Ḿpɛ wɛɛ̄ mbe nnɛ̄t á esī atsetsáʼ ega páʼā, mbe nnɛ̄t zīi Azwakne Ndém á éwú, é zéŋ ŋgɔ́ éwú.

⁴⁵ É melaʼ épúp tɛ́, mɛ́ le tí á ntē aŋwaʼne Ndém ŋ́gɛ: «Ndém a le ghʉ̄ʉ̄, Ádam, ḿvhɔ ŋiŋnɔŋ, á gɔ́ á ŋgɔŋ. A le ké nzéŋ ŋ́ghʉ̄, nzoknzem Ádam á shʉʼ, ŋ́gɔ́ á Azwakne, ŋ́ghʉ̄ɛ mɛ́ gɔ́ɔ éwú.

⁴⁶ Ajū mīi á lɛ mvhɔ, é lɛ te mbe nnɛ̄t zīi, e fhɔ́ɔ á mbū Azwakne ɛ́, e lɛ áa mbe nnɛ̄t zīi, ŋiŋnɔŋ a wɛɛ̄ á esī atsetsáʼ. Mbe nnɛ̄t zīi e fhɔ́ɔ á mbū Azwakne, é le shʉ̄ʼ áa nzem.

⁴⁷ Ndém a le lɔ̄k atsetsáʼ tɛ́ mbɔ́ mvhɔ ŋiŋnɔŋ. Melaʼ épúp tɛ́, a gɔ́ áa ŋiŋ esī atsetsáʼ. Mbáte epīa ŋiŋ, á ke mbīŋ efhó áa lephū.

⁴⁸ Epuɔ metsem á ndo esī atsetsáʼ, é swhií á ŋiŋ yīi, Ndém le lɔ̄k atsáʼ tɛ́ mbɔ́. Epuɔ metsem pīi pɔ́ e láʼ egɔ́ á lephū, pɔ́ e láʼ eswhí á ŋiŋ yīi, a fhɔ́ɔ á lephū.

⁴⁹ Ndeŋ ndeŋ páʼ ḿpɛ swhií á ŋiŋ yīi, Ndém a le lɔ̄k atsáʼ mbɔ́ lā, ḿpɛ e láʼ aleʼé, ézéŋ eswhí á ŋiŋ yīi, a fhɔ́ɔ á lephū.

⁵⁰ Epɔ̄ memía, anu zīi meŋ ndɔkɔ ndʉ́ɛ́ a a jʉɔ. Mbe nnɛ̄t páʼ e é si ŋgɔ́ mbap pɔ́ metshi lā, e gɔ le náŋ á ajʉʼ zīi, Ndém a naáŋ éwú esáʼa epuɔ ɔ́. Ajū mīi á gɔ ekwhʉ́, pɔ́ azi á naáŋ á lemiʼɛ, á gɔ le púte ajʉʼ nnáŋ á.

⁵¹ Meŋ a sia emɔ̄ʼ ntsem eshúŋ á wɛ́. Ḿpɛ metsem é té fú ekwhʉ́tɛ ɛ́. Táʼ, Ndém a a fú eghʉ, mbe nnɛ̄t zímpɛ metsem e esɛ̄nne.

⁵² Ésɛ̄nne épúp lɛ glɛ, páʼ mɛ́ míŋɛ lezēk lā. Ésɛ̄nne épúp á afʉʼ zīi, mɛ́ é júʼ ŋghi nzoknzem ntaŋ. Mɛ́ e fú etɔ́ŋ ntaŋ, mepfhō e ezím ánɛ lewhʉ̄ mé mbe nnɛ̄t zīi, e gɔ le zéŋ ŋkwhʉ́ ɛ́. Mbiŋ ŋgɔ́ mé pímpɛ, Ndém a eghʉ̄, ḿpɛ ewɛ̄ mbe nnɛ̄t eswhī.

⁵³ Meŋ a páʼā ndɔkɔ ndʉ́ɛ́ ŋ́gɛ, mbe nnɛ̄t jʉɔ zīi, e gɔ ekwhʉ́, e e láʼ esɛnne, écʉ́ʼ mbe nnɛ̄t zīi, é gɔ le zéŋ ŋkwhʉ́ ɛ́. Ŋ́gɛ, mbe nnɛ̄t jʉɔ zīi e gɔ elʉ́, e e láʼ esɛnnɛ, écʉ́ʼ mbe nnɛ̄t zīi, e e gɔ le zéŋ ndʉ́ ʉ́.

⁵⁴ Mbe nnɛ̄t zímpɛ e e láʼ esɛnne, tɛ e é le zéŋ ŋkwhʉ́ ɛ́. E e láʼ esɛnne tɛ e é le zéŋ ndʉ́ ʉ́, anu zīi Ndém a le lé á ntē aŋwaʼne yí, a elɛ mbō. A le lé ŋ́gɛ: «Mɛ́ é pú mbík á lewhʉ̄. Mɛ́ é lʉɔ́ʼ á yí tɛ njhʉ́.

⁵⁵ «Léwhʉ̄, emú mete á lelɔk njhʉ́ ncu, é gɔ́ egɔ́? Léwhʉ̄, eseŋ zīi, o lɔkɔ nzwhítɛ epuɔ lā, e egɔ́?»

⁵⁶ Eseŋ zīi lewhʉ̄ a lɔkɔ nzwhítɛ epuɔ, e é si ŋgɔ́ mefa. Ajū mīi mefa é lɔkɔ ntʉ̄ɛ̄, é gɔ́ lepé Ndém.

⁵⁷ Ḿpɛ esyákne á Ndém, páʼ a zapaá ánɛ Atsyapuɔ yímpɛ Yɛɛ́so Klísto, ŋ́ghʉ̄ ḿpɛ etsyāa á lewhʉ̄.

⁵⁸ Púp me mepɔŋ mesoó pá, pɛ etswīʼne efók ŋkwɛ, ńdɛ̄tne ánɛ Klísto, amɔ̄ʼ azō á le pú efāŋne á wɛ́ ɛ́, pɛ etswiʼne ŋghʉ̄ mefaʼ Atsyapuɔ Ndém, ńdɔk ŋgʉ̄ɔ mé mvhɔ. Ńnɔŋ nzhɛ́ɛ á légɛ, ŋgʉɔ̄ʼ zīi pɛ jʉ́ɔ á nzem Atsyapuɔ, e te e láʼ etó ndémndēm ɛ́.