Yoswa 5 - Chiyawo Bible

¹ Ayimwene wosope ŵa Aamoli kungapilo lyuŵa kwa Lusulo lwa Yolodani ni ayimwene wosope ŵa ku Kenani mungulugulu Nyasa ja Mediteleniyani ŵapikene kuti AMBUJE* ŵajumwisye Yolodani mpaka ŵandu ŵa ku Isalaeli ŵajombwece. Wakamwile woga nipo ŵatengwice myilu ligongo lya Aisalaeli.

Kuwumbala ku Giligala

² Sambano AMBUJE ŵamsalile Yoswa kuti, “Mpanganye yipula ya maganga nipo mwawumbasye soni Aisalaeli ŵa.”

³ Yoswa ŵatesile mpela muŵamlamulile AMBUJE, ni ŵawumbesye Aisalaeli pa malo gakolanjidwa litumbi lyakuwumbacisya.

^4-6 Ŵandu ŵa ku Isalaeli piŵatyokaga ku Iguputo, acalume wosope ŵaliji ali ŵawumbale kala. Nambope, mu ndaŵi ja yaka yakwana makumi mcece yiyapite ŵanduwo piŵajombokaga mcipululu, pangali mwa ŵanace ŵa acalume juŵawumbele. Soni, kumbesi kwa jele ndaŵijo acalume wosope ŵiŵaliji ŵa misingu jakuputa ngondo, piŵatyokaga ku cilambo ca Iguputo ŵawile ligongo nginiŵapikanila AMBUJE. Mpela muŵalumbilile kuti, nginiŵakunda kuciwona cilambo cakusicila ni cacajila, ciŵaŵisile cilanga* kwa acinangolo ŵawo.

⁷ Ŵanace ŵa ŵele acalumeŵa nginawumbala kose, nipo waliji wele mpago wasambanowu uŵawuwumbesye Yoswa.

⁸ Pikwamasile kuwumbasyako, mtundu wosope wene watemi mcigono m'momo mpaka maŵanga gaposile.

⁹ AMBUJE ŵatite kwa Yoswa, “Lelo tinamtyocesye mcesela wakuŵa acikapolo mu Iguputo.” Ni ligongo lyakwe malogo gakolanjidwa Giligala, mpakana lelo jino.

¹⁰ Aisalaeli piŵaliji pa cigono ku Giligala pelambo lyakuŵandikana ni Yeliko, ŵatendaga Pasaka* cilo ca lisiku lya likumi ni mcece lya mwesi.

¹¹ Kundaŵi kwakwe jaliji ndaŵi jandanda jiŵalile yakulya yiŵapandile ku Kenani: songolo sya tiligu syekalanje ni mkate wangali cakusasaŵilisya.

¹² Pa jele ndaŵiji Mana galesile kugwa, ali alile yakulya ya mcilambomo, nipo Aisalaeli nginakola soni gane galigose. Kutandila jele ndaŵijo mpaka msogolo mwakwe ŵalyaga yakulya yakupanda ku Kenani.

Yoswa ni mundu jwa upanga

¹³ Yoswa piŵaŵandicile ku Yeliko, mwakusisimucisya ŵam'weni mundu ali ajimi pasogolo pakwe, ali ajigele upanga. Yoswa ŵajawile kwa jwalakwe ni ŵamwusisye kuti, “Ana m'mwejo mli jumo jwa asilikali ŵetu, kapena m'magongo?”

¹⁴ “Ngaŵa yosopeyo,” mundujo ŵajanjile. “Une ndili apano mpela jwakulamulila asilikali ŵa ngondo ŵa AMBUJE.” Yoswa ŵaligwisisye pasi msyene mwakulinandiya kupeleka ucimbicimbi kwa mundujo nipo ŵatite, “Mbuje gwangu, une ndili jwamasengo jwawo. Ana akusosa kuti une ndende cici?”

¹⁵ Nipo jwakulamulila jwa ŵa ngondo ŵa AMBUJE ŵamsalile kuti, “Ulani sapato syenu; pakuti pimjimipo gali malo geswela.” Nipo Yoswa ŵatesile mpela muŵamsalililemo.