Yoswa 4 - Chiyawo Bible

Akuŵika maganga ga cikumbukumbu

¹ Mtundu wosope wene piŵajombwece Yolodani, AMBUJE* ŵatite kwa Yoswa,

² “Msagule acalume likumi ni ŵaŵili, jumo kutyocela ku mtundu uliwose,

³ ni mwalamule jemanjajo kuti ajigale maganga likumi ni gaŵili kutyocela pa sikati ja Lusulo lwa Yolodani, kusyesyene pa malo piŵajimi ŵakutaga mbopesipo. Mwasalile ŵanduwo anyakule magangago ni akagaŵice kutimkagone cilo cino.”

⁴ Myoyo Yoswa ŵaŵilasile acalume likumi ni ŵaŵili ŵiŵasagwilewo,

⁵ ni ŵasalile kuti, “Mjawule pasikati pa Lusulo lwa Yolodani palili Libokosi lya Cilanga ca AMBUJE Mlungu jwenu. Jwalijose jwa jemanja ajigale liganga pekoyo pakwe, limo lyakwimilila lukosyo lulilose mwa ngosyo sya ku Isalaeli.

⁶ Gele magangaga tigacakumbusya ŵandu yiŵayitesile AMBUJE. Msogolo, pitacimwusya ŵanace ŵenu gopolela kwakwe kwa magangaga,

⁷ timwasalile kuti mesi ga mu Lusulo lwa Yolodani galesile kwenda pilyajombwece lusulo Libokosi lya Cilanga ca AMBUJE. Gele magangaga tigacakumbusya Aisalaeli masiku gosope yiyatendekwe apano.”

⁸ Acalumewo ŵakuyisye yiŵalamwile Yoswayo. AMBUJE piŵamlamwile Yoswa, jemanjajo ŵajigele maganga likumi ni gaŵili kutyocela pasikati pa Lusulo lwa Yolodani, limo lyakwimilila lukosyo lululose mwa ngosyo syosope sya ku Isalaeli, ŵagajigele ulendo nago ku malo ga cigono, ni kuja kugayika pasi kweleko.

⁹ Yoswa nombe najo ŵagaŵisile maganga likumi ni gaŵili gala sikati ja Lusulo lwa Yolodani, pa malo pisyajimi sajo sya ŵakutaga mbopesi ŵiŵanyakwile Libokosi lya Cilanga. (Nipo magangago gali pelepo mpaka lelo jino).

¹⁰ Ŵakutaga mbopesiwo ŵajimi sikati ja Lusulo lwa Yolodani mpaka yatendece yosope yene yiŵalamwile AMBUJE kumsalila Yoswa kuti ŵandu ayitende. Ayi ni yiŵalamwile Mose* kwa Yoswa. Ŵandu ŵajangwiye komboka lusulolo.

¹¹ Piŵamalisisye komboka ŵandu wosope ŵala, ŵakutaga mbopesi ni Libokosi lya Cilanga ca AMBUJE ŵajawile pasogolo pa ŵanduwo.

¹² Acalume ŵa ngosyo sya Lubeni ni Gadi ni hafu ja lukosyo lwa Manase, ŵaliŵicile cile kukuputa ngondo, ŵajombwece ni kuja pasogolo pa ŵandu wosope, mpela yiŵasalile Mose kuti ayitende.

¹³ Ŵapali acalume 40,000 pameso pa AMBUJE ŵiŵaliŵicile cile kuja kukuputa ngondo ŵiŵajombwece ulendo kwilambo lyakuŵandicila ku Yeliko.

¹⁴ Yiŵayitesile AMBUJE lyele lisikulyo yatendesye ŵandu ŵa ku Isalaeli kumtenda Yoswa mundu jwamkulungwa. Ŵamcimbicisye jwalakwe mu umi wakwe wosope mpela muŵampelele ucimbicimbi Mose.

¹⁵ Myoyo AMBUJE ŵamsalile Yoswa

¹⁶ kwalamula ŵakutaga mbopesi ŵakunyakula Libokosi lya Cilanga kuti akopoce mu Lusulo lwa Yolodanimo,

¹⁷ nipo Yoswa ŵatesile myoyo.

¹⁸ Nambo piŵagambile kopoka ŵakutaga mbopesi ŵala sikati ja Lusulo lwa Yolodani ni kunyakula sajo syawo kuliŵata pa mkuli pejumu, mesi ga mu Lusulo lwa Yolodani gawujile ni kutanda kwenda soni mpaka gumbala lisi ni lisi.

¹⁹ Ŵandu ŵajombwece Lusulo lwa Yolodani lisiku lya likumi lya mwesi wandanda ni kutenda cigono ku Giligala, kungopoko lyuŵa kwa Yeliko.

²⁰ Pelepo Yoswa ŵawunjice maganga likumi ni gaŵili giŵagajigele kutyocela mu Lusulo lwa Yolodani.

²¹ Jwalakwe ŵasalile ŵandu ŵa ku Isalaeli kuti, “Msogolo muno, naga ŵanace ŵenu tamwusye gopolela kwakwe kwa magangaga.

²² Jemanja timŵasalile ya ndaŵi jiŵajombwece Aisalaeli Lusulo lwa Yolodani pa malo pejumu.

²³ Timwasalile kuti, AMBUJE Mlungu jwenu ŵamjumucisye mesi ga mu Lusulo lwa Yolodani mpaka mwamalisisye komboka, yalumo mpela muŵatujombocesye uwe Nyasa Jecejewu.*

²⁴ Ligongo lya cele cinduci, jwalijose pa cilambo capasi tacimanyilila mugakulile macili ga AMBUJE, nipo tacacimbicisya AMBUJE Mlungu jwenu mpaka kalakala.”