Yuda 1 - Chiyawo Bible

¹ Cikalataci cikutyocela kwa une Yuda, jwakutumicila jwa Yesu* Klistu,* nambo soni mpwakwe jwa Yakobo.* Ngulemba cikalataci kwa jemanja ŵiŵamŵilasile Mlungu, ŵimkutama mcinonyelo ca Mlungu Atati ni mcitetelo ca Yesu Klistu.

² Mlungu aculuye canasa cakwe, mtendele ni cinonyelo cakwe kwa jemanja.

Ya aciŵalimu ŵa unami

³ Acalongo acimjangu ŵakunonyelwa, naliji jwakusosasosa kuti namlembele cikalata, kuti namsalile ya cikulupusyo cetuwe. Nambo mtima wangu, wanganganicisye kuti namlembele cikalata kumsalila kuti, mputeje ngondo ja cikulupi, ciŵacipelece Mlungu kampepe kwa ŵandu.

⁴ Ŵandu ŵangakulupilila Mlungu, soni ŵele ŵaŵaliji ŵakwenela kupocela cilango, ajinjile sikati jenu mwakulisisa. Jemanjaji akusasokonesya utenga wa umbone mtima wa Mlungu, ni kuwutendekasya kuwa ufulu wakutendela yakusakala. Jemanjaji akasiŵakanya Yesu Klistu, mlongola jwetu ni Ambuje ŵetu. Yakuti ŵanganyaŵa tacipocela cilango yalembedwe kalakala.

⁵ Sambano nguti namkumbusye yindu yine, atamose mwayimanyilile yosope kala. Ambuje ŵawukulupwisye mtundu wa Aisalaeli mcilambo ca Iguputo, nambo kaneko ŵajonasile wosope ŵangakulupilila.

⁶ Mkumbucile ya malayika* ganganigajikutila ni ulamusi wawo, ni kugaleka malo gaŵapele Mlungu. Mlungu ŵataŵile ni maunyolo gangamala, nipo ŵatamice malo ga cipi kwembecela lisiku lyekulungwa litacalamula Mlungu.

⁷ Mkumbucile soni ya misinda ja Sodomu ni Gomola, ni misinda jine jakuŵandikana najo. Ŵandu ŵa m'misinda jeleji soni, ŵagambaga kutenda cigwagwa, ni kutendaga soni yakunyalaya yakusisyana ni umi wambone wa mundu. Mlungu ŵaŵisile jemanjaji kuti aŵe cisyasyo pakwapa cilango ca moto wangamala.

⁸ Mpela muyaŵelele, ŵandu ŵeleŵa akutenda myoyopeyo. Pakuya sagamisi syawo, akusayijonanga yilu yawo, akusawukanya ulamusi wa Mlungu, nambo soni akusiŵatendela cipongwe ŵalumbili ŵakwinani.

⁹ Nambo atamose Mikaele* ŵene, ŵakulungwa ŵa malayika, piŵakanganaga ni Satana,* ni kusisyana najo pa ya mtembo wa Mose,* ŵalakwewo nganasosa kuŵeceta mwacipongwe kuti Satana ali jwakulemwa. Nambo ŵatite kuti, “Ambuje ampe cilango.”

¹⁰ Nambo ŵandu ŵeleŵa akatendela cipongwe yindu yangakuyipikanicisya. Nipo yindu yakusayimanyilila ni lunda lwa mundu, mpela musiŵelele nyama, yindu yeleyi ni yikusiyajonanga.

¹¹ Jemanjaji akwete likungu, ligongo ŵakuyisye litala lya Kaini. Mpela mujwatendele Balamu, nombe nawo ŵagwile soni mu ulemwa ligongo lyakusosa kupata mbiya. Ligongo lya kumjimucila Mlungu, ŵajonasile jemanjajo mpela muŵatendele ni Kola.

¹² Jemanjaji ni ŵele ŵakusasakasya yindimba yenu yacinonyelo. Akusalya namwe mwakutesya soni, ni kulikamucisya acimsyenepe. Ali mpela mawunde gakusajigalidwa ni mbungo, nambo gele gangayika ni ula. Ali mpela yitela yele yangasogola yisogosi atamose ndaŵi yajikwenela kusogola, yiyawile nditu, nipo ŵandu ŵayitupwile.

¹³ Jemanjaji ali mpela matumbela gaukali ga panyasa gagakusakoposya ciwulo ca yakusakala yawo. Ali mpela ndondwa syesokonecele, nipo Mlungu akwasunjila malo ga cipi cekulungwa ca ndaŵi syosope.

¹⁴ Enoki, jwa mpago wa msano ni jiŵili kutandila pa Adamu, ŵalocesye ya ŵandupe piŵatite kuti, “Mlole, Ambuje alimkwisa ni malayika gakwe, gele gangaŵa mkomboleka kugaŵalanga.

¹⁵ Akwisa kukwalamula ŵandu wosope. Ŵandu ŵangalumbana tapocele cilango ligongo lya yindu yakusatenda, soni ligongo lya maloŵe gosope gacabe gakusaŵeceta mwakwasisya Ambuje.”

¹⁶ Ŵandu ŵakwe naŵa: ŵakunyinyita, ŵakudandawula, ŵagamba kuya yakunyalaya ya lisosa lya mtima wawo. Akusaŵeceta mwakulilumba acimsyenepe soni akusiŵalumba ŵandu ŵane mwa unami ligongo lyakusosa kupata pindu.

Yakwatetela ni misyungu

¹⁷ Nambo acalongo acimjangu ŵakunonyelwa, mkumbucileje maloŵe gaŵaŵecete ŵandumetume ŵa Ambuje ŵetu Yesu Klistu kalakala.

¹⁸ Jemanjajo ŵatite kuti, “Pa masiku gambesi tikuciyika ŵandu ŵakumnyosya Mlungu, utacikuyaga yakunyalaya ya lisosa lya mtima wawo.”

¹⁹ Ŵandu ŵeleŵa ni ŵakusatandisya yakugaŵanikana sikati ja ŵandu, ŵangali Msimu Ŵaswela m'mitima jawo, soni akusagamba kulondesya ya mcilambo capasi.

²⁰ Nambo jemanja ŵakunonyelwa mkamusyaneje, kuti umi wenu wacikulupi uwe uli mkulilakulila. Mpopeleje ni macili ga Msimu Ŵaswela.

²¹ Mlisunjeje mcinonyelo ca Mlungu pakwembecela umi wangamala,* utacimpa Ambuje ŵetu Yesu Klistu mwa canasa cakwe.

²² Kwa jemanja ŵakayicila mwatendeleje canasa.

²³ Nambo ŵane mwakulupusye pakwajokola kumoto. Ŵane soni mwatendele canasa cewanganyicile ni woga, mŵengane atamose ni yakuwala ya jemanjajo yayili yesakasye ni ulemwa.*

Lipopelo lyakumlumba Mlungu

²⁴ Lumbili, luŵe ni jwalakwe jwampaka apakombole kumsunga kuti kasimlemwa, jwele jutapakombole soni kwapeleka pameso palumbili lwakwe, mli ŵakusangalala soni ŵangali ulemwa.

²⁵ Mlungu, jwele jikape ali Mkulupusyo jwetu kupitila mwa Ambuje ŵetu Yesu Klistu, awe ni lumbili, ukulu, macili, ni ulamusi, kutandila mkanijitande ndaŵi, ni sambano mpaka ndaŵi syosope. Ami.*