Yoswa 24 - Chiyawo Bible

Yoswa akuŵeceta ni ŵandu ku Shekemu

¹ Yoswa ŵasisalile ngosyo syosope sya ku Isalaeli kuti sisongane ku msinda wa Shekemu. Piŵayice kweleko, jwalakwe ŵaŵilasile acakulungwa, ŵakulongolela, ŵakulamula, ni acakulungwa wa ngondo ŵa ku Isalaeli kuti ayice ni kwima pameso pa Mlungu.

² Yoswa ŵatite kwa ŵandu wosope, “Ayi ni yakuti AMBUJE,* Mlungu jwa Aisalaeli: ‘Kalakala acinangolo ŵenu ŵatamaga lisi line lya Lusulo lwa Yufuleti ni ŵajilambile milungu jine. Jumo jwa acinangolowo ŵaliji Tela, baba ŵawo Abulahamu,* ni Naholi.

³ Kaneko namjigele Abulahamu, nangolo jwenu, kutyocela ku cele cilamboco namjendesye mcilambo cosope ca Kenani. Napele yisukulu yejinji, soni napele Isaki,

⁴ nipo mwa Isaki napele Yakobo* ni Esawu. Esawu nampele cilambo ca kwitumbi ca Edomu kuŵa cakwe, nambo nangolo jwenu Yakobo nipo ŵanace ŵakwe ŵajesile kutulucila ku Iguputo.

⁵ Panyuma pakwe natumisye Mose* ni Aloni* kuti ŵakamusye acinangolo ŵenu, ni nayicisye yisawusyo yejinji pa cilambo ca Iguputo. Nambo nakopwesye mu Iguputo acinangolo ŵenuwo.

⁶ Ndili nakopwesye acinangolo ŵenu, asilikali ŵa ku Iguputo ŵakuyisye acinangolowo ali akwesile mahaci ni mageleta. Nambo piŵayice pa Nyasa Jecejewu*

⁷ ŵalisile kwa une kuti nakamucisye nipo naŵisile liwunde lya cipi pasikati pa jemanjajo ni Aiguputo. Najitendesye nyasa kuti jisefuce nipo Aiguputo ŵamisilwe ni mesi. Jemanja akumanyilila yinatesile Aiguputo. “ ‘Jemanja ŵatemi mcipululu kwa ndaŵi jelewu,

⁸ nipo namyicisye ku cilambo ca Aamoli, ŵiŵatamaga ku mbali ja kungopoko lyuŵa kwa Yolodani. Jemanjajo ŵamputile, nambo une nampundisye kwa jemanjajo. Jemanja mwajigele cilambo cawo, nipo najonasile pimwajawulaga pasogolo.

⁹ Mwenye jwa Mowabu, Balaki mwanace jwa Sipola, ŵamenyene ni jemanja. Jwalakwe ŵatumisye maloŵe kwa Balamu mwanace jwa Bewoli ni kumŵenda kuti amlwese jemanja.

¹⁰ Nambo une ngamkaningunda kuti Balamu amlwese, m'malo mwakwe namtendesye kuti ampe upile jemanja, nipo mu lyele litalali une namkulupwisye m'magasa mwa Balaki.

¹¹ Jemanja mwajombwece Yolodani ni kwika ku Yeliko. Asilikali ŵa ku Yeliko ŵamenyene ni jemanja, mpela muŵatendele Aamoli, Apelesi, Akenani, Ahiti, Agiligashi, Ahifi, ni Ayebusi. Nambo une namtendesye kuti mwapunde wosopewo.

¹² Pimwajawulaga pasogolo, une natendesye kuti ajogope ni kutetemela pakusosa kuti natoposye ayimwene ŵaŵili ŵa Aamoli. Une napundile jemanjajo m'malo mwenu. Ngaŵaga macili genu kapena kuti yida yenu ni yiyakamwile masengo.

¹³ Une nampele cilambo cimkutamaci cele nganimcikamulila masengo soni misinda jakwe nganimtaŵa jemanja. Mkulya yisogosi ya finyo ni ya olifi* kutyocela ku yitela yiŵapandile ŵandu ŵiŵatamaga mwelemo jemanja mkanimŵice.’ ”

¹⁴ Sambano Yoswa ŵapitilisye kuŵeceta kuti, “Mwape ucimbicimbi AMBUJE ni kwatumicila mwakuwona ni mwakulupicika. Atyosye milungu jiŵajilambilaga acinangolo ŵawo m'Mesopotamiya ni m'Iguputo, ni kwatumicila AMBUJE pewo basi.

¹⁵ Naga ngamkusosa kwatumicila AMBUJE, msagule lelo jino jutimumtumicileje, mwine milungu jiŵajilambilaga acinangolo ŵenu ku Mesopotamiya kapena milungu ja Aamoli, ŵimkutama nawo mcilambo cawo. Nambo kwa une ni liŵasa lyangu, tucatumicila AMBUJE.”

