Yoweli 2 - Chiyawo Bible

Sombe mpela cikalamusyo ca Lisiku lya AMBUJE

¹ Mlisye lipenga ku Siyoni.* Mgumile mwakwakalamusya ŵandu petumbi lyangu lyeswela. Mtetemele, jemanja ŵandu ŵa ku Yuda. Lisiku lya AMBUJE likwisa pangakaŵa.

² Tiliciŵa lisiku lyakogoya ni canasa, lisiku lya mawunde ni lya cipi ca bii. Likuga lya asilikali ŵajinji ŵa ngondo ŵamacili ligambile kuti bii mpela cipi ciciwunicile matumbi. Likuga lyamti myiyi nganiliwoneceje ni kala kose, atamose msogolo muno ngasiliwoneka soni.

³ Kusogolo kwawo moto ukwatinisya, kunyuma kwawo malamba ga moto gakoca yindu. Kusogolo kwawo, cilambo caliji mpela mgunda wa Edeni, nambo piŵatyosile, caŵele cipululu! Pangali kandu kalikose kakusigala.

⁴ Uwonece wakwe uli mpela wa mahaci, uwutuce wakwe uli mpela wa mahaci ga ngondo.

⁵ Akusumba penani pa matumbi ni masegwe gamti mpela ga mageleta. Akupikanika mpela malamba ga moto gagakoca manyasi. Jemanjajo akwenda pa msela umo mpela likuga lya ngondo lyamacili lili cile kuja kuputa ngondo.

⁶ Ŵandu ŵa mitundu jine* akusatenda woga naga ŵaweni jemanjajo, mwakuti ngope syawo syawonekaga syakugwa.

⁷ Akusaputa mpela ŵa ngondo. Akukwela mapupa mpela asilikali. Jwalijose akwenda pa msela umo, ngatindana jwine ni mjakwe.

⁸ Ngakututanatutana, jwalijose akwenda mwakongoka. Akupita pasikati pa yida ya ngondo ya amagongo ŵawo, jwalijose ngajimisya jemanjajo.

⁹ Akusawugumbilila msindawo, akukwela penani pa mapupa. Akwinjila m'nyumba akwinjilila pa windo mpela ŵawiyi.

¹⁰ Cilambo capasi cikutenganyika pa ndaŵi jakuŵandicila jemanjajo. Nombe nako kwinani kukutenganyika. Lyuŵa ni ndondwa yikutenda cipi, nombe nasyo ndondwa sikuleka kuŵala.

¹¹ Liloŵe lya AMBUJE likupikanika kusogolo kwa likuga lya ngondo. Likuga lyakwe lya ngondolo lili lyekulungwa mnope. Jwele jwakutenda yele yakulamula AMBUJE ali jwamacili mnope. Lisiku lya AMBUJE lili lyekulungwa ni lyakogoya mnope. Ana ŵani ŵitacipakombola kupilila pa lyele lisikulyo?

Mlungu akwaŵilanga ŵandu kuti awujile

¹² Nambo AMBUJE akuŵeceta kuti, “Atamose sambano jino, mwujile kwa une ni mtima wenu wosope, kulijima yakulya ni kulila mwa canasa.

¹³ Mpapule mitima jenu, ngaŵa yakuwala yenupe basi kulosya canasa cenu.” Mwujile kwa AMBUJE, Mlungu jwenu, pakuti jwalakwejo ali jwa canasa ni jwambone mtima, jwangatumbila mwacitema ni jwa canasa cangacenga. Jwalakwejo ali jwa cile kululuka.

¹⁴ Mwine mwakwe tacisinda mtima ni kuleka, nipo tacitulecela upile. Upilewo tiwuciŵa wa cakupeleka ca yakulya ni yakumwa yakupeleka kwa AMBUJE Mlungu jwenu.

¹⁵ Mgombe lipenga ku Siyoni; mjenesye msyungu wakulijima kulya ni mŵilasye msongano wekulungwa.

¹⁶ Mwasonganye ŵandu pamo, ni kwasalila ŵanduwo kuti aliswejesye. Mwasonganye acakulungwa, mwasonganye ŵanace, ni ŵakonga ŵakwe. Mlamule kuti nombe acimlombela atyoce mcipinda mwawo, ayice.

