1 Kɔlɛŋte 10 - Eka Eswhī

Epuɔ menɔŋ e epá á lewuʼte mesī

¹ Epɔ̄ memía, meŋ á si ŋkɔ̄ŋɔ ŋ́gɛ, pɛ ezéŋ nnáʼ ŋ́kímte anu zīi, á le ghʉ̄ wɔ maŋgānjʉʼ pímpɛ, ŋguʼ Mɔɔ́sɛ. Ndém a le lɔ̄k alɔ ŋkápte á wɔ́p, ŋ́ghʉ̄ pɔ́ metsem é ge etó á mía paŋ ntshi, ńzīŋ á esī ntshi.

² Á si ndɔk ŋgɔ́ páʼ, Ndém a le nōʼ á wɔ́p metsem á ntē ntshi, mbɔɔ á ntē alɔ ŋ́gɛ, pɔ́ a wɔ Mɔɔ́sɛ e epúte ncʉ́ʼ á taʼ lā.

³ Pɔ́ metsem é le puú mpfɛ́t á taʼ ntií etsō, etsō mɛ́t é fhó á mbū Ndém.

⁴ Ńzéŋ nnú ntshi yīi é fhoó á mbū Ndém. Ntshi mɛ́t é le nɔ̄ŋ ntúɔ́ ánɛ mmɔʼ mía tɔ́. Mía tɔ́ mɛ́t yīi, Ndém a le yá me pɔ́p, á gɔ́ á Klísto páʼ pɔ́ a pɔ́p é lɛ nnɔ.

⁵ Tɛ mbɔɔ páʼ pɔ́ le puú njʉ́ɔ menu muɔ mɛ́t lā, lelʉɛ epuɔ á nnɔ pɔ́p, a lɛ te náŋ páʼ Ndém a á si ŋkɔ̄ŋɔ ɔ́. Melaʼ épúp tɛ́ pɔ́ le kwhʉtéē, epfhō tsɔ́p é pú esɛ́tte á késáatswɛt.

⁶ Anu zīi á le ghʉ̄ wɔ maŋgānjʉʼ pímpɛ lā, á páʼā ndɔkɔ nzíʼnɛ á yímpɛ ŋ́gɛ, ndɛ́ʼ ḿpɛ enáŋa ŋgwīɛ̄ akwaŋte á leghʉ anu tepɔŋ, páʼ pɔ́ le wɛ̄ épúp lā.

⁷ Ndɛ́ʼ pɛ ewūʼte melém, páʼ emɔ̄ʼ epuɔ á nnɔ pɔ́p, é lɛɛ́ ŋghʉɛ épúp. Mɛ́ le tí á ntē aŋwaʼne Ndém ŋ́gɛ: «Alāʼ á le naŋté á esī mpfɛ́t azō, ńzéŋ nnú, mbiŋ ndū á esī, ńzéŋ á mvhɔ melém. »

⁸ Emɔ̄ʼ epuɔ á nnɔ pɔ́p é le nɔ̄ŋ ŋghʉ̄ɛ agā, Ndém á shʉʼ ntshí á taʼ aleʼé, ńzwhí á ŋiŋnɔŋ ntsāʼ ntsɔp tɛ́t megēm mbīa melaʼ épúp. Ndɛ́ʼ ḿpɛ efʉ̄ʼne á wɔ́p.

⁹ Emɔ̄ʼ epuɔ á nnɔ pɔ́p é le taté á Atsyapuɔ Ndém, ŋ́gɔ̄ á njʉ́ɔ páʼ a a ghʉ épúp. Ndém á tó menū é tsókte á wɔ́p, pɔ́ kwhʉ́te. Ndɛ́ʼ ḿpɛ etáte á Atsyapuɔ Ndém.

¹⁰ Emɔ̄ʼ epuɔ á nnɔ pɔ́p, é le zwɛtté á mbū Atsyapuɔ Ndém. Ŋ́ghʉ̄ épúp, cɔʼ Ndém yīi a gɛ nzwhítɛ epuɔ, á shʉʼ nzwhíte á wɔ́p. Ndɛ́ʼ pɛ ezwɛ́tte, á mbū Atsyapuɔ Ndém.

¹¹ Menu muɔ mɛ́t é le ghʉ̄ wɔ maŋgānjʉʼ pímpɛ páʼā, Ndém á lɔkɔ ntswɛ̄tɛ epuɔ. Mɛ́ le pīŋ ntí á ntē aŋwaʼne Ndém páʼā, ńdɔkɔ nzéŋɛ ntswɛ̄tɛ á yímpɛ, á yímpɛ pīi, ḿpɛ naáŋ ánɛ afʉʼ zīi, ŋgɔŋ e cʉ́ʼɛ ŋgʉɔ áa mé mmiī.

