1 Kɔlɛŋte 12 - Eka Eswhī

Azwakne Ndém á keēm ephʉ, á lelɔk ŋghʉ̄ mefaʼ Ndém

¹ Epɔ̄ memía, ŋ́gɔ́ ánɛ páʼ Azwakne Ndém á yaá eyi nthū awíɛ awíɛ á lelɔk ŋghʉ̄ mefaʼ Ndém lā, mbɔ meŋ á si ŋkɔ̄ŋɔ ŋ́gɛ, pɛ ecuŋte nzhɛ́ á anuúnē zīi á éwú.

² Pɛ é si nzhɛ́ɛ páʼ, pɛ le zɛ́t te zhɛ́ á Yɛɛ́so Klísto, mɛ́ nɔŋ eshūŋnɛ á wɛ́ ndɔkɔ ŋgʉ̄ɔ mé ejʉʼ mesī, á piŋ nzī ŋgɔ́ yīi, mesī mɛ́t é gɔ́ le shúŋne.

³ Melaʼ épúp tɛ́, meŋ á si ŋkɔ̄ŋɔ ŋ́gɛ, pɛ ezhɛ́ á légɛ, Azwakne Ndém á gɔ́ le tshóne á ŋiŋ, á lé ŋ́gɛ: «Ndɔ e é athū Yɛɛ́so ó. » Pɛ ezéŋ nzhɛ́ á légɛ, ŋiŋ a gɔ le lé ŋ́gɛ: «Yɛɛ́so a á si ŋgɔ́ á Atsyapuɔ», tɛ́ gɔ́ yīi Azwakne Ndém mé tshóne á ŋgaŋ á.

⁴ Nthū á lelɔk ŋghʉ̄ mefaʼ Ndém, é ntií ntiī, taʼ Azwakne Ndém mé ké ŋgyá.

⁵ Mefaʼ Atsyapuɔ páʼ a tsekneé á mbū epuɔ, é gɔ́ ntií ntiī. Atsyapuɔ á ké ŋgɔ́ áa taʼ.

⁶ Memɛnzhɛ á lelɔk ŋghʉ̄ mefaʼ Ndém, é gɔ́ ntií ntiī. Táʼ, Ndém yīi a yáa awíɛ awíɛ mete á lelɔk ŋghʉ̄ mefaʼ mɛ́t ntsem, á ké ŋgɔ́ áa wɔ́mɔʼɔ́.

⁷ Ndém a tswiī á légɛ Azwakne zí ánɛ awíɛ awíɛ, á lelɔk ŋghʉ̄ ajū mīi a tswíte epuɔ metsem.

⁸ Azwakne Ndém, á yaá eyi nthū mmɔʼ ŋiŋ, á gɔ́ á yí á lelɔk eshúŋ anuúnē zīi, ánɛ Ndém. Ńzɛ́t áa Azwakne mɛ́t, ŋ́gyá eyi mmɔʼ ŋiŋ, é gɔ́ á yí á lelɔk nzhɛ́ metsō, éshúŋ.

⁹ Ŋ́gyá eyi mmɔʼ ŋiŋ, é gɔ́ á yí á letswhi efɛ́ nnɛ̄t ŋgyá á mbū Yɛɛ́so. Ńzɛ́t áa Azwakne mɛ́t, ŋ́gyá eyi nthū mmɔʼ ŋiŋ, é gɔ́ á yí á lezhɛ̄ á letɛ epuɔ.

¹⁰ Ŋ́kó ŋgyá eyi mmɔʼ ŋiŋ, é gɔ́ á yí á leghʉ meŋkʉʼne menu. Eyi nthū mmɔʼ ŋiŋ, é gɔ́ á yí á letswi ŋke yīi, é fhɔ́ɔ á mbū Ndém. Eyi mmɔʼ ŋiŋ, é gɔ́ á yí á lezhɛ̄ ajū mīi, á fhɔ́ɔ á mbū Azwakne Ndém, ńzhɛ́ azi á fhɔ́ɔ á mbū mesī. Eyi mmɔʼ ŋiŋ é kó ŋgɔ́ á yí, á leshūŋne elāʼ tsīi a laá nzíʼnɛ ɛ́. Ŋ́gyá eyi nthū mmɔʼ ŋiŋ, é gɔ́ á yí á lekɛ̄ʼte eshúŋ ajū mīi, ashuŋne mɛ́t á lɔkɔ ndʉ́ɛ́.