¹⁷ Ŵakutaga mbopesi, ŵele ŵali ŵakutumicila ŵa AMBUJE, alileje pasikati pa malo gakupelecela mbopesi ni pacilili; aŵeceteje kuti: “Ŵalakwe AMBUJE ŵatendele canasa ŵandu ŵawo. Akakunda kuti ŵane ŵanyosye jemanjaji aciŵecetaga kuti, ‘Ana Mlungu jwawojo ali kwapi?’ ”

Mlungu akukululucila Isalaeli

¹⁸ Kaneko AMBUJE ŵalosisye ungakondwa wawo mu mtima ligongo lya cilambo cakwe mwakuti ŵatendele canasa ŵandu ŵakwe.

¹⁹ AMBUJE ŵajanjile ŵandu ŵakwe kuti, “Tinamtumicisye tiligu, finyo ni mawuta ga olifi* nipo timcijikuta. Ngasingunda soni kuti ŵandu ŵakusa amnyosye.

²⁰ Tinjityosya amagongo ŵa ku mpoto kuti aŵe kwakutalika ni jemanja nipo tinjatopolela ku cilambo cangali mesi soni ku cipululu. Ŵakusogolo tinjatopolela ku Nyasa ja kungopoko lyuŵa, nipo ŵapanyuma tinjatopolela ku Nyasa ja kungapilo lyuŵa Sambano mitembo jawo tijicikoposya liwungo lyakununga. AMBUJE atesile yindu yekulungwa.

²¹ “M'mwe cilambo, mkatenda woga; msengwe nipo msangalale, pakuti AMBUJE asyene atesile yekulungwa.

²² Yinyama ya mwitinji, mkatenda woga, pakuti mopo wa kucipululu ukusipucila, yitela yikusogola yisogosi, nguju ni mipeleya yikuŵeleka mwamacili.

²³ “Jemanja ŵandu ŵa ku Siyoni, msengwe ni kusangalala ligongo lya yele yamtendele AMBUJE Mlungu jwenu. Amsalalile mtima pakumpa ula mwacitema. Ampele ula jejinji, kutyocela pandanda mpaka kumalisya, mpela muyaŵelaga kalakala.

²⁴ Tiligu tacigumbala pa malo gakupwagulila, soni lulo tisicigumbala ni finyo jwasambano, nombe nago mawuta ga olifi tigaciŵa gejinji.

²⁵ Myoyo tinjimwucisya yosope yiyajonanjidwe ni sombe. Unetu ni junatumile likuga lya yitete lila, lilyayice kukulimbana ni jemanja.

²⁶ Timcikola yakulya yejinji, nipo timcililumba lina lya AMBUJE Mlungu jwenu, jwele jwamtendele yakusimonjesya, myoyo ŵandu ŵangu ngasanyosyeka soni.

²⁷ Timcimanyilila kuti une ndili ni Isalaeli, nambo soni kuti une jikape, ngaŵaga jwine, une ndili AMBUJE, Mlungu jwenu. Ŵandu ŵangu ngasiŵanyosya soni.

Yakwika kwa lisiku lya AMBUJE

²⁸ “Pali papite ndaŵi, lisiku tiliciyika pa ndaŵi jele tinjitumisya msimu wangu pa mtundu uliwose wa ŵandu; ŵanace ŵenu ŵacalume ni ŵanace ŵenu ŵacakongwe tacilocesya; ngalamba syenu tisicisagamila sagamisi nipo acacanda ŵenu taciyiwona yindu kupitila m'mesomkulola.

²⁹ Pa masiku gelego tinjitumisya msimu wangu pa ŵakutumicila ŵangu ŵa acalume ni acakongwe.

³⁰ “Tinjilosya yakusimonjesya ayi kwinani ni cilambo capasi: miasi, moto ni lyosi.

³¹ Lyuŵa tiliciŵa cipi, nipo mwesi tiwuciŵa miasi, lisiku lyekulungwa ni lyakogoya lya AMBUJE mkaniliyice.

³² Jwalijose jutacililumba lina lya AMBUJE, tacikulupuka. Mpela mujwaŵecetele jwalakwejo, ‘Tikuciŵa ŵane ŵakulupuka Kwitumbi lya Siyoni ni ku Yelusalemu, nipo mwa ŵakusigalawo tipacisimanikwa ŵane ŵele AMBUJE tacaŵilanga.’ ”