1 Kɔlɛŋte 13 - Eka Eswhī

Anu ánɛ ŋkɔŋne

¹ Meŋ ŋgwíʼe nnɔ̄ŋ eshúŋnɛ elāʼ ntsem tsīi, epuɔ menɔŋ é shúŋnɛ, mbɔɔ etsi mecɔʼ Ndém é shúŋnɛ, ḿbiŋ te ŋkɔŋne á ntē meŋ wɛ̄ɛ, mbɔ meŋ á si mbáknɛ áa ejʉʼ, páʼ nzem azō zīi ŋiŋ a pfeŋtɛ ká atɔ̄ zīi, ŋiŋ a púʼtɛ lā.

² Meŋ zi nnɔ̄ŋ ntswīi ŋke yīi, Ndém mé tswi, ńnɔŋ nzhɛ́ɛ á gá á leghʉ ajūɔ tsem, ńnɔŋ nzhɛ́ɛ ajūɔ tsem zīi, Ndém a le lʉ̄ɔ̄, ńzī efɛ́ nnɛ̄t ŋgyá á mbū Ndém tɛ ntsékne, tɛ ŋgɔ́ yīi meŋ gɔ elé á mbū lekwɛ̄t ŋ́gɛ, e efhó ega ntsɔ́ʼɔ. Meŋ gɔ́ épúp, ḿbīŋ te ŋkɔŋne á ntē meŋ wɛɛ̄, mbɔ meŋ mbuú te azō ɔ́.

³ Meŋ nzi ŋgāp etsō tsá ntsem, ŋ́gyá á mbū wɔ te kuʼ ánɛ azō, ńzī mbú ŋ́gyá athū nnɛ̄t zá ŋ́gɛ, mɛ́ etɔ̄ á mmók melaʼ Ndém, ŋ́gē eghʉ épúp, ŋkɔŋne é gɔ́ te á ntē meŋ ɛ́, mbɔ amɔ̄ʼ apɛ zīi, meŋ gɔ ejhʉ́, á té éwú ú.

⁴ Ŋiŋ yīi a kɔɔ̄ŋ epuɔ, á kwɛɛ́t ntē yí efʉʼ metsem, ńtswíte epuɔ. A te sɛ́h ntē wɛ. A te ŋīa. A te nnɛ̄t ŋáʼte.

⁵ A te ghʉ̄ menu esē ɛ́. A te ghʉ̄ ajū mīi yíléyī mé jhʉ́ apɛ éwú ú. A te gákne nzáŋ á lɔ́ŋ ɔ́. A te tém lefā ŋiŋ ɛ́.

⁶ Ŋgɔŋ te pɔ̄ŋ ntií ŋiŋ jʉɔ mɛ́t, ánɛ menu ŋgɛ́tte ɛ́. A cʉ́ʼɛ épúp mbɔ, e eké mbiŋ mbɔ̄ŋ á yí, ánɛ menu mīi, é anuúnē.

⁷ Ŋiŋ yīi a kɔɔ̄ŋ epuɔ, a á si ŋgɔ́ alʉɔ‑melɔ́ʼ. Ŋ́gɔ́ efʉʼ metsem, ḿvéŋ ŋ́gɛ anu zīi, mɛ́ shúŋɔ á yí, á anuúnē. Ŋ́gɔ́ efʉʼ metsem, nzhɛ́ á légɛ ajūɔ tsem á tɔɔ́k áa mbɔŋɔ́. Ŋ́gwɛ̄ á asekɛ́‑ntē.

⁸ Ŋiŋ yīi a kɔɔ̄ŋ epuɔ, a te néŋ té wɛ ŋkɔŋne á ntē yí í. Afʉʼ a fú ekuʼe, letswi ŋke yīi, é fhɔ́ɔ á mbū Ndém a emī. Leshūŋ meshuŋne mbɔ mɛ́ la zíʼnɛ ɛ́ a emī. Epuɔ é le zéŋ anuúnē zīi ánɛ Ndém nzhɛ́ ɛ́.

⁹ A egɔ́ épúp, melaʼ mīi ajū mīi ḿpɛ é zhɛɛ́, á gɔ́ áa méŋ agáʼ lɛ. Ŋke yīi Ndém a tswii ŋ́gɛ ḿpɛ etswī, é gɔ́ áa méŋ agáʼ lɛ.

¹⁰ Táʼ, afʉʼ zīi, Ndém a a láʼ eghʉ ḿpɛ ezhɛ́ ajūɔ tsem, á e láʼ ekuʼe, ajū mīi á ŋgɔ́ áa méŋ agáʼ lɛ, a epú mmī.

¹¹ Meŋ nde zɛ́t á méŋ agáʼ mɔ́, ńnɔŋ eshúŋnɛ páʼ mɔ́ lā, ńnɔŋ ŋkwāŋa menu páʼ mɔ́ lā, leghi tsá é nɔŋ esáŋa menu áa páʼ mɔ́ lā. Meŋ ndē mbiŋ ntswhí tɛ ŋgɔ́ á ndʉɛ, meŋ te zéŋ ŋghʉ̄ menu páʼ méŋ agáʼ mɔ́ ɔ́.

¹² Ḿpɛ é tsetsɔŋɔ, ńnɔŋ njʉ́ɔ etsō, ńnɔŋ njʉ́ɔ azō, áa ntsane tsane, páʼ ḿpɛ jʉ́ɔ azō ánɛ nzwiŋ ajʉɔ́‑eshhʉ̄ lā. A ké eláʼ amɔ̄ʼ afʉʼ, ḿpɛ echʉ́ nnɛ̄t ntɛ̄ʼte azō, mé menēk mímpɛ. Á tsetsɔŋɔ páʼā, meŋ enɔ̄ɔŋ nzhɛ́ɛ áa méŋ agáʼ azō lɛ, ánɛ ajūɔ tsem. A ké eláʼ afʉʼ mɛ́t, meŋ mbú nzhɛ́ ajūɔ tsem tɛ ntsékne, ndeŋ ndeŋ páʼ, Ndém a zhɛɛ́ á gá tɛ ntsékne.

¹³ Á shʉʉ̄ʼ ánɛ ajūɔ tsem, etsō tsɛ́tɛ́t é gɔ́ éwú tsīi, é gɔ le láʼ mmī í: ŋ́gɔ́ ŋiŋ á lefɛ̄ nnɛ̄t ŋgyá á mbū Ndém. Ŋ́gɔ́ á lenēŋ ntē nzwíʼte ajū mīi, Ndém a le laʼnēē. Ŋ́gɔ́ á lekɔŋ epuɔ. Azi á ké mbiŋ mbú éfáŋ, á gɔ́ áa lekɔŋ epuɔ.