Yoweli 3 - Chiyawo Bible

Mlungu tacijilamula mitundu ja ŵandu

¹ AMBUJE akuŵeceta kuti, “Ndaŵi jelejo pitijiciyika, masiku gelego tinjakwesya soni ŵandu ŵa ku Yuda ni ŵa ku Yelusalemu.

² Tinjasonganya pampepe ŵandu ŵa mitundu josope, nipo tinjajigalila ku Ciŵata ca Yehoshafati. Kweleko tinjalamula ligongo lya yele yiŵatendele Aisalaeli, ŵakusagulidwa ŵangu, pakuti ŵapwilingenye ku yilambo yawo yosope, ni kugaŵana cilambo cangu.

³ Ŵagaŵene ŵandu ŵangu pakulondola cisango. Mcanda ŵamcengenye ni jwamkongwe jwa lilama, mwali ni kumcenganya ni finyo, kaneko ŵamwele finyojo.

⁴ “Ana jemanja ŵa ku Taya, ŵa ku Sidoni, ku madela ga Filisitiya mkuti ndende cici? Ana msosileje kuti munjimucile ligongo lya yine yele yinamtendele? Naga pana kandu kakuti mumbucisye, une tinjimwucisya yakutenda yenu mwacitema.

⁵ Jemanja mwajigele silifa* ni golidi* jwangu ni yindu yangu yine ya mtengo wapenani, kwawula nayo ku nyumba ja milungu jine.

⁶ Mwasumisye ŵandu ŵa ku Yuda ni ku Yelusalemu kwa Agiliki,* kuti mjawule nawo kwakutalika ni malile ga cilambo cawo.

⁷ Nambo tinjajimusya kuti atyoce kumalo kwawo kumwasumisye jemanjajo. Kaneko tinjiwucisya yitendo yenu yosope pa mtwe penu.

⁸ Tinjasumisya ŵanace ŵenu ŵacalume ni ŵacakongwe kwa ŵandu ŵa ku Yuda, nipo jemanjajo tacasumisya kwa Aseba, mtundu wa ŵandu ŵakutama kwakutalika ŵala. AMBUJE aŵecete myoyo.

⁹ “Mjenesye pasikati pa ŵandu ŵa mitundu jine josope kuti, ‘Mliŵicile cile kuti mpute ngondo mwaŵilanje asilikali ŵenu ŵamacili. Asilikali wosope ayice pakuŵandika, atande kuputa ngondo.

¹⁰ Msyane majela genu kuti gaŵe mapanga, msyane yikwangwali kuti yiŵe yomba. Atamose kuti ŵangali macili aŵecete kuti, “Limbile mtima!”

¹¹ Mjanguye, myice, jemanja ŵandu ŵa mitundu josope jakusyungulila, ni msongane kweleko. Wawo AMBUJE, atumisye ŵa ngondo ŵawo.’ ”

¹² “Ŵandu ŵa mitundu josope aŵe cile nipo ayice ku Ciŵata ca Yehoshafati. Pakuti kweleko tinjipeleka cilango kwa ŵandu ŵa mitundu josope, ŵakutyocela kumbali syosope.

¹³ Jemanjajo ali ŵakusakala; mwakatile mpela mbeju ndaŵi jakugowola. Myice ni yagowolayo pakuti mwakupondela mpeleya mugumbele, soni lulo sikwasicila, myoyo soni yakulemwa ya mitundu jine ja ŵandu yitupile mnope.”

¹⁴ Makuga ga ŵandu gali m'Ciŵata ca Kulamula. Kweleko ni kuti lisiku lya AMBUJE tiliciyika mwacitema.

¹⁵ Lyuŵa ni mwesi yiŵilile, soni ndondwa silesile kuŵala.

Mlungu tacipeleka upile kwa ŵandu ŵakwe

¹⁶ AMBUJE akubangula kutyocela Kwitumbi lya Siyoni,* maloŵe gakwe gakupikanika mpela kulindima kutyocela ku Yelusalemu, kwinani ni cilambo capasi yikutenganyika. Nambo AMBUJE ni pakutililapo ŵandu ŵakwe ŵelewo ali ŵakwacinjilicisya Aisalaeli.

¹⁷ Myoyo, timcimanyilila kuti une ndili AMBUJE, Mlungu jwenu, jungusatama ku Siyoni, kwitumbi lyangu lyeswela. Yelusalemu taciŵa jwamswela mwakuti acalendo ngasapitamo mpela ŵakusumula.

¹⁸ Pitijiciyika ndaŵi jelejo, matumbi tigacikoposya finyo jwasambano, nipo kumkuli tikucijendelela mkaka; sulo syosope sya ku Yuda tisicigumbala ni mesi. Yiwulika ya mesi tiyicikopokaga ku Nyumba ja AMBUJE ni kwitilila ku Ciŵata ca Akesha.

¹⁹ Nambo Iguputo taciŵa cipululu, nipo Edomu taciŵa masame, ligongo lya ngondo jiŵamenyene ni ŵandu ŵa ku Yuda, ni ligongo lyakusulusya miasi ja ŵandu ŵangalemwa ku cilambo cawo.

^20-21 Nambo ku Yuda ni ku Yelusalemu tikuciŵa ŵandu mpaka kalakala. Tinjiwucisya mbusyo pa miasi ja ŵakuwulajidwawo, Ngasindecelela ulemwa* wa ŵakulemwawo. Une AMBUJE ngusatama Kwitumbi lya Siyoni.