1 Kɔlɛŋte 14 - Eka Eswhī

Emɔ̄ʼ menu mīi Azwakne Ndém á tswiteé á ŋiŋ á leghʉ

¹ Pɛ ekāk ete, lekɔŋ á ŋiŋ ntsem á egɔ́ á mía azō á mbū pɛ. Pɛ esé á wɛ́ á lewɛ mete mīi, Azwakne Ndém á yáa á mbū epuɔ, á lelɔk ŋghʉ̄ azō. Ńtswhi esé mete á lelɔk ntswī ŋke yīi, é fhɔ́ɔ á mbū Ndém, á mbū epuɔ.

² Ŋiŋ yīi a gē eshúŋne elāʼ, mbɔ a laá nzíʼnɛ ɛ́, a te eshúŋnɛ á mbū epuɔ menɔŋ ɔ́, a shúŋnɛ áa mbū Ndém melaʼ mīi, ŋiŋnɔŋ a gɔ le júʼ anu zīi, a lʉ́ɛ́ ɛ́. Azwakne Ndém á tshoneé á yí, á shúŋ ŋkʉʼne zīi Ndém a le lʉ̄ɔ̄.

³ Ŋiŋ yīi a piŋɛ ntswīi ŋke yīi, é fhɔ́ɔ á mbū Ndém, a tswii á mbū epuɔ menɔŋ. Ńtswīi ndɔkɔ ntswítɛ á wɔ́p á lefɛ̄ nnɛ̄t ŋgyá á mbū Ndém, ńdɔk ŋgʉ̄ɔ mé mvhɔ. Ńtswīi ndɔkɔ ŋgyáa á wɔ́p ŋgate. Ńtswīi ndɔkɔ ŋ́gɛ, pɔ́ etswiʼne ŋkāk ete.

⁴ Ŋiŋ yīi a gē eshúŋne elāʼ, mbɔ a laá nzíʼnɛ ɛ́, a á páʼa, yí méŋwɛ̄t á lɔkɔ ntswhíɛ, ánɛ lefɛ̄ nnɛ̄t. Ŋiŋ yīi a piŋɛ ntswīi ŋke yīi, é fhɔ́ɔ á mbū Ndém, á nɔŋ ŋghʉ̄ɛ, alúŋ epuɔ Yɛɛ́so á tswhíɛ.

⁵ Meŋ á si ntsáa ŋ́gɛ, pɛ metsem e eshúŋne elāʼ tsīi, pɛ la zíʼnɛ ɛ́. Ŋ́ké nnɔŋ ntswhīɛ ŋkɔ̄ŋɔ ŋ́gɛ, pɛ egɔ́ epuɔ pīi, pɔ́ tswii ŋke yīi, é fhɔ́ɔ á mbū Ndém. Ŋiŋ yīi a tswii ŋke yīi, é fhɔ́ɔ á mbū Ndém, a á mvhɔ, ánɛ ŋiŋ yīi, a shúŋnɛ elāʼ, mbɔ a laá nzíʼnɛ ɛ́. Ńdaʼ éyi á gɔ́ éyi, a a zéŋ ekɛ́ʼte éshúŋ epuɔ Yɛɛ́so anu zīi, a lʉ́ɛ́, tɛ́ pɔ́ elɔk ntswhí ánɛ lefɛ̄ nnɛ̄t.

⁶ Tsetsɔŋɔ me epɔ̄ memía, ḿpɛ elɛ ndé ŋ́gɛ, meŋ á shʉʼ á alāʼ pɛ, ńdɛ nzī á gá á leshūŋne á mbū pɛ, mé alāʼ zīi, pɛ te si njúʼu, mbɔ meŋ ka lɔ̄k épúp, ńtswíte á wɛ́ á leghʉ amɔ̄ʼ azō ɔ́, melaʼ mīi, ashuŋne zá á ka tswíte á wɛ́ á lezhɛ̄ anuúnē zīi, á fhɔ́ɔ á mbū Ndém ɛ́. Á té tswíte á wɛ́ á lezhɛ̄ ajūɔ eswhī ɛ́, á té tswíte á wɛ́ á lejūʼ ŋke yīi, é fhɔ́ɔ á mbū Ndém ɛ́, ḿbiŋ te á wɛ́ anu eswhī zíʼne.

