1 Kɔlɛŋte 11 - Eka Eswhī

¹ Pɛ ezīŋ ánɛ mekhu má, ndeŋ ndeŋ páʼ meŋ á si nzīŋɛ ánɛ mekhu Klísto lā.

Mɛt yīi á si nzɛ́ttɛ ŋ́gɛ, epuɔ Yɛɛ́so e ewɛ̄

² Meŋ á si ŋkɔ̄ŋtɛ á wɛ́, melaʼ mīi, pɛ́ é si ŋkímtɛ á gá ánɛ ajūɔ tsem. Mbɔɔ páʼ pɛ é si ŋghʉ̄ɛ ajūɔ tsem ndeŋ ndeŋ, páʼ meŋ nde ziʼné á wɛ́ épúp.

³ Táʼ, meŋ á si ŋkɔ̄ŋɔ ŋ́gɛ, pɛ ezhɛ́ á légɛ, Klísto a tshií á athū mvhɔ ánɛ ŋiŋ mbaŋa. Ŋiŋ mbaŋa á tshí á athū mvhɔ ánɛ menzwí, Ndém á kó ntshí á athū mvhɔ ánɛ Klísto.

⁴ Ŋiŋ mbaŋa a nɔŋ eswíŋtɛ á Ndém, kɛɛ́ nnɔ̄ŋ ntswīi ŋke yīi, é fhɔ́ɔ á mbū Ndém lɛ́ɛ, á tsɔ́ʼ acɔʼ á athū yí, tɛ ŋgɔ́ te épúp ghʉ, á zhɛ́ légɛ, a á si ŋgwáka á Klísto, á ŋiŋ yīi, a tshií á athū mvhɔ ánɛ yí.

⁵ Ŋ́gɔ́ mé menzwí, mbɔ a nɔŋɔ eswíŋtɛ á Ndém, kɛɛ́ nnɔ̄ŋ ntswīi ŋke yīi, é fhɔ́ɔ á mbū Ndém lɛ́ɛ, á kwɛ́t athū zí. Tɛ ŋgɔ́ te épúp ghʉ, á zhɛ́ á légɛ, a á si ŋgwáka á ndō yí, á ŋiŋ yīi a tshií á athū mvhɔ ánɛ yí. Mbɔ mɛ́ e cʉ́ʼɛ ejʉ́ɔ á yí áa páʼ, menzwí yīi, mɛ́ njhū á athū zí lā.

⁶ Menzwí a gɔ́ éyi a te ekwɛ́t á athū zí í, á kɔ́. A piŋɛ ŋgɔ́ éyi, a záʼa ntsɔʼ zi, kɛɛ́ njhū athū zí lɛ́ɛ, é gɔ́ esē á mbū yí, á lɛ ŋkwɛ́t á athū zí.

⁷ Ŋ́gɔ́ mé ŋiŋ mbaŋa, mbɔ a te pɔŋté á lege eswíŋte á Ndém, ńtɔ̄ʼ azō á athū yí í, melaʼ mīi Ndém a le pɔ́ á yí ŋ́gɛ, a eswhí á yí, mɛ́ ezápa ánɛ yí, ŋ́gyá mekuʼ mí Ndém. Ḿbiŋ ŋgɔ́ mé menzwí, mbɔ mɛ́ pɔŋteé á lejʉ̄ɔ á yí, ŋ́gyá mekuʼ ndō yi.

⁸ Pɛ zhɛɛ́ á légɛ, Ndém a lɛ te fók á ajʉʼ nnɛ̄t menzwí tɛ́ ndɔk mbɔ́ á ŋiŋ mbaŋa á, a le fók ajʉʼ nnɛ̄t ŋiŋ mbaŋa, tɛ́ ndɔk mbɔ́ á menzwí.

⁹ Pɛ zeéŋ nzhɛ́ á légɛ, Ndém a lɛɛ́ te mbɔ́ɔ á ŋiŋ mbaŋa melaʼ menzwí í. A le pīŋ mbɔ́ á menzwí melaʼ ŋiŋ mbaŋa.

¹⁰ Melaʼ páʼa tɛ́, menzwí a pɔŋteé á lekwɛ̄t athū zí, ńdɔk ntswī á légɛ, yí juúʼ á mbū ndō yi, ńzéŋ ndɔk ḿbɔ́k mecɔʼ Ndém á lezāŋ á lɔ́ŋ.

¹¹ Amɔ̄ʼ anu á zeéŋ ŋgɔ́ lɛ, á mbū Atsyapuɔ, menzwí a te gɔ́ té ŋiŋ mbaŋa á. Ŋiŋ mbaŋa á zéŋ te gɔ́ té menzwí í.

¹² Á épúp melaʼ mīi, Ndém a le lɔ̄k ajʉʼ nnɛ̄t ŋiŋ mbaŋa tɛ́ mbɔ́ á menzwí. Menzwí mé piīŋ nzhí á ŋiŋ mbaŋa, ntsem ntsem azō, é ké mbú efhó áa mbū Ndém.