¹⁶ Ŵanduwo ŵajanjile, “Uwe ngaŵa mkuwanicisya kwaleka AMBUJE kuti tujitumicile milungu jine!

¹⁷ AMBUJE Mlungu jwetu ŵakopwesye acinangolo ŵetu pamo ni uwe ŵakwe mu ukapolo mu Iguputo, nipo uwe twayiweni yakumasya lunda yiŵayipanganyisye jwalakwejo. Pitwayikaga akuno, twapitile m'ma upande ga mitundu jejinji ja ŵandu, nambo AMBUJE ŵatukulupwisye uwe ndaŵi syosope.

¹⁸ Pitwajawulaga malo gane ga cilamboco kutyoka pane, Aamoli ŵatamaga mcilambomo jele ndaŵijo, nambo AMBUJE ŵatopwesye wosopewo m'malo mwa uwe. Ni uwe nowe tucatumicila AMBUJE; ŵele pewo ni Mlungu jwetu.”

¹⁹ Yoswa ŵatite kwa ŵandu, “Nambo nganiciŵatu cindu cakoloŵa kwatumicila AMBUJE. Ŵele ali Mlungu jwamswela nipo ngasiŵakululucila ulemwa* wawo. Ngasiŵalecelela ŵali ŵangakulupicika kwa AMBUJE.

²⁰ Naga akwaleka AMBUJE kuti atumicile milungu ja cilendo, tacapitikucila jemanja ni kwapa cilango. AMBUJE tacajonanga jemanja, atamose ŵaliji ŵambone pandanda.”

²¹ Ŵanduwo ŵatite kwa Yoswa, “Ngaŵa! Uwe tucatumicila AMBUJE.”

²² Yoswa ŵasalile jemanjajo kuti, “Jemanja mŵele mboni mwacimsyene kuti msagwile kwatumicila AMBUJE. Ngaŵaya yakuwona yeleyi?” Jemanjajo ŵajanjile kuti, “Elo yili yakuwona, kuti tuli mboni.”

²³ Yoswa ŵatite, “Sambano mtyosye milungu ja cilendo jimkwetejo ni mlumbile kuti timcikulupicika kwa AMBUJE, Mlungu jwa Aisalaeli.”

²⁴ Ŵanduwo ŵatite kwa Yoswa, “Uwe tucatumicila AMBUJE Mlungu jwetu. Tucipikanila malamusi gawo.”

²⁵ Lyele lisikulyo ku Shekemu, Yoswa ŵajimilile ŵandu ŵa ku Isalaeli ni kutenda cilanga* pasikati pa ŵandu ni AMBUJE. Mu cele cilangaci mwaliji mwana malamusi gakuti ŵanduwo agapikanile.

²⁶ Yoswa ŵayilembile yakulamulilayi m'buku ja Malamusi ga Mlungu. Kaneko ŵajigele liganga lyalikulungwa ni kulijimika pasi pa citela ca mtundu pa malo gakusagulidwa ga AMBUJE ku Shekemu.

²⁷ Jwalakwe ŵatite kwa ŵandu wosope, “Ali ligangali tiliciŵa mboni jetu. Lipikene maloŵe gosope gene gaŵecete AMBUJE kwa uwe. Ni tiliciŵa mboni jakwasisya jemanja, myoyo lili pelepa kwakumbusya jemanja kuti mkasimumjimucila Mlungu jwenu.”

²⁸ Kaneko Yoswa ŵakundile ŵandu ŵala kuti ajawuleje nipo wosope ŵawujilile ku mbali ja cilambo cawo.

Kuwa kwa Yoswa

²⁹ Panyuma pakwe, yili yitendekwe yeleyi, jwakutumicila jwa AMBUJE Yoswa mwanace jwa Nuni ŵawile ali jwa yaka 110.

³⁰ Ŵandu ŵa ku Isalaeli ŵamsicile mcilambo cakwe ku Timunati Sela mcilambo ca kwitumbi ca Efelemu kumpoto kwa Litumbi lya Gaashi.

³¹ Pandaŵi jiŵaliji cijumi Yoswa, ŵandu ŵa ku Isalaeli ŵatumicile AMBUJE, nipo panyuma pa ciwa cakwe jemanjajo ŵapitilisye kutenda myoyo ndaŵi josope jiŵaliji umi ŵakulongolela ŵiŵayiweni yosope yiŵatendele AMBUJE Aisalaeli.

³² Mawupa ga Yosefe, giŵayice nago Aisalaeli kutyocela ku Iguputo, ŵagasicile ku Shekemu, mkacilambo kiŵasumile Yakobo kwa ŵanace ŵa Hamoli, baba ŵawo ŵa Shekemu, ni mbiya syakwanila masilifa* 100. Cele cilamboci casandwice ca yisukulu ya Yosefe.

³³ Eliyesa mwanace jwa Aloni piŵawile, Aisalaeli ŵasicile cilu cakwe ku Gibeya, limo lya matumbi ga mcilambo ca kwitumbi ca Efelemu. Lyele litumbili lyaliji lya Eliyesa mwanace jwa Finihasi.