¹¹ Menu muɔ mɛ́t ntsem, ndaʼ taʼ Azwakne mé yaá á awíɛ awíɛ mete, á lelɔk ŋghʉ̄. A yaá á mbū awíɛ awíɛ, nthū yīi, yí kɔŋ.

Mbe nnɛ̄t e gɔ́ áa taʼ, ŋ́ké ŋgwɛ̄ ekim, é záne

¹² Ḿpɛ enáʼ mbɛ́ á taʼ efʉʼ. Mbe nnɛ̄t ŋiŋ e gɔ́ áa taʼ, ŋ́ké mbiŋ ŋgwɛ̄ ekim tɛ é záne. Mejʉʼ nnɛ̄t é piŋ nzá lɛ akɔ̄ lɛ́ páʼā, ńtsóʼne áa ánɛ taʼ mbe nnɛ̄t. Á zeéŋ ŋgɔ́ ndeŋ ndeŋ épúp, ánɛ Klísto.

¹³ Ńdɔkɔ ŋ́gɛ, mɛ́ le nōʼ á yímpɛ metsem á ntshi páʼā, mete ndaʼ Azwakne Ndém, é ghʉ, ḿpɛ púu ncʉ́ʼ á taʼ mbe nnɛ̄t. Tɛ o láʼa ké gɔ́ á ŋiŋ Yúda kɛ́ á ŋiŋ yīi, a te ŋiŋ Yúda á. Tɛ o láʼa ké gɔ́ ŋkwa, kɛɛ́ á ŋiŋ yīi, a naáŋ á ŋga athū yí lɛ́ɛ, mbɔ taʼ Azwakne mé le kó ánɛ pímpɛ.

¹⁴ Mbe nnɛ̄t e te wɛ̄ á taʼ ajʉʼ nnɛ̄t ndáʼ á, e wɛɛ̄ mejʉʼ nnɛ̄t tɛ é záne.

¹⁵ Akhu ŋiŋ á lʉ́ɛ́ ŋ́gɛ: «Páʼ meŋ te apū lā, meŋ te ajʉʼ mbe nnɛ̄t ɛ́. » Mbɔ a a lé tɛ gaá lɛ́, é ké ezɛ́t áa ajʉʼ nnɛ̄t.

¹⁶ Letuúŋ ŋiŋ é lʉ́ɛ́ ŋ́gɛ: «Páʼ meŋ te lezēk ɛ́ lā, meŋ te ajʉʼ mbe nnɛ̄t ɛ́. » Mbɔ e lé tɛ gaá lɛ́, éké ezɛ́t áa ajʉʼ nnɛ̄t.

¹⁷ Mbe nnɛ̄t ŋiŋ ntsem ntsem e le wíʼe ndɛ̄ ŋgɔ́ áa lezēk, mbɔ a lɔɔ̄k akɔ̄ njúʼ ejʉʼ ē? E le wíʼe ndɛ̄ ŋgɔ́ áa letuúŋ, mbɔ a lɔɔ̄k akɔ̄ njúʼ azík azō ō?

¹⁸ Ndém a le ké ndɛt aziɛ́ ajʉʼ nnɛ̄t, ánɛ mbe nnɛ̄t lɛ́, ánɛ páʼ a á kɔŋ.

¹⁹ Ndém a le wíʼe, ńdɛ ŋghʉ̄ áa taʼ ajʉʼ nnɛ̄t ŋiŋ, mbɔ e é páʼā, ńdɔkɔ te ŋgɔ́ mbe nnɛ̄t ɛ́.

²⁰ Mejʉʼ nnɛ̄t é tɛ nzá páʼā, ŋ́ké ŋgɔ́ áa taʼ mbe nnɛ̄t.

²¹ Melaʼ épúp tɛ́, lezēk é gɔ le lé á mbū apū ŋ́gɛ: «O gɔ le tswíte á gá á leghʉ amɔ̄ʼ azō ɔ̄. » Athū á le lé á mbū mekhu ŋ́gɛ: «O gɔ le tswíte á gá á leghʉ amɔ̄ʼ azō ɔ́. »

²² Tɛ mbɔɔ épúp lɛ́, mejʉʼ nnɛ̄t mīi mɛ́ kwaāŋ ŋ́gɛ é té etsō ɔ́, etsiɛ́ mɛ́t, é tswiteé azɔ́p tswíte.