⁷ Á zeéŋ ŋgɔ́ ndeŋ ndeŋ épúp, ánɛ tsitsi lelúŋ páʼ akékwɛlé, ká ndendɔ̄ŋ lā. Mɛ́ gɔ́ te cūŋte njúʼ ajū mīi, ŋghi aziɛ́ azō lɛ́ e lʉ́ɛ́ ɛ́, mbɔ mɛ́ gɔ eghʉ̄ʉ páʼ lā, té nzhɛ́ ajū mīi, ndendɔ̄ŋ ká akékwɛlé á púʼu ū?

⁸ Ntɔŋ‑ntaŋ a gɔ́ te ghʉ̄, mɛ́ cuŋte njúʼ ŋghi ntaŋ á, mbɔ awɔ́ mmaʼ‑ncu á gɔ epɛ́tte nnɛ̄t zi, á legʉɔ ncu ū?

⁹ Ndeŋ ndeŋ épúp, o nɔŋ eshúŋnɛ á mbū epuɔ, mé alāʼ zīi pɔ́ te si njúʼu, mbɔ pɔ́ gɔ eghʉ̄ʉ páʼ lā, tɛ́ njúʼ anu zīi, o lʉ́ɛ́ ɛ̄? O ghʉɛ épúp, mbɔ o shúŋɔ ŋgwáʼ waʼé.

¹⁰ Meshuŋne alāʼ é ŋgɔŋ á ntií ntiī, mɛ́ piŋ ŋgē eshúŋ aziɛ́ lɛ́, ńdɔkɔ ndʉ́ɛ́ áa anu.

¹¹ Ŋiŋ a nɔŋɔ eshúŋnɛ alāʼ zīi, meŋ te si njúʼɔ á mbū meŋ, mbɔ ŋgaŋ a a gɔ́ á mbū meŋ, égɔ́ áa ŋge, meŋ ezéŋ ŋgɔ́ azá á mbū yí, ŋ́gɔ́ áa ŋge.

¹² Á zeéŋ ŋgɔ́ á mbū pɛ, ŋ́gɔ́ áa épúp. Pɛ efāʼ á légɛ, Azwakne Ndém a eyá á wɛ́ mete, á lelɔk ŋghʉ̄ menu. Pɛ esé épúp. Páʼ aziɛ́ mé si ŋké ŋkhʉ́nɛ á wɛ́ lā, pɛ esé épúp. Táʼ, a eké ŋgɔ́ áa lelɔk ŋghʉ̄, alúŋ epuɔ Yɛɛ́so, á tswiʼne efɛ́ nnɛ̄t, ńdɔk ŋgʉ̄ɔ mé mvhɔ.

¹³ Tɛ́ mbɔ, meŋ ndɔkɔ ŋ́gɛ, ŋiŋ yīi a shúŋnɛ alāʼ mbɔ a laá nzíʼnɛ, a pɔŋteé á leswīŋte á Ndém, ŋ́gɛ a elɛ nzéŋ ŋgyá á yí meshhʉ̄, á lelɔk ŋkɛ́ʼte eshúŋ epuɔ.

¹⁴ Meŋ nɔŋ eswíŋtɛ á Ndém mé meshuŋne mīi, meŋ te si njúʼu, mbɔ ntē gá é si eswíŋtɛ á Ndém. Táʼ, akwaŋte zá á pú te ánɛ aswiŋte mɛ́t tshí.

¹⁵ Ajū mīi á mbɔŋ á gá á leghʉ, a ajʉɔ. Azwakne Ndém á tshónɛ á gá á leswīŋte Ndém, mbɔ meŋ a swíŋte á yí, éké ezéŋ éswíŋte á yí mé alāʼ zīi, meŋ á si njúʼu. Azwakne Ndém á tshónɛ á gá á lezɔp, mbɔ meŋ a zɔpe, éké ezéŋ ezɔp, mé alāʼ zīi meŋ á si njúʼu.