¹² Púp, ŋiŋ yīi a á si ŋkwāŋa ŋ́gɛ, yí teteē ánɛ mɛnzhɛ Ndém, ŋgaŋ a epá á yí á lewhʉ á esī á afʉʼ zīi, ŋgʉɔ̄ʼ e é shʉʼ.

¹³ Metáté pīi é shʉʼɛ á mbū pɛ, é si ŋgɔ́ emi, é shʉʼɛ á mbū ŋiŋ ntsem. Ndém a leé anu, á láʼ ŋgɔ́ épúp. A gɔ le véŋ ŋ́gɛ, azō a etáte á wú, tɛ ntɔ́k mete mú ú. Metáté é zi eshʉ̄ʼ á mbū pɛ, mbɔɔ Ndém a a yá á wɛ́ meshhʉ̄, á lelɔk efhó éwú ntó, ézéŋ eyá á wɛ́ mete á lelɔk ŋkwɛ́t ntē.

¹⁴ Mepɔŋ mesoó pá, páʼ á ké mbiŋ ŋ́gɔ́ páʼa lā, pɛ epíʼte á lezēŋ ŋgúa melém ŋgwáʼ.

¹⁵ Meŋ shúŋnɛ á mbū pɛ páʼa, éshúŋnɛ á mbū epuɔ pīi, akwaŋte zɔ́p á éwú. Pɛ méŋwɛ̄t e efaʼ njʉ́ɔ, kɛ anu zīi meŋ shúŋɔ, á anuúnē lɛ́ɛ.

¹⁶ Ḿpɛ puteé ŋgɔ̄ á mpfɛ́t etsō lejhʉ̄ Atsyapuɔ, afʉʼ zīi ḿpɛ kʉɛ ndɔ̄ŋ meluʼ nnúu, ńdɔkɔ ŋgūʼtɛ á Ndém lā, á té páʼā metshi Yɛɛ́so Klísto, é lɔkɔ ŋghʉ̄ɛ, ḿpɛ a pɔ́p é pútɛ ncʉ́ʼɛ á taʼ á lɛ̄? Afʉʼ zīi ḿpɛ pwɔ́ʼtɛ mblɛ mpfɛ́tɛ lā, á té páʼā ḿpɛ a Klísto é lɔkɔ ncʉ́ʼɛ á taʼ á lɛ̄?

¹⁷ Mblɛ e gɔ́ áa taʼ, ḿpɛ metsem é piŋ mbúte ḿpfɛ́t ndaʼ mblɛ mɛ́t. Púp, á lɔkɔ ntswīi á légɛ, ḿpɛ é pú mbúte ŋ́gɔ́ á taʼ.

¹⁸ Pɛ enáʼ ncʉ̄te epuɔ Islaɛl njʉ́ɔ, pɔ́ gɛ nzwhítɛ mena, ńdɔkɔ nnɔ̄ŋɔ epɔʼ á mbū Ndém. Epuɔ pīi pɔ́ é pfɛ́t mbap jʉɔ mɛ́t, á páʼā pɔ́ a Ndém é lɔkɔ te ŋgɔ́ɔ nnɔ ɔ́ lɛ́?

¹⁹ Meŋ á páʼā, ńdɔkɔ ndʉ́ɛ́ ŋ́gɛ akɔ̄? Mesī pɔ́ mbap zīi, mɛ́ lɔk ŋgwáʼ njʉʼ á mbū pɔ́p é azō lɛ́?

²⁰ Ŋgáŋ, meŋ á páʼā ndɔkɔ ndʉ́ɛ́ ŋ́gɛ, wɔ te zhɛ́‑kwaʼ Ndém é waáʼ njʉʼ páʼā, ŋ́gwáʼ áa mbū mecɔʼ Sɛ́ta, pɔ́ té ŋgyáa á mbū Ndém ɛ́. Meŋ mbīŋ nnɔ̄ŋ te ŋkɔ̄ŋɔ ŋ́gɛ, pɛ a mecɔʼ Sɛ́ta e egɔ́ nnɔ ɔ́.

²¹ Pɛ gɔ le nú á ntē ndɔ̄ŋ Atsyapuɔ, ḿbiŋ nzéŋ ńnú á ntē ndɔ̄ŋ mecɔʼ Sɛ́ta á. Pɛ gɔ́ le pfɛ́t ánɛ tɛ́blɛ Atsyapuɔ, mbiŋ nzéŋ ḿpfɛ́t ánɛ tɛ́blɛ mecɔʼ Sɛ́ta á.

²² Ndɛ́ʼ ḿpɛ ghʉ̄ʉ épúp, ḿbɔ́k Atsyapuɔ á lezāŋ á lɔ́ŋ á mbū pímpɛ. Pɛ é kwaŋ ŋ́gɛ, ḿpɛ teē ntɔ́k á yí lɛ́?

