Yoweli 1 - Chiyawo Bible

¹ Une ndili Yoweli mwanace jwa Petuwele. Awu uli utenga uŵaŵecete AMBUJE kupitila mwa une.

Ŵandu akulila ligongo lya sombe sisyajonasile mbeju

² Mpikane jemanja acakulungwakulungwa ni jwalijose jwali mcilambo. Mtejele lipikanilo, ana yindu yamti myiyi pakwete piyatendecekwe mu ndaŵi jenu kapena mu ndaŵi ja acinangolo ŵenu?

³ Mwasalile ŵanace wenu, kuti jemanjajo ŵasalile ŵanace ŵawo, soni ŵanacewo tiŵasalile ŵanace ŵawo.

⁴ Cele cicalesile citete, sombe jalile. Cele cicalesile sombe jekulungwa, sombe jamwana jalile.

⁵ Mjimuce jemanja ŵandu ŵakolelwa, ni mlile. Mlile mwakudandawula jemanja wosope ŵakunonyela finyo, pakuti mipeleya jakuminyila finyo jijonanjidwe.

⁶ Likuga lya sombe liyice mcilambo mwetu, lili lyamacili soni lyangaŵalanjika. Meno gawo gali mpela ga lisimba lyalilume, soni meno gakwe gakutema mnope mpela ga lisimba lyalikongwe.

⁷ Ajonasile mipeleya jangu, soni yitela ya nguju syangu yajonasice. Ajisandwile, ni kutyosya makungwa ni kugajasa, ni kuleka nyambi syakwe sili mbee.

⁸ Mlile mpela mwali jwawete cisaka jwele jwakulila ligongo lya ciwa ca mcanda jwasosileje kumlomba jwalakwejo.

⁹ Yakupeleka ya cakumwa ni yakulya ngayipelecedwa soni ku Nyumba ja AMBUJE. Ŵakutaga mbopesi akulila ligongo lyakuti kwangali yakupeleka ya kwa AMBUJE.

¹⁰ M'migunda mwangali cajila, litaka likulila pakuti tiligu ajonasice, nombe najo mipeleya jijumwile, soni yitela ya mawuta yinyasile.

¹¹ Mjase mtima jemanja anamalima, mlile, jemanja ŵakulima mipeleya, ligongo lyakuti mbeju jakolanjidwa balele* ni tiligu ni yosope ya m'migunda nganiyitenda cenene.

¹² Mipeleya ni nguju yinyasile, yitela yosope ya yisogosi yinyasile nipo yijumwile. Lukondwa losope lwa ŵandu lumasile losope.

¹³ Jemanja ŵakutaga mbopesi ŵimkusatumicila, m'wale yisaka ni kuliputa pa mtima ligongo lya canasa. Mjawule ku Nyumba ja AMBUJE ni mkalile kweleko cilo cosope. Kwangali cakupeleka ca cakulya ni ca cakumwa, yeleyi ngasiyiwoneka soni ku Nyumba ja AMBUJE ŵenu.

¹⁴ Mwalamule ŵandu kuti alijime kulya; nipo mŵilasye msongano wa ulemu. Acakulungwa wosope ŵakutama mcilambomo mwaŵilanje asongane ku Nyumba ja AMBUJE, Mlungu jwenu ni jemanjajo alilile kwa AMBUJE.

¹⁵ Kongwene! Lisiku lyakogoya liŵandicile; lisiku lya AMBUJE, likwisa ni conasiko cakutyocela kwa Mlungu Jwamaciligosope.

¹⁶ Cakulya cetu cikumala uwe tuli mkulola. Mwangali soni lukondwa ni mtendele m'Nyumba ja AMBUJE jwetu.

¹⁷ Mbeju sigamba kunyala, ligongo lyakuti pasi pangali cinyesi. Nyumba syakusunjilamo katundu sijonasice; ngokwe syetu sipaswice, ligongo lyakuti kwangali yakugowola.

¹⁸ Yilangwa yikulila ni sala. Ng'ombe sigamba kulijendela aku naku ligongo lyakuti pangali mkucinga; nombe nasyo ngondolo sikulaga.

¹⁹ Ngulilila kwa ŵalakwe AMBUJE, pakuti moto utinisye mopo wosope wa kwitinji; soni malamba ga moto gatinisye yitela yosope ya mwitinji.

²⁰ Nombe nayo yinyama ya mwitinji yikumlilila jemanja, ligongo tusulo tosope tujumilile soni moto utinisye mopo wosope wa kwitinji.