²³ Mejʉʼ nnɛ̄t mīi, ḿpɛ kwaāŋ ŋ́gɛ, é té á nte afaʼ ghʉ̄ʉ, ḿpɛ chʉʉ́ nnɛ̄t ntúŋne etsiɛ́ ntɔ́k emɔ̄ʼ. Mejʉʼ nnɛ̄t mīi, ḿpɛ te gákne ntɔ́ŋ nzēŋ mɔ́p ɔ́, ḿpɛ chʉ́ nnɛ̄t ntúŋne etsiɛ́.

²⁴ Mejʉʼ nnɛ̄t mīi, é té ejʉʼ esē ɛ́, mɛ́ té tswhi ntúŋne á wɔ́p ɔ́. Ndém a le ké ŋghʉ mejʉʼ nnɛ̄t, ánɛ ntií zīi, epuɔ menɔŋ é pɔɔ́ŋ á lewuʼte mejʉʼ nnɛ̄t mīi, mɛ́ té lɔk ntɔ́ŋ azō ɔ́.

²⁵ A lɛɛ́ ŋghʉɛ épúp páʼā, ŋ́gɛ, ndɛ́ʼ tákátáká á gɔ́ ánɛ mbe nnɛ̄t. Á gɔ́ áa lɛ, mejʉʼ nnɛ̄t e etɔ́te mennɛ̄t mɔ́p nzeŋne zeŋné.

²⁶ Taʼ ajʉʼ nnɛ̄t a nɔŋ njʉ́ɔ ŋgʉɔ̄ʼ, emɔ̄ʼ mejʉʼ nnɛ̄t ntsem é pú njʉ́ɔ azɔ́p ŋgʉɔ̄ʼ. Mɛ́ nɔŋ ŋgyáa mekuʼ ánɛ taʼ ajʉʼ nnɛ̄t, emɔ̄ʼ mejʉʼ nnɛ̄t ntsem é kák azɔ́p, páʼ aziɛ́ ajʉʼ mɛ́t lā.

²⁷ Pɛ ké mbiŋ ŋgɔ́ páʼā, ŋ́gɔ́ mbe nnɛ̄t Klísto. Awíɛ awíɛ á gɔ́ ajʉʼ nnɛ̄t zí.

²⁸ Ndém a le tshí awíɛ awíɛ ánɛ alúŋ epuɔ Yɛɛ́so lɛ́, ánɛ etsí letshiɛ́. A le gē ezi, ńtshí meziŋ‑ntō ánɛ etsɔ́p letshiɛ́. Ḿbáte, ńtshí metswi‑ŋke Yɛɛ́so ánɛ etsɔ́p letshiɛ́. Ḿbáte, ńtshí epuɔ pīi azɔ́p afaʼ á lezīʼne epuɔ anu zí Ndém, ánɛ etsɔ́p letshiɛ́. Ŋ́gɔ́ á mbū emɔ̄ʼ epuɔ, ŋ́gyá ewɔ́p nthū, é gɔ́ á leghʉ meŋkʉʼne menu. Eyi emɔ̄ʼ epuɔ, é gɔ́ á letɛ megɔ. Eyi emɔ̄ʼ epuɔ é gɔ́ á letswīte emɔ̄ʼ. Eyi emɔ̄ʼ epuɔ, é gɔ́ á letsaŋ emɔ̄ʼ. Eyi emɔ̄ʼ epuɔ, é gɔ́ á leshūŋne elāʼ tsīi, pɔ́ la zíʼnɛ ɛ́.

²⁹ Epuɔ metsem é té meziŋ‑ntō ɔ́. Epuɔ metsem é té metswi‑ŋke Yɛɛ́so ó. Epuɔ metsem mé té ziʼné epuɔ anu Ndém ɛ́. Epuɔ metsem mé té wɛ̄ meshhʉ̄ á lelɔk ŋghʉ̄ meŋkʉʼne menu ú.

³⁰ Epuɔ metsem mé té wɛ̄ nthū á lelɔk ntɛ̄ epuɔ ɔ́. Epuɔ metsem é gɔ le shúŋne elāʼ tsīi, mɛ́ la á wɔ́p zíʼnɛ ɛ́. Epuɔ metsem é gɔ le kɛ́ʼte eshúŋ epuɔ menu mīi, ashuŋne mɛ́t á lɔkɔ ndʉ́ɛ́ ɛ́.

³¹ Púp, pɛ esé ŋ́gɛ, Azwakne Ndém á eyá wɛ́ nthū, á leghʉ memía metsō. Tsetsɔŋɔ, meŋ gɔ á ntswīi pɛ á mbɔŋ mɛnzhɛ yīi, a puú ntshí mvhɔ, ánɛ epi emɔ̄ʼ ntsem.