Ŋiŋ a egē eghʉ azō, ńdɔkɔ ŋgūʼtɛ áa Ndém

²³ Emɔ̄ʼ epuɔ á nnɔ pɛ, é leé ŋ́gɛ: «Mɛ́ gɔ eghʉ̄ʉ páʼ mɛ́ kɔŋ. » Pɛ eké njúʼ, ajūɔ tsem zīi pɔ́ ghʉɛ, á gɔ́ le wɔ́p tswíte. Á anuúnē «Mɛ́ gɔ eghʉ̄ʉ páʼ mɛ́ kɔŋ. » Táʼ, ajūɔ tsem zīi mɛ́ ghʉɛ, á gɔ le tswíte á lefɛ̄ nnɛ̄t ŋgyá á mbū Ndém ɛ́.

²⁴ Ndɛ́ʼ ŋiŋ á lɛ ŋghʉ̄ áa ajū mīi, á tswíte á yí yíléyī. Ŋiŋ a eghʉ̄ á ajū mīi, á gɔ etswíte emɔ̄ʼ epuɔ.

²⁵ Ajūɔ tsem zīi, mɛ́ swiŋɛ á esaá, o gɔ ezó ḿpfɛ́t, té zóko nzɛ́ttɛ kɛ o pfɛ́tɛ, mbɔ o ó ghʉ á mbɔŋɔ́ kɛ tepɔŋ lɛ́, ńdɔk nták ntē wú.

²⁶ Meŋ ndʉ́ɛ́ páʼa melaʼ mīi, ŋgɔŋ jʉɔ ntsem e puú ŋgɔ́ áa alá apū Atsyapuɔ Ndém, mbɔɔ ajūɔ tsem zīi, á puú ŋgɔ́ á ntē éwú.

²⁷ Te zhɛ́ á Yɛɛ́so, a tɔ́ŋɔ á wú á mba yí, ŋ́gɛ o eshʉʼ mpfɛ́t azō, o véŋ á wú á legʉɔ éwú. Kó éwú, ḿpfɛ́t ajūɔ tsem zīi, a á yá á mbū wu, té zóko efāʼa kɛ o pfɛ́tɛ, á gɔ́ éyi o ó ghʉ á mbɔŋɔ́ kɛ té pɔŋ lɛ́ɛ, ńdɔk nták ntē wú.

²⁸ O piŋɛ nnɔ̄ŋ mpfɛ́tɛ, ŋiŋ á shʉ̄ʼ ndé á mbū wu ŋ́gɛ: «Mbap zīi o pfɛ́tɛ lā, mɛ́ ndɔk ntsɔ́ʼ afɛʼ á mbū mesī. » Te ezéŋ mpfɛ́t, ḿbɔ́k á wú á letākte ntē ŋiŋ yīi, a á tswɛte á wú lā, á zóko nzɛ́ttɛ á ntē yí ŋ́gɛ, kɛ leghʉ épúp a á mbɔŋ, kɛ té pɔŋ lɛ̄ɛ?

²⁹ Meŋ ndʉ́ɛ́ á ŋiŋ yīi a á shʉʼ ntswɛ̄te á wú lā, á lezōko ŋkwāŋtɛ amɔ̄ʼ anu, meŋ te ndʉ́ɛ́ á wú ú, melaʼ mīi, ŋiŋ ndɛʼɛ mé té pɔŋté á leshʉʼ eshúŋ á gá ajū mīi meŋ gɔ epfɛ́t ɛ́.

³⁰ Ŋiŋ a te pɔŋté á lethū alɔ́ʼ zá, melaʼ páʼ meŋ á pfɛ́t azō ɔ́, ájū mīi meŋ á ge epfɛ́t, ésyákne á Ndém éwú ú.

³¹ O nɔŋ mbúu ŋghʉ̄ɛ tɛ mbɔɔ akɔ̄ lɛ́, kɛ o pfɛ́tɛ áa azō lɛ́, kɛ o núu azō lɛ́, o eghʉ̄ʉ ajū mīi epuɔ menɔŋ e jʉ́ɔ, éwuʼte á Ndém.

³² Pɛ enáŋ ánɛ ntií zīi, lenāŋ wɛ a gɔ le ghʉ̄, ŋiŋ á fa nzhɛ ɛ́. Tɛ a láʼa legɔ̄ á ŋiŋ Yúda, tɛ a láʼa legɔ̄ á ŋiŋ yīi a te ŋiŋ Yúda á, tɛ a láʼa legɔ̄ emɔ̄ʼ epuɔ Ndém.

³³ Pɛ eghʉ̄ páʼ meŋ lā, meŋ kaāk ete á légɛ, ajūɔ tsem zīi meŋ ghʉɛ, a etswíte epuɔ metsem. Meŋ te lɛ ŋghʉ̄ áa ajū mīi, á tswíte á gá meŋɛmeŋ ɛ́. Meŋ ghʉʉ̄ azi, á tswíte á atʉtʉ epuɔ, ńzhɛ́ páʼ Ndém a a ghʉ pɔ́ etswɛ́t.