¹⁶ O ge esyákne á Ndém, ńdɔ̄k áa ashuŋne zīi Azwakne Ndém mé néŋ á ntē wu, mé alāʼ zīi ŋiŋ a gɔ le júʼ, mbɔ ŋiŋ yīi, a lɛɛ̄ nnáŋ azí á esī njúʼu, a gɔ le júʼ tɛ ndé ŋ́gɛ: «Á páʼa á», melaʼ mīi a te si njúʼu ashuŋne jú zīi, o lɔkɔ esyáknɛ á Ndém ɛ́.

¹⁷ Tsya áa légɛ, o ó syákne á Ndém á mbɔŋɔ́ tɛʼ ánɛ anu jú, táʼ, leghʉ épúp, a ka tswíte emɔ̄ʼ ŋiŋ á lefɛ̄ nnɛ̄t, ńdɔk ŋgʉ̄ɔ mé mvhɔ ɔ́.

¹⁸ Meŋ á si esyáknɛ á Ndém tɛʼ, ánɛ páʼ a le ghʉ̄ʉ̄, meŋ eshúŋne elāʼ tsīi, meŋ ndaá nzíʼnɛ ɛ́, ḿbú ntɔ́k á wɛ́ metsem.

¹⁹ Táʼ, meŋ gʉɔ̄ tɛ ŋkó ánɛ taʼ alúŋ epuɔ Yɛɛ́so, ŋ́kɔ̄ŋ á gá á leshūŋ eshuŋne tsīi, mɛ́ e júʼe, tsɔ tsɛ́táa, ńdɔk nték emɔ̄ʼ epuɔ, ńtɔ́k á gá á leshūŋ meshuŋne ŋkhʉ, á piŋ ŋgɔ́ yīi, ŋiŋ a gɔ le júʼ.

²⁰ Epɔ̄ memía, ndɛ́ʼ pɛ esáŋ menu páʼ mezízí ewɔŋkhʉ̄ lā. Pɛ esáŋ menu páʼ melʉɛ lā. Ŋ́gɔ́ ánɛ mefa, mbɔ pɛ egɔ́ páʼ mezízí ewɔŋkhʉ̄ lā, éwɔ te fa.

²¹ Á ntē aŋwaʼne Ndém, Ndém á lé ŋ́gɛ: «Meŋ a shʉʼ elɔk epuɔ pīi pɔ́ shúŋnɛ melāʼ ndɛʼɛ, éshúŋne á mbū epuɔ alāʼ puɔ. Meŋ a shʉʼ elɔk nchu wɔ shúŋne‑melaʼ ndɛʼɛ, tɛ́ eshúŋne á mbū pɔ́p. Éghʉ épúp, pɔ́ ezéŋ le nchu gá júʼ. »

²² Leshūŋne elāʼ tsīi mɛ́ la zíʼnɛ ɛ́, á si ŋgɔ́ ayiŋne zīi, Ndém a yáa á mbū wɔ te zhɛ́‑Yɛɛ́so, ḿbiŋ te ayiŋne á mbū wɔ zhɛ́‑Yɛɛ́so ó. Letswi ŋke yīi é fhɔ́ɔ á mbū Ndém, á si ŋgɔ́ ayiŋne á mbū wɔ zhɛ́‑Yɛɛ́so, ḿbiŋ te ayiŋne á mbū wɔ te zhɛ́‑Yɛɛ́so ó.

²³ Ḿpɛ elɛ ndé ŋ́gɛ, alúŋ epuɔ Yɛɛ́so zɛ́ ntsem, á cúʼte, epuɔ metsem é gɔ́ éwú eshúŋɔ elāʼ tsīi, pɔ́ la zíʼne ɛ́, mbɔ epuɔ pīi pɔ́ lɛ enáŋ á esī njúʼu azɔ́p júʼe, ká wɔ te zhɛ́‑Yɛɛ́so pīi, pɔ́ é kó azɔ́p á ŋgyā, é té kwaŋ ŋ́gɛ, pɛ gɔ́ áa epia á lɛ́?