¹³ Pɛ méŋwɛ̄t e enáʼ ŋkwaŋte njúʼ. Tɛ á péʼe, ŋ́gɔ́ mbɔŋ ŋ́gɛ, menzwí a eshʉʼ ntshí á mvhɔ epuɔ, éswíŋte á Ndém, té athū zí ŋgɔ́ ŋkwɛ́t kwɛ́t e?

¹⁴ Pɛ méŋwɛ̄t e ecʉ njʉ́ɔ páʼ, ŋgɔŋ e ziīŋ épúp, pɛ ka jʉ́ɔ ŋ́gɛ, é esē tɛʼ á mbū ŋiŋ mbaŋa, á letshi ntsɔʼ zi néŋ, é sak tɛʼ tɛʼ ɛ́ lɛ̄?

¹⁵ Ŋ́ké mbiŋ ŋgɔ́ á mbū menzwí, ŋ́gɔ́ ajūɔ mekuʼ, melaʼ mīi, Ndém a le yá á yí á sisia ntsɔʼ, ŋ́gɛ a elɔk ŋkápte athū zí.

¹⁶ A piŋɛ ŋgɔ́ éyi, ŋiŋ a piŋne anu jʉɔ mɛ́t, ŋgaŋ á zhɛ́ á légɛ, ḿpɛ te wɛ̄ emɔ̄ʼ ntií ndɛʼɛ, á lelɔk nnáŋ á. Emɔ̄ʼ melúŋ epɔ̄ Ndém é zéŋ te wɛ̄ azɔ́p mmɔʼ ntií ndɛʼɛ ɛ́.

Páʼ ḿpɛ gɔ epfɛ́t etsō lejhʉ̄ Atsyapuɔ épúp

¹⁷ Ajɔ̄ á tɔ́k páʼā. Anu zīi meŋ gɔ á eshúŋɔ tsetsɔŋɔ, meŋ te ndɔ̄kɔ ŋgɔ̄ á ŋkɔŋté pɛ ɛ́. Á efʉʼ metsem yīi, pɛ é cúʼte, ŋ́gɔ̄ á ŋguʼteē Ndém, menu mīi pɛ fʉʼtɛ, é té tswíte á wɛ́ á legʉɔ me mvhɔ ɔ́, é ghʉʉ̄ pɛ pīiŋ áa mé nzem.

¹⁸ Mvhɔ anu zīi, meŋ gɔ á eshúŋɔ e ejʉɔ. Mɛ́ ke shúŋ á gá ŋ́gɛ, efʉʼ metsem yīi pɛ é cúʼte, ŋ́gɔ̄ á ŋguʼté Ndém, pɛ fākte menɔ menɔ. Meŋ á kwaŋ ŋ́gɛ, á gɔ́ mmɔʼ mbɔ á anuúnē.

¹⁹ Á mbɔŋ ŋ́gɛ, pɛ ezi efākte menɔ menɔ, púp, mɛ́ elɔk nchʉ́ nnɛ̄t njʉ́ɔ epuɔ pīi, pɔ́ té kɔ̄ŋ á wɔ́p á lefakte menɔ menɔ ɔ́.

²⁰ Afʉʼ zīi pɛ é cúʼte ŋgɔ́ á taʼ nchu, pɛ te ncúʼtɛ páʼā, ŋ́gɔ̄ á mpfɛ́t etsō lejhʉ̄ Atsyapuɔ ɔ́.

²¹ Pɛ cúʼtɛ páʼā, awíɛ awíɛ á lɛ ŋgáknɛ ŋgɔ̄ áa mpfɛ́t ecū mīi, a á ŋgwɛ̄. Púp páʼā, emɔ̄ʼ epuɔ é ge ekwhʉ́te nzi, mbɔ emɔ̄ʼ epuɔ é mpfɛ́t, ńnú tɛ mbíate.

²² Meŋ á kwaŋ ŋ́gɛ, memba mɛ́ é éwú mīi, pɛ gɔ enáŋte éwú mpfɛ́t, ńzéŋ nnú. Ndɛ́ʼ pɛ ezéŋ alúŋ epɔ̄ Ndém ntsēŋte. Ndɛ́ʼ pɛ ezéŋ nnéŋ esē á athū wɔ te kuʼ ánɛ azō. Meŋ á páʼa ezéŋ elé mé pɛ gɛ akɔ̄? Pɛ é kwaŋ ŋ́gɛ, meŋ gɔ ekɔ̄ŋte á wɛ́ ánɛ jʉɔ ntií lenāŋ mɛ́t lɛ́? Ŋgáŋ, meŋ gɔ le á wɛ́ kɔŋte.