²⁴ A piŋɛ ŋgɔ́ éyi, epuɔ metsem é si ntswīi ŋke yīi, é fhɔ́ɔ á mbū Ndém, mbɔ te zhɛ́‑Yɛɛ́so, ká ŋiŋ yīi a á kó á ŋgyā, ńdɛ nnɔŋ ńjúʼ júʼe, pɔ́ e júʼ páʼ ashuŋne ntsem zīi, pɔ́ júʼu, á si ntswīi á wɔ́p mefa mɔ́p. Mbɔ pɔ́ e júʼ páʼ á si ŋŋāka á wɔ́p.

²⁵ Púp, ntsem zīi e é ŋgɔ́ á ntē awíɛ awíɛ á nnɔ pɔ́p, e egɔ́ esia sia. Awíɛ a elɛ ntswíʼte, ŋ́ŋɔ́ʼne tɛ athū zí a epfēŋ esī, ŋ́gūʼte á Ndém, ńdé ŋ́gɛ: «Anuúne, Ndém a á tsetsɛlɛ pɛ. »

Ndém a te tákátáká kɔŋ

²⁶ Epɔ̄ memía, anu zīi meŋ a ge emakne, élé mé pɛ, a ajʉɔ páʼa. Pɛ cúʼtɛ nnɔ̄ŋ ŋgɔ̄ á eswíŋte Ndém, ŋ́gɔ́ éyi, ŋiŋ a gɔ ezɔ̄ɔp ntshi, á zɔp. Ŋ́gɔ́ éyi, ŋiŋ a gɔ eshúŋne, ńdɔk nték epuɔ, á shúŋne. Ŋ́gɔ́ éyi ŋiŋ a tswi ŋke yīi, é fhɔ́ɔ á mbū Ndém, á tswi. Ŋ́gɔ éyi ŋiŋ a gɔ elé anu mé alāʼ zīi, a laá nzíʼne ɛ́, ŋgaŋ á lé. Ŋ́gɔ́ éyi ŋiŋ a gɔ ekɛ́ʼte alāʼ mɛ́t eshúŋ epuɔ, ŋgaŋ á kɛ́ʼte eshúŋ. Ajūɔ tsem a eké ŋgɔ́ áa lelɔk ntswíte á leghʉ, alúŋ epuɔ Yɛɛ́so, á tswiʼne efɛ́ nnɛ̄t, ńdɔk ŋgʉ̄ɔ mé mvhɔ.

²⁷ Ŋ́gɔ́ éyi mɛ́ e shúŋ elāʼ tsīi mɛ́ la zíʼne ɛ́, epuɔ mémpīa ká epuɔ métɛ́t ndaʼ, é lɛ eshúŋne. Taʼ ŋiŋ á ké eshúŋne tɛ ndáŋte, tɛ́ eyimɔʼ á shúŋne azí. Ŋiŋ á ké ŋgɔ́ á esī yīi, a a kɛ́ʼte ashuŋne mɛ́t, éshúŋ epuɔ.

²⁸ Ŋiŋ a piŋɛ te á esī yīi, a a kɛ́ʼte eshúŋ epuɔ ɔ́, epuɔ pīi pɔ́ nnɔŋ ŋgɔ̄ á eshúŋnɛ á nnɔ alúŋ lā, pɔ́ lɛ ndáŋte, awíɛ awíɛ á shúŋne á ntē yí méŋwɛ̄t, á mbū Ndém.

²⁹ Ŋ́gɔ́ mé letswi ŋke yīi, é fhɔ́ɔ á mbū Ndém, mbɔ á mbɔŋ ŋ́gɛ, epuɔ mémpīa ká epuɔ métɛ́t, e etswí á shuŋne ndɔ̄k ntswī. Emɔ̄ʼ epuɔ Yɛɛ́so, e esáŋ anu mɛ́t, ńjʉ́ɔ kɛ á ajʉʼ éwú, ŋ́gɔ́ épúp lɛ́ɛ.