²³ Menu mīi meŋ nde ziʼné á wɛ́, é si ŋgɔ́ menu mīi Atsyapuɔ mé le ziʼné á gá. Meŋ nde ziʼné ndé ŋ́gɛ, á lɛ etsōʼ yīi, mɛ́ le nɔ̄ŋ ŋgɔ á eswiīŋ Atsyapuɔ Yɛɛ́so, á pɛ́ mblɛ,

²⁴ ésyákne á Ndém éwú, ḿbwɔ́ʼte, ńdé ŋ́gɛ: «Ejʉɔ e é si ŋgɔ́ mbe nnɛ̄t za zīi, meŋ ŋgyáa á mbū pɛ. Pɛ ecʉ́ʼɛ nnáŋa ŋghʉ̄ɛ páʼa, ńdɔkɔ ŋkímtɛ á gá. »

²⁵ Pɔ́ pfɛ́t tɛ é mi, á kʉɛ ndɔ̄ŋ meluʼ, ńzéŋ ndé ŋ́gɛ: «Emuɔ é si ŋgɔ́ metshi má mīi, Ndém a lɔkɔ ŋkʉɔ́ʼɔ eka eswhī. Efʉʼ metsem yīi, pɛ gɔ á nnú meluʼ muɔ mɛ́t, pɛ eghʉ̄ʉ páʼ meŋ á ghʉ épúp lā, ńnáŋa ndɔkɔ ŋkímtɛ á gá. »

²⁶ Á páʼā ndɔkɔ ndʉ́ɛ́ ŋ́gɛ, efʉʼ metsem yīi, pɛ é pfɛ́t mblɛ ánɛ ejʉɔ ntií, ńzéŋ nnú meluʼ, pɛ elɔ̄kɔ ntswīi á mbū epuɔ ŋ́gɛ, Atsyapuɔ á le kwhʉ́, ńdɔk nzó á athū zímpɛ. Éláʼ eghʉ épúp elɔk etswii, tɛ a eláʼ mbīŋ nzem.

²⁷ Páʼ á ké ŋgɔ́ páʼa lā, ŋiŋ a ge epfɛ́t mbe nnɛ̄t Atsyapuɔ, ézéŋ enú metshi mí, a te lɔ̄k ntií mbɔŋ ɔ́, mbɔ a á fa, melaʼ mīi, a á wák mbe nnɛ̄t pɔ́ metshi Atsyapuɔ.

²⁸ Púp, awíɛ awíɛ a etsāʼ ntē yí, tɛ njʉ́ɔ mefa é le éwú ú, tɛ́ a epfɛ́t mbe nnɛ̄t Atsyapuɔ, ńzéŋ nnú metshi mí.

²⁹ Ŋiŋ á ge epfɛ́t mblɛ Atsyapuɔ mɛ́t, ézéŋ enú meluʼ mí, a te wūʼte páʼ mbe nnɛ̄t pɔ́ metshi Yɛɛ́so lā á, mbɔ ŋgaŋ a lɔkɔ ŋkʉ̄ɛ ndɔ Ndém nnéŋɛ ánɛ yí méŋwɛ̄t.

³⁰ Á melaʼ épúp tɛ́, megaŋ agɔ mbɔɔ melɔʼ é nnɔ pɛ nzáne. Á zeéŋ ŋgɔ́ melaʼ épúp tɛ́, emɔ̄ʼ epuɔ pɛ́ é lē ŋkwhʉ́te.

³¹ Ḿpɛ ge ezi, ńtsāʼ ntē yímpɛ tɛ́ mpfɛ́t, mbɔ Ndém a te etswá á yímpɛ ŋgʉɔ athʉ́ lepé ɛ́.

³² Atsyapuɔ Ndém a tswaá á yímpɛ ŋgʉɔ athʉ́ lepé páʼā, ńdɔkɔ nzíʼnɛ á yímpɛ azō. Ńdɔkɔ eshúŋɔ á yímpɛ ŋ́gɛ, aleʼé zīi a ŋaka epuɔ menɔŋ, a á le púte á yímpɛ a epuɔ ŋgɔŋ puɔ, ńtswá á.

³³ Púp me epɔ̄ memía pá, pɛ cúʼtɛ nnɔŋ ŋgɔ̄ á mpfɛ́t etsō lejhʉ̄ Atsyapuɔ, pɛ ezwíʼte emɔ̄ʼ epɔ̄ memía pɛ́.

³⁴ Nzi é nɔŋ nzáŋa á ŋiŋ, á té njhʉ̄ mpfɛ́t azō á mba yí, ḿbɔ́k á wɛ́ á lecūʼte, ŋiŋ á kʉɛ ndɔ Ndém. Ŋ́gɔ́ ánɛ emɔ̄ʼ menu ndɛʼɛ, mbɔ meŋ a láʼ eshʉʼ tɛ ekó á alāʼ pɛ, tɛ́ ecʉte.