³⁰ Ŋiŋ á nɔŋ eshúŋnɛ, Ndém á tswī ŋke á mbū mmɔʼ ŋiŋ ánɛ alúŋ, ŋiŋ yīi a á nnɔŋ eshúŋnɛ, á náʼ ndáŋte.

³¹ Pɛ metsem é gɔ etswīi ŋke yīi, Ndém mé tswi, táʼ ŋiŋ á ké ntswī eyí tɛ ndáŋte, tɛ́ mmɔʼ á tswi eyí. Púp, ŋiŋ ntsem á lɔk nzhɛ́ anu eswhī, ńzéŋ ndɔk ńtswīʼne ńtēte ánɛ lefɛ̄ nnɛ̄t.

³² Ŋiŋ yīi a wɛɛ̄ mete á lelɔk ntswīi ŋke yīi, é fhɔ́ɔ á mbū Ndém, a kuūʼ á yí á lekūʼte nnɛ̄t zi, tɛ eshúŋne, áa afʉʼ zīi, a pɔŋteé á leshūŋne.

³³ Melaʼ mīi, Ndém a te tákátáká kɔŋ, a kɔɔ̄ŋ áa apwɛne. Páʼ ánɛ aziɛ́ alúŋ epuɔ Yɛɛ́so lɛ́, ŋ́gɔ́ épúp lɛ́,

³⁴ wɔnzwí é pɔŋteé á lelāŋte. Pɔ́ té pɔŋté á leshūŋne éwú ú. Pɔ́ pɔŋteé á lenɔŋ nnɛ̄t á esī páʼ lepé é zɛtteé épúp.

³⁵ Pɔ́ nɔŋ ŋkɔ̄ŋɔ á wɔ́p á lecuŋte nzhɛ́ anu zīi, mɛ́ é shúŋ, pɔ́ kó á mba, ńzɛ́tte melō pɔ́p. Á té mbɔŋ ŋ́gɛ, menzwí a etswí ashuŋne á nnɔ alúŋ epuɔ Yɛɛ́so ó.

³⁶ Pɛ é si ncuŋtɛ nzhɛ́ɛ páʼ, ashuŋne Ndém á lɛ te zī á alāʼ pɛ ɛ́. Pɛ é si nzéŋɛ nzhɛ́ɛ páʼ, pɛ méŋwɛ̄t ndaʼ mé lɛ te lɛ̄ njúʼ ashuŋne mɛt ɛ́.

³⁷ Ŋiŋ a gɔ́ɔ á nnɔ pɛ, ńnɔŋ nzhɛ́ɛ á légɛ, yí é si ŋgɔ́ á ntswi‑ŋke Ndém, kɛɛ ńnɔŋ ŋkwāŋa ŋ́gɛ, Azwakne Ndém á le yá á yí mmɔʼ mete lɛ̄ɛ, ŋgaŋ á lɛ nzhɛ́ á légɛ, anu zīi meŋ tíi á mbū pɛ, é si ŋgɔ́ lepé, éfhɔ́ɔ á mbū Atsyapuɔ.

³⁸ Ŋiŋ a gɔ te épúp zhɛ́, ŋgaŋ á zhɛ́ á légɛ, Ndém a te ezhɛ́ á yí azí í.

³⁹ Púp me epɔ̄ memía, pɛ esé á wɛ́ á legɔ̄ wɔ tswii‑ŋke yīi, é fhɔ́ɔ á mbū Ndém. Ndɛ́ʼ pɛ pīiŋ mvɛ́ne á ŋiŋ, á leshūŋne elāʼ tsīi, a la zíʼnɛ ɛ́.

⁴⁰ Ńdaʼ ŋ́gɛ, akʉ̄ɛ akʉ̄ɛ a eké nzīŋ áa páʼ, a pɔŋteé á leziŋ épúp, té tákátáká.